1 Tan natan, agawa a kayari nen Abinadi ya imbalikas so saraya a salita iniunat to so lima to tan inkuan to: Say panaon so onsabi sano amin nanengneng da so panañgilaban na Katawan; sano balang sakey a bansa, sankakanayon, salita, tan totoo mannenengneng ira ed mata tan mata tan ipatua da ed arap na Dios a say panañgokom to so maptek.

2 Tan dia ed ontan saray marelmeng so nibantak ed paway, tan wala so makaseñgeg a sikara so managlem, tan mannañgis, tan manñgoyañgoy, tan panñgalateñgetan da so saray ñgipen da; tan saya so lapu ed ag da indeñgel ed voces na Katawan; dia ed ontan sikara so ag dinundon na Katawan.

3 Lapu ed sikara so makamundo tan makademonyo, tan say demonyo wala so pakapanyari to ed sikara; on angan saman so oleg a sikato so anukso ed saray unaan ya ateng tayo, a sikato so señgeg na inkigapol da; a sikato so señgegan kanian say amin a katooan so nanmaliw a makamundo, maliket ed alak na laman, makademonyo, kabat to so maong ed mauges, a sikara so inoleyan na demonyo.

4 Dia ed onia say amin a katooan so abalang; tan nia, sikara so abalang a magnayon no say Dios ag to dinundon so saray totoo to ed kipapasen da ya abalang tan nigapol.

5 Balet nunoten yo a siopaman ya ipasuot to so dili a minomundo ya inkaugali to, tan mampatuloy ed saray dalan na kasalanan tan onalsa sumpa ed Dios, sikato so mansiansia ed pasen na inkigapol tan say demonyo so awalaan na amin a pakapanyari ed sikato. Kanian dia ed sikato siñga angapo so inkarundon ya agawa, lapu ed sikato so kabusol na Dios; tan say demonyo sikato met so kabusol na Dios.

6 Tan natan no si Cristo so ag sinmabi dia ed mundo, a nansalita ed saray beñgatla ya onsabi a siñga saraya so ayari la a sinmabi, angapo komon so karundon.

7 Tan no si Cristo ag inmoli ed bilay manlapu ed saray inaatey, odino ag to apaksot so balor na patey pian say lubok ag ontaluna, tan pian say patey angapo so otot to, angapo so kioli ed bilay.

8 Balet wala so kioli ed bilay, kanian say lubok angapo ed sikato so taluna, tan say otot na patey naakmon la ed si Cristo.

9 Sikato so silew tan bilay na mundo; on, sakey a silew ya angapo so angaan to, ya ag nayari ya ombiluñget; on, tan ontan met so bilay ya andi-angaan, kanian angapo la so patey.

10 Angan saya ya ompatey a laman isulong to so angapo so kipapatey a laman, tan saya so nabulok a laman so mañgisulong na ag-nabulok a laman, tan naawit ya ontalindeg ed arap na panañgokoman na Dios, pian okomen to unong ed saray kimey da, no sikara so maong odino sikara so mauges—

11 No sikara so maong, paarap ed kioli ed bilay ya andi-angaan tan liket; tan no sikara so mauges, paarap ed kioli ed bilay ya andi-angaan a dusa, tan sikara so niawat ed demonyo, a sikato so añgoley ed sikara, a saya so dusa—

12 Lapu ed sikara so nankurang unong ed saray dili a makamundo a linawa ra tan saray pilalek da; ya ag ira kapiganman tinmawag ed Katawan sanlegan a saray taklay na panañgasi so akaunat ed sikara; lapu ed say taklay na panañgasi so akaonat ed sikara, tan saman so ag da labay a gawaen; angaman sikara so apasakbayan ed saray kaugsan da tan iñgen ag da labay so onsian ed saya; tan sikara so nigangan a mambabawi, tan iñgen sikara so ag nambabawi.

13 Tan natan, ag kasi nepeg yo so ongiwgiw tan mambabawi ed saray kasalanan yo, tan nunoten yo dia labat ed tan panamegley nen Cristo pian nayari a sikayo so nilaban?

14 Dia ed ontan, no ibañgat yo so gangan nen Moises, ibañgat yo met a saya so anino na saray beñgatla ya onsabi—

15 Ibañgat yo ed sikara a say karundon onsabi ed panamegley nen Cristo a Katawan, a sikato so peteg ya Andi-Angaan ya Ama. Amen.