1 Tan agawa a saray ñgayew na ari so pinmawil, lapu ed angapo so asumpalan na impananap da ed saray totoo na Katawan.

2 Tan natan nengneng yo, say ñgayew na ari so daiset, lapu ed sikara so abawasan, tan wala so ginmapo ya inkaapag-apag ed saray nakdaan ed saray totoo.

3 Tan saraman so daiset a kabiañgan ginapoan da ya ibesñgaw so saray pantaktakot sumpa ed ari, tan wala so ginmapo a baleg a baliñgaan ed limog da.

4 Tan natan wala so sakey a too ed limog da a say ñgaran to Gideon, tan lapu ed sikato so mabiskeg a too tan kabusol na ari, dia ed ontan inoyus to so espada to, tan sinambaan to ed sanok to a pateyen to so ari.

5 Tan agawa a nilabanan to so ari; tan sanen say ari anengneng to a sikato so ñgalñgali la natalo, sikato so tinmaynan tan binmatik tan kinmalab ed tori ya asinger ed templo.

6 Tan si Gideon tinumbok to ya inosilan tan ñgalñgali la akasabi ed tori pian pateyen to so ari, tan say ari inwandag to so saray mata to ed kaliber-liber a mamaarap ed dalin na Shemlon, tan anengneng to, saray ñgayew na Lamanite a wala la ra ed loob na ketegan na dalin.

7 Tan natan say ari inmakis ed paniñgel na kamarerua to, a nankuan: Gideon, ag mo ak papateyen, lapu ed saray Lamanite wala la ra ed sikatayo, tan sikatayo so pateyen da; on, pateyen da so saray totook.

8 Tan natan say ari aliwa a baleg so kapagaan to ed saray totoo to a siñga say kapagaan to ed dili a bilay to: angaman ontan, si Gideon ag to inekal so bilay to.

9 Tan say ari ingangan to ed saray totoo a sikara so ombatik ya onarawi ed saray Lamanite, tan sikato a dili so wala ed unaan da, tan sikara so binmatik ed kalawakan, a kaiba ra so saray bibii tan saray anak da.

10 Tan agawa ya inosilan ira na saray Lamanite, tan sikara so nabet da, tan ginapoan da ra a pinapatey.

11 Natan agawa a say ari ingangan to ed amin a lalaki a taynanan da so saray kaasawaan da tan saray anak da, tan ibatikan da so saray Lamanite.

12 Natan wala so dakel ya ag da ra taynanan, balet linabay da ni so ontilak tan ompatey a kaiba da ra. Tan saray arum tinaynanan da so saray kaasawaan tan saray anak da tan binmatik ira.

13 Tan agawa a saraman so tinmilak a kaiba na saray kaasawaan tan saray anak da ingangan da a saraman so magagangana a bibii ya anak da so ontalindeg ya onsabat tan mikasi ed saray Lamanite ya ag da ra pateyen.

14 Tan agawa a saray Lamanite so awalaan na panañgasi ed sikara, lapu ed sikara so naayat ed gangana na saray bibii.

15 Dia ed ontan saray Lamanite ag da ra inekalan na bilay, tan sikara so inala ra a dinakep tan sikara so inala ra ya impawil ed dalin na Nephi, tan iniabuloy da a nayarian da a kayarianen so dalin, ed silong na sakey a getar ya iawat da si ari Noah ed saray lima na saray Lamanite, tan iawat da so saray kayarian da, angan kapaldua ed amin a kayarian da, kapaldua ed saray balitok da, tan pilak da, tan amin ya ankabli a beñgatla, tan dia ed onia sikara so mambayar na buis ed ari na saray Lamanite a tinaon-taon.

16 Tan natan wala so sakey ed saray lalaki ya anak na ari ya adakep, a say ñgaran to Limhi.

17 Tan natan si Limhi pilalek to a si ama to so ag da napatey; manwari ya ontan, si Limhi ag maamot ed sikato so inkauges nen ama to, lapu ed sikato a dili so sakey a too a maptek.

18 Tan agawa a si Gideon so añgibaki a maamot na saray lalaki ed kalawakan, a mananap ed ari tan ontan met ed saray kaolop to. Tan agawa a naabet da so saray totoo diman ed kalawakan, amin likud lambeñgat ed ari tan saray sacerdote to.

19 Natan sinambaan da ed saray puso ra a sikara so ompawil ed dalin na Nephi, tan no saray kaasawaan da tan saray anak da so inaatey la, tan ontan met ed saray tinmitilak ed sikara, sikara so ombales, tan sikara met so mipateyan ed sikara.

20 Tan say ari ingangan to ya ag ira ompawil; tan sikara so nampasnok ed ari, tan ingangan da a sikato so manirap, angan kipapatey ed panamegley na apoy.

21 Tan ñgalñgali da met la awiten so saray sacerdote tan sikara so pateyen da, tan sikara so binmatik a tinmaynan ed arap da.

22 Tan agawa a ñgalñgali la ra ompawil ed dalin na Nephi, tan nabet da so saray totoo nen Gideon. Tan saray totoo nen Gideon imbaga ra so nipaakar ed amin ya agawa ed saray kaasawaan da tan saray anak da; tan saray Lamanite iniabuloy da a kayarianen da so dalin ed panamegley na pambayar na buis ed saray Lamanite na kapaldua ed amin a kayarian da.

23 Tan saray totoo imbaga ra ed saray totoo nen Gideon a pinatey da so ari, tan saray sacerdote to so binmatik a linma ya aragdawi ed kalawakan.

24 Tan agawa a kayari a sinampotan da so impantitipon, amawil la ra ed dalin na Nephi, a napno na gayaga, lapu ed saray kaasawaan da tan saray anak da so ag apatey; tan imbaga ra ed si Gideon so ginawa ra ed ari.

25 Tan agawa a say ari na saray Lamanite so nangawa na sakey a samba ed sikara, a saray totoo to ag da ra pateyen.

26 Tan ontan met nen Limhi, lapu ed sikato so laki ya anak na ari, a sikato so añgiteran na saray totoo na panarian, so nangawa na sakey a samba ed say ari na saray Lamanite a saray totoo to so mambayar na buis ed sikato, angan kapaldua ed amin a kayarian da.

27 Tan agawa a si Limhi ginapoan to ya inletneg so panarian tan inletneg to so kareenan ed limog na saray totoo to.

28 Tan say ari na saray Lamanite so añgipasen na bantay ed kaliber-liber na dalin, pian napansiansia to so saray totoo nen Limhi ed saman a dalin, pian sikara so ag makataynan ya onla ed kalawakan; tan tinaganoan to so saray bantay to ed saray buis ya aawaten to ed saray Nephite.

29 Tan natan si ari Limhi so awalaan na nampatuloy a kareenan ed panarian to ed loob na duara a taon, lapu ed saray Lamanite ag da ra ginulo odino ginetma a pateyen.