1 Tan natan agawa a say panamasegsegang ed simbaan na saray aliwan mananisia so nanmaliw a mapalalo kanian say simbaan ginmapo a manñguroñguro, tan mandalem ed saray pañgulo ra nipaakar ed saya a pamaakaran; tan nandalem ira ed si Alma. Tan si Alma imparungtal to so nagagawa ed ari si ari Mosiah. Tan si Mosiah inkono to ed saray sacerdote to.

2 Tan agawa a si ari Mosiah impaakseb to ed kaliber-liber na saman a dalin a saray ag-manisia ag nepeg a mamasegsegang ed saray miembro na simbaan na Dios.

3 Tan wala so mapeget a gangan ed amin a simbaan a nepeg ya angapo so panamasegsegang ed limog da, tan kaukolan wala so pampapara ed limog na amin a totoo;

4 Tan ag da nepeg ya abuloyan so kinon ni say inkapasang a manderal na kareenan da; a balang sakey a too nepeg a pablien to so kaabay to a siñga sikato, a mansagpot ira ed dili a lima da ya onkana ed pambilay da.

5 On, tan amin a sacerdote ra tan managbañgat da nepeg a sikara so mankimey ed dili a lima da ya onkana ed pambilay da, ed amin a kipapasen likud no dia ed bublay na laman, odino dia ed dakel a pankaukolan; tan dia ed pangawa ra ed saraya a beñgatla, sikara so makagamor na daakan a gracia na Dios.

6 Tan ginmapo a baleg a kareenan lamet ed saman a dalin; tan saray totoo ginmapo ra ya ondakel a mapalalo, tan ginapoan da so onkayat ed tapew na dalin, on, dia ed baybay tan dia ed abalaten, dia ed bokig tan dia ed sagur, a nampapaalagey ira na saray ankakabaleg a ciudad tan bario ed amin a sukong na dalin.

7 Tan say Katawan so dinalaw to ra tan pinaaliguas to ra, tan sikara so nanmaliw a dakel tan mayaman a totoo.

8 Natan saray lalaki ya anak nen Mosiah so nibilang ed limog na saray aliwan mananisia; tan ontan met ed sakey ed saray lalaki ya anak nen Alma so nibilang ed sikara, tan say ñgaran to Alma, ya imboloy da ed si ama to; angaman ontan, sikato so nanmaliw ya alablabas a marelmeng tan too a managlingkor ed saray talintao. Tan sikato so sakey a too a malabir, tan mapasirayew ed pananalita ed saray totoo; dia ed ontan atanguyor to so dakel ed saray totoo a mangawa unong ed kanengneñgan na saray inkauges to.

9 Tan sikato so baleg ya akasebel ed aliguas na simbaan na Dios; ya aayaten to ya onarawi so puso na saray totoo; ya amaseñgeg ed baleg a baliñgaan ed limog na saray totoo; ya añgiter na pankanawnawa ed saray kabusol na Dios a mañgikana na pakapanyari ed sikara.

10 Tan natan agawa a legan so manliber-liber a mandederal ed simbaan na Dios, tan sikato so linma a maamot a kaiba to so saray lalaki ya anak nen Mosiah ya aanapen da so panderal ed simbaan, tan ipapañgulo ra so saray totoo ya onsian ed Katawan, sumpa ed saray gangan na Dios, odino angan say ari—

11 Tan unong la ed inkuan ko ed sikayo, legan da a manliliber-liber ya onaalsa sumpa ed Dios, anengneng da, so sakey ya angel na Katawan a pinmarungtal ed sikara; tan sikato so linmeksab a siñga dia ed lurem; tan sikato so nansalita a siñga tanol na karul, a gapoan na inyegyeg na dalin a pantudtoonan da;

12 Tan agay la so kabaleg na pankelaw da, kanian sikara so niparukol ed dalin, tan ag da atalusan so saray salita ya imbaga to ed sikara.

13 Manwari ya ontan sikato so nansalita lamet, a nankuan: Alma, bañgon ka tan sika so ontalindeg, akin papasegsegañgen mo so simbaan na Dios? Tan say Katawan inkuan to: Saya so Simbaan ko, tan saya so iletneg ko; tan angapo so makapañgitumba ed saya, likud no say señgegan say kasalanan na saray totook.

14 Tan lamet, say angel inkuan to: Nia, say Katawan areñgel to so pikakasi na saray totoo to, tan ontan met ed saray pikakasi na igagangan to, a si Alma, a sikato so amam; lapu ed sikato so nampikasi ed baleg a pananisia nipaakar ed sika pian sika so naawit ed pikakabat na katuaan; dia ed ontan, lapu ed saya a gagala siak so linma dia pian napanisia taka ed pakapanyari tan pakaoley na Dios, pian say pikakasi na saray igagangan to so naebatan unong ed pananisia ra.

15 Tan natan nia, nayarian yo kasi a supiaten so pakapanyari na Dios? Tan nia, ag kasi say voces ko niyegyeg to so dalin? Tan ag yo ak kasi met nanenengneng ed arap yo? Tan siak so imbaki a nanlapu ed Dios.

16 Natan ikuan ed sika: Onla ka, tan nunot mo so inkadakep na saray ama yo ed dalin na Helam, tan dia ed dalin na Nephi; tan nunot yo no panon so kabaleg na saray beñgatla a ginawa to ed sikara; tan sikara so wala ed inkaaripen, tan sikara so inlaban to. Tan natan ikuan ko ed sika, Alma, onla ka la ed dalan mo, tan ag mo la panseseetan a deralen so simbaan, pian saray pikakasi ra so naebatan, tan angan no kaliktan mo a sika so nibantak.

17 Tan natan agawa a saraya so kaunoran a salita ya imbesñgaw na angel ed si Alma, tan sikato so tinmaynan la.

18 Tan natan si Alma tan saraman so kaiba to niparukol ira lamet ed dalin, tan agay la so kabaleg na pankelaw da; lapu ed dia ed saray dili a mata ra akanengneng ira na sakey ya angel na Katawan; tan say voces to siñga karul, a niyegyeg to so dalin; tan kabat da ya angapo so antokaman a beñgatla likud ed say pakapanyari na Dios so nayari a makayegyeg ed dalin tan pagiwgiwen to a siñga saya a nabuyak.

19 Tan natan say pankelaw nen Alma so mapalalo a baleg kanian sikato so nanmaliw ya emel, ya ag to nabiswat so sañgi to; on, tan sikato so kinmapoy, ya angan ag to nigalaw so saray lima to; dia ed ontan sikato so inala na saraman so kaiba to, tan inawit da ya ag makakolapay, ya anga ed impañgigaton da ed arap nen ama to.

20 Tan insalaysay da ed si ama to so amin ya agawa ed sikara; tan si ama to so manliket, lapu ed kabat to a saman so pakapanyari na Dios.

21 Tan ingangan to a saray karaklan so natipon pian tasian da so ginawa na Katawan ed say anak to, tan ontan met ed saray kaolop to.

22 Tan ingangan to a saray sacerdote so mantitipon; tan ginapoan da so manayuno, tan mampikasi ed Katawan a Dios da pian lukasan to so sañgi nen Alma, pian makapansalita, tan ontan met ed saray sali tan taklay to ya awaten da so biskeg da—pian saray mata na saray totoo so nalukasan tan nakabatan da so kaabigan tan gloria na Dios.

23 Tan agawa a kayari a nanayuno tan nampikasi ed loob na duara ya agew tan duara a labi, saray sali tan taklay nen Alma naawat da so biskeg da, tan sikato so tinmalindeg tan ginapoan to so mansalita ed sikara, a babagaan to ra a manliket:

24 Tan, inkuan to, siak so nambabawi la ed saray kasalanan ko, tan siak la so dinundon na Katawan; nengneng yo siak so nianak ed Espiritu.

25 Tan say Katawan inkuan to ed siak: Ag mo pankelawan ya amin a katooan, on, lalaki tan bibii, amin a bansa, sankakanayon, salita tan totoo, so nakaukolan a nianak lamet; on, nianak ed Dios, a nauman manlapu ed minomundo tan nigapol ed kipapasen da, a paarap ed sakey a kipapasen na inkamatunong, lapu ed sikara so dinundon na Dios, pian manmaliw ira ya anak to a lalaki tan bibii;

26 Tan dia ed onia sikara so manmaliw a balo a pinalsa; tan likud no gawaen da so saya, ag da natawir so panarian na Dios.

27 Ikuan ko ed sikayo, likud ed saya a pamaakaran, sikara so nakaukolan a nibantak; tan saya so amtak, lapu ed siak so ñgalñgali la nibantak.

28 Angaman ontan, kayari na impanyakyak ko ed dakel a subok, a nambabawi ak ya asinger la ed patey, say Katawan ed panañgasi to anengneng to a manepeg ak a singkaten to manlapu ed andi-angaan a kapoolan, tan siak so nianak ed Dios.

29 Say kamareruak so adundon ed kapaitan tan balor na inkauges. Wala ak nen saman ed sankabiluñgetan a kaaraleman; balet natan anengneng ko la so makapakelaw a liwawa na Dios. Say kamareruak so atagentagen ed andi-angaan a kairapan; balet siak so siningkat to, tan say kamareruak ag la manlilikna na sakit.

30 Ag ko inawat so Mananundon ko, tan imbeneg ko so saray sinalita na kaamaan tayo; balet natan pian napatipat da a sikato so onsabi, tan nanunotan to so balang sakey a pinalsa a ginawa to, gawaen to a sikato so ompanengneng ed amin.

31 On, balang pueg so ontalimukor, tan amin a dila so mampatua ed arap to. On, angan dia ed kaunoran ya agew, sano amin a totoo so onalagey pian okomen to, dia ed ontan ipatua ra a sikato so Dios; sirin ipatua ra, saraman so nambilay ya angapo so Dios da ed saya a mundo, a say tutol ya andi-angaan a dusa so manepeg ed sikara; tan sikara so ongiwgiw, tan ompayegpeg, tan onkebet ira ed silong na pasikiap na mata to a makasukait ed amin.

32 Tan natan agawa a si Alma ingapo to nanlapu ed saya a panaon so mambañgat ed saray totoo, tan ontan met saraman so kaolop nen Alma sanen say angel so pinmanengneng ed sikara, a nanakar ed kaliber-liber na amin a dalin, ya impapakabat da ed amin a totoo so saray beñgatla a nadñgel tan anengneng da, tan ipopulong da so salita na Dios ed dakel a pakasobsubok, lapu ed sikato so pinasegsegang a mapalalo na saray ag-manisia, lapu ed sikato so binakbak na dakel ed sikara.

33 Balet manwari ya onia so amin, sikara so añgipasabi na dakel a ligliwa ed simbaan, ed panamegley na impamaneknek da ed saray pananisia ra, tan impikasi ra ed sikara so andukey a panagtepel tan dakel a kairapan ed pañgonor na saray gangan na Dios.

34 Tan apatira ed saraya so lalaki ya anak nen Mosiah; tan say kañgaranan da so Ammon, tan Aaron, tan Omner, tan Himni; saraya so kañgaranan na saray lalaki ya anak nen Mosiah.

35 Tan sikara so nambaroy ed amin na dalin na Zarahemla, tan ed limog na amin a totoo a wala ed silong na pakaoley nen ari Mosiah, a siseseet a nampilalek ira ed pañgapiger da ed amin a pasakit a ginawa ra ed simbaan, ya impatua ra so amin a kasalanan da, tan imparungtal da so amin a beñgatla ya anengneng da, tan impaliwawa ra so saray profesiya tan say masanto a kasulatan ed amin a mampilalek ya ondeñgel ed sikara.

36 Tan dia ed onia sikara so inagamil ed lima na Dios ed pañgipawil na dakel ed pikakabat na katuaan, on, say pikakabat ed Mananundon da.

37 Tan agay la so palar da! Tan sikara so añgikayat na kareenan; sikara so añgipakabat na maong a balita ed maabig; tan imparungtal da ed saray totoo a say Katawan so mañguoley.