1 Tan natan, agawa a si Alma, so binmatik nanlapu ed saray igagangan nen ari Noah, so nambabawi ed saray kasalanan tan kaugsan to, tan linma a nambokbukor ed limog na saray totoo, tan ginapoan to ya ibañgat so saray salita nen Abinadi—

2 On, nipaakar ed saman so onsabi, tan ontan met nipaakar ed kioli ed bilay na saray inaatey, tan say karundon na saray totoo, a saya so nagawa ed panamegley na pakapanyari, tan panirap, tan ipatey nen Cristo, tan say kioli to ed bilay tan say itokutok to ed tawen.

3 Tan no kaonoñgan so kinarakel na saray dinmeñgel ed salita to sikara so binañgatan to. Tan sikara so binañgatan to ed kabukoran, pian ag makasabi ed pikakabat na ari. Tan dakel so anisia ed saray salita to.

4 Tan agawa a no kaonoñgan kinarakel na saray anisia ed sikato so linma ed pasen a tatawagen na Mormon, a saya a pasen so inñgaran na ari, lapu ed saya so wala ed ketegan na dalin a dia ed panapanaon, saya so ayaman, na saray atap a monanakap.

5 Natan, dia ed Mormon wala so sakey a subol na malinew a danum, tan dia ed saya so nanayaman nen Alma, lapu ed asinger ed danum wala so kasamekan a tinuboan na saray ankekelag a kakiewan, a diman so panaamotan to ed agew manlapu ed panaanap na ari.

6 Tan agawa a no kaonoñgan so karakel na saray anisia ed sikato diman ira linma ya ondeñgel ed saray salita to.

7 Tan agawa a kayari na dakel ya agew wala la so maong a bilang na nantitipon ed saman a pasen na Mormon, pian ondeñgel ed saray salita nen Alma. On, amin a nantitipon so anisia ed saray salita to, pian ondeñgel ed sikato. Tan sikara so binañgatan to, tan impulong to ed sikara so pambabawi, tan karundon, tan pananisia ed Katawan.

8 Tan agawa ya inkuan to ed sikara: Nia, wala dia so saray danum na Mormon (tan onia so impantawag da) tan natan, lapu ed pilalek yo so onloob ed say olopan na Dios, tan sikayo so natawag a totoo to, tan siaabubon kayo a manakbat ed ambelat a saksakbaten na sakey tan sakey, pian saraya so onlemew;

9 On, tan maabuloy kayo a miermen ed saraman so maermen; on, tan ligliwaen yo so saray mankaukolan na ligliwa, tan ontalindeg kayo a tasi ed Dios ed amin a panaon tan ed amin a beñgatla, tan angan inerman a pasen a kawalaan yo, angan dia ed patey, pian sikayo so dundonen na Dios, tan nibilang kayo ed saray wala ed unaan a onoli ed bilay, pian nawalaan kayo na andi-angaan a bilay—

10 Natan ikuan ko ed sikayo, no saya so pilalek na saray puso yo, anto so wala ed sikayo a sumpa ed pakabiniagan yo ed ñgaran na Katawan, a sakey a tasi ed arap to a linmoob kayo ed sakey a paknaan ed sikato, a sikato so panlingkoran yo tan onoren yo so saray gangan to, pian ikalbo to so Espiritu to a daakan ed sikayo?

11 Tan natan sanen saray totoo nadñgel da so saraya a salita, intipak da so saray lima ra lapu ed gayaga, tan imbelyaw da: Saya so pirawat na saray puso mi.

12 Tan natan agawa a si Alma inala to si Helam, lapu ed sikato so sakey ed saray unaan, tan linma ra tan inmalagey ira ed danum, tan nampikasi, a nankuan: O Katawan, iter mo pa so Espiritum ed igagangan mo, pian gawaen to so saya a kimey ed masanto a puso.

13 Tan sanen nibaga to so saraya a salita, say Espiritu na Katawan so linma ed sikato, tan inkuan to: Helam, biniagan taka, lapu ed awalaan ak na pakaoley a nanlapu ed Dios a Makapanyari ed Amin, ya onkana ed sakey a paneknek a sika so linmoob ed sakey a paknaan a manlingkor ed sikato ya anga ed sika so ompatey unong ed ipatey na laman; tan say Espiritu na Katawan so niiter ed sika; tan iter to ed sika so andi-angaan a bilay, ed panamegley na pananundon nen Cristo, a sikato so imparaan to a nanlapu la ed inletneg na mundo.

14 Tan kayari ya imbaga nen Alma so saraya a salita, mandapag a si Alma tan si Helam so linmegep ed danum; tan sikara so linmimwas tan sinmakbit ira ed danum a sigagayaga, lapu ed napno ra na Espiritu.

15 Tan lamet, si Alma so añgala na sananey ni, tan linma a pidua ed danum, tan sikato so bininiagan to a siñga unong ed inmuna, balet ag to la impalgep so laman to lamet ed danum.

16 Tan unong ed saya a kanengneñgan bininiagan to so balang sakey a linma ed pasen na Mormon; tan wala so bilang da a duara a lasus tan apatira a kamarerua; on, tan sikara so abiniagan ed danum na Mormon, tan sikara so napno na gracia na Dios.

17 Tan sikara so atawag a simbaan na Dios, odino say simbaan nen Cristo, nanlapu ed saman a panaon. Tan agawa a siopaman ya abiniagan ed pakapanyari tan pakaoley na Dios so niarum ed simbaan to.

18 Tan agawa a si Alma, lapu ed walaan na pakaoley a nanlapu ed Dios, sikato so nanordin na saray sacerdote; angan sakey a sacerdote ed dagup na tungal limamplo a bilang so inordinan to a mampulong ed sikara, tan pian mañgibañgat ed sikara nipaakar ed saray beñgatla a nipaakar ed panarian na Dios.

19 Tan ingangan to ed sikara ya angapo so arum ya ibañgat da likud labat ed saray beñgatla ya imbañgat to, tan sinalita na sañgi na saray masanto a profeta.

20 On, angan sikara so ingangan to ya angapo so arum ya ipulong da likud ed pambabawi tan pananisia ed Katawan, a sikato so anundon ed saray totoo to.

21 Tan sikara so ingangan to a nepeg angapo so baliñgaan ed sakey tan sakey, balet sikara so mantalaran ed sakey a mata ya awalaan na sakey a pananisia tan sakey a biniag, a saray puso ra so alaga ed pankakasakey tan aro na sakey tan sakey.

22 Tan dia ed onia sikara so ingangan to a mampulong. Tan dia ed onia nanmaliw ira ya anak na Dios.

23 Tan sikara so ingangan to a nepeg da ya onoren so agew na ñgilin, tan saya so pasantosen da, tan ontan met dia ed inagew-agew mañgiter ira na pisasalamat ed Katawan a Dios da.

24 Tan ingangan to met ed sikara a saray sacerdote ya inordinan to so nepeg a mankimey ed saray dili a lima ra ya onkana ed pambilay da.

25 Tan wala so sakey ya agew ed loob na sakey simba a nibiig pian sikara so mantitipon a mambañgat ed saray totoo, tan igalang da so Katawan a Dios da, tan ontan met, unong a wala ed loob na pakayari ra, sikara so mantitipon.

26 Tan saray sacerdote ag da inilalo ed saray totoo so pambilay da; balet dia ed pankimey da sikara so makaawat na gracia na Dios, pian sikara so ombiskeg ed Espiritu, lapu ed wala ed sikara so pikakabat ed Dios, pian makapambañgat ira ed pakapanyari tan pakaoley a manlapu ed Dios.

27 Tan lamet si Alma ingangan to a saray totoo ed simbaan so mañgiapag ira ed saray tagano da, balang sakey unong ed wala ed sikato; no sikato so awalaan na malaglaem nepeg a sikato so mañgiter met na malaglaem; tan dia ed saman so daiset so wala ed sikato, daiset met so kaukolan; tan siopaman na angapo niiter ed sikara.

28 Tan dia ed onia sikara so nepeg a mañgiter ed saray tagano ra ed mabulos a linawa tan maong a pilalek ed Dios, tan dia ed saraman so sacerdote a wala ed sikara so pankaukolan, on, tan balang sakey a mankakaukolan, lakseb a kamarerua.

29 Tan saya so inkuan to ed sikara, lapu ed ingangan na Dios; tan sikara so nankurang a maptek ed arap na Dios, ya añgiapag ed balang sakey mandapag dia ed inkalaman tan inkaespiritu unong ed saray pankaukolan da.

30 Tan natan agawa so saya ya amin diman ed Mormon, on, ed asinger na saray danum na Mormon, dia ed katakelan ya asinger ed saray danum na Mormon; on, diman ed pasen na Mormon, saray danum na Mormon, saray katakelan ed Mormon, agay la so karakepan na saraya ed mata na saray linma diman ya akapikabkabat ed Mananundon da; on, tan agay la so inkapalar da, tan sikara so nancancion na pandayew ed sikato ed ando la ya ando.

31 Tan saraya a beñgatla so agawa ed ketegan na dalin, pian ag onsabi ed pikakabat na ari.

32 Balet nia, agawa a say ari, lapu ed asukayan to so sakey a pankusokuso ed limog na saray totoo, imbaki to so saray igagangan to a mansiim ed sikara. Kanian dia ed saman ya agew ya impandaragup da pian ondeñgel ed salita na Katawan sikara so asukayan na ari.

33 Tan natan say ari inkuan to a si Alma so mansosugsog ed saray totoo pian onalsa ra sumpa ed sikato; dia ed ontan imbaki to so ñgayew to a manderal ed sikara.

34 Tan agawa a si Alma tan saray totoo na Katawan so apasakbayan ed isabi na saray ñgayew na ari; dia ed ontan inala ra so saray abong-abong da ya abel tan saray boleg da tan sinmipot ira ya amaarap ed kalawakan.

35 Tan wala so karakel na bilang da ya apat a lasus tan limamplo a kamarerua.