1 Siak, Zeniff, lapu ed siak so nibañgat ed salita na saray Nephite, tan lapu ed awalaan na pikakabat nipaakar ed dalin na Nephi, odino say dalin ya unaan a tawir na kaamaan mi, tan lapu ed siak so nibaki a mansiim ed limog na saray Lamanite pian nasiim ko so saray ñgayew da, pian saray ñgayew mi so onla a manderal ed sikara—balet sanen naimatonan ko so kaabigan a wala ed limog da nampilalek ak a sikara so ag la deralen.

2 Dia ed ontan, akibaliñgaan ak ed saray kaagian ko ed loob na kalawakan, tan say labay ko say manañgoley mi so migawaan na paknaan ed sikara; balet lapu ed sikato so sakey a too a mapasnok tan napgaan na dala ingangan to a siak so pateyen; balet siak so nilaban ed panamegley na interter na dakel a dala; lapu ed say sakey ya ama linmaban sumpa ed sakey ya ama, tan say agi sumpa ed agi, anga ed say babaleg a bilang ed saray ñgayew mi so aderal ed loob na kalawakan; tan sikami so pinmawil, sikami a nakdaan, ed dalin na Zarahemla, a manungtong na inkagawa ed saray kaasawaan da tan anak da.

3 Tan siansia ni, lapu ed wala ed siak so ag-nasabsabaan a pampilalek a manawir ed dalin na kaamaan mi, tinipon ko no panon kinarakel na saraman so mampilalek ya ontakdang a mankayarian ed dalin, tan sinmipot kami lamet a nambaroy ed kalawakan ya onla ed saman a dalin; balet sikami so abakbak na eras tan ansakit a liknaan; lapu ed matantan kami a makanunot ed Katawan a Dios mi.

4 Angaman ontan, kayari dakel ya agew na impanakar-akar mi ed kalawakan impaalagey mi so saray abong-abong mi ya abel ed saman so pasen ya inateyan na saray kaagian mi, a saya so asinger ed dalin na kaamaan mi.

5 Tan agawa a linma ak lamet kaibak so apatira ed saray totook ed ciudad, angan dia ed ari, pian kabaten ko no anto so kanunotan na ari, tan pian nakabatan ko no nayari ya onla ak kaibak so saray totook tan kayarianen so dalin ed kareenan.

6 Tan linma ak a nilooban ko so ari, tan sikato so akipaknaan ed siak a nayarian mi a kayarianen so dalin na Lehi-Nephi, tan say dalin na Shilom.

7 Tan ingangan to met ed saray totoo to ya ontaynan ed saman a dalin, tan siak tan saray totook so linma ed saman a dalin pian kayarianen mi.

8 Tan ginapoan mi so mampaalagey na saray paalagey, tan manapiger ed saray padir na ciudad, on, angan saray padir na ciudad na Lehi-Nephi, tan say ciudad na Shilom.

9 Tan ginapoan mi so mandalos ed dalin, on, ed angan nambabañgil a bokel, saray bokel na mais, tan trigo, tan bokakew, tan neas tan sheum, tan saray bokel na amin a nengneng na buñga; tan ginmapo kami ya ondakel tan onaliguas ed dalin.

10 Natan saya so kasiliban tan mauges a kanunotan nen ari Laman, say pañgawit to ed inkaaripen ed saray totook, kanian impalugar to so dalin pian kayarianen mi.

11 Dia ed ontan agawa, a kayari na impanayam mi ed saman a dalin ed loob na labindua a taon si ari Laman ginmapo ya inmaburido, ag la piga dia ed antokaman a pamaakaran saray totook so ombiskeg ed dalin, tan ag da la ra nayarian a taloen tan awiten da ra ed inkaaripen.

12 Natan sikara so mañgiñgiras tan sikara so totoo a managlingkor ed saray talintao; kanian pilalek da kami ya awiten ed inkaaripen, pian sikara so mampataba ed saray sagpot na lima mi; on, pian sikara so manliket ed saray ayayep mi ed kaalugan.

13 Dia ed ontan agawa a si ari Laman ginapoan to a pagalawen so saray totoo to a mibaliñgaan ed saray totook; kanian ginmapo so saray bakal tan baliñgaan ed saya a dalin.

14 Tan agawa, dia ed komalabintalo a taon na oley ko ed dalin na Nephi, diman ed pasen ya abalaten ed dalin na Shilom, sanen saray totook so mamapainom tan mamapakan na saray ayayep da, tan bobokalkalen da so saray dalin da, sakey a baleg ya olop na saray Lamanite so linma ed sikara tan ginapoan da ra a pateyen, tan imbatik da so saray ayayep da, tan saray mais na kaalugan da.

15 On, tan agawa a sikara so binmatik, amin na saray ag da naabot, angan dia ed ciudad nen Nephi, tan sikara so tinmawag ed siak na panañgiagel.

16 Tan agawa ya inayuraan ko ra ed panamegley na pabekang, tan pana, espada, tan panagtastas, tan pekpek, tan palsot, tan amin a nengneng na kagawaan ed pibabakal a nayarian mi a pawalaen, tan siak tan saray totook so linma ya akilaban sumpa ed saray Lamanite.

17 On, dia ed biskeg na Katawan sikami so linma ya akilaban sumpa ed saray Lamanite; lapu ed siak tan saray totook so nannañgis a mapalalo ed Katawan ya ilaban to kami ed lima na saray kabusol mi, lapu ed aliing kami ed pakanunot ed inkilaban na kaamaan mi.

18 Tan say Dios nadñgel to so saray nañgis mi tan inebatan to so saray pikakasi mi; tan sikami so linma ed silong na biskeg to; on, linma kami sumpa ed saray Lamanite, tan dia ed loob na sanagew tan sanlabi akapatey kami na talora a libo apataplo tan talo; sikara so pinapatey mi anga ed sikara so asunson mi ed paway na dalin mi.

19 Tan siak, a dili, dia ed dili a limak, tinmulong ak ya añgikutkot ed saray inaatey da. Tan nia, dia ed baleg ya ermen tan sinagem, duara a lasus tan pitumplo tan siam ed saray kaagian mi so apatey.