Say Libro nen Mosiah

1 Tan natan angapo la so baliñgaan ed amin a dalin na Zarahemla, ed limog na saray totoo nen ari Benjamin, kanian si ari Benjamin awalaan na toltuloy a kareenan legan na saray akeraan ni ya agew to.

2 Tan agawa a sikato so awalaan na talora a lalaki ya anak; tan tinawag to so ñgaran da a Mosiah, tan Helorum, tan Helaman. Tan ginawa to so polaing pian sikara so nabañgatan ed amin a salita na saray kaamaan to, pian sikara so manmaliw a totoo a walaan na pakatalus; tan pian nakabatan da so nipaakar ed saray profesiya a saraya so sinalita na saray sañgi na kaamaan da, a saraya so niawat ed panamegley na lima na Katawan.

3 Tan imbañgat to met ed sikara so nipaakar ed saray kasulatan a nitatak ed saray piligo a gansa, a nankuan: Anak ko, pirawat ko a nunoten yo no ag lapu ed saraya a piligo, a kawalaan na saraya a kasulatan tan saraya a gangan, sikatayo so nantepel ed kakulañgan na kakabatan, angan dia ed saya a panaon, ya ag tayo akabatan so saray misterio na Dios.

4 Lapu ed ag sarag na ama tayo, si Lehi, a nanunotan to ya amin so saraya a beñgatla, a nibañgat to so saraya ed saray anak to, likud no dia ed tulong na saraya a piligo; lapu ed sikato so nibañgat ed salita na saray Egipto kanian nayarian to a basaen so saraya so nitatak, tan nibañgat to ed saray anak to, pian saraya so nibañgat da met ed saray anak da, tan dia ed onia nasumpal so saray gangan na Dios, angan dia ed saya a panaon.

5 Ikuan ko ed sikayo, anak ko, no ag lapu ed saraya a beñgatla, saraya a nisinop tan niagel ed kaderal ed panamegley na lima na Dios, pian nabasa tayo tan natalusan so saray misterio to, tan saray gangan to so wala ed arap na mata tayo a naynay, angan saray kaamaan tayo so nayari a linmasay met ira ed ag-pananisia, tan sikatayo met so nanmaliw a siñga kaagian tayo, a saray Lamanite, ya angapo so pikakabat da ed saraya a beñgatla, odino ag da angan sisiaen sano saraya so nibañgat ed sikara, lapu ed saray ugali a tawir na kaamaan da, a saraya so aliwa a duga.

6 O anak ko a lalaki, pirawat ko a nunoten yo a saraya a salita so tua, tan ontan met saraya a kasulatan so tua. Tan nengneng yo, saray piligo nen Nephi met, a saraya so kawalaan na saray kasulatan tan salita na kaamaan tayo nanlapu ed panaon ya intaynan da ed Jerusalem ya anga ed natan, tan saraya so tua; tan nakabatan tayo so petepeteg lapu ed saraya so wala ed arap na saray mata tayo.

7 Tan natan, anak ko a lalaki, pirawat ko a nunoten yo a panseetan a sukaiten so saraya, pian sikayo so makagungona ed saraya; tan pirawat ko ya onoren yo so saray gangan na Dios, pian sikayo so onaliguas ed saya a dalin unong ed saray sipan a ginawa na Katawan ed kaamaan tayo.

8 Tan dakel ni a beñgatla so imbañgat nen ari Benjamin ed saray lalaki ya anak to, ya ag la nisulat ed saya a libro.

9 Tan agawa a kayari a sinampotan nen ari Benjamin so pambabañgat to ed saray anak to, sikato so tinmakken, tan anengneng to ya ag la mambayag sikato so onla la ed amin a dalan na saya a dalin; dia ed onia, anunotan to a nakaukolan a iawat to so panarian ed sakey ed saray lalaki ya anak to.

10 Dia ed ontan, impaawit to si Mosiah ed arap to; tan saraya so salita ya imbaga to ed sikato, a nankuan: Anak ko a laki, labay ko a mangawa ka na sakey a pakabat ed amin a sakop na saya a dalin ed limog na saya a totoo, odino dia ed saray totoo na Zarahemla, tan saray totoo nen Mosiah a manaayam ed saya a dalin, tan sikara so mantitipon; tan dia ed kaimbuasan ipakabat ko ed saray totook manlapu ed sañgik a dili a sika so ari tan manañgoley ed saya a totoo, a pinili na Katawan a Dios tayo ya initer ed sikatayo.

11 Tan kaaruman to nia, ñgaranan ko so saya a totoo, pian sikara so nibiig ed tapew na amin a totoo ya inawit na Katawan a Dios a pinmaway ed dalin na Jerusalem; tan saya so gawaen ko lapu ed sikara so totoo a maseet a manumpal ed saray gangan na Katawan.

12 Tan iter ko ed sikara so sakey a ñgaran a kapiganman ag nabural, likud no panagkasalanan so makaseñgeg.

13 On, tan nagkalalo ni ikuan ko ed sikayo, no saya a totoo a pinalaboan a maong na Katawan so napelag ed panagkasalanan, tan manmaliw a marelmeng tan mikakaloguran a totoo, say Katawan so ikbanan to ra, lapu ed saya sikara so onkapoy a siñga saray kaagian da; tan sikara so ag to la iagel ed panamegley na angapo so makapipareng tan makapakelaw a pakapanyari to, a siñga unong ed impañgiagel to ed kaamaan tayo.

14 Lapu ed ikuan ko ed sikayo, no ag to iniunat so taklay to pian iagel to so kaamaan tayo sikara so napelag ed lima na saray Lamanite, tan apairap ira ed pasnok da.

15 Tan agawa a kayari a sinampotan nen ari Benjamin so saraya a balikas to ed say anak to a laki, iniawat to ed sikato so pakaoley ed amin a pamaakaran ed panarian.

16 Tan arum ni, initer to met ed sikato so pakaoley ed saray kasulatan a nitatak ed piligo a gansa; tan ontan met ed say piligo nen Nephi; tan ontan met, say espada nen Laban, tan say bola odino say manañgiwanwan, a saya so añgitunton ed kaamaan tayo ed kalawakan, a saya so imparaan na lima na Katawan pian dia ed ontan sikara so niwanwan, balang sakey unong ed ideñgel tan seet ya initer da ed sikato.

17 Dia ed saman, no sikara so aliwa a matuor sikara so ag inmaliguas ni say akapampatuloy ira ed baroy da, balet sikara so asunson a papawil, tan nagawa so aliwan kaliktan na Dios ed sikara, tan dia ed saman sikara so abakbak na eras tan manotot a sulit, pian sikara so natenyeg a makanunot ed saray susumpalen da.

18 Tan natan, agawa a si Mosiah so linma tan sinumpal to so saray ingangan nen ama to ed sikato, tan impakabat to ed amin a totoo a wala ed dalin na Zarahemla pian mantitipon ira, ya ondago ed templo pian ondeñgel ed saray salita ya ibalikas nen ama to ed sikara.