1 Tan natan, agawa sanen si ari Benjamin asumpal to la ya imbaga so saray salita ya initer ed sikato na angel na Katawan, inwandag to so saray mata to ed saray karaklan, tan nia sikara so akadakmumo ed dalin, lapu ed say takot ed Katawan so sinmabi ed sikara.

2 Tan anengneng da so inkasikara ed kipapasen da a minomundo, angan abeba ni nen say sapok na dalin. Tan sikara ya amin so inmakis na maksil ed saksakey a voces, a nankuan: O mañgiter kayo na panañgasi, tan ikana yo pa so dala na bagat nen Cristo a pamaandi na kasalanan pian sikami so makaawat na panamirdona ed saray kasalanan mi, tan saray puso mi so napadalisay; lapu ed manisia kami ed si Jesu Cristo, say Anak na Dios, ya amalsa ed tawen tan dalin, tan amin a beñgatla; so onlasur ed limog na saray anak na totoo.

3 Tan agawa a kayari na impañgibesñgaw da ed saraya a salita say Espiritu na Katawan so sinmabi ed sikara, tan sikara so napno na gayaga, lapu ed naawat da so pamaandi na saray kasalanan da, tan awalaan ira na kareenan na kanunotan, lapu ed mapalalo a pananisia ra ed si Jesu Cristo a sikato so onsabi, unong ed saray salita nen ari Benjamin ya imbalikas to ed sikara.

4 Tan si ari Benjamin inlokas to lamet so sañgi to tan ginapoan to so mansalita ed sikara, a kuan to: Kakaarok tan kaagian ko, kakanayon ko tan totook, tawagen ko lamet so imano yo, a komon deñgelen tan talusan yo so nakekeraan ed saray salita ya ibagak ed sikayo.

5 Tan nia, no say pikakabat ed kaabigan na Dios ed saya a panaon so amañgon ed sikayo ed liknaan na inkaangapo yo, tan say andi-kana tan say inkaplag a kipapasen yo—

6 Ikuan ko ed sikayo, no sikayo so sinmabi ed pikakabat ed kaabigan na Dios, tan say angapo so mipara ed pakapanyari to, tan say karonuñgan to, tan say anos to, tan say andukey a panagtepel to ed saray anak na totoo; tan ontan met, ed say bagat a pamaandi na kasalanan a niparaan nanlapu la ed impañgiletneg na mundo, pian say kilalaban so onsabi ed siopaman ya iter to so talek to ed Katawan, tan panseetan to a sumpalen so saray gangan to, tan mampatuloy ed pananisia ya anga ed sampot na bilay to, say labay ko ya ibaga say bilay na saya a laman—

7 Ikuan ko, saya so too a makaawat na kilalaban, ed panamegley na bagat a pamaandi na kasalanan a niparaan nanlapu la ed impañgiletneg na mundo ya onkana ed amin a katooan, a nanlapu la ed inkigapol nen Adan, odino siopaman natan, odino siopaman ed arapen, anga ed kasampotan na mundo.

8 Tan saya so pamaakaran pian onsabi so kilalaban. Tan angapo so arum a kilalaban likud ed saray asalita la; ni say wala ni so arum a pamaakaran pian nilaban so too likud ed saray pamaakaran ya asalitak la ed sikayo.

9 Manisia kayo ed Dios; manisia kayo ed sikato, tan sikato so amalsa na amin a beñgatla, mandapag dia ed tawen tan dia ed dalin; manisia kayo a sikato so awalaan na amin a kakabatan, tan amin a pakapanyari, mandapag dia ed tawen tan dia ed dalin; manisia kayo a say too ag to natalusan so amin a beñgatla a natatalusan na Katawan.

10 Tan lamet, manisia kayo a nakaukolan a mambabawi kayo ed saray kasalanan yo tan benegan yo so saraya, tan mampaabeba kayo ed inkasikayo ed arap na Dios; tan onkerew kayo ed masimuon a puso a pirdonaen to kayo; tan natan, no manisia kayo ed saraya ya amin a beñgatla imanoen yo a gawaen yo so saraya.

11 Tan lamet ikuan ko ed sikayo unong ed say imbagak la, a dia ed insabi yo ed pikakabat ed gloria na Dios, odino no akabatan yo la so kaabigan to tan atawayan yo la so aro to, tan naawat yo la so pamaandi na saray kasalanan yo, a saya so señgeg na ontan la a mapalalo a gayaga ed saray kamarerua yo, angan ontan so pilalek ko a nunoten yo, tan lawas yo a nunoten, so say inkamakapanyari na Dios, tan say dili ya inkaangapo yo, tan say kaabigan to tan andukey a panañgitepel to ed sikayo, andi-kakanaan a pinalsa, tan ipaabeba yo so inkasikayo a dili angan dia ed kaaraleman na panagpaabeba, ya ontawag kayo ed ñgaran na Katawan ed inagew-agew, tan ag-nagiing ya ontalindeg kayo ed pananisia ed saman so onsabi, a saya so sinalita na sañgi na angel.

12 Tan nia, ikuan ko ed sikayo no gawaen yo so saya sikayo lawas so mangayaga, tan napano kayo ed aro na Dios, tan lawas a mansiansia so pamaandi na saray kasalanan yo; tan onaliguas kayo ed pikakabat ed gloria na saman so amalsa ed sikayo, odino dia ed say pikakabat yo ed saman so maptek tan tua.

13 Tan ag kayo nawalaan na nunot a mamasakit ed sakey tan sakey, balet mambilay kayo a mareen, tan iter yo ed balang sakey a too so unong ed saman so kanepegan to.

14 Tan ag yo nitepel a saray anak yo so naerasan, odino nalakseban; ni say nitepel yo a sumpaen da so gangan na Dios, tan manlalaban tan mankukulkol ira ed sakey tan sakey, tan manlingkor ira ed demonyo, a sikato so katawan na kasalanan, odino sikato so mauges ya espiritu a sikato so sinalita na kaamaan tayo, kanian sikato so kabusol na amin ya inkamatunong.

15 Balet sikara so ibañgat yo a mankurang ed dalan na katuaan tan sikakalakal; ibañgat yo ra a manaaroan ed balang sakey tan sakey, tan manlingkor ed sakey tan sakey.

16 Tan ontan met, sikayo a dili tuloñgan yo so saray mankaukolan na tulong yo; mañgiapag kayo ed kakanen yo ed saraman so mankaukolan; tan ag yo itetepel a say mipapayabol ipasabi to so pikakasi to ed sikayo ed andi-kakanaan, tan ipulisay yo a sikato so ompatey.

17 Lagi ikuan yo: Saya a too inawit to ed sikato a dili so kasegsegañgan to; dia ed ontan ag ko igalaw so limak, tan ag ko iapag ed sikato so kakanen ko, ni say iapag ko ed sikato so pambibilay ko pian sikato so ag manlikna na segsegang, makaseñgeg saray dusa to so nepeg ed sikato—

18 Balet ikuan ko ed sikayo, O too, siopaman a mangawa ed onia sikato met lamlamang so walaan na baleg a pankaukolan a mambabawi; tan likud no sikato so mambabawi ed saman a ginawa to sikato so nabalang ed ando la ya ando, tan angapo so biang to ed panarian na Dios.

19 Tan nengneng yo, ag kasi sikatayo ya amin so mipapayabol? Ag itayo kasi maniilalo ed saksakey a Pinalsa, iñgen say Dios, ed amin a pankaukolan tayo, mandapag a kakanen tan kawes, tan balitok, tan pilak, tan amin a kayamanan a wala ed sikatayo ed antokaman so kanengneñgan?

20 Tan nia, angan dia ed saya a panaon, ontatawag kayo ni ed ñgaran to, tan onkekerew kayo na pamaandi ed saray kasalanan yo. Tan nitepel to kasi a sikayo so kinmerew a naapa? Andi; initer to so Espiritu to ed sikayo, tan ginawa to a saray puso yo so napano na gayaga, tan kinopit to so saray sañgi yo pian ag kayo makasalita, ed agay la a kabaleg na gayaga yo.

21 Tan natan, no say Dios, ya amalsa ed sikayo, tan sikato so paniilaloan yo ed saray bilay yo tan amin a wala ed sikayo tan sikayo natan, iiter to ni ed sikayo so antokaman a kerew yo a makanepegan, dia ed pananisia, no sisiaen yo a saya so naawat yo, O sirin, nepeg a sikayo so mañgiapag na saray kayarian yo ed sakey tan sakey.

22 Tan no okomen yo so sakey a too a mikakasi ed sikayo ed saray tagano yo pian ag ompatey, tan sikato so tutolan yo, sirin malaglaem so kaptekan na dusa ed pañgisiblet yo ed saray tagano yo, a saraya so ag yo kayarian no ag kayarian na Dios, a sikato met so makankayarian ed bilay yo; tan iñgen ag kayo akikasi, ni say nambabawi ed beñgatla a ginawa yo.

23 Ikuan ko ed sikayo, abagey so saman a too, lapu ed say kayarian to so naderal a kaolop to; tan natan, ibagak so saraya a beñgatla ed saraman so mayaman nipaakar ed saray beñgatla na saya a mundo.

24 Tan lamet, ikuan ko ed saray duka, no angapo ed sikayo so saraya iñgen awalaan na magenap, a wala ed saman a kipapasen a wala ed inagew-agew; say labay ko ya ibaga amin yo a mañgibebeneg ed saray mipapayabol, lapu ed angapo yo; say labay ko ya ikuan yo ed saray puso yo: Ag ak makaiter lapu ed angapok, balet no wala ed siak mañgiter ak.

25 Tan natan, no ibaga yo so saya ed dalem na saray puso yo mansiansia kayo ya andi-kasalanan, no andi sikayo so natutolan; tan say tutol yo so maptek lapu ed inagom yo so saman so ag yo ni naawat.

26 Tan natan, makaseñgeg ed saraya a beñgatla a sinalitak ed sikayo—a saya, pian pagnayon yo so pamaandi na saray kasalanan yo ed inagew-agew, pian mankurang kayo komon ya angapo so kasalanan ed arap na Dios—pirawat ko a mañgiapag kayo na saray tagano yo ed saray duka, balang sakey a too unong ed say wala ed sikato, a siñga say pamakan ed saray narasan, pañgawes ed saray lakseb, say idalaw ed saray mansasakit tan pañgiter na saray nakaukolan da, mandapag dia ed espiritu tan dia ed laman, unong ed saray pankaukolan da.

27 Tan nengneñgen yo a saraya ya amin a beñgatla so nagawa ed kakabatan tan uksoy; lapu ed aliwa a manepeg a say sakey a too so ombatik a maples nen say biskeg to. Tan lamet, nakaukolan a sikato so manseet, pian dia ed ontan sikato so makaala na palabo; dia ed ontan, amin a beñgatla nakaukolan a nasumpal a mauksoy.

28 Tan pilalek ko a nunoten yo, a siopaman ed limog yo so ombayes ed kaabay to nakaukolan ya ipawil to so saman a beñgatla a binayes to, unong ed inabubonan to, odino sikayo so mankasalanan; tan nayari a sikayo met so makaseñgeg na pankasalanan na kaabay yo.

29 Tan kaunoran, ag ko dia nibaga ya amin so señgegan na saray pankasalananan yo; lapu ed wala so dakerakel a dalan tan pamaakaran, angan agay la a karakel ya ag ko nabilang.

30 Balet masarag la so saray nibagak ed sikayo, no ag yo alwaran so inkasikayo, tan saray kanunotan yo, tan saray salita yo, tan saray kagagawa yo, tan sumpalen yo so saray gangan na Dios, tan mampatuloy kayo ed pananisia unong ed saray nadñgelan yo nipaakar ed isabi na Katawan tayo, anga ed sampot na bilay yo, sikayo so nabalang. Tan natan, O too, nunot mo, tan ag ka nabalang.