1 Tan natan, agawa sanen si ari Benjamin so akapansalita la na onia ed saray totoo to, nampabaki ed limog da, lapu ed labay to a kabaten ed saray totoo to no manisia ra ed saray salita ya imbaga to ed sikara.

2 Tan imbelyaw da ed saksakey a voces, a kuan da: On, manisia kami ed amin a salita ya imbagam ed sikami; tan ontan met, kabat mi so inkapeteg tan katuaan da, lapu ed say Espiritu na Katawan a Makapanyari ed Amin, so añgiter na baleg ya inkaoman ed sikami, odino dia ed saray puso mi, kanian angapo la so pankaliktan mi a mangawa na mauges, no ag say pangawa na maong ya andi-tonda.

3 Tan sikami, ed inkasikami a dili, met, dia ed panamegley na andi-angaan a kaabigan na Dios, tan saray parungtal na Espiritu to, awalaan kami na baleg a pakanengneng ed saman so onsabi; tan sano nakaukolan, nayarian mi so mamprofesiya nipaakar ed amin a beñgatla.

4 Tan say pananisia a wala ed sikami ed saray beñgatla a sinalita na ari so añgiter ed sikami na baleg a pikakabat, a saya so nangayagaan mi ed mapalalo a kabaleg a gayaga.

5 Tan siaabuloy kami ya onloob ed sakey a paknaan ed Dios mi a gawaen mi so kaliktan to, tan ontulok ed saray gangan to ed amin a beñgatla ya igangan to ed sikami, ed amin a nakekeraan ya agew mi, pian ag mi awiten ed inkasikami so andi-angaan a dusa, a siñga unong ed sinalita na angel, pian ag kami oninum ed kupa na sanok na Dios.

6 Tan natan, saraya so salita a pilalek nen ari Benjamin ed sikara; tan dia ed ontan inkuan to ed sikara: Imbesñgaw yo so saray salita a kaliktan ko; tan say paknaan a ginawa yo so sakey a paknaan a matunong.

7 Tan natan, lapu ed paknaan a ginawa yo sikayo so natawag ya anak nen Cristo, anak to a lalaki, tan anak to a bibii; tan nia, dia ed saya ya agew sikayo so anak to ed espiritu; lapu ed inkuan yo a saray puso yo so nauman lapu ed pananisia ed ñgaran to; dia ed ontan, sikayo so nianak ed sikato tan nanmaliw kayo ya anak to a lalaki tan bibii.

8 Tan dia ed saya a ñgaran sikayo so agawa a bulos, tan angapo so arum a ñgaran a dia ed saman sikayo so nagawa a bulos. Angapo so arum a ñgaran so niiter a dia ed saman say kilalaban so onsabi; dia ed ontan, pirawat ko ya akoen yo ed sikayo so ñgaran nen Cristo, sikayo ya amin a linmoob ed paknaan ed Dios a sikayo so matoluk ya anga ed sampot na saray bilay yo.

9 Tan nagawa a siopaman a mangawa ed saya so narumog ed nikawanan a lima na Dios, lapu ed nakabatan to so ñgaran a pantawag ed sikato; lapu ed sikato so natawag ed ñgaran nen Cristo.

10 Tan natan nagawa, a siopaman ya ag to akoen ed inkasikato so ñgaran nen Cristo sikato so natawag ed sananey a ñgaran; dia ed ontan, narumog to so inkasikato ed nikawigi a lima na Dios.

11 Tan pilalek ko a nunoten yo met, a saya so ñgaran ya inkuan ya iter ko ed sikayo a kapiganman ag nabural, likud no say makaseñgeg say pankasalanan; dia ed ontan, manalwar kayo ya ag kayo mankapankasalanan, pian saya a ñgaran so ag nabural ed saray puso yo.

12 Ikuan ko ed sikayo, pirawat ko a nunoten yo ya ag yo lingwanan so ñgaran a nisulat lawas ed saray puso yo, pian ag kayo narumog ed nikawigi a lima na Dios, balet pian nareñgel tan nakabat yo so voces a pakatawagan ed sikayo, tan ontan met, say ñgaran a pantawag to ed sikayo.

13 Panon kasi so pikabat na sakey a too ed say katawan to ya ag to ni nanlingkoran, tan sakey a sankaili ed sikato, tan arawi ed nunot tan gagala na puso to?

14 Tan lamet, say sakey a too kasi alaen to so sakey ya asno a kayarian na kaabay to, tan saman so kayarianen to? Ikuan ko ed sikayo, Andi; ag to angan nitepel a saman so miakan ed limog na saray ayep to, balet saya so abolen to a paarawien, tan papawayen to. Ikuan ko ed sikayo, ya angan ontan so nagawa ed limog yo sano ag yo kabat so ñgaran ya akatawagan yo.

15 Dia ed ontan, pirawat ko a sikayo so ag-nagiing tan ag-nagalaw, tan lawas daakan ed maong a kimey, pian si Cristo, say Katawan a Dios a Makapanyari ed Amin, sikayo so sekderan to a kayarian to, pian naawit kayo ed tawen, pian sikayo so nawalaan na andi-angaan a kilalaban tan andi-angaan a bilay, dia ed panamegley na kakabatan, tan pakapanyari, tan kaptekan, tan panañgasi na saman so amalsa ed amin a beñgatla, dia ed tawen tan dalin, a sikato so Dios na amin. Amen.