1 Tan agawa a si Amulon agamoran to so palabo ed mata na ari na saray Lamanite; dia ed ontan, say ari na saray Lamanite initer to ed sikato tan saray kaagian to a sikara so naturo na managbañgat ed saray totoo to, on, angan dia ed saray totoo a wala ed dalin na Shemlon, tan dia ed dalin na Shilom, tan dia ed dalin na Amulon.

2 Lapu ed saray Lamanite kinayarian da so saraya ya amin a dalin; dia ed ontan, say ari na saray Lamanite so anoro na ari ed amin na saraya a dalin.

3 Tan natan say ñgaran na ari na saray Lamanite so Laman, lapu ed sikato so niboloy ed ñgaran nen ama to; tan dia ed ontan sikato so atawag ya ari Laman. Tan sikato so ari na dakel a totoo.

4 Tan sikato so anoro na saray managbañgat ed saray kaagian nen Amulon dia ed balang sakey a dalin a kinayarian na saray totoo to; tan dia ed onia say salita nen Nephi so ginapoan da ya ibañgat ed limog na amin a totoo na saray Lamanite.

5 Tan sikara so totoo a maaro ed balang sakey; angaman ontan ag da kabat so Dios; ni saray kaagian nen Amulon imbañgat to ed sikara so antokaman a beñgatla nipaakar ed Katawan a Dios da, ni say gangan nen Moises; ni say imbañgat da ed sikara so saray salita nen Abinadi;

6 Balet imbañgat da ra a mañgisinop na saray kasulatan da, tan sikara so mansusulatan ed balang sakey tan sakey.

7 Tan dia ed onia saray Lamanite ginmapo ra ya ondakel ed saray kayamanan, tan ginmapo ra a manlako tan mansaliwan ed sakey tan sakey tan sikara so binmiskeg ed pakayari, tan ginmapo ra a manmaliw a masilib tan makabat a totoo, unong ed kakabatan na mundo, on, sakey a sankasiliban a totoo, a maliket ira ed amin a kanengneñgan na karelmeñgan tan panagtolisan, likud ed saray dili a kaagian da.

8 Tan natan agawa a si Amulon ginapoan to ya oleyan si Alma tan saray kaagian to, tan ginapoan to ra a pasegsegañgen, tan ingangan to ed saray anak to so pasegsegañgen da so saray anak da.

9 Lapu ed si Amulon kabat to si Alma, a sikato so sakey ed saray sacerdote na ari, tan sikato so anisia ed saray salita nen Abinadi tan sikato so sinunson da ed paway na arapan na ari, tan dia ed ontan sinmanok ed sikato; lapu ed sikato so mananumbok nen ari Laman, iñgen inkana to so pakaoley to ed sikara, tan sikato so añgiter na saray kimey ed sikara, tan añgipasen na saray katawan ed saray managkimey.

10 Tan agawa ya ambelat a tuloy so liliknaen da kanian ginapoan da so mampikasi a madaleyet ed Dios.

11 Tan si Amulon ingangan to ya itonda ra ed saray pannañgis da; tan sikato so añgipasen na saray mambantay ed sikara, tan siopaman a naalmoan ya ontatawag ed Dios so pateyen.

12 Tan si Alma tan saray totoo to ag da inkelyaw so saray voces da ed Katawan a Dios da, balet imbesñgaw da so pilalek na saray puso ra ed sikato; tan kabat to so kanunotan na saray puso ra.

13 Tan agawa a say voces na Katawan dinmateng ed sikara ed saray kairapan da, a nankuan: Itangwa yo so saray ulo yo tan manliket kayo, lapu ed kabat ko so paknaan a ginawa yo ed siak; tan siak so akipaknaan ed saray totook tan ipaway ko ra ed inkaaripen.

14 Tan palemewen ko met so saray belat a wala ed saray takeb yo, ya angan saraya so ag yo nalikna ed saray beneg yo, legan a sikayo so wala ed inkaaripen; tan saya so gawaen ko pian ontalindeg kayo a tasik manlapu ed natan, tan pian nakabatan yo ya andi-duarua a siak, say Katawan a Dios, dalawen ko so saray totook ed saray kairapan da.

15 Tan natan agawa a saray belat a nitoon ed si Alma tan saray kaagian to so agawa ya anlemew; on, say Katawan so pinabiskeg to ra kanian nitepel da so saray belat a wala ed takeb da a mainawa, tan tinmulok ira a sililiket tan siaanos ed amin a kaliktan na Katawan.

16 Tan agawa ya agay la so kabaleg na pananisia ra tan anos da kanian say voces na Katawan so sinmabi ed sikara lamet, a nankuan: Sikayo so manliket, tan dia ed kaimbuasan sikayo so ilaban ko ya ipaway ed inkaaripen.

17 Tan inkuan to ed si Alma: Sika so onla ed unaan na saya a totoo, tan siak so mila ed sika tan ilaban ko so saya a totoo ya ipaway ed inkaaripen.

18 Natan agawa a si Alma tan saray totoo to dia ed panaon na labi tinipon da so saray karnero ra tan ontan met ed saray bokel na dawa ra; on, tan angan sanlabi so impantipon da ed saray karnero ra.

19 Tan dia ed kaimbuasan say Katawan initer to so malet ya ugip ed saray Lamanite, on, tan amin na saray katawan ed saray managkimey so wala ed malet ya ugip.

20 Tan si Alma tan saray totoo to so sinmipot ya amaarap ed kalawakan; tan sanen sanagew la ra a nambaroy, impaalagey da so saray abong-abong da ya abel ed sakey a patar, tan tinawag da so patar na Alma, lapu ed sikato so añgiwanwan ed sikara ed kalawakan.

21 On, tan diman ed patar na Alma imbesñgaw so pisasalamat da ed Dios lapu ed sikato so mapañgasi ed sikara, tan pinalemew to so saray belat a wala ed saray takeb da, tan inlaban to ra ed inkaaripen; lapu ed sikara so wala ed inkaaripen, tan angapo so makapañgilaban ed sikara likud no say Katawan a Dios da.

22 Tan akisalamat ira ed Dios, on, amin a lalaki tan amin a bibii tan amin ya anak da a makasalita la inkelyaw da so saray voces da ed pandayew na Dios da.

23 Tan natan say Katawan inkuan to ed si Alma: Mansiglat ka tan alis ka tan saraya a totoo ed saya a dalin, lapu ed abañgon la so saray Lamanite tan sikayo so oosilan da; dia ed ontan paway kayo la ed saya a dalin, tan patondaen ko so saray Lamanite ed saya a patar pian ag la ra dia makaarawi a mañgosil ed saya a totoo.

24 Tan agawa a sikara so sinmipot a pinmaway ed patar, tan intuloy da so baroy da ed kalawakan.

25 Tan kayari a sikara so wala ed kalawakan ed loob na labindua ya agew akasabi ra ed dalin na Zarahemla; tan sikara so inawat met nen ari Mosiah a sigagayaga.