1 Tan agawa a kayari na duara a taon ed insabi nen Abinadi ed limog da ya ag-nampabirbir, kanian sikato so ag da kabat, tan ginapoan to so namprofesiya ed limog da, a nankuan: Onia so ingangan na Katawan ed siak a kuan to—Abinadi, onla ka tan mamprofesiya ka ed saya a totook, lapu ed pinaawet da so saray puso ra sumpa ed saray salitak; sikara so ag nambabawi ed saray mauges a kagagawa ra; dia ed ontan, dalawen ko ra ed pasnok ko, on, dia ed sebeg na pasnok ko sikara so dalawen ko ed saray kaugsan tan karumsisan da.

2 On, abagey so saya a kapolian! Tan say Katawan inkuan to ed siak: Iyunat mo so limam tan mamprofesiya ka, ya ikuan mo: Onia so imbaga na Katawan, a nagawa ed saya a kapolian, lapu ed saray kaugsan da, sikara so naawit ed inkaaripen, tan sikara so nabakbak ed aping; on, tan sikara so sunsonen na saray totoo, tan sikara so pateyen; tan saray buitri ed tagey, tan saray aso, on, tan saray monanakap, kanen da so saray laman da.

3 Tan nagawa, a say bilay nen ari Noah so napabli a siñga kawes a wala ed dalem na ampetang a pugon; lapu ed nakabatan to a siak so Katawan.

4 Tan nagawa a bakbaken ko so saya a totook na saray ansakit a liknaen, on, ed panamegley na eras tan salot; tan gawaen ko a sikara so managlem ed sanlegan na dukey na agew.

5 On, tan gawaen ko a sikara so nabakbak na ambelat ed saray beneg da; tan sikara so nasunson a siñga emel ya asno.

6 Tan nagawa a mañgibaki ak na mauges ya uran a kristal ed limog da, tan saya so mamakbak ed sikara; tan sikara met so nabakbak na dagem a manlapu ed bokig; tan saray bigis so onlaknab met ed saray dalin da, tan kanen da so saray dawa ra.

7 Tan sikara so nabakbak na baleg a salot—tan saraya ya amin so gawaen ko lapu ed saray kaugsan tan karumsisan da.

8 Tan nagawa a likud no sikara so mambabawi sikara so sigpot a deralen ko ed tapew na saya a dalin; iñgen mañgitilak ak na kasulatan ed benegan da, tan saraya so iagel ko ed kaderal ya onkana ed saray arum a bansa a mankayarian ed saya a dalin, on, angan saya so gawaen ko pian nakabatan na saray arum a bansa so karumsisan da. Tan dakel ni a beñgatla so improfesiya nen Abinadi sumpa ed saya a totoo.

9 Tan agawa a mamapasnok ira ed sikato; tan sikato so inala ra tan inawit da a sibabalor ed arap na ari, tan inkuan da ed ari: Nengneng mo, inawit mi dia ed arap mo so sakey a too ya inkuan da añgiprofesiya na mauges nipaakar ed saray totoom, tan imbaga to a deralen ira na say Dios.

10 Tan improfesiya to met so mauges nipaakar ed bilay mo, tan inkuan to a say bilay mo so manmaliw a siñga kawes a wala ed dalem na pugon na apoy.

11 Tan lamet, imbaga to a sika so sakey labat a dayami, angan siñga dayami ya amagaan ed alog, a bataken na saray ayayep tan gatin-gatinan da.

12 Tan lamet, imbaga to a siñga ka labat rosas na sakey a sasabitan, a, no nagnap la so inkaluto to, sano siplogan na dagem, sikato so nipalir-palir ed tapew na dalin. Tan ibabaraan to a saraya so sinalita na Katawan. Tan inkuan to a saraya ya amin so onsabi ed sika likud no sika so mambabawi, tan saya so lapu ed saray kaugsan mo.

13 Tan natan, O ari, anto so baleg a kaugsan a ginawam, odino anto so saray baleg a kasalanan a ginawa na saray totoom, pian sikatayo so tutolan na Dios odino okomen na saya a too?

14 Tan natan, O ari, nengneng mo, angapo so kasalanan tayo, tan sika, O ari, so ag nankasalanan; dia ed ontan, saya a too so nantila nipaakar ed sika, tan sikato so namprofesiya ya andi-kakanaan.

15 Tan nia, sikatayo so mabiskeg, sikatayo so ag niakar ed inkaaripen, odino sikatayo so naawit a nadakep na saray kabusol tayo; on, tan sika so inmaliguas ed saya a dalin, tan sika met so onaliguas.

16 Nengneng mo, nia so saya a too, sikato so iawat mi ed saray limam; nayarian mo a gawaen so labay mo ed sikato a dia nunoten mo maong.

17 Tan agawa a si ari Noah impaibantak to si Abinadi ed pañgawan; tan ingangan to a mantitipon so saray sacerdote pian mikonuan ed sikara no anto so gawaen da ed sikato.

18 Tan agawa ya inkuan da ed ari: Awit yo dia pian sikato so tepetan mi; tan say ari ingangan to a sikato so iarap da ed sikara.

19 Tan sikato so ginapoan da a tepetan, pian napambabalingliñgan to so salita to, pian dia ed saman ag la piga sikato so naianapan da na kasalanan; balet sikato so inmebat ed sikara a makpel, tan asundoan to so amin a tepet da, on, ed baleg a kelaw da; lapu ed asundoan to so amin a tepet da, tan sikara so kinewkew to ed amin na saray salita ra.

20 Tan agawa a sakey ed sikara so nankuan ed sikato: Anto so kabaliksan na saray salita a nisulat, tan saraya so imbañgat na kaamaan tayo, a say kuan to:

21 Agay la so karakepan na palandey a tutoonan na saray sali na saraman so manañgawit na maong a balita; a mañgibabawag na kareenan; a mañgaawit na maong a balita a maabig; a mañgibabawag na kilalaban; a mañgibaga ed Sion, Say Dios mo so mañguoley;

22 Saray bantay mo ikelyaw da so voces da; a manoolop so voces da, sikara so mancancion; tan nanengneng da ed mata sano say Katawan awiten to lamet so Sion;

23 Bigla a mangayaga kayo; mancancion kayo ya amin sikayo ya andi-kakanaan a pasen na Jerusalem; lapu ed say Katawan niligliwa to so saray totoo to, dinundon to so Jerusalem;

24 Say Katawan imparungtal to so masanto a taklay to ed mata na amin a bansa, tan amin a sampot na dalin nanengneng da so pañgilaban na Dios tayo?

25 Tan natan si Abinadi inkuan to ed sikara: Sikayo kasi so sacerdote, tan mankonkonwari a mambabañgat ed saya a totoo, tan natatalusan yo so espiritu na panagprofesiya, tan iñgen pilalek yo ni a nakabatan ed siak no anto so kabaliksan na saraya a beñgatla?

26 Ibagak ed sikayo, abagey kayo lapu ed impampikewet yo ed saray dalan na Katawan! Tan sano atalusan yo so saraya a beñgatla ag yo imbañgat so saraya ed sikara; dia ed ontan, sikayo so amikewet ed saray dalan na Katawan.

27 Ag yo inkana so puso yo ed pakatalus; dia ed ontan, aliwa kayo a makabat. Dia ed ontan, anto so imbañgat yo ed saya a totoo?

28 Tan inkuan da: Imbañgat mi so gangan nen Moises.

29 Tan lamet inkuan to ed sikara: No ibabañgat yo so saray gangan nen Moises, akin balet ag yo susumpalen so saya? Akin balet inteen yo ed kayamanan so saray puso yo? Akin mangagawa kayo na inkabalangkantis tan ikakana yo so saray biskeg yo ed saray balangkantis, on, tan inabuloyan yo so saya a totoo a mangawa na kasalanan, a saya so makaseñgeg kanian say Katawan imbaki to ak a mamprofesiya sumpa ed saya a totoo, on, angan sakey a baleg a kaugsan sumpa ed saya a totoo?

30 Ag yo kasi kabat a siak so mansasalita na katuaan? On, kabat yo a siak so mansasalita na tua; tan nepeg yo so ongiwgiw ed arap na Dios.

31 Tan nagawa a sikayo so nabakbak lapu ed saray kaugsan yo, lapu ed inkuan yo ya ibabañgat yo so gangan nen Moises. Tan anto so amta yo nipaakar ed gangan nen Moises? Say kilalaban kasi so manlapu ed gangan nen Moises? Anto so nikuan yo?

32 Tan inmebat ira tan inkuan da a say kilalaban so onsabi ed panamegley na gangan nen Moises.

33 Balet natan si Abinadi inkuan to ed sikara: Amtak no sumpalen yo so saray gangan na Dios sikayo so nilaban; on, no sumpalen yo so saray gangan ya initer na Katawan ed kinen Moises ed palandey na Sinai, a kuan to:

34 Siak so Katawan a Dios yo, ya añgipaway ed sikayo ed dalin na Egipto, ed paway na abong na inkaaripen.

35 Ag kayo nawalaan na arum a Dios ed arap ko.

36 Ag kayo mangagawa na antokaman a talintao, odino beñgatla a kaparpara na antokaman a wala ed tagey na tawen, odino saray beñgatla a wala ed dalem na dalin.

37 Natan si Abinadi inkuan to ed sikara: Ginawa yo kasi so saraya ya amin? Ikuan ko ed sikayo Andi, ag yo ginawa. Tan binañgatan yo kasi so saya a totoo a gawaen da so saraya ya amin a beñgatla? Ikuan ko ed sikayo, Andi, ag yo ginawa.