1 Tan agawa a kayari a sinampotan nen ari Limhi so impansalita to ed saray totoo to, lapu ed sikato so nansalita na dakel a beñgatla ed sikara tan pigara labat so insulat ko ed saya a libro, imbaga to ed saray totoo to so nipaakar ed saray kaagian da a wala ed dalin na Zarahemla.

2 Tan kinaukolan to a si Ammon so ontalindeg ed arap na karaklan, tan salitaen to ed sikara so amin ya agawgawa ed saray kaagian da manlapu ed saman so panaon ya intaynan nen Zeniff ed saman a dalin ya anga ed panaon a sikato a dili so inmalis ed saman a dalin.

3 Tan tinungtong to met ed sikara so saray sampot a salita nen ari Benjamin ya imbañgat to ed sikara, tan saraya so impaliwawa to ed saray totoo nen ari Limhi, pian natalusan da so amin a salita ya imbaga to.

4 Tan agawa a kayari a ginawa to so saya si ari Limhi binolosan to la so karaklan, tan ingangan to ya ompawil la so balang sakey ed saray dili ya abong da.

5 Tan agawa ya ingangan to so saraman so piligo a kawalaan na kasulatan nipaakar ed saray totoo to nanlapu ed panaon ya intaynan da ed dalin na Zarahemla, so awiten da ed arap nen Ammon, pian saraya so basaen to.

6 Natan, kayari a binasa nen Ammon so kasulatan, si ari tinepet to ed sikato no nayarian to ya ipatalus to so saray salita, tan si Ammon imbaga to ya ag to nayarian.

7 Tan say ari inkuan to ed sikato: Lapu ed apaermen ak ed saray itetepel na saray totook, ingangan ko ya apataplo tan talo ed saray totook so mambaroy ed kalawakan, pian ag la piga narumog da so dalin na Zarahemla, pian mikasi kami ed saray kaagian tayo ya ipaway da kami ed inkaaripen.

8 Tan sikara so abalang ed kalawakan ed loob na dakel ya agew, iñgen sikara so maseet, tan ag da nalmo so dalin na Zarahemla no ag amawil ira ed saya a dalin, lapu ed sikara so nambaroy ed dalin a kawalaan na dakel a danum, ya asukayan da so dalin ya amayakmakan na pokel na totoo, tan saray ayayep, tan amayakmakan met na aderal-deral a nambabañgil a nengneng na paalagey, a nalmo da so sakey a dalin a nanayaman nen saman na saray totoo a siñga kinarakel na saray totoo na Israel.

9 Tan onkana a pamaneknek ed saray beñgatla ya inkuan da so tua inawit da so duamplo tan apat a piligo a napno na tatak, tan saraya so gawa ed peteg a balitok.

10 Tan nia, ontan met, añgawit ira na salimbeng ed pagew, a saraya so ankakabaleg, tan saraya so gawa ed gansa tan gambang, tan saraya so nagnap ed inkalimpio.

11 Tan lamet, añgawit ira na saray espada, a saray putan so aderal la, tan saray tarem to so alatian la; tan angapo so angan sakey ed saya a dalin a nayarian to so impañgipatalus so salita odino saray tatak ed saray piligo. Kanian inkuan ko ed sika: Nayarian mo so mañgipatalus?

12 Tan ikuan ko ed sika lamet: Wala kasi so kabat mo a nayarian to so mañgipatalus? Lapu ed pilalek ko a saraya a kasulatan so nipatalus ed dili a salita mi; tan, ag la piga, saraya so makapañgiter ed sikami na pikakabat ed saray nakdaan a totoo ya aderal, no iner so nanlapuan na saraya a kasulatan; odino, ag la piga, saraya so makapañgiter na pikakabat nipaakar ed saraya a totoo ya aderal; tan pilalek ko a nakabatan so señgegan na inkaderal da.

13 Natan si Ammon inkuan to ed sikato: Petepeteg nayarian ko ya ibaga ed sika, O ari, so sakey a too a nayarian to ya ipatalus so saray kasulatan; lapu ed wala ed sikato so pannengneñgan, tan nayarian to ya ipatalus so amin a kasulatan ed saray kadaanan a panaon; tan saya so sakey a palabo a nanlapu ed Dios. Tan saraya a beñgatla so tatawagen na panañgipatalus, tan angapo so too a makanengneng ed saraya likud no sikato so nigangan, ag la piga nanengneng to so ag to nepeg a nengneñgen tan sikato so ompatey. Tan siopaman a nigangan ya onnengneng ed saraya, sikato met lamlamang so tatawagen a too a makapikabat ed linawa na Dios.

14 Tan nia, say ari na saray totoo a manaayam ed dalin na Zarahemla so too a nigangan a mangawa ed saraya a beñgatla, tan wala ed sikato so saya a sankaabigan a palabo a nanlapu ed Dios.

15 Tan say ari inkuan to a say too a makapikabat ed linawa na Dios so atagtagey nen say sakey a profeta.

16 Tan si Ammon inkuan to a say too a makapikabat ed linawa na Dios so sakey a manañgipuyan tan sakey a profeta met; tan saya a palabo so babaleg kanian angapo so too a makagamor, likud no wala ed sikato so pakapanyari na Dios, a saya so ag nakayarian na too; iñgen say sakey a too nawalaan na baleg a pakapanyari a niiter ed sikato a manlapu ed Dios.

17 Balet say too a makapikabat ed linawa na Dios kabat to so saray beñgatla a linmabas, tan ontan met ed saray beñgatla ya onsabi, tan dia ed panamegley na saraya amin a beñgatla so nipuyan, odino, iñgen, saray maamot a beñgatla so niparungtal, tan saray akamot a beñgatla so niakar ed liwawa, tan saray beñgatla ya ag kabat so nakabatan da, tan ontan met saray beñgatla so nakabatan ed panamegley da odino andi saraya so ag la nakabatan.

18 Dia ed onia say Dios initer to so pamaakaran pian say too, dia ed panamegley na pananisia, makapangawa na saray makapakelaw a milagro; dia ed ontan sikato so manmaliw a baleg a pinabañgan na saray kapara to a pinalsa.

19 Tan natan, sanen sinampotan la nen Ammon so impañgibaga to ed saraya a salita say ari so nangayaga a mapalalo, tan initer to so pisasalamat ed Dios, a nankuan: Ag panduaruaan a baleg a misterio so wala ya akasulat ed saraya a piligo, tan saraya a panañgipatalus ag la panduaruaan a saraya so niparaan onkana ed saya a gagala ed pañgilukas na amin a misterio ed saray anak na totoo.

20 O agay la a makapakelaw so saray kimey na Katawan, tan agay la so bayag na impañgitepel to ed saray totoo to; on, tan agay la ya inkabulag tan ag natanek so saray pakatalus na saray anak na totoo; lapu ed ag da anapen so kakabatan, ni say pilalek da a sikato so mañgoley ed sikara!

21 On, sikara so siñga atap ya ayayep ya ibabatikan da so managpastol, tan sikara so nataytayak, tan sikara so nasunson, tan sikara so kanen na saray monanakap na katakelan.