1 Natan agawa a dakel ed saray ontatayatdang a kapolian ya ag da natalusan so saray salita nen ari Benjamin, lapu ed sikara so ankekelag ni ya ugogaw ed saman a panaon sanen sikato so nansalita ed saray totoo to; tan sikara so ag anisia ed sisia a tawir na kaamaan da.

2 Sikara so ag anisia ed saray asalita la nipaakar ed kioli ed bilay na saray inaatey, ni say anisia ra nipaakar ed isabi nen Cristo.

3 Tan natan lapu ed ag da pananisia ag da natalusan so salita na Dios; tan saray puso ra so inmawet.

4 Tan ag ira nabiniagan; ni say mikasakey ira ed simbaan. Tan sikara so nisian a totoo no nipaakar ed saray pananisia ra, tan sikara so nansiansia ed saya a magnayon, angan dia ed saray makamundo tan makasalanan a kipapasen da; lapu ed ag ira ontawag ed Katawan a Dios da.

5 Tan natan dia ed legan na oley nen Mosiah sikara so ag akapaldua ed karakel na saray totoo na Dios; balet lapu ed pambabaliñgaan ed limog na saray kaagian nanmaliw ira a dinmakel.

6 Tan agawa a dakel so saray apalikdo ra lapu ed saray mapasirayew a salita ra, ed saraman so wala ed simbaan, tan sikara so nanseñgegan na impakagawa ra na dakel a kasalanan; dia ed ontan nakaukolan a saraman so akagawa na kasalanan, a sikara so wala ed simbaan, so binilin na simbaan.

7 Tan agawa a sikara so iniarap da ed saray sacerdote, tan sikara so iniawat da ed saray sacerdote na saray managbañgat; tan saray sacerdote inawit da ra ed arap nen Alma, a sikato so atagey a sacerdote.

8 Natan si ari Mosiah initer to ed si Alma so pakaoley ed simbaan.

9 Tan agawa a si Alma ag to amta so nipaakar ed sikara; balet dakel so saray tasi sumpa ed sikara; on, saray totoo so tinmalindeg a nampaneknek ed saray kaugsan da a karakel.

10 Natan angapo ni so onia ya agawgawa nen saman ed simbaan; dia ed ontan si Alma agulo so espiritu to, tan ingangan to a sikara so awiten da ed arap na ari.

11 Tan inkuan to ed ari: Nengneng mo, dakel so saray inawit mi dia ed arap mo, ya indalem na saray kaagian da; on, tan sikara so naawit dia ed nanduroma a kaugsan. Tan sikara so ag mambabawi ed saray kaugsan da; dia ed ontan sikara so inawit mi ed arap mo, pian sika so mantutol ed sikara unong ed saray kasalanan da.

12 Balet si ari Mosiah inkuan to ed si Alma: Nia, sikara so ag ko tutolan; dia ed ontan iawat ko ra ed saray limam pian sikara so natutolan.

13 Tan natan say espiritu nen Alma lamet so agulo; tan sikato so linma tan tinmepet ed Katawan no anto so gawaen to nipaakar ed saya a pamaakaran, lapu ed antakot ompano makagawa na aliwa ed pakanengneng na Dios.

14 Tan agawa a kayari to ya initer to ya amin so liknaan to ed Dios, say voces na Katawan so sinmabi ed sikato, a nankuan:

15 Mapalar ka, Alma, tan mapalar so saray abiniagan ed danum na Mormon. Sika so mapalar lapu ed mapalalo a pananisiam ed saray salita labat nen igagangan ko ya Abinadi.

16 Tan mapalar ira lapu ed saray mapalalo a pananisia ra ed saray salitam labat ya imbalikas mo ed sikara.

17 Tan mapalar ka lapu ed sika so añgiletneg na simbaan ed limog na saya a totoo; tan sikara so nipaletneg, tan sikara so manmaliw a totook.

18 On, mapalar so saya a totoo a sikara so siaabuloy a mañgako na ñgaran ko, lapu ed ñgaran ko so pantawag ed sikara; tan sikara so kayarian ko.

19 Tan lapu ed intepet mo ed siak so nipaakar ed saray nankasalanan, sika so mapalar.

20 Sika so igagangan ko; tan mipaknaan ak ed sika, a sika so nawalaan na andi-angaan a bilay; tan sika so manlingkor ed siak, tan sika so mankurang ed ñgaran ko, tan tipon mo so saray karnerok.

21 Tan siopaman ya ondeñgel ed voces ko sikato so karnerok; tan sikato so awaten mo ed simbaan, tan sikato met so awaten ko.

22 Tan nia, saya so simbaan ko; siopaman a nabiniagan so nabiniagan ed pambabawi. Tan siopaman ya awaten mo sikato so manisia ed ñgaran ko; tan sikato so mabolbulos ko a pirdonaen.

23 Lapu ed siak so saman so mañgako ed saray kasalanan na mundo; lapu ed siak so amalsa ed sikara; tan siak so mañgiter ed siopaman a manisia ya anga ed kasampotan na sakey a pasen ed nikawanan na limak.

24 Tan nia, dia ed ñgaran ko sikara so natawag; tan no siak so kabat da sikara so ondago, tan nawalaan ira na pasen a andi-angaan ed nikawanan na limak.

25 Tan nagawa a sano say komadua ya itanol na trompita dia ed ontan saraman so ag balot makapikabat ed siak so ondago tan ontalindeg ed arap ko.

26 Tan dia ed ontan nakabatan da a siak so Katawan a Dios da, a siak so Mananundon da; balet sikara so ag nadundon.

27 Tan dia ed ontan ipatuak ed sikara ya ag ko ra kabat a kapiganman; tan sikara so onalis ya onla ed andi-angaan ya apoy a niparaan ya onkana ed demonyo tan saray angeles to.

28 Dia ed ontan ikuan ko ed sika, a siopaman so ag ondeñgel ed voces ko, sikato met lamlamang so ag naawat ed simbaan ko, lapu ed sikato so ag ko awaten ed sampot ya agew.

29 Dia ed ontan ikuan ko ed sika, Onla ka; tan siopaman so mankasalanan sumpa ed siak, sikato so tutolan mo unong ed saray kasalanan a ginawa to; tan no ipatua to so saray kasalanan to ed arap mo tan ed siak, tan mambabawi ed inkamatua na puso to, sikato so pirdonaen mo, tan sikato so pirdonaen ko met.

30 On, tan no kaonoñgan so kabetbet na saray totook a mambabawi pirdonaen ko ra ed saray kasalanan da sumpa ed siak.

31 Tan mampipirdonaan kayo na saray kasalanan yo ed balang sinansakey; tan tua ikuan ko ed sika, saman so ag mamirdona ed kasalanan na kaabay to no ikuan to a sikato so nambabawi, saya met lamlamang so mañgawit ed inkasikato ed kadusa.

32 Natan ikuan ko ed sika, Onla ka; tan siopaman ya ag mambabawi ed saray kasalanan to sikato met lamlamang so ag nibilang ed saray totook; tan saya so sumpalen yo manlapu ed natan ya anga ed arapen.

33 Tan agawa a sanen si Alma nadñgel to so saraya a salita insulat to pian saraya so wala ed sikato, tan pian natutolan to so saray totoo ed saman a simbaan unong ed saray gangan na Dios.

34 Tan agawa a si Alma linma tan tinutolan to so saray inawit da a nankasalanan, unong ed salita na Katawan.

35 Tan siopaman a nambabawi ed saray kasalanan da tan saraya so impatua to, sikara so nibilang ed limog na saray totoo na simbaan;

36 Tan saraman so ag da ipatua so saray kasalanan da tan ag nambabawi ed saray kaugsan da, sikara met lamlamang so ag nibilang ed saray totoo na simbaan, tan saray ñgaran da so binural da.

37 Tan agawa a si Alma so añgoley ed amin a kurang ed simbaan; tan ginmapo ra lamet a nawalaan na kareenan tan bolaslas a mapalalo ed saray kipapasen na simbaan, a nankurang ira a maalwar ed arap na Dios, ya añgawat ira na dakerakel, tan aminiag ira na dakerakel.

38 Tan natan saraya ya amin a beñgatla so ginawa nen Alma tan saray managkimey a kaiba to ed simbaan, a nankurang ira ed naspot a seet, ya imbañgat da so salita na Dios ed amin a beñgatla, a nantetepel ira na amin a nengneng na kairapan, lapu ed sikara so pinasegsegang na amin na saray aliwa a miembro na simbaan na Dios.

39 Tan binilin da so saray kaagian da; tan sikara met so abilin, balang sakey unong ed salita na Dios, unong ed saray kasalanan da, odino dia ed kasalanan a ginawa to, lapu ed sikara so ginangan na Dios a mampikasi ya andi-tonda, tan mañgiter na pisasalamat ed amin a beñgatla.