1 Tan natan si Abinadi inkuan to ed sikara: Labay ko a natalusan yo a say Dios a dili so onla dia ya onlasur ed limog na saray anak na totoo, tan sikato so manundon ed saray totoo to.

2 Tan lapu ed say panayam to ed laman sikato so natawag ya Anak na Dios, tan lapu ed say laman to so initer to ya oleyan na linawa na Ama, kanian sikato so Ama tan say Anak—

3 Say Ama, lapu ed sikato so inñginew ed pakapanyari na Dios; tan say Anak, lapu ed laman; dia ed onia sikato so nanmaliw ya Ama tan Anak—

4 Tan sikara so saksakey a Dios, on, say peteg ya Andi-angaan ya Ama ed tawen tan dalin.

5 Tan dia ed onia say laman nanmaliw a wala ed pakaoley na Espiritu, odino say Anak ed Ama, lapu ed sikara so saksakey a Dios, a mantepel na tukso, tan ag onabuloy ed tukso, balet intepel to a sikato so balawen da, tan pairapen da, tan pinapaway, tan ag-binirbir na saray totoo to.

6 Tan kayari to nia ya amin, kayari to a nankimey na dakel a makapakelaw a milagro ed limog na saray anak na totoo, sikato so niakar, on, angan unong ed inkuan nen Isaias, a siñga sakey a karnero ya emel ed arap na managkiskis, kanian ag to nilukasan so sañgi to.

7 On, anga ed sikato so iniakar da, ipasak ed krus, tan pateyen, angan say laman manmaliw a wala ed pakaoley na patey, say linawa na Anak so inakmon na linawa na Ama.

8 Tan dia ed onia say Dios ukbaren to so balor na patey, lapu ed sikato so tinmaluna ed patey; initer to ed Anak so pakapanyari a manmaliw a manamegley ed saray anak na totoo—

9 Lapu ed sikato so tinmukutok ed tawen, a wala ed sikato so sankaaraleman a panañgasi; a sikato so napno na panagabagey ed saray anak na totoo; a sikato so manalalagey ed nambaetan da tan say kaptekan; sikato so amultot ed saray balor na patey, ya inala to ed sikato a dili so saray kaugsan tan kasalanan da, lapu ed sikara so dinundon to, tan pinenek to so nakaukolan na kaptekan.

10 Tan natan ikuan ko ed sikayo, siopa so mañgibawag ed kailalakan to? Nia, ikuan ko ed sikayo, sanen say kamarerua to so ginawa to a bagat ed kasalanan nanengneng to so saray boleg to. Tan natan anto so nibaga yo? Tan siopa so boleg to?

11 Nia ikuan ko ed sikayo, siopaman a dinmeñgel ed salita na saray profeta, on, amin a masanto a profeta a namprofesiya nipaakar ed isabi na Katawan—ikuan ko ed sikayo, ya amin na saray dinmeñgel ed saray salita da, tan anisia a say Katawan dundonen to so saray totoo to, tan sikara so nampatuloy ya nantalaran ed saman ya agew a pamaandi na saray kasalanan da, ikuan ko ed sikayo, sikara so boleg to, odino sikara so mananawir ed panarian na Dios.

12 Lapu ed sikara sinakbat to so saray kasalanan da; sikara so kinanaan na patey to, pian dundonen to ra ed saray impankasalanan da. Tan natan, ag kasi sikara so saray boleg to?

13 On, tan ag kasi saray profeta, balang sakey a nilukasan to so sañgi to a mamprofesiya, ya ag apaktak ed kasalanan, say labay ko ya ibaga amin a masanto a profeta nanlapu ed ingapo na mundo? Ikuan ko ed sikayo sikara so boleg to.

14 Tan sikara iraman so añgipakabat na kareenan, sikara so añgawit na maong a balita na kaabigan, a sikara so añgipakabat na kilalaban; tan inkuan da ed Sion: Say Dios mo so mañguoley!

15 O agay la so karakepan na saray palandey a pantogtuonan na saray sali ra!

16 Tan lamet, agay la so karakepan na saray palandey a pantogtuonan na saray sali na saraman so anga ed natan sikara so mañgipapakabat na kareenan!

17 Tan lamet, agay la so karakepan na saray palandey a pantogtuonan na saray sali na saraman a dia ed kayari to nia sikara so mañgipakabat na kareenan, on, manlapu ed saya a panaon anga ed arapen tan anga ed ando la ya ando!

18 Tan nia, ikuan ko ed sikayo, aliwa ni a saya ya amin. Tan O agay la so karakepan na saray palandey a pantogtuonan na saray sali to na saman so mañgaawit na maong a balita, saman so añgiletneg na kareenan, on, angan say Katawan, a sikato so anundon ed saray totoo to; on, saman so añgiter na kilalaban ed saray totoo to;

19 Tan no ag lapu ed karundon a ginawa to ya onkana ed saray totoo to, a saya so niparaan la nanlapu ed inkiletneg na mundo, ikuan ko ed sikayo, no ag makaseñgeg ed saya, amin a katooan so nabalang.

20 Balet nia, say balor na patey so napaksot, tan say Anak so manoley tan awalaan na pakapanyari ed saray inaatey; dia ed ontan, ginawa to so kioli ed bilay na saray inaatey.

21 Tan wala so onsabi a kioli ed bilay, angan say unaan a kioli ed bilay; on, angan say kioli ed bilay na saraman so wala nen saman, tan wala natan, tan dia ed arapen, iñgen anga ed kioli nen Cristo ed bilay—a saya so akatawagan to.

22 Tan natan, say kioli na amin a profeta ed bilay, tan amin ya anisia ed saray salita ra, odino amin ya anumpal ed saray gangan na Dios, sikara so ombañgon ed unaan a kioli ed bilay; dia ed ontan, sikara so unaan ya onoli ed bilay.

23 Sikara so nabilay a miayam ed Dios ya anundon ed sikara; dia ed onia wala ed sikara so bilay ya andi-angaan ed panamegley nen Cristo, a sikato so amultot ed balor na patey.

24 Tan sikara iraman so awalaan na biang ed unaan a kioli ed bilay; tan sikara saraman so inaatey sakbay na insabi nen Cristo, dia ed ag da pikakabat, lapu ed ag nibawag ed sikara so kilalaban. Tan dia ed onia say Katawan so añgawit na kipawil ed saraya; tan wala so biang da ed unaan a kioli ed bilay, odino wala ed sikara so andi-angaan a bilay, lapu ed sikara so dinundon na Katawan.

25 Tan saray ankekelag ya ugogaw wala met ed sikara so andi-angaan a bilay.

26 Balet nia, tan ontakot kayo, tan ongiwgiw kayo ed arap na Dios, lapu ed nepeg kayo ya ongiwgiw; lapu ed say Katawan angapo so dundonen to ed saray onalsa sumpa ed sikato tan ompatey ed saray kasalanan da; on, angan amin na saraman so inaatey ed saray kasalanan da nanlapu la ed ingapo na mundo, lapu ed ginagala ra so inmalsa sumpa ed Dios, lapu ed sikakabat ira ed saray gangan na Dios, tan ag da inonor so saraya; sikara iraman so ag mibiang ed unaan a kioli ed bilay.

27 Dia ed ontan ag kayo kasi nepeg ya ongiwgiw? Lapu ed say kilalaban ag onsabi ed saray onia; lapu ed say Katawan angapo so dinundon to ed saray onia; on, ni say Katawan ag to ra nayarian a dundonen, lapu ed ag to nayari ya iburi ed inkasikato; lapu ed ag to nayarian ya iburi so kaptekan sano wala so pibibiang to nia.

28 Tan natan ikuan ko ed sikayo ya onsabi so panaon a say panañgilaban na Katawan so nibawag ed balang sakey a bansa, sankakanayon, salita, tan totoo.

29 On, Katawan, saray managbantay mo ikelyaw da so voces da; a manoolop so voces da sikara so mancancion; lapu ed sikara so mannenengneng ed mata tan mata, sano say Katawan awiten to lamet so Sion.

30 Mangayaga kayo, mancancion kayo a manoolop, sikayo ya andi-kakanaan a pasen na Jerusalem; lapu ed say Katawan niligliwa to so saray totoo to, dinundon to so Jerusalem.

31 Say Katawan impanengneng to so masanto a taklay to ed saray mata na amin a bansa; tan say amin a sampot na dalin nanengneng da so pañgilaban na Dios tayo.