1 Tan agawa a kayari a sinumpal nen Mosiah so ingangan nen ama to, tan nangawa na pakabat ed lapag na amin a dalin, saray totoo ed amin a dalin so nantitipon, pian sikara so onla ed templo ya ondeñgel ed saray salita nen ari Benjamin ya ibalikas to ed sikara.

2 Tan wala so dakel a bilang da, angan ontan la so karakel da kanian ag da la binilang; lapu ed sikara so dinmakel a mapalalo tan binmolaslas a maong dia ed dalin.

3 Tan inala ra met so saray pañguloan a kilaw na saray ayayep da, pian saraya so ibagat da tan poolan a bagat unong ed gangan nen Moises;

4 Tan ontan met pian iter da so pisasalamat ed Katawan a Dios da, lapu ed sikato so añgipaway ed sikara nanlapu ed dalin na Jerusalem, tan sikato so añgiagel ed sikara ed lima na saray kabusol da, tan sikato so nanturo na totoo a maptek a nanmaliw a managbañgat da, tan ontan met sakey a too a maptek a nanmaliw ya ari ra, a sikato so añgiletneg na kareenan ed dalin na Zarahemla, tan sikato so nambañgat ed sikara a sumpalen da so saray gangan na Dios, kanian sikara so nangayaga tan napno na aro ed Dios tan ed amin a too.

5 Tan agawa sanen linma ra ed templo, impaalagey da so saray abong-abong da ya abel ed kaliber-liber, balang sakey a too unong ed boleg to, a kaiba so asawa to, tan saray anak to a lalaki, tan saray anak to a bibii, tan saray lalaki ya anak da, tan saray bibii ya anak da, manlapu ed sankapañguloanan mampaleksab ya anga ed sankayugtanan, balang sakey a boleg so akabiig ed sakey tan sakey.

6 Tan impaalagey da so saray abong-abong da ya abel ed kaliber-liber na templo, a say puerta na abong-abong ya abel na balang sakey a too so akaarap ed templo, pian angano wala ra ed dalem na abong-abong da ya abel tan nareñgel da ni so saray salita ya ibalikas nen ari Benjamin ed sikara;

7 Lapu ed say katooan so masiado a dakel kanian si ari Benjamin ag to ra nabañgatan ya amin ed loob na templo, kanian ingangan to say sakey a tori so ipatalindeg, pian dia ed ontan nareñgel na amin a totoo to so saray salita ya ibalikas to ed sikara.

8 Tan agawa a ginapoan to so mansalita ed saray totoo to manlapu ed tori; tan ag da nareñgel ya amin so saray salita to lapu ed kinarakel na totoo; dia ed ontan impaisulat to so saray ibabalikas to tan impaibunog to ed saraman so totoo ya ag la narandan na voces to, pian naawat da met so saray salita to.

9 Tan saraya so salita ya imbalikas to tan ingangan to ya isulat da, ya inkuan to: Kaagian ko, sikayo ya amin a nantitipon ed inkasikayo a dili, sikayo a makareñgel ed saray salita ya ibalikas ko ed saya ya agew; tan ag ko ingangan ya onla kayo dia pian leglemewen yo so saray salita ya ibagak, balet nepeg yo so ondeñgel ed siak, tan lukasan yo so saray layag yo pian makadñgel kayo, tan saray puso yo pian sikayo so makatalus, tan saray kanunotan yo pian saray misterio na Dios so nalukasan ed pakamuria yo.

10 Ag takayo ginangan ya onla dia pian ontakot kayo ed siak, odino nunoten yo a siak a dili so atagtagey nen say sakey a too a pinalsa.

11 Balet siñga ak sikayo, a nasasakopan met na amin a kanengneñgan na sulit na laman tan kanunotan; iñgen siak so pinili na saya a totoo, tan pinasanto ak nen amak tan inabuloyan na lima na Katawan pian siak so manmaliw a sakey a manañgoley tan sakey ya ari ed saya a totoo; tan siak so inasikaso tan iniagel na ag-mipara a pakapanyari to, a manlingkor ed sikayo ed angaan na nayarian ko, ed nunot tan biskeg ya initer na Katawan ed siak.

12 Ikuan ko ed sikayo lapu ed siak so naabuloyan a mamalabas ed saray agew ko ed panaglingkor ed sikayo, ya anga ed saya a panaon, tan ag ko inanap so balitok odino pilak odino antokaman a nengneng na kayamanan ed sikayo;

13 Ni say inabuloyan ko a sikayo so nipukok ed saray pañgawan, ni say gawaen yo ya aripen so sakey ya onkana ed sananey, ni say sikayo so mamatey, odino mantulisan, odino mantakew, odino mangawa na panagkamalala; ni say inabuloyan ko a mangawa kayo na antokaman a nengneng na karelmeñgan, tan imbañgat ko ed sikayo a sumpalen yo so saray gangan na Katawan, ed amin a beñgatla ya ingangan to ed sikayo—

14 Tan angan, siak, a dili, nansagpot ak ed saray dili a limak pian makapanlingkor ak ed sikayo, tan ag kayo nabelatan ed saray buis, tan angapo so beñgatla ya onsabi a makapaermen a sakbaten yo—tan dia ed saraya ya amin a beñgatla a sinalitak, sikayo a dili so tasi ed saya ya agew.

15 Iñgen, kaagian ko, ag ko ginawa so saraya pian siak so mampanta, ni say sinaglawik so saraya a beñgatla pian sikayo so pankasalananen ko; balet imbagak so saraya a beñgatla pian nakabatan yo a nayarian ko so onebat ed malinis a consiensia ed arapan na Dios ed saya ya agew.

16 Nia, ikuan ko ed sikayo lapu ed inkuan ko la ed sikayo a pinalabas ko so saray agew ko a nanlingkor ed sikayo, ag ko kinaliktan so mampanta, lapu ed wala ak met labat ed panaglingkor na Dios.

17 Tan nia, ibagak ed sikayo so saraya a beñgatla pian naaralan yo so kakabatan; pian naaralan yo sano sikayo so manlilingkor ed kapara yo a pinalsa sikayo labat so manlilingkor ed Dios yo.

18 Nia, tinawag yo ak ya ari yo; tan no siak, a tatawagen yo ya ari yo, mansasagpot ak pian manlilingkor ed sikayo, ag kasi sirin nakaukolan a mansagpot kayo pian makapanlingkor kayo ed balang sakey?

19 Tan nia met, no siak, a tinawag yo ya ari yo, inkana to so saray agew to ed panaglingkor ed sikayo, tan iñgen sikato so wala ed panaglingkor ed Dios, kanepegan to kasi so makaawat na pisasalamat manlapu ed sikayo, O nakaukolan a sikayo so misalamat ed mañgatatawen ya Ari yo!

20 Ikuan ko ed sikayo, kaagian ko, no iter yo ya amin so pisasalamat tan pandayew a wala ed tibukel a kamarerua yo ed angaan na pakapanyari a kayarian yo, ed saya a Dios ya amalsa ed sikayo, tan añgampaya tan añgiagel ed sikayo, tan amaseñgeg a sikayo so mangayaga, tan añgiabuloy a sikayo so mambilay ed kareenan ed balang sinansakey—

21 Ikuan ko ed sikayo no panlingkoran yo so saman so amalsa ed sikayo manlapu la ed gapo, tan mañgiaagel ed sikayo ed inagew-agew, ed pañgipapabayes to ed sikayo na linawa, pian sikayo so mambilay tan ongalaw tan mankimey unong ed dili a linawa yo, tan angan tutuloñgan to kayo ed sakey a bekta anga ed sananey—ikuan ko, no sikato so panlingkoran yo ed amin a tibukel na kamarerua yo iñgen sikayo ni so andi-gungona ya igagangan.

22 Tan nia, say nakaukolan to ed sikayo say panumpal yo ed saray gangan to; tan insipan to ed sikayo no sumpalen yo so saray gangan to sikayo so onaliguas ed dalin; tan ag mañgoman angan kapigan ed saya ya imbaga to; dia ed ontan, no sumpalen yo so saray gangan to sikayo so bendicionan to tan paaliguasen to.

23 Tan natan, dia ed unaan a kipapasen, sikayo so pinalsa to, tan initer to ed sikayo so saray bilay yo, a makaseñgeg ed saya sikayo so akautang la ed sikato.

24 Tan dia ed komadua, kinaukolan to a nepeg a gawaen yo so unong ed ingangan to ed sikayo; a no saya so gawaen yo, tampol a bendicionan to kayo; tan dia ed onia sikayo so abayaran to. Tan siansia sikayo ni so akautang ed sikato, tan natan, tan dia ed arapen, tan dia ed ando la ya ando; dia ed ontan, anto so nayarian yo ya ipanta?

25 Tan natan tepeten ko, wala kasi so nayarian yo ya itangsit ed inkasikayo? Ebatan takayo, Angapo. Ag yo nikuan a magmaong kayo ni nen say sapok na dalin; iñgen sikayo so apalsa a nanlapu ed sapok na dalin; balet nengneng yo, saya so kayarian na saman so amalsa ed sikayo.

26 Tan siak, angan say siak, a tatawagen yo ya ari yo, ag ak magmaong nen say sikayo; lapu ed siak met so nanlapu ed sapok. Tan nanengneng yo a siak la so matakken, tan ñgalñgalik la iawat so saya a laman ko ed ina to a dalin.

27 Dia ed ontan, unong ed inkuan ko ed sikayo siak so nanlingkor ed sikayo, a nankurang katekep na malinis a consiensia ed arap na Dios, angan dia ed saya a panaon siak so amaseñgeg a mantitipon kayo, pian naalmo ak ya angapo so tetel, tan pian say dala yo so ag la onla ed siak, sano siak so onalagey ya okomen na Dios ed saray beñgatla ya ingangan to ed siak nipaakar ed sikayo.

28 Ikuan ko ed sikayo a siak so añgigangan a sikayo so mantitipon pian naekal ed saray kawes ko so dala yo, ed saya a panaon a ñgalñgali ak la onlasur ed lubok ko, pian onlasur ak ed kareenan, tan say ag-ompatey ya espirituk so mitipon ed koro ed tagey pian micancion na saray pandayew ed saya a maptek a Dios.

29 Tan arum ni, ikuan ko ed sikayo a siak so añgigangan a sikayo so mantitipon, pian ibagak ed sikayo ya ag la nayari a siak so managbañgat yo, ni say ari yo;

30 Tan angan dia ed saya a panaon, say tibukel na kalamanan ko so mangiwgiw a mapalalo legan a sasalien ko so mansalita ed sikayo; balet say Katawan a Dios aampayaen to ak, tan siak so inabuloyan to pian makapansalita ak ed sikayo, tan ingangan to ak a mañgibaga ed sikayo ed saya ya agew, a say laki ya anak ko a si Mosiah so ari yo tan sakey a manañgoley ed sikayo.

31 Tan natan, kaagian ko, pirawat ko a saya so gawaen yo a siñga ginawa yo la. Unong a sinumpal yo so saray gangan ko, tan ontan met ed saray gangan nen amak, tan sikayo so inmaliguas, tan sikayo so niagel ed kapelag ed saray lima na kabusol yo, ontan met no sumpalen yo so saray gangan na anak ko a laki, odino saray gangan na Dios ya iawat to ed sikayo ed panamegley to, onaliguas kayo ed dalin, tan saray kabusol yo so angapo so pakayari ra ed sikayo.

32 Balet, O sikayo a totook, manalwar kayo ag la piga ya onletaw so baliñgaan ed limog yo, tan onkiling kayo ya ononor ed mauges ya espiritu, unong ed sinalita nen amak a Mosiah.

33 Tan nia, wala so sakey a pañgaskasian a nibesñgaw ed siopaman ya onkiling ya ononor ed saman ya espiritu; tan no sikato so ondeñgel ya ononor ed saman, tan mansiansia tan ompatey ed kasalanan to, saman lamlamang so oninum na kaayew ed dili a kamarerua to; tan awaten to ya upa to so andi-angaan a dusa, makaseñgeg sinumpa to so gangan na Dios a sumlang ed dili a pikakabat to.

34 Ikuan ko ed sikayo, angapo so angan sakey ed limog yo, likud ed saray ankekelag ya ugogaw ya ag ni abañgatan nipaakar ed saraya a beñgatla, balet kabat yo a sikayo so andi-angaan ya akautang ed mañgatatawen ya Ama yo, ya iter yo ed sikato so amin a wala ed sikayo tan say inkasikayo; tan abañgatan kayo met na nipaakar ed saray kasulatan a kawalaan na saray profesiya a sinalita na saray masanto a profeta, anga ed saman so panaon a si ama tayo, si Lehi, so tinmaynan ed Jerusalem.

35 Tan ontan met, amin a sinalita na kaamaan tayo ya anga ed natan. Tan nia ontan met, sikara so nansalita na saray ingangan na Katawan ed sikara; dia ed ontan, sikara so maptek tan matua.

36 Tan natan, ikuan ko ed sikayo, kaagian ko, kayari yo ya akabatan tan nibañgat ed sikayo so saraya ya amin a beñgatla, no sikayo so onsumpa tan ontoñgañga ed saray sinalita la, pian onoyos kayo ed Espiritu na Katawan, pian angapo la so pasen to ed sikayo a mañgitunton ed dalan na kakabatan pian sikayo so nabendicionan, onaliguas tan niagel—

37 Ikuan ko ed sikayo, a say too a mangawa na onia, sikato met lamlamang so ompaparungtal ed mapalaway ya panagalsa sumpa ed Dios; dia ed ontan sikato so makiling a mañgonor ed mauges ya espiritu, tan manmaliw a kabusol na amin ya inkamatunong; dia ed ontan, angapo la ed sikato so napasenan na Katawan, lapu ed sikato so ag manayam ed saray aliwa a masanto a templo.

38 Dia ed ontan no saman a too so ag mambabawi, tan mansiansia tan ompatey a kabusol na Dios, say pankaukolan na madivino a kaptekan liiñgen to so ag-ompatey a kamarerua to ed maliksi a liknaan ed pannodnunot na dili a kasalanan to, a makaseñgeg na ikebet to ed imaton na Katawan, tan napano so pagew to na pannodnunot ed kasalanan to, tan say sulit, tan paniñgel, a saya so siñga apoy ya ag-nasebseban, a say dalang to mamaatagey ed ando la ya ando.

39 Tan natan ikuan ko ed sikayo, say panañgasi angapo la so pankanepegan to ed saman a too; dia ed ontan say sankasampotan a tutol ed sikato so say panlikna to na andi-angaan a dusa.

40 O, sikayo ya amin a mamatakken, tan ontan yo met ed saray totoo a wala ed kalangweran, tan sikayo ya ankekelag ni ya ugogaw a makatalus la ed saray salitak, lapu ed nansalita ak na malinlinew ed sikayo pian natalusan yo, kerewen ko a sikayo so iliing ed pakanunot ed say makapataktakot a kipapasen na saraman so napelag ed impankasalanan.

41 Tan arum ni, pilalek ko a nunoten yo so mapalar tan maliket a kipapasen na saraman so manusumpal ed gangan na Dios. Tan nengneng yo, sikara so abendicionan ed amin a beñgatla, mandapag dia ed inkalaman tan inkamaespiritu; tan no magnayon ira a matuor ya anga ed kasampotan sikara so naawat ed tawen, pian sikara so miayam ed Dios ed kipapasen na andi-angaan a liket. O nunoten yo, nunoten yo a saraya a beñgatla so tua; lapu ed say Katawan a Dios so añgibalikas ed saya.