1 On, angan si Isaias ag to kasi inkuan onia: Siopa so anisia ed saray imbaga mi, tan siopa so añgipatnagan na Katawan ed taklay to?

2 Lapu ed sikato so ontubo ed arap to a siñga sakey a malangwer a tanaman, tan siñga sakey a lamut ya ompaway ed amaga a dalin; angapo so kanengneñgan to ni say karakepan to; tan sano saya so nanengneng tayo angapo so karakepan to a pampilalekan tayo.

3 Sikato so binalaw tan ag-inawat na saray totoo; sakey a too na saray ermen, tan kabat to so kaermenan; tan saray lupa tayo so inamot tayo ed sikato; sikato so binalaw, tan sikato so ag tayo pinabli.

4 Petepeteg a sikato so anakbat ed saray kaermenan tayo, tan inawit to so saray ermen tayo; iñgen sikato so pinabli tayo ya abakbak, a binakbak na Dios, tan nanlikna na kasegsegañgan.

5 Balet sikato so asugatan lapu ed saray kasalanan tayo, sikato so asireg-sireg lapu ed saray kasalanan tayo; say dusa na kareenan tayo so wala ed sikato; tan dia ed saray bakat na latiko ed sikato sikatayo so atambal.

6 Amin tayo, so siñga karnero, ya abalang a sinmian; balang sakey so binmalingling ed labay to a dalan; tan say Katawan sinakbat to ed inkasikato so kaugsan tayo ya amin.

7 Sikato so adusa, tan sikato so apasegsegang, iñgen ag to nilukasan so sañgi to; sikato so naawit a siñga sakey a kordero ed panagpateyan, tan siñga sakey a karnero ed arap na saray komikiskis a nampaemel kanian ag to nilukasan so sañgi to.

8 Sikato so inala ed pañgawan tan nanlapu ed inkaokom; tan siopa so manekder ed kapolian to? Lapu ed sikato so nisian ed dalin na saray mambibilay; lapu ed kasalanan na saray totook sikato so abakbak.

9 Tan sikato so nipumpon a kaiba to so saray marelmeng, tan saray mamayaman ed impatey to; lapu ed angapo so ginawa to a mauges, ni say panamaliñgo angapo ed sañgi to.

10 Iñgen kinaliktan na Katawan a sikato so nabakbak; sikato so inyan to ed kaermenan; sano gawaen to so kamarerua to a bagat ed kasalanan nanengneng to so saray boleg to, padukeyen to so saray agew to, tan say kaliktan na Katawan so onaliguas ed lima to.

11 Nanengneng to so kasegsegañgan na kamarerua to, tan sikato so napenek; makaseñgeg ed pikakabat to say matunong ya igagangan ko patunoñgen to so dakel; lapu ed sakbaten to so saray kasalanan da.

12 Dia ed ontan sikato so iapag ko na kabiañgan a kaiba so saray makapanyari, tan sikato so mipaldua ed saray asamsam a kaiba so saray mabiskeg; lapu ed initer to so liknaan to nipaakar ed ipapatey; tan sikato so nibilang ed saray managkasalanan; tan sikato so anakbat na kasalanan na saray dakel, tan sikato so nangawa na panamegley ed saray makasalanan.