1 Tan lamet kaagian ko, tawagen ko so imano yo, lapu ed wala ni so labay ko a salitaen ed sikayo; tan nia, wala ni so beñgatla ya ibagak ed sikayo nipaakar ed saman so onsabi.

2 Tan saray beñgatla ya ibagak ed sikayo so impakabat ed siak na sakey ya angel a nanlapu ed Dios. Tan inkuan to ed siak: Bañgon ka; tan binmañgon ak, tan anengneng ko ya akaalagey ed arapan ko.

3 Tan inkuan to ed siak: Bañgon ka, tan deñgel mo so saray ibagak ed sika; tan nia, linma ak dia pian ibagak ed sika so maliket a balita a makapagayaga.

4 Lapu ed say Katawan dineñgel to so saray pikakasim, tan tinutolan to so inkamatunong mo, tan imbaki to ak ya ibawag ko ed sika pian mangayaga ka; tan pian ipakabat mo ed saray totoom, pian napano met ira na gayaga.

5 Tan nia, say panaon onsabi, tan ag la mabayag, a dia ed pakapanyari, say Katawan a Makapanyari ed Amin a sikato so mañguoley, a sikato nen saman, tan natan nanlapu ed andi-angaan ya anga ed andi-angaan, so onlasur manlapu ed tawen ed limog na saray anak na totoo, tan sikato so manayam ed tabernaculo a pitek, tan sikato so onla ed limog na saray totoo, a mangawa na saray makapakelaw a milagro, a siñga say pantambal ed saray mansasakit, say pamaoli ed bilay ed saray inaatey, a gawaen to so saray lopoy ya onakar, saray bulag so mañgawat na pakanengneng, tan saray telek so makadñgel, tan tambalen to so amin a nengneng na bublay.

6 Tan papawayen to so saray demonyo, odino saray mauges ya espiritu a manaayam ed puso na saray anak na totoo.

7 Tan nia, sikato so mantepel na saray tukso, tan sakit na laman, eras, inkapgaan tan banal na laman, angan nagkalalo ni nen say nitepel na sakey a too, likud ed say patey; tan nengneng yo, say dala ompaway manlapu ed amin a señgeg na bago to, lapu ed agay la so paniñgel to makaseñgeg ed karelmeñgan tan saray karumsisan na saray totoo to.

8 Tan sikato so natawag a Jesu Cristo, say Anak na Dios, say Ama na tawen tan dalin, say Manamalsa na amin a beñgatla manlapu ed gapo; tan say ina to tawagen na Maria.

9 Tan nia, sikato so onla ed saray dili a kayarian to, pian say kilalaban so onsabi ed saray anak na totoo angan dia ed panamegley na pananisia ed ñgaran to; tan angan kayari na saya ya amin sikato so ibilang da a sakey a too, tan ikuan da a wala ed sikato so demonyo, tan sikato so bakbaken da, tan ipasak da ed krus.

10 Tan sikato so onoli ed bilay ed komatlo ya agew a manlapu ed saray inaatey; tan nia, sikato so manalalagey a mañgokom ed mundo, tan nengneng yo, saraya ya amin a beñgatla so nagawa pian sakey a matunong a panañgokom so onsabi ed saray anak na totoo.

11 Tan nengneng yo, tan say dala to so imbagat to lapu ed saray kasalanan na saraman so nigapol lapu ed impankasalanan nen Adan, ya inatey ira ya ag da akabatan so linawa na Dios nipaakar ed sikara, odino sikara so ag-mikabat a sikara so nankasalanan.

12 Balet abagey, abagey so siopaman a sikakabat a sikara so tinmuñgañga sumpa ed Dios! Lapu ed say kilalaban ag onsabi ed sikara no ag dia ed panamegley na pambabawi tan pananisia ed Katawan Jesu Cristo.

13 Tan say Katawan a Dios imbaki to so saray masanto a profeta to ed limog na amin ya anak na totoo, a mañgibawag ed saraya a beñgatla ed balang sakey a sankakanayon, bansa, tan salita, pian siopaman a manisia a si Cristo so onsabi, sikara met lamlamang so mañgawat na pamaandi na saray kasalanan da, tan mangayaga ed mapalalo a gayaga, angan siñga sikato la so sinmabi ed limog da.

14 Iñgen say Katawan a Dios anengneng to a saray totoo to so totoo ya awalaan na matalker a teñger, tan initer to ed sikara so sakey a gangan, angan say gangan nen Moises.

15 Tan dakel so saray pakapatnagan, tan saray pakelaw tan saray kanengneñgan, tan saray anino ya impanengneng to ed sikara, nipaakar ed isabi to; tan ontan met saray masanto a profeta imbawag da ed sikara so nipaakar ed isabi to; tan iñgen pinaawet da so saray puso ra, tan ag da atalusan a say gangan nen Moises angapo so kakanaan to no ag dia ed panamegley na dala na bagat to a pamaandi na kasalanan.

16 Tan angan no bilang saray ankekelag ya ugogaw so makapankasalanan sikara so ag nilaban; balet ikuan ko ed sikayo a sikara so mapalar; tan nia, unong ed si Adan, odino lapu ed inkapalsa, sikara so nigapol, angaman ontan say dala nen Cristo paandien to so saray kasalanan da.

17 Tan arum ni, ibagak ed sikayo, angapo so arum a ñgaran a niiter ni say wala so arum a dalan odino pamaakaran a say kilalaban nayari ya onsabi ed saray anak na totoo, no ag labat dia ed loob tan panamegley na ñgaran nen Cristo, say Katawan a Makapanyari ed Amin.

18 Tan nia sikato so mañgokom, tan say panañgokom to so maptek; tan say melag ya ogaw ag nabalang no inatey ed kaogawan to; balet saray totoo inumen da so kaayew ed saray dili a kamarerua ra likud no sikara so mampaabeba ed inkasikara tan manmaliw ira a siñga ankekelag ya ugogaw, tan manisia ra a say kilalaban onia nen saman, tan onia natan, tan saya so onsabi, dia ed loob tan panamegley na pakapanyari na dala na bagat nen Cristo a pamaandi na kasalanan, say Katawan a Makapanyari ed Amin.

19 Lapu ed say inkaugali na too so sakey a kabusol na Dios, tan saya so nanlapu la ed inkigapol nen Adan, tan lawas la, ed ando la ya ando, likud no sikato so ontolok ed saray panagayat na Masanto ya Espiritu, tan ibeneg to so inkaugali na too tan manmaliw a santo ed panamegley na bagat nen Cristo a Katawan a pamaandi na kasalanan, tan manmaliw a siñga ogaw, matolok, maolimek, mapaabeba, maanos, napno na aro, maabuloy ya ononor ed amin a beñgatla a say Katawan nanengneng to a manepeg ya ipalikna ed sikato, angan siñga sakey ya ogaw ya ontulok ed ama to.

20 Tan nagkalalo ni, ikuan ko ed sikayo, say panaon so onsabi sano say pikakabat nipaakar ed Manañgilaban so ontayak ed amin a bansa, sankakanayon, salita, tan totoo.

21 Tan nia, sano onsabi so saman a panaon, angapo so narumog ya ag-nankasalanan ed arap na Dios, likud ed saray ankekelag ya ugogaw, no ag dia labat ed panamegley na pambabawi tan pananisia ed ñgaran na Katawan a Dios a Makapanyari ed Amin.

22 Tan angan dia ed saya a panaon, sano sikayo so añgibañgat ed saray totoo yo nipaakar ed saray beñgatla ya ingangan na Katawan a Dios ed sikayo, angan sirin sikara so narumog ya angapo so pakatetelan dia ed pakanengneng na Dios, unong labat ed saray salita a sinalitak ed sikayo.

23 Tan natan nibalikas ko la so saray salita ya ingangan na Katawan a Dios ed siak.

24 Tan onia so inkuan na Katawan: Saraya so ontalindeg a mabiskeg a pamaneknek sumpa ed saya a totoo, ed agew na panañgokom; dia ed saya sikara so naokom, balang sakey a too unong ed saray kimey to, no bilang saraya so maong, odino saraya so mauges.

25 Tan sano saraya so mauges sikara so niakar ed sakey a makapataktakot a pakamurian ed dili a kasalanan tan karumsisan da, a saya so gapo na ikebet da manlapu ed imaton na Katawan a paarap ed kipapasen a masegsegang tan andi-angaan a dusa, a manlapu diman ag la ra makapawil; dia ed ontan ininum da so kaayew ed saray dili a kamarerua ra.

26 Dia ed ontan, sikara so inminum ed kupa na sanok na Dios, a saya a kaptekan ag niburi na malaglaem nen say pañgiburi a si Adan so nigapol lapu ed impibiang to ed nisebel a buñga; dia ed ontan, magnayon ya angapo la so pamamirbir na panañgasi ed sikara.

27 Tan say panirap da so siñga sakey a dayat na apoy tan azufre, a say dalang to ag-nasebseban, tan say asewek to mampaatagey ed ando la ya ando. Dia ed onia say Katawan ingangan to ed siak. Amen.