1 Tan natan agawa sanen asumpal la nen Abinadi so saraya a salita, say ari ingangan to ed saray sacerdote to a sikato so alaen da tan sikato so pateyen da.

2 Balet wala so sakey ed limog da a say ñgaran to Alma, a sikato met so nanlapu ed poli nen Nephi. Tan sikato so sakey a malangwer ni a too, tan sinisia to so saray salita ya imbalikas nen Abinadi, lapu ed kabat to so nipaakar ed saray kaugsan a pinaneknekan nen Abinadi sumpa ed sikara; dia ed ontan ginapoan to so mikasi ed ari ya ag to mampasnok ed kinen Abinadi, balet itepel to a sikato la so ontaynan ed kareenan.

3 Balet say ari so lalo a sinmanok, tan ingangan to a si Alma so papawayen da ed limog da, tan impatumbok to ed saray igagangan to pian sikato so pateyen da.

4 Balet sikato so binmatik nanlapu ed arap da tan iniamotan to ra kanian ag da narumog. Tan lapu ed sikato so akaamot ed dakel ya agew insulat to so saray salita ya imbalikas nen Abinadi.

5 Tan agawa a say ari ingangan to so saray taga-bantay to a liktoben da si Abinadi tan sikato so alaen da; tan sikato so binalor da tan imbantak da ed pañgawan.

6 Tan kayari na talora ya agew, kasumpal to ya akitalusan ed saray sacerdote to, ingangan to a sikato so awiten da lamet ed arap to.

7 Tan inkuan to ed sikato: Abinadi, akarumog kami na señgegan na nankasalanan mo, tan sika so manepeg a pateyen.

8 Lapu ed imbagam a say Dios a dili so onlasur ed limog na saray anak na totoo; tan natan, lapu ed saya sika so pateyen likud no babawien mo ya amin so saray salita ya imbalikas mo a mauges nipaakar ed siak tan saray totook.

9 Natan si Abinadi inkuan to ed sikato: Ikuan ko ed sika, ya ag ko babawien so saray salita ya imbalikas ko ed sika nipaakar ed saya a totoo, lapu ed saraya so tua; tan pian nakabatan mo so inkapeteg na saraya kanian intepel ko a siak so napelag ed saray lima yo.

10 On, tan mantepel ak ya anga ed patey, tan ag ko babawien so saray salitak, tan saraya so ontalindeg a paneknek sumpa ed sika. Tan no siak so pateyen yo paterteren yo so dala ya angapo so kasalanan, tan saya met so ontalindeg a paneknek sumpa ed sikayo dia ed sampot ya agew.

11 Tan natan si ari Noah ibulos to la lawari, lapu ed tinmakot ed saray salita to; lapu ed tinmakot ag la piga say panañgokom na Dios so onsabi ed sikato.

12 Balet saray sacerdote inkelyaw da so saray voces da sumpa ed sikato, tan sikato so ginapoan da a tetelen, a kuan da: Sikato so nampauges ed ari. Dia ed ontan say ari ginmalaw so sanok to sumpa ed sikato, tan sikato so iniawat to pian sikato so pateyen.

13 Tan agawa a sikato so inala ra tan binalor da, tan sininit da so baog to ed panamegley na saray sañga a nañgalab, on angan dia ed patey.

14 Tan natan sanen say apoy so ginmapo la a napoolan, sikato so inmakis ed sikara, a nankuan:

15 Nengneng yo, angan unong ed ginawa yo ed siak, ontan met so nagawa a saray boleg yo a dakel so mantepel na sakit a siñga itetepel ko, angan say sakit na patey ed panamegley na apoy; tan saya lapu ed sikara so manisia ed panañgilaban na Katawan a Dios da.

16 Tan nagawa a sikayo so mantepel na amin a nengneng na sakit lapu ed saray kasalanan yo.

17 On, tan sikayo so nabakbak ed balang sakey a lima yo, tan sikayo so nasunson tan nataytayak a mampawil-pawil, a siñga say olop na atap ya ayayep ya osilan na atap tan masebeg a monanakap.

18 Tan dia ed saman ya agew sikayo so anopen, tan sikayo so alaen da ed lima na saray kabusol yo, tan dia ed ontan sikayo so mantepel, a siñga itetepel ko, na sakit na patey ed apoy.

19 Dia ed onia say Dios gawaen to so bales ed saraman so manderal ed saray totoo to. O Dios, awat mo pa so kamareruak.

20 Tan natan, sanen nibaga nen Abinadi so saraya a salita, sikato so niparukol, lapu ed sikato so nantepel na patey ed panamegley na apoy; on, sikato so pinatey da lapu ed ag to iburi so saray gangan na Dios, a kinapotan to so katuaan na saray salita to ed panamegley na impatey to.