1 Tan agawa a si Limhi tan saray totoo to so pinmawil ed ciudad na Nephi, tan ginapoan da so manayam lamet ed saman a dalin ed kareenan.

2 Tan agawa a dia ed inlabas na dakel ya agew saray Lamanite ginapoan da lamet so ongalaw a sisasanok sumpa ed saray Nephite, tan ginapoan da so ompegdat ed ketegan na dalin ed kaliber-liber.

3 Natan ag da ra nayarian a pateyen, lapu ed saman so samba na ari a ginawa to ed si Limhi; balet sikara so tamtampalen da ed lupa, tan sikara so uoleyan da; tan ginapoan da a pabelaten so sasakbaten da ed saray beneg da, tan sikara so sinunson da a siñga emel ya asno—

4 On, saraya ya amin so agawa ya akasumpalan na salita na Katawan.

5 Tan natan saray ansakit a liliknaen na saray Nephite so mapalalo, tan angapo so polaing pian nilaban da so inkasikara ed saray lima da, lapu ed sikara so niliktob na saray Lamanite ed amin a gilig.

6 Tan agawa a saray totoo ginapoan da so manñguroñguro ed ari lapu ed saray ansakit a liliknaen da; tan ginapoan da so mampilalek ya onla sumpa ed sikara a milaban. Tan lalo ya impalikna ra ed ari lapu ed saray dalem da; dia ed ontan iniabuloy to ed sikara a gawaen da la so onong ed kaliktan da.

7 Tan sikara so nantitipon lamet, tan insulong da so saray kirlong da, tan sikara so linma ya sumpa ed saray Lamanite pian sunsonen da ra a papawayen ed dalin da.

8 Tan agawa a sikara so tinalo na saray Lamanite, tan sikara so sinunson da a pasener, tan dakel so pinatey da ed sikara.

9 Tan natan wala so baleg a kaermenan tan paniñgel ed limog na saray totoo nen Limhi, say abalo a bii paneermenan to so asawa to, saray anak a laki tan bii so maneermen ira lapu ed ama ra, tan saray agagi a lalaki ed saray kaagian da.

10 Natan wala so dakel ya abalo a bibii ed saman a dalin, tan sikara so nannañgis a mapalalo ed inagew-agew, lapu ed baleg a takot da ed saray Lamanite a sinmabi ed sikara.

11 Tan agawa a say ag-tinmonda ya akis da so amagalaw ed saray nakdaan a totoo nen Limhi mampasnok sumpa ed saray Lamanite; tan sikara lamet so linma ya akilaban, balet sikara lamet so asunson ya apapawil, a nanlikna ra na dakel ya abalang.

12 On, sikara lamet so linma ed komatlo a panaon, tan nantepel ira lamet ed onia a kanengneñgan; tan saraman so ag inatey amawil ira lamet ed ciudad na Nephi.

13 Tan sikara so nampaabeba ed inkasikara a dili angan dia ed sapok, ya inabuloyan da so inkasikara ed pako na inkaaripen, ya iniabuloy da ed inkasikara a dili a nabakbak, tan nasunson a mampawil-pawil, tan sikara so dinetdetan da, onong ed pankaliktan na saray kabusol da.

14 Tan nampaabeba ra ed inkasikara a dili angan dia ed kaaraleman na panagpaabeba; tan sikara so nampikasi a madaleyet ed Dios; on, angan sanagew so impampikasi ra ed Dios da pian ilaban to ra ed saray kasegsegañgan da.

15 Tan natan say Katawan matantan ya ondeñgel ed saray nañgis da lapu ed saray kaugsan da; angaman ontan say Katawan dineñgel to so saray nañgis da, tan ginapoan to a palemeken so puso na saray Lamanite kanian ginapoan da a palemewen so saray ipapasakbat da ed sikara; iñgen say Katawan anengneng to ya ag ni makana a sikara so ilaban to ed inkaaripen.

16 Tan agawa a ginapoan da so onaliguas na daiset ed saman a dalin, tan ginapoan da so mantanem na saray dawa ed sawaan, tan ontan met ed saray karnero, tan saray baka, ya ag la ra nanlikna na eras.

17 Natan wala so baleg a bilang na saray bibii, a dakel nen saray lalaki; dia ed ontan si ari Limhi ingangan to a balang sakey a laki so mañgiapag na napambilay ya ikana na saray abalo a bibii tan saray anak da, pian sikara so ag ompatey ed eras; tan saya so ginawa ra lapu ed kinarakel na saray bilang na saray apatey.

18 Natan saray totoo nen Limhi sikara so nantitipon a siñga saksakey a laman onong ed angaan na nayarian da, tan insiguro ra so saray bokel na dawa tan saray ayayep da;

19 Tan say ari ag to nanmatalekan so kiagel to ed paway na padir na ciudad, likud no kaiba to so saray taga-bantay to, ag la piga dia ed antokaman a pamaakaran sikato so napelag ed lima na saray Lamanite.

20 Tan ingangan to ed saray totoo to a mambantay ira ed kaliber-liber na dalin, ag la piga a dia ed antokaman a pamaakaran naerel da so saraman so sacerdote a binmatik ed kalawakan, a sikara so nantakew ed saray bibii ya anak na saray Lamanite, tan saya so señgegan na baleg ya inkaderal a sinmabi ed sikara.

21 Lapu ed pilalek da a sikara so naala ra pian sikara so dusaen da; lapu ed sikara so ompepegdat ed dalin na Nephi no labi, tan aalaen da so saray bokel na dawa ra tan dakel ed saray ankabli a beñgatla; dia ed ontan sikara so nanalagar ed sikara.

22 Tan agawa ya angapo la so gulo ed baetan na saray Lamanite tan saray totoo nen Limhi, ya anga ed panaon a si Ammon tan saray kaagian to so sinmabi ed saman a dalin.

23 Tan say ari sanen sikato so linma ed paway na puerta na ciudad a kaiba to so saray taga-bantay to, nalmoan da si Ammon tan saray kaagian to; tan impasen to a sikara so sacerdote nen Noah dia ed saman ingangan to a sikara so erelen da, tan baloren da ra, tan ibantak da ra ed pañgawan. Tan no sikara labat so saray sacerdote nen Noah ingangan to a sikara so pateyen.

24 Balet sanen arumogan to ya aliwa a sikara, no ag sikara so kaagian to, tan nanlapu ra ed dalin na Zarahemla, sikato so napno na mapalalo a baleg a gayaga.

25 Natan si ari Limhi so añgibaki, sakbay na indateng nen Ammon, na pigara a bilang na lalaki a mananap ed dalin na Zarahemla; balet saya so ag da arumog, tan sikara so abalang ed kalawakan.

26 Angaman ontan, akarumog ira na sananey a dalin a wala so totoo to nen saman; on, sakey a dalin ya amayakmakan na amagaan a pokel, on, sakey a dalin ya atooan nen saman tan saya so sigpot ya aderal; tan sikara, lapu ed impasen da a saya a dalin na Zarahemla, amawil la ra ed dalin na Nephi, lapu ed akadateng ira ed ketegan na dalin ed aliwan dakel ya agew sakbay na indateng nen Ammon.

27 Tan sankaawit da so kasulatan, angan say kasulatan na saray totoo a makampokel ed saray arumog da; tan saraya so nitatak ed saray piligo a nanlapu ed bato a nanlaok na balatyang.

28 Tan natan si Limhi so napno lamet na gayaga ed impakapikabat to ed sañgi nen Ammon a si ari Mosiah so awalaan na palabo a nanlapu ed Dios, a lapu ed saya nayarian to ya ipatalus so saray nitatak; on tan si Ammon met so nangayaga.

29 Balet si Ammon tan saray kaagian to so napno na ermen lapu ed dakel ed saray kaagian da so apatey;

30 Tan ontan met a si ari Noah tan saray sacerdote to so señgegan kanian saray totoo nangawa ra na dakel a kasalanan tan karelmeñgan sumpa ed Dios; tan sikara met so nanermen ed impatey nen Abinadi; tan ontan met ed intaynan nen Alma tan saray totoo ya akila ed sikato, a sikara so nantibukel na sakey a simbaan na Dios ed panamegley na biskeg tan pakapanyari na Dios, tan pananisia ed saray salita ya imbesñgaw nen Abinadi.

31 On, sikara so nanermen lapu ed insipot da, lapu ed ag da amta no iner so binatikan da. Natan sikara so akitipon ed sikara a malikeliket, lapu ed sikara a dili so linmoob ed sakey a paknaan ed Dios a manlingkor ed sikato tan mañgonor na saray gangan to.

32 Tan natan nanlapu ed indateng nen Ammon, si ari Limhi so linmoob met ed sakey a paknaan ed Dios, tan dakel met ed saray totoo to, a manlingkor ira ed sikato tan mañgonor na saray gangan to.

33 Tan agawa a si ari Limhi tan dakel ed saray totoo to so pilalek da so nabiniagan; balet angapo so too ed nasasakopan na saman a dalin so walaan na pakaoley a nanlapu ed Dios. Tan si Ammon ag to labay a gawaen so saya a beñgatla, lapu ed impasen to so inkasikato ya ag-manepeg ya igagangan.

34 Dia ed ontan saman a panaon ag da tinibukel so inkasikara a sakey a simbaan, lapu ed aalagaren da ni so Espiritu na Katawan. Natan pilalek da so manmaliw ya angan siñga si Alma tan saray kaagian to, a saraya so binmatik ed kalawakan.

35 Pilalek da so nabiniagan a sakey a tasi tan sakey a paneknek a sikara so maabuloy a manlingkor ed Dios ed amin a puso ra; angaman ontan pinadukey da ni so panaon; tan say kasulatan nipaakar ed impambiniag da so niiter kayari to nia.

36 Tan natan say amin a ninunot nen Ammon tan saray totoo to, tan si ari Limhi tan saray totoo to, so say pañgilaban da ed inkasikara manlapu ed lima na saray Lamanite tan manlapu ed inkaaripen.