1 Natan si Alma, lapu ed sikato so pinasakbayan na Katawan a saray ñgayew nen ari Noah a sikara so ondateng ed sikara, tan lapu ed impakabat to ed saray totoo to, dia ed ontan tinipon da so saray karnero ra, tan inala ra so saray dawa, tan sikara so sinmipot a linma ed kalawakan sakbay na insabi na saray ñgayew nen ari Noah.

2 Tan say Katawan sikara so pinabiskeg to, kanian saray totoo nen ari Noah ag da ra naabotan a deralen.

3 Tan sikara so inmalis ed loob na walora ya agew a baroy ed kalawakan.

4 Tan sikara so akasabi ed sakey a dalin, on, angan sakey a marakep tan makaruyo a dalin, sakey a dalin na malinew a danum.

5 Tan impaalagey da so saray abong-abong da ya abel, tan ginapoan da a kimeyan so dalin, tan ginapoan da met so mampatalindeg na saray paalagey; on, sikara so makuli, tan sikara so nansagpot a mapalalo.

6 Tan saray totoo pilalek da a si Alma so manmaliw ya ari ra, lapu ed sikato so inararo na saray totoo to.

7 Balet inkuan to ed sikara: Nia, ag manepeg a wala so ari tayo; tan onia so inkuan na Katawan: Ag yo ipapasen a galañgen so sakey a laman ya atagtagey nen say sananey, odino say sakey a too ag to nunoten ed inkasikato ya atagtagey nen say sananey; dia ed ontan ikuan ko ed sikayo ya ag manepeg a nawalaan kayo na sakey ya ari.

8 Manwari ya ontan, no nayari a nawalaan kayo a naynay na saray maptek a totoo a manmaliw ya ari yo lalo a maong a nawalaan kayo na sakey ya ari.

9 Balet nunot yo so inkauges nen ari Noah tan saray sacerdote to; tan angan siak a dili so asingkat ed sakey a patit, tan nangawa ak na dakel a beñgatla a marumsis ed imaton na Katawan, a saraya so señgegan na ansakit a pambabawik;

10 Manwari ya ontan, kayari dakel a subok, say Katawan dineñgel to so saray nañgis ko, tan inebatan to so saray pikakasik, tan siak so ginawa to a sakey ya ikakana ed lima to ed pañgawit na dakel ed sikayo ed pikakabat na katuaan to.

11 Manwari ya ontan, dia ed saya ag ak nangloria, lapu ed ag ko kanepegan so mangloria ed inkasiak.

12 Tan natan ikuan ko ed sikayo, sikayo so pinairap nen ari Noah, tan sikayo so inaripen to tan saray sacerdote to, tan sikayo so niakar ed kaugsan lapu ed sikara; dia ed ontan sikayo so abalor ed lubir na kaugsan.

13 Tan natan lapu ed sikayo so nilaban lapu ed pakapanyari na Dios ya akaukpos ed saraya a balor; on, angan dia ed saray lima nen ari Noah tan saray totoo to, tan ontan met ed balor na inkauges, angan ontan la so pilalek ko a sikayo so ontalindeg ya ag-nagiing ed saya a kawayañgan a saya so makaseñgeg na inkabulos yo, tan ag yo iiter so talek yo ed siopaman a too a manmaliw a sakey ya ari yo.

14 Tan ontan met ag kayo manmamatalek ed siopaman a manmaliw a managbañgat yo odino managpulong yo, likud no sikato so sakey a too na Dios, a mankokurang ed saray basbas to tan mañgoonor ed saray gangan to.

15 Onia so impañgibañgat nen Alma ed saray totoo to, a balang sakey a too aroen to so kaabay to a siñga sikato, a nepeg angapo so baliñgaan ed limog da.

16 Tan natan, si Alma so atagey a sacerdote ra, lapu ed sikato so añgiletneg na simbaan da.

17 Tan agawa ya angan siopaman ag niiter so pakaoley a mampulong odino mambañgat no ag dia ed panamegley na nanlapu ed Dios. Dia ed ontan pinasanto to so amin a sacerdote ra tan amin a managbañgat da; tan angapo so siopaman ya apasanto likud no sikara so totoo a maptek.

18 Dia ed ontan sikara so nambantay ed saray totoo ra, tan sikara so tinagano ra ed saray beñgatla a nipaakar ed inkamatunong.

19 Tan agawa a ginmapo ira ya onaliguas a mapalalo ed saman a dalin; tan saya so tinawag da a dalin na Helam.

20 Tan agawa a sikara so dinmakel tan inmaliguas a mapalalo ed dalin na Helam; tan añgipatalindeg ira na ciudad, a saya so tinawag da a ciudad na Helam.

21 Angaman ontan say Katawan anengneng to a manepeg so pampasnok to ed saray totoo to; on, sinubok to so anos tan pananisia ra.

22 Manwari ya ontan—siopaman a mañgiter na talek to ed sikato saya met lamlamang so nitanduro ed sampot ya agew. On, tan onia so agawa ed saya a totoo.

23 Tan nia, ipanengneng ko ed sikayo a sikara so niakar ed inkaaripen, tan angapo so nayari a mañgilaban ed sikara no ag say Katawan a Dios da, on, angan say Dios nen Abraham tan si Isaac tan si Jacob.

24 Tan agawa a sikato so añgilaban ed sikara, tan impanengneng to so kinabaleg na pakapanyari to ed sikara, tan agay la so saray gayaga ra.

25 Tan nia, agawa a leleg a wala ra ed dalin na Helam, on, dia ed ciudad na Helam, legan a sikara so mambobokalkal na dalin ed kaliber-liber, anengneng da so ñgayew na saray Lamanite a wala ed ketegan na saman a dalin.

26 Natan agawa a saray kaagian nen Alma sikara so binmatik ed saray kaalugan da, tan sikara so nantitipon ed ciudad na Helam; tan sikara so ataktakot a mapalalo lapu ed inletaw na saray Lamanite.

27 Balet si Alma so linma tan tinmalindeg ed arap da, tan sikara so binilin to ya ag ira nepeg ya ontakot, balet nunoten da so Katawan a Dios da tan sikato so mañgilaban ed sikara.

28 Dia ed ontan naandi so takot da, tan ginapoan da so mikasi ed Katawan a palemeken to so puso na saray Lamanite, pian ag da ra pateyen, tan saray kaasawaan da, tan saray anak da.

29 Tan agawa a say Katawan pinalemek to so puso na saray Lamanite. Tan si Alma tan saray kaagian to so linma tan initer da so inkasikara ed saray lima da; tan saray Lamanite kinayarian da so dalin na Helam.

30 Natan saray ñgayew na saray Lamanite, a tinmumbok ed saray totoo nen ari Limhi, so abalang ed kalawakan ed dakel ya agew.

31 Tan nia, arumog da so saray sacerdote nen ari Noah, ed sakey a pasen a tatawagen na Amulon; tan ginapoan da a kayarianen so dalin na Amulon tan ginapoan da a kimeyan so dalin.

32 Natan say ñgaran na pañgulo na saray sacerdote so Amulon.

33 Tan agawa a si Amulon sikato so akikasi ed saray Lamanite; tan imbaki to met so kaasawaan da, a sikara so bibii ya anak na saray Lamanite, pian mikasi ed saray kaagian, ya ag da ra deralen so saray kaasawaan da.

34 Tan saray Lamanite so awalaan na panañgasi ed si Amulon tan saray kaagian to, tan ag da ra dineral, makaseñgeg ed saray kaasawaan da.

35 Tan si Amulon tan saray kaagian to sikara so akitipon ed saray Lamanite, tan sikara so mambabaroy ed kalawakan a mananap ed dalin na Nephi sanen nalmo ra so dalin na Helam, a saya so kinayarian nen Alma tan saray kaagian to.

36 Tan agawa a saray Lamanite insipan da ed si Alma tan saray kaagian to, no iwanwan da ra ed dalan ya onarap ed dalin na Nephi iabuloy da ya iter ed sikara so bilay da tan ontan met ed say kawayañgan da.

37 Balet kayari nen Alma ya añgiwanwan ed dalanen da ya ompugta ed dalin na Nephi saray Lamanite ag da labay a sumpalen so sipan da; no ag añgiter ira na bantay ed kaliber-liber na dalin na Helam, ed kinen Alma tan saray kaagian to.

38 Tan saray nakdaan ed sikara so linma ed dalin na Nephi; tan say arum ed saray kabiañgan da so amawil ed dalin na Helam, tan inawit da met ed sikara so saray kaasawaan da tan saray anak na saray taga-bantay ya atilak ed saman a dalin.

39 Tan say ari na saray Lamanite iniabuloy to ed si Amulon a sikato so manmaliw ya ari tan manañgoley ed saray totoo to, a wala ed dalin na Helam; angaman ontan angapo so pakayari to ed antokaman a beñgatla ya onsumlang ed linawa na ari na saray Lamanite.