1 Manje kwakukhona indzawo eShemloni lapho emadvodzakati emaLamani bekahlanganela khona ndzawonye kutsi ahlabele, adanse, futsi atijabulise.

2 Futsi kwenteka kutsi ngalelinye lilanga bekasibalo lesincane nje ahlangene ndzawonye kutsi ahlabelele futsi agidze.

3 Manje baphristi benkhosi Nowa, bebanemahloni ekubuyela edolobheni laNefi, yebo, ngetulu kwaloko bebesaba kutsi bantfu bebayawubabulala, ngako-ke abazange balokotse babuyele ebafatini babo kanye nasebantfwaneni babo.

4 Futsi sebahleli ehlane, sebawatfolile emadvodzakati emaLamani babhaca bawabuka;

5 Futsi ngesikhatsi sekusele labambalwa nje babo labebabutsene ndzawonye kutsi bagidze, baphuma etindzaweni tabo tekubhaca bawatsatsa bawatfwala baya nawo ehlane; yebo, emashumi lamabili nakune emadvodzakati emaLamani bawatfwala baya nawo ehlane.

6 Futsi kwenteka kutsi ngesikhatsi emaLamani sekatfolile kutsi emadvodzakati awo bekalahlekile, atfukutselela bantfu baLimhayi, ngoba acabanga kutsi bekubantfu baLimhayi.

7 Ngako-ke atfumela emabutfo awo phambili; yebo nenkhosi lucobo lwayo yahamba phambi kwebantfu bayo baya eveni laNefi kuyobhubhisa bantfu baLimhayi.

8 Manje Limhayi wawabona asembhoshongweni, nawo onkhe emalungiselelo emphi wawabona; ngako-ke wagcogcela ndzawonye bantfu bakhe, bahlala bawalindza etinkhundleni kanye nasemahlatsini.

9 Futsi kwenteka kutsi ngesikhatsi emaLamani sekachamukile, bantfu baLimhayi bacala bakhwela etikwawo bavela etindzaweni tabo tekulindza, futsi bacala kuwabulala.

10 Futsi kwenteka kutsi imphi yaba matima kakhulu, ngoba balwa njengemabhubesi abanga kudla kwawo.

11 Futsi kwenteka kutsi bantfu baLimhayi bacala kuwacosha emaLamani phambi kwabo; noma bona bebangasiyo nencenye leningi njengemaLamani. Kodvwa balwela timphilo tabo, netebafati babo, kanye netebantfwana babo; ngako-ke batikhandla futsi balwa njengabonyokangwenya.

12 Futsi kwenteka kutsi bayitfola inkhosi yemaLamani emkhatsini wesibalo salabafile bawo; noma yona beyingakafi, beyilimele yashiywa phansi, bekushesha kakhulu kubaleka kwebantfu bayo.

13 Futsi bayitsatsa bayibopha emanceba, bayiletsa phambi kwaLimhayi, batsi: Buka, nayi inkhosi yemaLamani; ngoba itfole linceba ibese iyawa emkhatsini walabafile bayo, futsi bayishiyile; buka, siyiletse phambi kwakho; manje asiyibulale.

14 Kodvwa Limhayi watsi kubo: Angeke ngiyibulale, kodvwa yiletseni lapha kute ngiyibone. Futsi bayiletsa. Limhayi watsi kuyo: Ngusiphi sizatfu lesente nine nite nitokulwa nebantfu bami na? Buka, bantfu bami abazange basephule sifungo lengasenta kini; ngako-ke, kungani nine nisephule sifungo lenasenta ebanftwini bami na?

15 Manje inkhosi yatsi: Ngisephulile sifungo ngoba bantfu bakho batsatse emadvodzakati ebantfu bami; ngako-ke, ngentfukutselo yami ngente kutsi bantfu bami bete batokulwa nebantfu bakho.

16 Manje Limhayi bekangakeva lutfo mayelana naloludzaba; ngako-ke watsi: Ngitawuphenya emkhatsini webantfu futsi noma ngubani lowente lentfo lena utawubhujiswa. Ngako-ke wenta kutsi kwentiwe luphenyo emkhatsini webantfu bakhe.

17 Manje ngesikhatsi Gideyoni sekativile leti tintfo, yena ayindvuna yemasotja enkhosi, wahamba waya phambili watsi enkhosini: Ngiyakucela hocisa, ungabaphenyi laba bantfu, futsi ungalibeki licala kubo ngalentfo.

18 Ngoba awubakhumbuli yini baphristi beyihlo wakho, laba bantfu labebafuna kubabhubhisa na? Futsi abekho yini ehlane na? Futsi ngabe akusibo yini labantjontje emadvodzakati emaLamani na?

19 Manje, buka, futsi utjele inkhosi ngaleti tintfo, kute yona itjele bantfu bayo kute batfotjiswe ngatsi; ngoba buka vele sebalungiselela kutsi bete batolwa natsi; buka ngetulu kwaloko kukhona kuphela labambalwa betfu.

20 Futsi buka, beta nalamaningi emabutfo abo; futsi ngaphandle kwekutsi inkhosi ibatfobise ngakitsi sitobhubha.

21 Ngoba akagcwaliseki yini emavi a-Abinadi, lawaphrofetha macondzana natsi—futsi konkhe loku kungenca yekutsi asitange siwalalele emavi eNkhosi, futsi siphendvuke ebubini betfu na?

22 Manje asiyicolele inkhosi, futsi sigcwalise sifungo lesasenta kuyo; ngoba kuncono kutsi sibe sebugcilini kunekutsi silahlekelwe timphilo tetfu; ngako-ke, asiyekeleni kucitsa ingati lengaka.

23 Manje Limhayi wayitjela inkhosi tonkhe tintfo mayelana neyise, kanye nebaphristi labebabalekele ehlane, futsi wabeka sento sekutsatfwa kwemadvodzakati abo kubo.

24 Futsi kwenteka kutsi inkhosi yatfotjiswa bantfu bayo; yatsi kubo: asambeni siyohlangana nebantfu bami, ngaphandle kwetikhali; futsi ngiyafunga kini ngesifungo kutsi bantfu bami angeke bababulale bantfu bakho.

25 Futsi kwenteka kutsi bayilandzela inkhosi, bahamba ngaphandle kwetikhali kuyohlangana nemaLamani. Futsi kwenteka kutsi bahlangana nemaLamani; nenkhosi yemaLamani yakhotsama phambi kwawo, futsi yabancengela bantfu baLimhayi.

26 Futsi ngesikhatsi emaLamani abona bantfu baLimhayi, kutsi bebangenatikhali, aba nebubele kubo futsi atfotjiswa ngubo, futsi abuyela emuva nenkhosi yawo ngekuthula aya eveni lawo.