1 Manje iNkhosi Mosiya yenta kutsi bonkhe bantfu babutsane ndzawonye.

2 Manje bebangabaningi kakhulu labebabantfwana baNefi, noma bebangabaningi kakhulu labo labebabesitukulwane saNefi, njengoba bekunjalo ngebantfu baZarahemla, labekawesitukulwane saMuleki, kanye nalabo labeta naye ehlane.

3 Futsi bebangabaningi kakhulu labebabantfu baNefi kanye nalabebabantfu baZarahemla njengoba bekunjalo kulabebangemaLamani; yebo, bebangasiyo ngisho incenye lenkhulu kakhulu.

4 Manje bonkhe bantfu baNefi bebabutsene ndzawonye, futsi ngalokunjalo nabo bonkhe bantfu baZarahemla, futsi bebubutsene ndzawonye bangemacembu lamabili.

5 Futsi kwenteka kutsi Mosiya wayifundza, futsi wenta kutsi ifundvwe, imibhalo yaZenifi ifundzelwe bantfu bakhe; yebo, wayifundza imibhalo yebantfu baZenifi, kusukela ngesikhatsi bashiya eveni laseZarahemla bate babuya futsi.

6 Futsi ngetulu kwaloko wafundza umlandvo wa-Alima kanye nabomnakabo, kanye nato tonkhe tinhlupheko tabo, kusukela ngesikhatsi bashiya eveni laseZarahemhla kute kube ngesikhatsi babuya futsi.

7 Manje, ngesikhatsi Mosiya sekente siphetfo sekufundza imibhalo, bantfu bakhe labebahlala eveni baba nekumangala kanye nekushaceka.

8 Ngoba bebangati kutsi bacabange ini; ngoba ngesikhatsi babona labo labebakhululiwe baphuma ebugcilini bagcwala kujabula lokukhulu kakhulu.

9 Ngetulu kwaloko, ngesikhatsi bacabanga ngabomnakabo labebabulewe ngemaLamani bagcwala lusizi, bakhala tinyembeti letiningi telusizi.

10 Ngetulu kwaloko, ngesikhatsi bacabanga ngebuhle baNkulunkulu lobucondza ngco kubantfu, kanye nemandla akhe ekukhululeni Alima kanye nabomnakabo baphuma etandleni temaLamani kanye nasebugcilini, baphakamisa emavi abo bambonga Nkulunkulu.

11 Futsi, ngesikhatsi bacabanga ngemaLamani, labekabomnakabo, ngekona kwawo kanye nangesimo sawo lesingcolile, bagcwala buhlungu nekudzabuka ngalokuphatselene nekuzuza kwemiphefumulo yawo.

12 Futsi kwenteka kutsi labo labebabantfwana ba-Amuloni kanye nabomnakabo, labebatsetse emadvodzakati emaLamani kuwashada, abaphatsekanga kahle ngendlela boyise labebatiphetse ngayo, futsi bona abazange basabitwa ngemabito aboyise, ngako-ke batitsatsela libito laNefi, kute babitwe ngebantfwana baNefi futsi babalwe kanye nalabo labebabitwa ngekutsi bangemaNefi.

13 Manje bonkhe bantfu baZarahemla babalwa nemaNefi, futsi loku kungenca yekutsi umbuso wawunganiketwanga muntfu kodvwa kulabo labebabesitukulwane saNefi.

14 Manje kwenteka kutsi ngesikhatsi Mosiya sekente siphetfo senkhulumo kanye nekufundzela bantfu bakhe, waba nesifiso sekutsi Alima naye ngalokunjalo akhulume kubantfu.

15 Futsi Alima wakhuluma kubo, ngesikhatsi bonkhe sebabutsene ndzawonye ngemacembu lamakhulu, wahamba wesuka kulinye licembu waya kulelinye, ashumayela kubantfu kuphendvuka nekukholwa eNkhosini.

16 Futsi wabancusa bantfu baLimhayi kanye nabomnakabo, bonkhe labo labebakhululiwe baphuma ebugcilini, kutsi bakhumbule kutsi bekuyiNkhosi leyabakhulula.

17 Futsi kwenteka kutsi emvakwekutsi Alima sekabafundzisile bantfu tintfo letiningi, sekente siphetfo sekukhuluma nabo, inkhosi Limhayi yaba nesifiso sekutsi ibhajatiswe; kanjalo nabo bonkhe bantfu bayo babanesifiso sekutsi nabo babhajatiswe.

18 Ngako-ke, Alima wahamba waya emantini futsi wababhabhatisa; yebo, wababhabhatisa ngendlela leyo lekenta ngayo kubomnakabo emantini aMormon; yebo, futsi ngebuningi balabo lababhabhatisa bangena ebandleni laNkulunkulu; futsi loku bekungenca yekukholelwa kwabo emavini a-Alima.

19 Futsi kwenteka kutsi inkhosi Mosiya yaniketa Alima kutsi akhe emabandla kulo lonkhe live laseZarahemla; futsi yamnika emandla ekutsi abeke baphristi kanye nebafundzisi ngetulu kwawo onkhe emabandla.

20 Manje loku kwentiwa ngenca yekutsi bebabanini kakhulu bantfu kangangekutsi bebangenakuphatfwa ngumfundzisi munye; noma bonkhe bakwati kuliva livi laNkulunkulu embutsanweni munye;

21 Ngako-ke babutsana ndzawonye emacembu lehlukene, babitwa ngekutsi bangemabandla; libandla ngelibandla linebaphristi balo kanye nebafundzisi balo, futsi wonkhe umphristi ashumayela livi njengoba beliniketwe kuye ngemlomo wa-Alima.

22 Futsi ngaleso sizatfu, nanoma bekungemabandla lamaningi bonkhe bebalibandla linye, yebo, libandla laNkulunkulu; ngoba bekute lutfo lolwalushunyayelwa kuwo onkhe emabandla ngaphandle kwekuphendvuka kanye nelukholo kuNkulunkulu.

23 Manje besekukhona emabandla lasikhombisa eveni laseZarahemla. Futsi kwenteka kutsi labo labebanesifiso sekubitwa ngelibito laKhristu, noma laNkulunkulu, batihlanganisa nemabandla aNkulunkulu;

24 Futsi bebabitwa ngekutsi bantfu baNkulunkulu. Futsi iNkhosi yatsela Moya wayo etikwabo, babusiseka, baphumelela eveni.