1 Futsi kwenteka kutsi emvakwekutsi Mosiya sekente njengoba uyise amyaletile, sekente simemetelo kulo lonkhe live, bantfu babutsana ndzawonye kulo lonkhe live, kute bahambe bakhuphukele ethempelini kuyova emavi inkhosi Bhenjamini leyayitowakhuluma kubo.

2 Bebasibalo lesikhulu, bebabaningi ngendlela yekutsi abatange bababale; ngoba bese baphindzaphindvwe kakhulu futsi sebandze kakhulu eveni.

3 Ngetulu kwaloko batsatsa ematibulo etimvu tabo, kute banikele ngemhlatjelo kanye nangemnikelo wekushiswa njengekwemtsetfo waMosi;

4 Ngetulu kwaloko kute babonge eNkhosini Nkulunkulu wabo, lowabakhipha eveni laseJerusalema, wabakhipha etandleni tetitsa tabo, wakhetsa bantfu labalungile kutsi babe bafundzisi babo, ngalokunjalo nendvodza lelungile kutsi ibe yinkhosi yabo, leyenta kwaba khona kuthula eveni laseZarahemla, leyabafundzisa kutsi bagcine imiyaleto yaNkulunkulu, kute batfokote phindze bagcwale lutsandvo lwaNkulunkulu kanye nelwebantfu bonkhe.

5 Futsi kwenteka kutsi ngesikhatsi bafika ethempelini, bamisa emathende abo atungeleta lapho, yonkhe indvodza ngekwemndeni wayo, lofaka ekhatsi umfati wayo, nemadvodzana ayo, nemadvodzakati ayo, kanye nemadvodzana abo, kanye nemadvodzakati abo, kusukela kulomdzala kwehla kuya kulomncane, yonkhe imindeni yehlukene lomunye kulomunye.

6 Bamisa emathende abo atungeleta lithempeli, wonkhe umuntfu anelithende lelinemnyango walo lobheke ethempelini, kute ngaloko bahlale emathendeni abo phindze beve emavi inkhosi Bhenjamini leyayitowakhuluma kubo;

7 Ngoba sicuku sasisikhulu kakhulu kangangekutsi inkhosi Bhenjamini ayikwatanga kubafundzisa bonkhe ngekhatsi kwetindvonga telithempeli, ngako-ke yenta kutsi kumiswe umbhoshongo, kute ngaloko bantfu bakhe baweve emavi lebekatowakhuluma kubo.

8 Futsi kwenteka kutsi wacala kukhuluma nebantfu bakhe asembhoshongweni; kodvwa abakwatanga bonkhe kuva emavi akhe ngenca yebukhulu besicuku; ngako-ke wenta kutsi emavi lawakhulumako abhalwe bese atfunyelwa emkhatsini walabo labebangekho ngaphansi kwemsindvo welivi lakhe, kute nabo ngalokunjalo bawatfole emavi akhe.

9 Ngulawa lamavi lawakhuluma waphindze wenta kutsi abhalwe, atsi: Bomnaketfu, nonkhe nine lenihlangene ndzawonye, nine leninekuweva emavi ami lengitowakhuluma kini ngalolusuku; ngoba angitange nginiyalete kutsi nikhuphukele lapha nitodlala ngemavi lengitowakhuluma, kodvwa kutsi ningilalele, nivule tindlebe tenu kute nive, netinhlitiyo tenu kute nicondze, netingcondvo tenu kute timfihlakalo taNkulunkulu tembulwe kini.

10 Angikaniyaleti kutsi nikhuphukhele lapha kute ningesabe, noma kutsi nicabange kutsi mine ngingetulu kwemuntfu lobhubhako.

11 Kodvwa nami nginjengani lucobo lwenu, ngingaphansi kwato tonkhe timo tebutsakatsaka emtimbeni kanye nasengcondvweni; noko ngikhetfwe ngulaba bantfu, ngangcweliswa ngubabe, ngavunyelwa sandla senkhosi kutsi ngibe ngumbusi nenkhosi ngetulu kwalaba bantfu; ngigciniwe ngaphindze ngalondvolotwa ngemandla akhe langenakulinganiswa, kutsi nginisebentele ngako konkhe kucina, ingcondvo kanye nemandla iNkhosi lenginike wona.

12 Ngitsi kini njengoba ngivunyelwe kutsi ngicitse tinsuku tami ekunisebenteleni, kute kube ngulesi sikhatsi, angikate ngifune ligolide nesiliva noma nanhloboni yemcebo wenu;

13 Angitange ngivume kutsi nibanjwe nifakwe ematilongweni, noma nentane tigcila lomunye kulomunye, noma nibulale, noma niphange, noma nebe, noma niphinge; noma nekutsi ngivume kutsi nente noma hlobo luni lwebubi, nginifundzisile kutsi nigcine imiyaleto yeNkhosi, kuto tonkhe tintfo leniyalete ngato—

14 Nanami, lucobo lwami, ngisebentile ngetandla tami kute nginisebentele, nekutsi ningatfwaliswa ngemitselo, nekutsi kungeti lutfo etikwenu lokumatima kutsi nikutfwale—kuto tonkhe leti tintfo lesengitikhulumile, nani lucobo lwenu nibofakazi nalamuhla.

15 Noko, bomnaketfu, angikatenti leti tintfo kute ngitigabatise, noma kutsi nginitjela leti tintfo kute ngaloko nginibeke licala; kodvwa nginitjela leti tintfo kute nati kutsi ngingakwati kuphendvula nganembeza lohlantekile phambi kwaNkulunkulu nalamuhla.

16 Bukani, ngitsi kini ngenca yekutsi ngitsite ngicitse tinsuku tami ekunisebenteleni, angifuni kutikhukhumeta, ngoba empeleni bengisebentela Nkulunkulu.

17 Bukani, nginitjela leti tintfo kute nifundze kuhlakanipha; kute nifundze kutsi uma usebentela bantfu bakini empeleni usebentela Nkulunkulu wakho.

18 Bukani, ningibite ngenkhosi yenu; uma mine, leningibita ngenkhosi yenu, ngisebenta kutsi nginisite, pho nine akukafaneli yini kutsi nisebente kute nisitane na?

19 Bukani futsi, uma mine, leningibita ngenkhosi yenu, leseyicitse tinsuku tayo inisebentela, noko bengikadze ngisebentela Nkulunkulu, ngifanelwe kubongwa ngini, Awu kufanele kangakanani kutsi nibonge iNkhosi yenu yasezulwini!

20 Ngitsi kini, bomnaketfu, uma ninganika konkhe kubonga kanye neludvumo umphefumulo wenu wonkhe lonemandla ekubanalo, kuloyo Nkulunkulu lonidalile, wanigcina wanilondvolota, wenta kutsi nitfokote, waninika kutsi nihlale ngekuthula lomunye nalomunye—

21 Ngitsi kini uma beningamsebentela loyo lowanidala kusukela ekucaleni, lonilondvolotako lusuku nelusuku, ngekuniboleka umphefumulo, kute niphile phindze ninyakate nente ngekutsandza kwenu, aphindze anisekela kusukela kulomunye umzuzu kuya kulomunye—ngitsi, uma beningamsebentela ngemiphefumulo yenu yonkhe noko kunjalo beniyawuba tisebenti letingenamvuzo.

22 Bukani, kuphela lakudzingako kini kugcina imiyaleto yakhe; unitsembisile kutsi uma niyoyigcina imiyaleto yakhe niyophumelela eveni; akajiki nanini kuloko lakushito; ngaloko-ke, uma nigcina imiyaleto yakhe uyanibusisa phindze aniphumelelise.

23 Manje, kwekucala, unidalile, waninika timphilo tenu, leninelicala ngato.

24 Kwesibili, udzinga kutsi nente njengoba aniyaletile; lokungukutsi uma nekwenta, uyanibusisa masinyane; ngako-ke sewunikhokhele. Nisenelicala, futsi nisetawuba nalo, phakadze naphakadze; ngaloko-ke, yini leningatikhukhumeta ngayo na?

25 Manje ngiyabuta, kukhona yini leningakusho ngani na? Ngiyaniphendvula ngitsi, Cha. Aninakusho kutsi ninjengelutfuli lwemhlaba; noko nadalwa ngelutfuli lwemhlaba; kodvwa bukani, lwakhe loyo lowanidala.

26 Nami, ngisho mine, lenimbita ngenkhosi yenu, angisincono kunani; ngoba nami ngalokunjalo ngiwaselutfulini. Futsi niyabona kutsi sengimdzala, sekusedvute ngidzele lomtimba lobhubhako uye kunina wawo umhlaba.

27 Ngako-ke, njengoba ngishito kini kutsi nginisebentele, ngihamba nanembeza lohlantekile phambi kwaNkulunkulu, ngalokunjalo nangalesi sikhatsi ngente kutsi nibutsane ndzawonye, kute ngitfolwe ngingenacala, futsi nekutsi ingati yenu ingehleli etikwami, uma sengimele kutsi ngehlulelwe nguNkulunkulu ngetintfo langiyalete ngato mayelana nani.

28 Ngitsi kini ngente kutsi nibutsane ndzawonye kute ngisuse etingutjeni tami ingati yenu, kulesi sikhatsi lapho sengitokuya phansi ethuneni lami, kute ngehlele phansi ngekuthula, moya wami longabhubhi uhlangane nemakwaya langetulu ekuhlabeleleni tindvumiso taNkulunkulu lolungile.

29 Ngetulu kwaloko, ngitsi kini ngente kutsi nibutsane ndzawonye, kute ngimemetele kini kutsi angeke ngisaba ngumfundzisi wenu, noma yinkhosi yenu;

30 Ngoba nangalesi sikhatsi, umtimba wami wonkhe uyachachatela kakhulu njengoba ngetama kukhuluma nani; kodvwa iNkhosi Nkulunkulu iyangisekela, ingivumele kutsi ngikhulume nani, phindze ingiyalete kutsi ngimemetele kini ngalolusuku, kutsi indvodzana yami Mosiya uyinkhosi nembusi ngetulu kwenu.

31 Manje, bomnaketfu, ngifuna kutsi nente njengoba benikadze nentile kute kube manje. Njengoba niyigcinile imiyaleto yami, ngalokunjalo nemiyaleto yababe, naphumelela, nagcinwa ekuweleni etandleni tetitsa tenu, ngalokunjalo uma niyoyigcina imiyaleto yendvodzana yami, noma imiyaleto yaNkulunkulu leyoletfwa kini ngayo, niyophumelela kulelive, titsa tenu angeke tibe nemandla ngetulu kwenu.

32 Kodvwa, Awu bantfu bami, caphelani hleze kuvuke imibango emkhatsini wenu, funa nikhetse kulalela umoya lomubi, lakhuluma ngawo babe Mosiya.

33 Ngoba bukani, kukhona inhlawulo lemenyetelwe kuloyo lokhetsa kulalela lowomoya; ngoba uma akhetsa kulalela wona, futsi ahlale ate afele etonweni takhe, yena phindze utinatsela lusizi emphefumulweni wakhe; ngoba utfola njengenkhokhelo yakhe kujeziswa lokungapheli, ece umtsetfo waNkulunkulu ngekuphikisana nelwati lwakhe lucobo.

34 Ngitsi kini, kute namunye emkhatsini wenu, ngaphandle kwebantfwana benu labancane labangafundziswanga mayelana naleti tintfo, longati kutsi ninelicala laphakadze kuBabe wenu wasezulwini, kuletsa kuye konkhe leninako kanye naleningiko; ngetulu kwaloko nifundzisiwe mayelana nemibhalo lecuketse tiphrofetho labakhuluma ngato baphrofethi labangcwele, kwehla kute kufike esikhatsini babe, Lehi, lashiya ngaso eJerusalema.

35 Ngalokunjalo, nako konkhe lokwakhulunywa bobabe betfu kute kube manje. Bukani, ngetulu kwaloko, bakhuluma loko labebayaletwe ngako yiNkhosi; ngako-ke, leyomibhalo ilungile phindze iliciniso.

36 Manje, ngitsi kini, bomnaketfu, emvakwekutsi senatile nafundziswa tonkhe leti tintfo, uma ningaphambuka phindze niphikisane naloko lokukhulunyiwe, kangangekutsi nite nitikhiphe kuMoya weNkhosi, kute angabi nendzawo kini kutsi anicondzise etindleleni tekuhlakanipha kute nibusiswe, niphumelele, phindze nilondvolotwe—

37 Ngitsi kini, umuntfu lowenta loku, nguye loyo futsi lophumela ebaleni avukele Nkulunkulu; ngako-ke ukhetsa kulalela umoya lomubi, uba sitsa kuko konkhe kulunga; ngako-ke, iNkhosi ayinandzawo kuye, ngoba ayihlali emathempelini langcolile.

38 Ngako-ke uma loyo muntfu angaphendvuki, ahlale phindze afe asitsa kuNkulunkulu, tidzingeko tekulunga taNkulunkulu tivusela umphefumulo wakhe longabhubhi ekwatini licala lakhe, lelimenta kutsi ashwaphane phambi kweNkhosi, ligcwalise sifuba sakhe ngekutisola, nebuhlungu, kanye nelusizi, lolufana nemlilo longacisheki, lo emalangabi awo akhuphukela etulu phakadze naphakadze.

39 Manje ngitsi kini, umusa awunakumtfola loyo muntfu; ngako-ke siphetfo sakhe kutsi abeketelele buhlungu lobungapheli.

40 Awu, nonkhe nine madvodza lamadzala, nani bafana, kanye nani bantfwana labancane leniwacondzako emavi ami, ngoba ngikhulume ngalokusobala kini kute nicondze, ngiyathandaza kutsi nivukele ekukhumbuleni simo lesesabekako salabo labawele esiphambekweni.

41 Ngetulu kwaloko, ngifisa kutsi nicabange ngesimo lesibusisiwe futsi nesekujabula salabo labagcina imiyaleto yaNkulunkulu. Ngoba bukani, babusisiwe kuto tonkhe tintfo, tesikhashana kanye netakamoya; uma babambelele ekwetsembekeni kute kube sekugcineni bemukelwa ezulwini, kute ngaloko bahlale naNkulunkulu esimeni sekutfokota lokungenakuphela. Awu khumbulani, khumbulani kutsi leti tintfo tiliciniso; ngoba iNkhosi Nkulunkulu itikhulumile.