Sehluko 3
Inkhosi Bhenjamini iyachubeka nenkhulumo yayo—INkhosi leneMandla Onkhe itawusebenta emkhatsini webantfu isedvokodvweni lelubumba—Ingati itawuphuma kuto tonkhe timbobo tesikhumba ngesikhatsi ihlawulela tono temhlaba—Layo ngilo kuphela libito lekuta ngalo insindziso. Bantfu bangamkhumula umuntfu wemvelo babe ngulabaNgcwele ngeNhlawulo—Kuhlupheka kwalababi kutawuba njengelichibi lemlilo kanye nesibabule. Cishe ngemnyaka wa 124 ngaphambi kwekutalwa kwaKhristu.
1 Ngetulu kwaloko bomnaketfu, ngicela nilalele, nginalokutsite lokuningi lengitokukhuluma kini; ngoba bukani, nginetintfo lengitonitjela tona mayelana naloko lokutako.
2 Futsi leto tintfo lengitonitjela tona tembulwe kimi yingilosi levela kuNkulunkulu. Yatsi kimi: Vuka; ngavuka, buka beyime phambi kwami.
3 Yatsi: Vuka, uve emavi lengitokutjela wona; ngoba buka; ngite kutomemetela kuwe tindzaba letimnandzi tekujabula lokukhulu.
4 Ngoba iNkhosi iyivile imithandazo yakho, yakwehlulela ngekulunga kwakho, ingitfume kutsi ngitomemetela kuwe kute utfokote; nekutsi umemetele kubantfu bakho, kute nabo ngalokunjalo bagcwaliswe ngenjabulo.
5 Ngoba buka, sikhatsi siyeta, asikho khashane kakhulu, kutsi ngemandla, iNkhosi leneMandla Onkhe lebusako, leyayinguye, futsi lenguye levela kulo lonkhe liphakadze kuya kulo lonkhe liphakadze, itokwehla ivela ezulwini yehlele emkhatsini webantfwana bebantfu, itohlala edvokodvweni lelubumba, itohamba emkhatsini webantfu, yenta timangaliso letinemandla, njengekuphilisa labagulako, kuvusa labafile, yente tishosha tihambe, timphumphutse titfole kubona kwato, kanye netimungulu kutsi tive, iphindze yelaphe tonkhe tinhlobo tetifo.
6 Iyawukhipha bodeveli, noma imimoya lemibi lehlala etinhlitiyweni tebantfwana bebantfu.
7 Bukani, iyawuhlushwa tilingo, nebuhlungu bemtimba, yindlala, koma, kanye nekukhatsala, ngetulu kwaloko umuntfu langakuva, ngaphandle kwekutsi kute kube uyafa; ngoba buka, ingati itophuma kuto tonkhe timbobo tesikhumba, luyokuba lukhulu lusizi kuyo ngenca yebubi kanye netinengiso tebantfu bayo.
8 Uyawubitwa ngekutsi nguJesu Khristu, iNdvodzana yaNkulunkulu, Babe welizulu nemhlaba, uMdali wato tonkhe tintfo kusukela ekucaleni, unina uyawubitwa ngekutsi nguMariya.
9 Buka, uta kubakhe, kute insindziso ite kubantfwana bebantfu nangekukholwa egameni lakhe; nangemvakwakokonkhe loku bayawumtsatsa njengemuntfu, batsi unadeveli, bayawumbhacabula, futsi bayawumbetsela.
10 Uyawuvuka ngelusuku lwesitsatfu kulabafile; buka, umele kwehlulela umhlaba, futsi buka, tonkhe leti tintfo tentiwa kute kwehlulela lokulungile kute kubantfwana bebantfu.
11 Ngoba buka, ngetulu kwaloko ingati yakhe ihlawulela tono talabo labawa ngesiphambeko sa-Adamu, labo labafa bangayati intsandvo yaNkulunkulu mayelana nabo noma labona ngekungati.
12 Kodvwa maye, maye kuloyo lowatiko kutsi uyahlubuka kuNkulunkulu! Ngoba insindziso ayiti kulonjalo ngaphandle kwekutsi kube ngekuphendvuka kanye nelukholo eNkhosini Jesu Khristu.
13 INkhosi Nkulunkulu itfumele baphrofethi bayo labangcwele emkhatsini wabo bonkhe bantfwana bebantfu, kumemetela leti tintfo kuyo yonkhe imindeni, tive, kanye netilimi, kute ngaloko noma ngubani lokholwako kutsi Khristu uyokuta, ngibo labo labangatfola kutsetselelwa kwetono tabo, batfokote ngekutfokota lokukhulu, kube shengatsi sewufikile emkhatsini wabo.
14 Noko iNkhosi Nkulunkulu yabona kutsi bantfu bayo bebabantfu labanetinhloko letilukhuni, yabamisela umtsetfo, umtsetfo waMosi.
15 Tiningi tibonakaliso, netimangaliso, nemifanekiso, kanye nekufana lakuveta kubo, mayelana nekuta kwakhe; ngalokunjalo nebaphrofethi labangcwele bakhuluma kubo mayelana nekuta kwakhe; kodvwa noko batenta lukhuni tinhlitiyo tabo, bangacondzi kutsi umtsetfo waMosi wawungasiti ngalutfo ngaphandle kwekutsi kwakungenca yenhlawulo yengati yakhe.
16 Futsi noma ngabe kwakungenteka kutsi bantfwana labancane bebangona bebangeke basindziswe; kodvwa ngitsi kini babusisiwe; ngoba buka, njenga-Adamu, noma ngekwemvelo, bayawa, ngalokunjalo ingati yaKhristu ihlawulela tono tabo.
17 Ngetulu kwaloko, ngitsi kini, akuyuba khona lelinye libito leliyawunikwa nanoma nguyiphi lenye indlela noma lisu lokungafika ngalo insindziso kubantfwana bebantfu, kuphela kulo kanye nangalo libito laKhristu, iNkhosi, leneMandla Onkhe.
18 Ngoba buka iyehlulela, nekwehlulela kwayo kulungile; umntfwana lomncane akabhubhi lofa ebuntfwaneni bakhe; kodvwa bantfu batinatsela bona lucobo lusizi ngaphandle kwekutsi batitfobe phindze babe njengebantfwana labancane, bakholwe kutsi insindziso yeta, ita, futsi isetawuta, kuyo phindze nangayo ingati lehlawulako yaKhristu, iNkhosi leneMandla Onkhe.
19 Ngoba umuntfu wemvelo usitsa kuNkulunkulu, seloku waba ngiso kusukela ekuweni kwa-Adamu, utawuba ngiso, phakadze naphakadze, ngaphandle kwekutsi avumele kuholwa nguMoya loNgcwele, amkhumule umuntfu wemvelo abe ngulongcwele ngenhlawulo yaKhristu iNkhosi, futsi abe njengemntfwana, atinikele, atehlise, atitfobe, abeketele, agcwale lutsandvo, avume kutinikela kuto tonkhe tintfo iNkhosi lebona kumlungele kutsi itibeke etikwakhe, njengemntfwana atinikela kuyise.
20 Ngetulu kwaloko, ngitsi kini, sikhatsi siyawufika lapho lwati lweMsindzisi luyawukwandza lugcwale kuto tonkhe tive, imindeni, tilimi, kanye nakubantfu.
21 Bukani, uma leso sikhatsi sifika, kute namunye loyawutfolakala angenacala phambi kwaNklunkulu, ngaphandle kwebantfwana labancane, kungekuphendvuka kuphela nelukholo kulo libito leNkhosi Nkulunkulu leneMandla Onkhe.
22 Futsi nangaso lesi sikhatsi, uma sewubafundzisile bantfu bakho tintfo iNkhosi Nkulunkulu wakho lekuyalete ngato, nangaleso sikhatsi abatfolakali bangenacala phambi kwaNkulunkulu, kuphela ngekwemavi lengiwakhulumile kuwe.
23 Manje sengiwakhulumile emavi iNkhosi Nkulunkulu lengiyalete ngawo.
24 Naku lokushiwo yiNkhosi: Ayawukuma njengebufakazi lobugcamile ngalokumelene nalaba bantfu, ngelusuku lwekwehlulelwa; ngaloko-ke bayawukwehlulelwa, wonkhe umuntfu ngekwemisebenti yakhe, noma ngabe mihle, noma ngabe mibi.
25 Futsi uma imibi bayoboniswa bubi bemacala abo lucobo kanye netinengiso, lokubenta bashwaphabe phambi kweNkhosi babe sesimeni selusizi kanye nekuhlupheka lokungenakuphela, lapho bangasenakubuya nanini; ngako-ke batinatsele bona lucobo lusizi emiphefumulweni yabo.
26 Ngako-ke, banatse enkomishini yelulaka lwaNkulunkulu, kulunga lokungeke kusahociswa nanini kubo kunekutsi kuhocise kutsi Adamu wawa ngenca yekudla kwakhe sitselo lesasingakavunyelwa; ngako-ke, umusa awusenawukwati kubatfola nanini ingunaphakadze.
27 Kuhlupheka kwabo kunjengelichibi lemlilo nesibabule, emalangabi alo langacisheki, intfutfu yalo lekhuphukela etulu phakadze naphakadze. Ingiyalete kanjena-ke iNkhosi. Amen.