1 Manje, kwenteka kutsi emvakwekutsi inkhosi Bhenjamini seyicedzile kukhuluma emavi lebekadze aletfwe kuyo yingilosi yeNkhosi, yaphonsa emehlo ayo kuso sonkhe sicuku, buka sase siwele phansi, ngoba bese bafikelwe kuyesaba iNkhosi.

2 Bese batibonile basesimeni sabo sasemhlabeni, bangaphansi kunelutfuli lwemhlabatsi. Bonkhe bakhala kakhulu ngelivi linye, batsi: Awu bani nemusa, wente ingati lehlawulako yaKhristu isebente kute sitfole kutsetselelwa kwetono tetfu, netinhlitiyo tetfu tihlantwe; ngoba siyakholwa kuJesu Khristu, iNdvodzana yaNkulunkulu, lowadala lizulu nemhlaba, kanye nato tonkhe tintfo; loyokwehlela phansi emkhatsini webantfwana bebantfu.

3 Futsi kwenteka kutsi emvakwekutsi sebakhulume lamavi Moya weNkhosi wehlela etikwabo, bagcwala injabulo, sebatfole kutsetselelwa kwetono tabo, sebanekuthula kwanembeza, ngenca yelukholo lolukhulu labebanalo kuJesu Khristu labekatofika, njengekwemavi inkhosi Bhenjamini lebeyiwakhulume kubo.

4 INkhosi Bhenjamini yaphindze yavula umlomo wayo yacala kukhuluma kubo, itsi: Bangani bami kanye nabomnaketfu, tihlobo tami kanye nebantfu bami, ngiyaphindza ngiyanicela kutsi nilalele, kute nive niphindze nicondze emavi ami lasele lengitowakhuluma kini.

5 Ngoba bukani, uma lwati lwebuhle baNkulunkulu ngalesi sikhatsi selunivusele ekuboneni kungabi lutfo kwenu, kanye nekungabaluleki kwenu kanye nesimo sekuwa—

6 Ngitsi kini, uma senifike elwatini lebuhle baNkulunkulu, nemandla akhe langenakulinganiswa, nekuhlakanipha kwakhe, nesineke sakhe, kanye nekumela bulukhuni kwakhe kubantfwana bebantfu; ngetulu kwaloko, nenhlawulo leyalungiswa kusukela ekusekelweni kwemhlaba, kute ngaloko insindziso ite kuloyo loyobeka litsemba lakhe eNkhosini, akhutsale ekugcineni imiyaleto yayo, futsi achubeke elukholweni kute kube sekugcineni kwemphilo yakhe, imphilo yemtimba lobhubhako—

7 Ngitsi, ngulomuntfu lotfola insindziso, ngenhlawulo leyalungiselwa bonkhe bantfu kusukela ekusekelweni kwemhlaba, labebaloku bakhona kusukela ekuweni kwa-Adamu, noma labakhona, noma labayoba khona nanini, kute kube sekupheleni kwemhlaba.

8 Nguyonandlela lena insindziso leyota ngayo. Kute lenye insindziso ngaphandle kwalena lesekukhulunywe ngayo; noma kute leminye imibandzela umuntfu langase asindziswe ngayo ngaphandle kwalemibandzela lenginitjele ngayo.

9 Kholwani kuNkulunkulu; kholwani kutsi nguye, nekutsi wadala tintfo tonkhe, lokusezulwini nalokusemhlabeni; kholwani kutsi unako konkhe kuhlakanipha, kanye nawo onkhe emandla, ezulwini nasemhlabeni; kholwani kutsi umuntfu angeke akwati kucondza tonkhe tintfo iNkhosi lekwati kuticondza.

10 Ngetulu kwaloko, kholwani kutsi kufanele niphendvuke etonweni tenu niphindze nitishiye, nititfobe phambi kwaNkulunkulu; nicele ngebucotfo benhlitiyo kutsi anitsetselele; manje, uma nikholwa ngito tonkhe leti tintfo bonani kutsi niyatenta.

11 Ngetulu kwaloko ngitsi kini njengoba ngishito ngaphambilini, kutsi njengoba senifike elwatini lwenkhatimulo yaNkulunkulu, noma uma seninelwati ngebuhle bakhe seniluvile lutsandvo lwakhe, senitfole kutsetselelwa kwetono tenu, lokwenta injabulo lenkhulu kakhulu emiphefumulweni yenu, ngalokunjalo ngifuna kutsi nite nikhumbule, njalo nihlale nikhumbula, bukhulu baNkulunkulu, kanye nekungabi lutfo kwenu lucobo, nebuhle bakhe nekumela bulukhuni kwakhe kini, tidalwa letingakafaneleki, nititfobe nasekujuleni kwentfobeko, nibite libito leNkhosi tinsuku tonkhe, nime ngekucina elukholweni kuloko lokutako, lokwakhulunywa ngemlomo wengilosi.

12 Bukani, ngitsi kini uma nikwenta loku niyohlala nitfokota, nigcwaliswe ngelutsandvo lwaNkulunkulu, niyohlala nigcine kutsetselelwa kwetono tenu; niyokhula elwatini lwenkhatimulo yaloyo lowanidala, noma elwatini lwaloko lokulungile phindze lokuliciniso.

13 Angeke nibe nawo umcondvo wekulimatana, kodvwa kutsi nihlale ngekuthula, niphindze ninike wonkhe umuntfu loko lokumfanele.

14 Angeke nivume kutsi bantfwana benu bahambe balambile, noma bahambe bangcunu; noma nivume kutsi baphule imitsetfo yaNkulunkulu, balwe baphindze bacabane bodvwana, basebentele develi, loyinkhosi yesono, noma longumoya lomubi labakhuluma ngawo bobabe betfu, lositsa sako konkhe kulunga.

15 Kodvwa nitawubafundzisa kutsi bahambe etindleleni teliciniso kanye netebucotfo; nitawubafundzisa kutsi batsandzane, nekutsi basitane.

16 Ngetulu kwaloko, nani lucobo lwenu nitawubasita labo labeme badzinga lusito lwenu; nitawupha ngaloko leninako kuloyo lodzingile; angeke nivume kutsi siceli siphakamise sicelo saso ngelite, nisicoshe kutsi sibhubhe.

17 Mhlawumbe uyotsi: Lomuntfu utiletsele yena etikwakhe lusizi lwakhe: ngako-ke ngitawusigodla sandla sami, angeke ngimnike kudla kwami, noma ngimnike lenginako kute angahlupheki, ngoba tijeziso takhe tilungile—

18 Kodvwa mine ngitsi kini, Awu muntfu, loyo lowenta loku nguye kanye lonesidzingo lesikhulu sekuphendvuka; ngaphandle kwekutsi aphendvuke ngaloko lakwentile uyobhubha ingunaphakadze, futsi akanasabelo embusweni waNkulunkulu.

19 Ngoba bukani, asisito yini ticeli sonkhe na? Ngabe asikanciki yini sonkhe kuye kanye loyo Muntfu, ngisho Nkulunkulu, ngato tonkhe tintfo lesinato, ngekudla kanye netingubo, kanye nangeligolide, kanye nangesiliva, kanye nangawo wonkhe umcebo lesinawo?

20 Bukani, nangalesi sikhatsi, benimemeta libito lakhe, nicela kutsetselelwa kwetono tenu. Ngabe uvumile yini kutsi nicele ngelite na? Cha; uwutfululile Moya wakhe etikwenu, wenta kutsi tinhlitiyo tenu tigcwaliswe ngenjabulo, waphindze wenta kutsi imilomo yenu ivalwe kute ingakwati kukhuluma, futsi ibe yinkhulu kakhulu injabulo yenu.

21 Manje, uma Nkulunkulu, lonidalile, lenincike kuye ngetimphilo tenu kanye nangako konkhe leninako phindze leningiko, aninika noma yini leniyicelako lelungile, ngelukholo, nikholwa kutsi niyoyitfola, Awu pho, kufaneleke kangakanani kutsi niphane ngaloko leninako.

22 Uma nehlulela umuntfu lowenta sicelo sakhe kini ngetintfo tenu kute angabhubhi, nimjezise, sitawulunga kangakanani senu sijeziso ngekugodla intfo yenu, lengasiyo yenu, kodvwa leyiyaNkulunkulu, lo nemphilo yenu iyakhe; futsi noko nibe ningenti sicelo, noma niphendvuke entfweni leniyentile.

23 Ngitsi kini, maye kuloyo muntfu, ngoba imphahla yakhe iyobhubha kanye naye; manje, ngisho leti tintfo kulabo labanotsile ngekwetintfo temhlaba.

24 Ngetulu kwaloko, ngitsi kulabamphofu, nine leningenalutfo kodvwa nibe ninako lokwanele, kute niphile lusuku nelusuku; ngisho nine nonkhe lenalela siceli, ngenca yekutsi aninalutfo; ngifuna kutsi nitsi etinhlitiyweni tenu: angiphi ngenca yekutsi anginalutfo, kodvwa kube benginako bengiyokupha.

25 Manje, uma nikusho loku etinhlitiyweni tenu niyohlala ningenacala, ngaphandle kwaloko niyajeziswa; sijeziso senu silungile ngoba nifisa loko leningakunikwanga.

26 Manje, ngenca yaleti tintfo lengitikhulume kini—lokungukutsi, kute kugcinwe kutsetselelwa kwetono tenu lusuku ngelusuku, kute nihambe ningenacala phambi kwaNkulunkulu—ngifuna kutsi niphane ngaleninako kulabamphofu, wonkhe umuntfu ngaloko lanako, njengekondla labalambile, kwembatsisa labangcunu, kuvakashela labagulako kanye nekubasita kutsi bakhululeke, ngekwakamoya kanye nangekwenyama, njengekwetidzingeko tabo.

27 Futsi bonani kutsi tonkhe leti tintfo tentiwa ngekuhlakanipha kanye nangeluhlelo; ngoba akukafaneli kutsi umuntfu agijime ngetulu kwemandla lanawo. Ngetulu kwaloko, kudzingekile kutsi akhutsale, kute ngaloko atfole umvuzo; ngako-ke, tonkhe tintfo kufanele tentiwe ngeluhlelo.

28 Ngifuna kutsi nikhumbule, kutsi noma ngubani emkhatsini wenu lobolekile kumakhelwane wakhe akabuyisele intfo leyo layibolekile njengoba kadze avumile, ngaphandle kwaloko uyowenta sono; mhlawumbe uyawukwenta makhelwane wakhe kutsi ente sono naye.

29 Kwekugcina anginakunitjela tonkhe tintfo leningenta ngato sono; ngoba kukhona tinhlobonhlobo tetindlela kanye nemasu, letiningi kakhulu kangangekutsi anginakutibala.

30 Kodvwa naku lenginganitjela kona, kutsi uma ningaticapheli, kanye nemicabango yenu, kanye nemavi enu, kanye netento tenu, nigcine imiyaleto yaNkulunkulu, nichubeke elukholweni lwaloko lenikuvile mayelana nekuta kweNKhosi, kute kube sekupheleni kwetimphilo tenu, kufanele nibhubhe. Manje, Awu muntfu, khumbula, ungabhubhi.