1 Manje, kwenteka kutsi ngesikhatsi inkhosi Bhenjamini seyikhulume kanjalo kubantfu bayo, yatfumela emkhatsini wabo, ifisa kwati kubantfu bayo kutsi ngabe bebawakholwa yini lamavi leyayiwakhulume kubo.

2 Bonkhe bakhala ngelivi linye, batsi: Yebo, siyawakholwa onkhe lamavi lowakhulumile kitsi; futsi ngetulu kwaloko, sati ngekweliciniso kwawo kanye nangebuciniso bawo, ngenca yaMoya weNkhosi leneMandla Onkhe, lowente lushintjo lolukhulu kitsi, noma etinhlitiyweni tetfu, kangangekutsi, sesite umdlandla wekwenta lokubi, kodvwa kwenta lokuhle njalo.

3 Futsi tsine, lucobo lwetfu, ngetulu kwaloko, ngekulunga kwaNkulunkulu lokungapheli, kanye netibonakaliso taMoya wakhe sinekucodza lokukhulu ngaloko lokutako; futsi kube bekudzingekile, besingaphrofetha ngato tonkhe tintfo.

4 Futsi lukholo lebesinalo etintfweni inkhosi yetfu lekhulume ngato kitsi lolusiletsela lolu lwati lolukhulu, ngaloko-ke siyajabula ngentfokoto lenkhulu kakhulu.

5 Sitimisele kungena esivumelwaneni naNkulunkulu wetfu kutsi sente intsandvo yakhe, silalele imiyaleto yakhe etintfweni tonkhe layawusiyaleta ngato, tonkhe tinsuku tetfu letisasisalele, kute singatiletseli etikwetfu kuhlupheka lokungapheli, njengoba kukhulume ingilosi, kute singanatsi enkomishini yelulaka lwaNkulunkulu.

6 Manje, lawa ngemavi inkhosi Bhenjamini leyayiwafisa kubo; ngako-ke yatsi kubo: Nikhulume emavi lebengiwafisa; sivumelwano lenisentile sivumelwano lesilungile.

7 Manje, ngenca yesivumelwano lenisentile nitobitwa ngekutsi nibantfwana baKhristu, emadvodzana akhe, kanye nemadvodzakati akhe; ngoba buka, ngalolusuku unitele ngekwakamoya; ngoba nitsi tinhlitiyo tenu tishintjile ngekukholwa egameni lakhe; ngako-ke, nitelwe nguye seningemadvodzana kanye nemadvodzakati akhe.

8 Ngaphansi kwalelibito nikhululiwe, kute lelinye libito leningakhululwa ngalo. Kute lelinye libito leliniketiwe lekungeta ngalo insindziso; ngako-ke, ngifuna kutsi nemukele kubitwa ngelibito laKhristu, nonkhe nine leningene esivumelwaneni naNkulunkulu kutsi nilalele kute kube sekupheleni kwetimphilo tenu.

9 Kuyawukwenteka kutsi loyo lowenta loku uyawutfolakala esandleni sangesekudla saNkulunkulu, ngoba uyawulati libito layawubitwa ngalo; ngoba uyawubitwa ngelibito laKhristu.

10 Manje kuyawukwenteka, kutsi loyo longayukwemukela kubitwa ngelibito laKhristu kufanele abitwe ngalelinye libito; ngaloko-ke, uyawutitfola asesandleni sangesencele saNkulunkulu.

11 Ngifuna kutsi nikhumbule, kutsi leli libito lengatsi ngitoninika lona lelingeke lesulwe nanini, ngaphandle kwekutsi kube ngenca yesiphambeko; ngako-ke, caphelani kutsi ningaphambuki kute lelibito lingesulwa etinhlitiyweni tenu.

12 Ngitsi kini, ngifuna kutsi nite nikhumbule kuligcina libhaliwe njalo lelibito etinhlitiyweni tenu, kute ningatfolakali ngasesandleni sangesencele saNkulunkulu, kodvwa kutsi nilive niphindze nilati livi leniyawubitwa ngalo, ngalokunjalo, nelibito layawunibita ngalo.

13 Ngoba umuntfu angayati kanjani inkhosi langazange ayisebentele, nalongatiwa kuyo, lokhashane nemicabango kanye netifiso tenhlitiyo yayo na?

14 Ngetulu kwaloko, ngabe umuntfu angayitsatsa yini imbongolo lengeyakamakhelwane wakhe ayigcine na? Ngitsi kini, Cha; angeke avume nekutsi idle emkhatsini wemhlambi wakhe, kodvwa utawuyicosha ayikhiphele ngaphandle. Ngitsi kini, kuyawuba njalo nasemkhatsini wenu uma ningalati libito lenibitwa ngalo.

15 Ngako-ke ngifuna kutsi nisime ninganyakatiswa, nikhule njalo ekwenteni imisebenti lemihle, kute Khristu, iNkhosi Nkulunkulu loneMandla Onkhe, anente nibe ngebakhe, kute niletfwe ezulwini, kute nizuze insindziso yaphakadze kanye nekuphila lokuphakadze, ngekuhlakanipha nangemandla, nangekulunga, kanye nangemusa waloyo lowadala tintfo tonkhe, ezulwini nasemhlabeni longuNkulunkulu longetulu kwako konkhe. Amen.