1 Manje, kwenteka kutsi emvakwekutsi inkhosi Mosiya seyibe nekuthula njalonjalo sikhatsi lesingangeminyaka lemitsatfu, yaba nesifiso sekwati mayelana nebantfu labahamba bayohlala eveni lemaLehi-Nefi, noma edolobheni lemaLehi-Nefi; ngoba bantfu bakhe bebangakeva lutfo ngabo kusukela ngesikhatsi bahamba eveni laseZarahemla.

2 Futsi kwenteka kutsi inkhosi Mosiya yavuma kutsi emadvodza lacinile lalishumi nesitfupha akhuphukele eveni lemaLehi-Nefi, kuyobuta mayelana nabomnakabo.

3 Futsi kwenteka kutsi ngakusasa acala kukhuphuka, kuwo kwakhukhona lomunye longu-Amoni, lobekayindvodza lecinile lenemandla, bekawesitukulwane saZarahemla, ngetulu kwaloko bekangumholi wabo.

4 Manje, bebangayati indlela lebekumele bahambe ngayo ehlane kukhuphukela eveni lemaLehi-Nefi; ngako ke bazulazula tinsuku letiningi ehlane, tinsuku letingemashumi lamane bazulazula.

5 Ngesikhatsi sebazulazule tinsuku letingemashumi lamane bafika egcumeni, lelisenyakatfo yelive laseShilomu, lapho bamisa emathende abo.

6 Amoni watsatsa bomnakabo labatsatfu, emabito abo kwakubo-Amalekhi, Helemi kanye naHemi, behlela entasi eveni laNefi.

7 Buka, bahlangana nenkhosi yebantfu labebaseveni laNefi, kanye naseveni laseShilomu, bebatungeletwe bogadzi benkhosi, batsatfwa, baboshwa, baphindze bafakwa ejele.

8 Futsi kwenteka emvakwekutsi sebasejele tinsuku letimbili baphindze baletfwa phambi kwenkhosi, tibopho tabo tacegiswa, bamiswa phambi kwenkhosi, bavunyelwa, noma bayaletwa, kutsi baphendvule imibuto leyayitoyibuta kubo.

9 Yatsi kubo: Bukani, mine nginguLimhayi, indvodzana yaNowa, lobekayindvodzana yaNefi lowakhuphuka waphuma eveni laseZarahemla kute atfole lelive njengelifa, lokwakulive laboyise, lowentiwa inkhosi ngelivi lebantfu.

10 Manje, ngifisa kwati sizatfu sekutsi nibe nesibindzi lesingaka sekusondzela edvute netindvonga talelidolobha, ngesikhatsi mine, lucobo lwami, benginabogadzi bami ngephandle kwelisango.

11 Manje, ngalesi sizatfu nginivumele kutsi nisindziswe, kute ngibute ngani, kungenjalo ngabe ngente kutsi bogadzi bami banibulale. Nivumelekile kutsi nikhulume.

12 Manje, ngesikhatsi Amoni abona kutsi bekavumelekile kukhuluma, waya ngaphambili wakhotsama phambi kwenkhosi; waphindze waphakama watsi: Awu nkhosi, ngiyabonga kakhulu phambi kwaNkulunkulu ngalolusuku kutsi ngisaphila, futsi ngisavunyelwe kutsi ngikhulume; ngitawutama kukhuluma ngesibindzi;

13 Ngoba ngicinisekile kutsi kube bewungati bewungeke uvume kutsi ngifakwe leti tibopho. Ngoba mine ngingu-Amoni, nginguwesitukulwane saZarahemla, futsi ngikhuphukile ngaphuma eveni laseZarahemla kutsi ngitobuta mayelana nabomnaketfu, Zenifi labanyusa baphuma kulelo live.

14 Manje, kwenteka kutsi emvakwekutsi Limhayi sekawavile lamavi ku-Amoni, wajabula kakhulu, watsi: Manje, sengiyati ngekweliciniso kutsi bomnaketfu labebaseveni laseZarahemla basaphila. Futsi manje, ngitawutfokota; kusasa ngitawukwenta kutsi bantfu bami batfokote nabo.

15 Ngoba buka, sisebugcilini kumaLamani, sitseliswe ngemtselo lokumatima kuwutfwala. Manje, buka, bomnaketfu batawusikhulula ebugcilini betfu, noma basikhiphe etandleni temaLamani, sitawuba tigcili tabo; ngoba kuncono kutsi sibe tigcili kumaNefi kunekutsi sikhokhe umtselo enkhosini yemaLamani.

16 Manje, inkhosi Limhayi yayaleta bogadzi bayo kutsi bangabe basambopha Amoni noma bomnakabo, kodvwa yenta kutsi bahambe baye egcumeni lelalisenyakatfo yaseShilomu, baletse bomnakabo edolobheni, kute ngaloko badle, banatse, batiphumute emisebentini yeluhambo lwabo; ngoba bebahlushwe tintfo letiningi; bebahlushwe yindlala, koma, kanye nekukhatsala.

17 Manje, kwenteka ngakusasa kutsi inkhosi Limhayi yatfumela simemetelo emkhatsini wabo bonkhe bantfu bayo, kutsi babutsane ndzawonye ethempelini, kutova emavi labekatowakhuluma.

18 Futsi kwenteka kutsi emvakwekutsi sebabutsene ndzawonye yakhuluma kubo ngalendlela, itsi: Awu nine, bantfu bami, phakamisani tinhloko tenu nidvudvuteke; ngoba bukani, sikhatsi sesifikile, noma asisekho khashane kakhulu, lapho singeke sibe ngaphansi kwetitsa tetfu, nanoma bumatima betfu bubuningi, bube lite; noko ngiyetsemba busesele bumatima lobunemphumela losatawukwentiwa.

19 Ngako-ke, phakamisani tinhloko tenu, nitfokote, nibeke litsemba lenu kuNkulunkulu, kuloyo Nkulunkulu lobekanguNkulunkulu wa-Abrahama, na-Isaka, kanye naJakobe; loyo Nkulunkulu lowakhipha bantfwana baka-Israyeli eveni laseGibhithe, wenta kutsi bahambe badzabule Lwandle loluBovu emhlabatsini lowomile, wabondla ngemana kute bangabhubhi ehlane; futsi tiningi letinye tintfo labentela tona.

20 Futsi ngetulu kwaloko, yena kanye loyoNkulunkulu ukhiphe bobabe betfu eveni laseJerusalema, wabagcina wabalondvolota bantfu bakhe kute kube manje; bukani, kungenca yekungalungi kanye netinengiso tetfu kutsi usiletse ebugcilini.

21 Nine nonkhe nibofakazi ngalolusuku, kutsi Zenifi, lowentiwa inkhosi ngetulu kwalaba bantfu, bekanenshisekelo lenkhulu kutsi atfole live laboyise, ngako-ke wakhohliswa ngebucili kanye nangemacebo enkhosi Lamani, lowatsi ekubeni angene esivumelwaneni nenkhosi Zenifi, ekubeni atinikele etandleni takhe kuphatfwa kwencenye yalelive, noma lidolobha lemaLehi-Nefi, nelidolobha laseShilomu kanye nelive lelitungeletiwe—

22 Konkhe loku yakwenta, ngenhloso yinye yekuletsa laba bantfu ebugcilini noma ngaphansi kwayo. Bukani, tsine ngalesi sikhatsi sikhokha umtselo enkhosini yemaLamani, lokulinani leliyincenye yinye yemmbila wetfu, kanye nemabele etfu, nako konkhe kwetfu lokuyinhlavu kwalo lonkhe luhlobo, kanye nencenye yinye yekwentalo yemhlambi wetimvu kanye nemhlambi wetinkhomo tetfu; nencenye yinye yako konkhe lesinako noma lesikuphetse inkhosi yemaLamani iyakufuna kitsi, noma timphilo tetfu.

23 Manje, ngabe loku akusiko matima yini kukutfwala na? Ngabe loku, akusiyo yini, inhlupheko, lenkhulu kitsi na? Manje, bukani, ngabe sikhulu kanganani sizatfu sekutsi silile na?

24 Yebo, ngitsi kini, tinkhulu tizatfu letenta silile; ngoba bukani bangaki bomnaketfu lababulawa, ingati yabo yacitselwa lite, konkhe ngenca yebubi.

25 Ngoba kube laba bantfu bebangawelanga esiphambekweni iNkhosi yayingeke ivume kutsi lobu bubi lobukhulu kangaka behlele etikwabo. Kodvwa bukani, abawalalelanga emavi ayo; kodvwa kwavuka imibango emkhatsini wabo, kangangekutsi bacitsa ingati emkhatsini wabo lucobo.

26 Umphrofethi weNkhosi bambulele; yebo, indvodza lekhetsiwe yaNkulunkulu, leyabatjela ngebubi babo kanye netinengiso, yaphrofetha ngetintfo letiningi letitokwenteka, yebo, nangekuta kwaKhristu.

27 Ngenca yekutsi watsi kubo Khristu bekanguNKulunkulu, Babe wato tonkhe tintfo, watsi uyotsatsa umfanekiso wemuntfu, kuyoba ngumfanekiso umuntfu ladalwe ngawo ekucaleni; noma ngalamanye emavi, watsi umuntfu bekadalwe ngemfanekiso waNkulunkulu, nekutsi Nkulunkulu uyokwehlela emkhatsini webantfwana bebantfu, atsatse umtimba wenyama nengati, futsi ahambe emhlabeni wonkhe.

28 Manje, ngenca yekutsi washo loku, bambulala; tiningi kakhulu tintfo labatenta letehlisela lulaka lwaNkulunkulu etikwabo. Ngako-ke, ngubani lomangalako kutsi basebugcilini, kanye nekutsi bashaywa ngetinhlupheko letibuhlungu na?

29 Ngoba bukani, iNkhosi itsite: Angitubasita bantfu bami ngelusuku lwesiphambeko sabo; kodvwa ngitawutibiyela tindlela tabo kute bangaphumeleli; tento tabo tiyawukuba sikhubekiso phambi kwabo.

30 Ngetulu kwaloko, itsi: Uma bantfu bami bayawuhlanyela kungcola bayawuvuna emakhoba abo kuso sivunguvungu; futsi umphumela waloko ngushevu.

31 Ngetulu kwaloko itsi: Uma bantfu bami bayawuhlanyela kungcola bayawuvuna umoya wasemphumalanga, loletsa imbubhiso ngekushesha.

32 Manje, bukani, setsembiso seNkhosi sigcwalisekile, nishayiwe niphindze nisetinhluphekweni.

33 Kodvwa uma nitawuphendvukela eNkhosini ngenhloso legcwele yenhlitiyo, nibeke litsemba lenu kuyo, niyisebentele ngako konkhe kukhutsala kwengcondvo, uma nitawukwenta loku, ngekwentsandvo nangekwesifiso sayo, itawunikhipha ebugcilini.