१ इस्राएलका सर्वशक्तिमान् परमप्रभु परमेश्वर यसो भन्नुहुन्छ: हेर, म तिमीलाई भन्दछु, मेरा सेवक एडवर्ड, कि तिमी आशीषित छौ र तिमीलाई तिम्रा पापहरूको क्षमा गरिएको छ र तिमीलाई तुरहीको आवाजले जस्तै मेरो सुसमाचारको प्रवचन दिन बोलावट गरिएको छ;

२ अनि म मेरा सेवक सिड्नी रिग्डनका हातद्वारा तिमीमाथि मेरा हात राख्नेछु र तिमीले मेरो आत्मा, पवित्र आत्मा, आश्वासी समेत प्राप्त गर्ने छौ, जसले तिमीलाई अधिराज्यको शान्तिपूर्ण विषयहरू सिकाउने छ;

३ अनि तिमीले यसलाई उच्च स्वरमा घोषणा गर्ने छौ, यसो भन्दै: होसन्ना, सर्वोच्च परमेश्वरको नामको प्रशंसा होस् ।

४ अनि अब यो बोलावट र आज्ञा म तिमीहरूलाई सबै मानिसहरूका सम्बन्धमा दिन्छु—

५ मेरा सेवकहरू सिड्नी रिग्डन र जोसेफ स्मिथ जूनियर अगाडि, यो बोलावट र आज्ञालाई आत्मसात गरेर आउने जतिलाई नियुक्त गरिने छ र राष्ट्रहरू बीचमा अनन्त सुसमाचार प्रवचन दिन पठाइने छ—

६ पश्चात्तापको प्रवचन दिँदै, यसो भन्दै: यहाँसम्म कि मासुको दाग लागेको वस्त्रलाई समेत घृणा गर्दै, आगोबाट बाहिर आऊ र आफूलाई यस अपमानजनक युगबाट बचाऊ ।

७ अनि मेरा चर्चका एल्डरहरूलाई यो आज्ञा दिइने छ, कि हरेक मानिस जसले यसलाई हृदयको एकाग्रताले अँगाल्ने छ, उसलाई मैले बोले जस्तै नियुक्त गरी पठाउन सकिन्छ ।

८ म येशू ख्रीष्ट, परमेश्वरको पुत्र हुँ; यसकारण, आफ्नो कम्मर कस अनि अकस्मात् म मेरो मन्दिरमा आउने छु । अनुसार समेत । आमीन ।