Ñandejára Jesucristo ñanembo’e ñañembo’e hağua
Peñembo’évo, ¿peñembo’e añete piko terãpa pejénte umi ñe’ẽ?
1977-pe ame’ẽkuri servicio misionero ramo Cuzco, Perú-pe, ha che compañero ha che rorresibíkuri ñemoneĩ rogueraha hağua opa misionerokuérape Cuzco zona-guápe Machu Picchu ruinas iporãmbajepévape.
Opakuévoma ore visita umi ruina-pe, oĩ misionero-kuéra ohoséva Puente del Inca peve, ha’éva peteĩ montaña rape. Añandu sapy’a che korasõme Espíritu he’iha chéve ani hağua roho upépe. Upe tape oĩ petei montaña ho’áva 600 metros yképe. Heta hendápe upe tape po’ikue ha’e peteĩ persona ohasa hağuáichante; che compañero ha che ro’e chupekuéra ndorohoiva’erãha Puente del Inca-pe.
Ha katu, misionero-kuéra ojerure jey jey roho hağua. Umi jejerure imbareteve ha, Espíritu ombotove ramo jepe, añeme’ẽ pe aty presión–pe ha ha’e chupekuéra rohotaha upe puente-pe, ha katu ñañangareko porãtaramonte.
Roñepyrῦ roguata tape oraháva Puente del Inca peve. Che aha tapykuépe, ha ñepyrῦrãme opavave oguata mbegue ja’e haguéichakuri, upéinte misionero-kuéra oñepyrῦ oguata pya’eve ha odisparáma katu hikuái, ohendu’ỹre che jerure ani hağua oho pya’ete. Añeñandu obligado ahupyty chupekuéra ha’e hağua rojevy jeyva’erãha. Che aĩ mombyry chuguikuéra ha adisparámante ahupyty hağua chupekuéra.
Ajerévo peteĩ curva-pe, peteĩ ipo’ietehápe mokõi oguata hağuáicha, ajuhu peteĩ misionero oñembo’y ilómo itaguasúre. Aporandu chupe mba’érepa oñembo’y hína upépe ha he’i chéve oñanduha opytava’erãha upépe sapy’aite, ha he’i chéve ahánte hağua.
Añandu pya’ete ahupytyva’erãha umi ohóvape tenondeve, ha’e chepytyvõ ahasa hağua tenonde ha ikatu aguata mie upe tapére. Ahecha pe yvýpe henyhẽha ka’avo hovýgui ha amoivo che py derecho yvy ári, añeme’ẽ en cuenta, ha’akuévo, ndaiporiha yvy umi ka’avo guýpe. Py’aropúpe ajejagarra yvyra rakã oĩvare tape guýpe, ha sapy’aite ahechákuri yvy gotyo, 600 metros che guýpe, río Urubamba ohasáva Valle Sagrado de los Incas rupi. Añandu ohóramoguáicha chehegui che mbarete ha sapy’aite rire ndaikatumo’ãvéimaha ajejoko. Upemarõ, añembo’e atãve. Peteĩ ñembo’e mbykymi aipe’ávo che juru ha ha’e: “¡Túva, chepytyvõmina!”.
Umi yvyra rakã naimbaretéi ojoko hağuáicha che rete ha aikuaa ipaha hi’ağuiha. Upe momento ha’etépe ha’apotaitévoma, añandu peteĩ po mbarete chejapyhýva che jyvágui ha chetiráva yvate gotyo. Upe ñeipytyvõme, ikatukuri añeha’ã ha ajupi jey tapépe. Pe misionero opytava’ekue tapykue chesalva.
Ha katu niko, Ñande Ru Yvagagua pe chesalva añetéva. Ha’e ohendu che ñe’ẽ. Che ahendu kuri Espíritu ñe’ẽ mbohapy jey, he’ivo ani hağua roho Puente del Inca-pe, ha katu nda’obedeséi. Che aĩ en shock, cheresa’yju ha ndaikuaái mba’épa ha’éta. Upémarõ chemandu’a umi ambue misionero-kuéra oĩha tenondeve orehegui, upéicha roho roheka chupekuéra rojuhu peve ha romombe’u chupekuéra ojehuva’ekue chéve.
Rojevy Machu Picchu-pe, jesareko ha kirirĩme. Tape rojerévo che apyta kirirĩme, ha ou che akãme aimo’ã ha’e ohenduha che ñe’ẽ ha katu che nahendúi Chupe. Añandu hasy’asy che korasõme adesobedese haguére Iñe’ẽ, upéicha avei peteĩ sentimiento pypuku gratitud reheve Imisericordiare. Ha’e nomomba’apói Ijusticia che árí, Imisericordia guasuetépe katu, osalva che rekove (tojehecha Alma 26:20).
Ára opakuévoma, añepyrῦtavo ajapo che ñembo’e personal, añembo’e che korasõ guive “misericordia-kuéra Túva ha opa consolación Tupãme” (2 Corintios 1:3). Añembo’e “peteĩ korasõ añetévare, intención añete reheve, arekóvo fe Cristo-re” (Moroni 10:4).
Upe pyharevépe, añembo’ékuri che jurúpente, ha katu amanombotávo, añembo’e che korasõ reheve. Ajepy’amongeta che rekovére upe punto peve. Añeme’ẽ en cuenta heta jey ñande Ru Yvagagua imisericordiosoha chendive. Chembo’e heta mbo’epy upe ára Machu Picchu ha Cuzco, Perú-pe. Peteĩ mbo’epy iñimportantevéva ha’e añembo’eva’erãha akoiete peteĩ korasõ añetére, intención añetévare, amomba’apóvo fe Cristo-re.
Peteĩ jey Ñandejára Jesucristo “oñembo’e peteĩ tendápe”, ha “ojapopávo, peteĩva idiscípulo he’i chupe: Ñandejára, orembo’éna roñembo’e hağua” (Lucas 11:1). Ha’e upémarõ ombo’e Idiscípulokuérape oñembo’ekuaa hağua, ha ko’áğa ñanembo’e peẽme ha chéve ñañembo’e hağua jahechávo chupe ñane akãme oñembo’évo Getsemaní-pe ha he’ívo: “Ha katu ani ojejapo che voluntad, sino nemba’e” (Lucas 22:42). Peñembo’évo, ¿peipota añete piko “tojejapo’ỹ che voluntad, sino nemba’éva”?
Pablo omombe’u mba’éichapa Jesús oñembo’e “oĩnguévo ho’ópe”, upe Getsemaní-pe, oĩvo “ome’ẽvo jerure ha ñembo’e ñe’ẽ mbarete ha tesaýpe ikatúvape oguenohẽ chupe ñemanógui, oñehenduka ikyhyje rreveréntere” (Hebreos 5:7). Peñembo’évo, ¿añete piko peñembo’e terãpa pejénte umi ñe’ẽ?, ¿Penepererĩnte piko peñembo’évo?
Jesús oñembo’e mbarete ha oñe’ẽ Itúvandi. “Ha ojehu… avei Jesús oñemongarai; ha oñembo’e aja, yvága ojepe’a” (Lucas 3:21). Peñembo’évo, ¿peñandu piko yvága ojepe’árõ? ¿Araka’éiko ipaha peñandúra’e pe conexión yvágandi?
Jesús oñembosako’i Ijupe ojapo hağua decisiones importantes oñembo’évo Itúvape.
“Ha’e oho upe monte-pe oñembo’évo, ha ohasa pyhare oñembo’évo Tupãme.
“Ha ára oğuahẽvo, ohenói idiscípulokuérape ha oiporavo doce ijapytepekuéragui” (Lucas 6:12–13).
¿Peñembo’e piko peẽ pende Ru Yvagaguápe peñembosako’ívo umi decisiones importantes pejapyhy hağua? ¿Peñembosako’i piko pereko hağua peteĩ momento peñembo’évo?
Jesús oúvo continente americano-pe, ombo’e pueblo-pe mba’éichapa oñembo’éta. “Ha Jesús he’i chupekuéra: Peñembo’énte pehóvo; ha ha’ekuéra nombopahái iñembo’e” (3 Nefi 19:26).
Jesús ñaneinvita “[ñañembo’e] akóinte” (D. Y C. 10:5). Jesús oikuaa Ñande Ru Yvagagua ñanerenduha ha ome’ẽha ñandéve iporãvéva ñandéve ğuarã. ¿Mba’ére sapy’ánte ndajajapyhyséi? ¿Mba’ére?
Pe momento ja’ekuévo “Padre Celestial”, Ha’e ohendúma ñane ñembo’e ha oreko sensibilidad ñandéve ha ñane remikotevẽpe ğuarã; ha Hesa ha Ijapysa oñekonecta penendive. Ha’e olee ñane apytu’ῦ ha oñandu ñane korasõ; ndaipóri mba’eve ikatúva ñamokañy chugui. Ha iporãitevéva niko Ha’e ohecháta mborayhu ha misericordia resápe: mborayhu ha misericordia ikatu’ỹva hesakãmba ñandéve. Upeichavérõ, pe mborayhu ha misericordia oĩta Hendie pe momento peẽ pejévo “Padre Celestial”.
Upéicha upe ñembo’e momento ha’e peteĩ momento, isagrádoitereiva. Ha’e ndaha’éi peteĩ he’íva: “Nahániri, norohendumo’ãi ko’áğa nde reju haguére che rendápe rerekóvo problema-kuérante”. Yvypórante péicha ojapo. Ha’e niko ndaha’éi pe he’íva: “¡nereñeimaginái mba’eichaitépa che rembiapo hína ko’áğa!”. Yvypórante péicha he’i.
Che esperanza ha che ñembo’e ha’e opavave tañañembo’e Jesús ñanembo’e haguéicha. Ñandejára Jesucristo rérape. Amén.