L-Ordinanzi tas-Salvazzjoni Jwasslulna Dawl Meraviljuż
Jekk intom tipparteċipaw fl-ordinanzi u tonoraw il-patti marbutin magħhom intom tirċievu dawl mill-aktar meraviljuż.
Ħuti, jiena nifraħ magħkom fl-evanġelju, jew fid-duttrina ta’ Kristu.
Wieħed ħabib tiegħi darba staqsa lill-Presbiteru Neil L. Andersen, li dak iż-żmien kien għadu membru tas-Sebgħin, kif huwa kien ħassu meta kien tkellem quddiem 21,000 ruħ fiċ-Ċentru tal-Konferenza. Il-Presbiteru Andersen wieġeb, “Tħossok eċċitat mhux minħabba l-21,000 ruħ ta’ quddiemek; iżda minħabba l-15 il-Aħwa li jkunu jinsabu bilqiegħda warajk.” Dak il-ħin tbissimt, iżda issa qed inħoss dak li ddeskriva hu. Jiena verament inħobb u nsostni lil dawn il-15-ir raġel bħala profeti, bassâra u rivelaturi.
Il-Mulej qal lil Abraham li permezz tan-nisel tiegħu u permezz tas-saċerdozju, il-familji kollha tad-dinja se jkunu mberkin “bil-barkiet tal-Evanġelju, … sewwasew bil-ħajja eterna” (Abraham 2:11; ara wkoll versi 2–10).
Dawn il-barkiet imwiegħda tal-evanġelju u s-saċerdozju ġew irrestawrati fid-dinja, u mbagħad, fl-1842, il-Profeta Joseph Smith amministra l-għotja mqaddsa lil numru limitat ta’ rġiel u nisa. Mercy Fielding Thompson kienet waħda minnhom. Il-Profeta qalilha, “Din l-għotja mqaddsa se tgħaddik minn ġod-dalma għal dawl mill-aktar meraviljuż.”1
Illum nixtieq niffoka fuq l-ordinanzi tas-salvazzjoni, li lilkom u lili jwasslulna dawl mill-aktar meraviljuż.
Ordinanzi u Patti
F’ Leali lejn il-Fidi aħna naqraw: “Ordinanza hija att sagru u formali mwettaq bl-awtorità tas-saċerdozju.L-ordinanzi li huma essenzjali għall-eżaltazzjoni tagħna … jissejħu l-ordinanzi tas-salvazzjoni. Jinkludu l-magħmudija, il-konferma, l-ordinazzjoni għas-Saċerdozju Melkisedeku (għall-irġiel), l-għotja mqaddsa tat-tempju u s-siġill taż-żwieġ.”2
Il-Presbiteru David A. Bednar għallem, “L-ordinanzi tas-salvazzjoni u l-eżaltazzjoni li huma amministrati fil-Knisja rrestawrata tal-Mulej … jikkonstitwixxu metodi awtorizzati li permezz tagħhom il-barkiet u l-qawwiet tas-sema jistgħu jsiru parti mill-ħajja individwali tagħna.”3
Bħal munita b’ żewġt uċuħ, l-ordinanzi kollha tas-salvazzjoni huma akkumpanjati minn patti li aħna nagħmlu ma’ Alla. Alla wegħedna ċerti barkiet jekk aħna b’ fedeltà nonoraw dawn il-patti.
Il-profeta Amuleki ddikjara, “Issa … huwa ż-żmien … li titħejjew biex tiltaqgħu ma’ Alla” (Alma 34:32). Kif nitħejjew? Billi nirċievu b’ mod den l-ordinanzi. Għandna wkoll, kif qal il-President Russell M.Nelson, “inkomplu mexjin fit-triq tal-patt.” Il-President Nelson kompla, “L-impenn tagħkom li timxu wara s-Salvatur billi tagħmlu l-patti Miegħu u mbagħad iżżommu dawk il-patti jwassal biex jinfetaħ bieb għal kull barka u privileġġ spiritwali disponibbli għall-irġiel, għan-nisa u għat-tfal kollha madwar id-dinja.”4
John u Bonnie Newman, bħal ħafna minnkom, huma reċipjenti tal-barkiet spiritwali li wegħidna l-President Nelson. Darba waħda f’ jum il-Ħadd, wara li kienet għadha kif attendiet il-Knisja flimkien mat-tliet uliedhom ċkejknin, Bonnie qalet lil John, li ma kienx membru tal-Knisja, “Ma nistax nibqa’ sejra hekk waħdi. Inti trid tiddeċiedi jekk tridx tibda tiġi magħna l-knisja jew inkella tagħżel int xi knisja li fiha nistgħu nattendu flimkien, iżda t-tfal jeħtieġ li jkunu jafu li missierhom iħobb ukoll lil Alla.” Il-Ħadd ta’ wara u l-Ħdud kollha ta’ wara, John mhux biss attenda l-knisja magħhom; huwa wkoll serva, fejn għadda snin twal idoqq il-pjanu f’ ħafna oqsma, fergħat u Primarji. Jiena kelli l-privileġġ li niltaqa’ ma’ John f’ April tal-2015, u f’ dik il-laqgħa, aħna ddiskutejna li l-aħjar mod kif huwa seta’ juri l-imħabba tiegħu lejn Bonnie kien li jeħodha t-tempju, iżda dan ma setax iseħħ qabel ma huwa jitgħammed.
Wara li dam jattendi l-Knisja ta’ Ġesù Kristu tal-Qaddisin tal-Aħħar Jiem għal 39 sena, John tgħammed fl-2015. Sena wara, John u Bonnie ġew issiġillati ġewwa t-Tempju ta’ Memphis, Tennessee, 20 sena wara li hija rċeviet l-għotja mqaddsa tagħha. Robert, binhom ta’ 47 sena, qal dwar missieru, “Rajt lil missieri verament jifjorixxi minn dak inhar li huwa rċieva s-saċerdozju.” Bonnie kompliet, “John minn dejjem kien persuna kuntenta u ferrieħa, iżda issa li rċieva l-ordinanzi u qed jonora l-patti tiegħu wassluh biex isir bniedem aktar ġentili.”
L-Att tal-Fidwa ta’ Kristu u l-Eżempju Tiegħu
Bosta snin ilu, il-President Boyd K. Packer widdibna, “Imġieba tajba mingħajr l-ordinanzi tal-evanġelju la tista’ tifdi u lanqas teżalta l-umanità.”5 Fil-fatt, aħna mhux biss għandna bżonn l-ordinanzi u l-patti biex nerġgħu lura għand Missierna, iżda neħtieġu wkoll lill-Ibnu, Ġesù Kristu u l-Att tal-Fidwa Tiegħu.
Is-Sultan Benjamin għallem li huwa biss permezz u f’ isem Kristu li wlied il-bniedem jistgħu jiksbu s-salvazzjoni (ara Mosiah 3:17; ara wkoll Artikli tal-Fidi 1:3).
Permezz tal-Att tal-Fidwa Tiegħu, Ġesù Kristu fdiena mill-konsegwenzi tal-Waqgħa ta’ Adam u għamilha possibbli li aħna nindmu u eventwalment niksbu l-eżaltazzjoni. Permezz ta’ ħajtu, Huwa ta eżempju lilna lkoll biex nirċievu l-ordinanzi tas-salvazzjoni, li fihom “tidher il-qawwa tad-divinità” (D&C 84:20).
Wara li s-Salvatur irċieva l-ordinanza tal-magħmudija biex “iġib fis-seħħ is-sewwa kollha” (ara 2 Nephi 31:5–6), Satana ġarrbu. Bl-istess mod, it-tentazzjoni tagħna ma tintemmx wara l-magħmudija jew wara s-siġill, iżda jekk aħna nirċievu l-ordinanzi sagri u nonoraw il-patti marbutin magħhom, dan iwassal biex jimliena b’ dawl meraviljuż u jagħtina l-qawwa li nirreżistu u negħlbu t-tentazzjoni.
Twissija
Isaija bassar li fl-aħħar jiem, “tniġġset l-art … għax … bidlu l-ordinanza” (Isaija 24:5; ara wkoll D&C 1:15).
Twissija marbuta ma’ dan, żvelata lill-Profeta Joseph Smith, kienet li xi wħud “jersqu lejja, il-Mulej, b’ fommhom, … u huma jgħallmu l-kmandamenti tal-bniedem bħala duttrina, jiċħdu l-qawwa tat-tjieba, minkejja li minn barra jagħmluha ta’ tajbin” (Joseph Smith—History 1:19).
Pawlu wkoll widdeb li ħafna se jkunu li se “jiċħdu l-qawwa tat-tjieba, minkejja li minn barra jagħmluha ta’ tajbin: nies bħal dawn aħarbuhom” (2 Timotju 3:5). Nirrepeti, nies bħal dawn aħarbuhom.
Il-ħafna distrazzjonijiet u tentazzjoni tal-ħajja huma bħal “ilpup ħattafa” (Mattew 7:15). Huwa r-ragħaj il-veru li jħejji, jipproteġi u jwiddeb lin-nagħaġ u lill-merħla meta jkun resqin lejhom l-ilpup (ara Ġwanni 10:11-12). Bħala assistenti tar-ragħaj li nippruvaw nimitaw il-ħajja perfetta tar-Ragħaj it-Tajjeb, aħna mhux ukoll rgħajja ta’ ruħna kif ukoll ta’ ħaddieħor? Bl-għajnuna tal-kunsill tal-profeti, bassâra u rivelaturi, li għadna kemm sostnejna, u bil-qawwa u d-don tal-Ispirtu s-Santu, aħna nkunu nistgħu nilmħu l-ilpup ġejjin lejna jekk aħna inkunu dejjem attenti u preparati. B’ kuntrast għal dan, meta aħna ma nkunux rgħajja diliġenti ta’ ruħna u ta’ ruħ ħaddieħor, hemm ċans li nweġġgħu. In-nuqqas ta’ diliġenza titfa’ lilna u lil ħaddieħor fil-periklu. Jien nistieden lilna lkoll biex inkunu rgħajja fidili.
Esperjenza u Testimonjanza
Is-sagrament huwa ordinanza li tgħinna nibqgħu fit-triq it-tajba, u li nieħdu sehem fih b’ mod den huwa evidenza li aħna qed inżommu l-patti tagħna marbutin mal-ordinanzi l-oħra kollha. Ftit tas-snin ilu, hekk kif jien u marti Anita konna qed inservu fil-Missjoni ta’ Arkansas Little Rock, jiena mort ngħallem flimkien ma’ żewġ missjunarji żgħażagħ. Waqt il-lezzjoni, ir-raġel twajjeb li konna qed ngħallmu qal, “Jiena attendejt il-knisja tagħkom; għalfejn hemm bżonn li tieklu l-ħobż u l-ilma kull nhra ta’ Ħadd? Fil-knisja tagħna, aħna nagħmlu dan darbtejn fis-sena, fl-Għid u fil-Milied, u din hija ħaġa mill-aktar sinifikanti.”
Aħna għednielu li aħna ġejna mitlubin sabiex “niltaqgħu spiss biex nieklu mill-ħobż u nixorbu mill-inbid” (Moroni 6:6; ara wkoll D&C 20:75). Aħna qrajna flimkien Mattew 26 u 3 Nephi 18. Huwa wieġeb li xorta waħda kien għadu ma jistax jara n-neċessità.
Imbagħad aħna qsamna miegħu dan il-paragun: “Immaġina li inti tkun involut f’ aċċident serju tat-traffiku. Inti tweġġa’ u tintilef minn sensik. Jgħaddi xi ħadd minn ħdejk, jarak mitluf minn sensik, u jċempel in-numru tal-emerġenza, 911. Inti tiġi mdewwi u terġa’ tiġi f’ sensik.”
Lil dan ħuna aħna staqsejnieh, “Meta inti terġa’ ssir kapaċi tirrikonoxxi l-ambjent ta’ madwarek, x’ mistoqsijiet taħseb li tistaqsi?”
Huwa qalli, “Inkun nixtieq inkun naf kif jien spiċċajt hemm u min kien dak li sabni. Inkun irrid nirringrazzjah kuljum għaliex salvali ħajti.”
Aħna qsamna ma’ dan ir-raġel twajjeb kif is-Salvatur salva ħajjitna u kemm hemm bżonn li aħna nirringrazzjawh kuljum, kuljum, kuljum!
Imbagħad staqsejnieh, “Għax int taf li Huwa ta ħajtu għalik u għalina, kemm-il darba tixtieq li inti tiekol il-ħobż u tixrob l-ilma bħala emblemi ta’ ġismu u demmu?
Huwa qalilna, “Issa qed nifhem, issa qed nifhem. Iżda ħaġa oħra. Il-Knisja tagħkom mhijiex brijuża daqs tagħna.”
Għal dan aħna weġibna, “X’ tagħmel jekk is-Salvatur Ġesù Kristu jiħdol mill-bieb tiegħek?”
Huwa qal, “Immedjatament, ninżel għarkopptejja.”
Aħna staqsejnieh, “Allura mhux l-istess tħoss meta inti tidħol f’ xi kappella tal-Qaddisin tal-Aħħar Jiem—qima lejn is-Salvatur?”
Huwa qalilna, “Issa qed nifhem, issa qed nifhem!”
Dak Ħadd il-Għid huwa ġie l-knisja u baqa’ jattendi sal-lum.
Jiena nistieden lilna lkoll biex nistaqsu lilna nfusna, “X’ ordinanzi, inkluż is-sagrament, jeħtieġ li jien nirċievi u x’ patti jeħtieġ li jien nagħmel, inżomm u nonora?” Jiena nwiegħed li jekk intom tipparteċipaw fl-ordinanzi u tonoraw il-patti marbutin magħhom intom tirċievu dawl mill-aktar meraviljuż. F’ isem Ġesù Kristu, amen.