ຄຳປາໄສປິດກອງປະຊຸມ

ໂດຍ ປະທານຣະໂຊ ເອັມ ແນວສັນ

ຄວາມມີຄ່າຄວນສ່ວນບຸກຄົນຮຽກຮ້ອງການເຫລື້ອມໃສທີ່ແທ້ຈິງຂອງຄວາມຄິດ ແລະ ຈິດໃຈ ເພື່ອຈະໄດ້ກາຍເປັນເໝືອນດັ່ງພຣະຜູ້ເປັນເຈົ້າຫລາຍກວ່າເກົ່າ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເມື່ອເຮົາມາເຖິງທ້າຍຂອງກອງປະຊຸມທີ່ດີເລີດນີ້, ພວກເຮົາຂອບພຣະໄທພຣະຜູ້ເປັນເຈົ້າສຳລັບຂ່າວສານ ແລະ ສຽງເພງທີ່ດົນໃຈເຫລົ່ານັ້ນ. ເຮົາໄດ້ບຳລຸງທາງວິນຍານຂອງເຮົາແທ້ໆ.

ພວກເຮົາຮູ້ວ່າ ພຣະກິດຕິຄຸນທີ່ຟື້ນຟູຂອງພຣະເຢຊູຄຣິດ ໄດ້ນຳຄວາມຫວັງ ແລະ ຄວາມສຸກມາໃຫ້ຜູ້ຄົນທີ່ຮັບຟັງ ແລະ ເຮັດຕາມຄຳສອນຂອງພຣະອົງ. ພວກເຮົາຍັງຮູ້ວ່າ ແຕ່ລະບ້ານເຮືອນສາມາດກາຍເປັນເຄຫາສະຖານແຫ່ງສັດທານຳອີກ, ບ່ອນທີ່ຄວາມສະຫງົບ, ຄວາມຮັກ, ແລະ ພຣະວິນຍານຂອງພຣະຜູ້ເປັນເຈົ້າສາມາດສະຖິດຢູ່.

ແນ່ນອນ, ສິ່ງທີ່ສຳຄັນທີ່ສຸດຂອງການຟື້ນຟູ ແມ່ນພຣະວິຫານທີ່ສັກສິດ. ພິທີການ ແລະ ພັນທະສັນຍາທີ່ສັກສິດຂອງພຣະວິຫານ ເປັນສິ່ງຈຳເປັນຕໍ່ການກະກຽມຜູ້ຄົນເພື່ອຕ້ອນຮັບພຣະຜູ້ຊ່ວຍໃຫ້ລອດ ໃນການສະເດັດມາຄັ້ງທີສອງຂອງພຣະອົງ. ປະຈຸບັນນີ້ ພວກເຮົາມີພຣະວິຫານທີ່ອຸທິດແລ້ວ 166 ແຫ່ງ, ແລະ ຈະມີຫລາຍແຫ່ງຕື່ມອີກ.

ການເປີດຊົມຈະຖືກຈັດຂຶ້ນກ່ອນການອຸທິດພຣະວິຫານຫລັງໃໝ່ ແລະ ຫລັງທີ່ຖືກສ້ອມແປງໃໝ່. ໝູ່ເພື່ອນທີ່ຕ່າງສາດສະໜາກໍຈະໄປຊົມພຣະວິຫານເຫລົ່ານັ້ນ ແລະ ຈະຮຽນຮູ້ບາງສິ່ງກ່ຽວກັບພອນຂອງພຣະວິຫານ. ແລະ ຜູ້ໄປຊົມບາງຄົນເຫລົ່ານັ້ນ ຈະຢາກຮູ້ຫລາຍຂຶ້ນກວ່າເກົ່າ. ບາງຄົນຈະຖາມຢ່າງຈິງໃຈ ເຖິງວິທີທີ່ຈະໄດ້ຮັບພອນຂອງພຣະວິຫານ.

ໃນຖານະສະມາຊິກຂອງສາດສະໜາຈັກ, ເຮົາຕ້ອງກະກຽມເພື່ອຕອບຄຳຖາມຂອງເຂົາເຈົ້າ. ເຮົາສາມາດອະທິບາຍວ່າ ພອນຂອງພຣະວິຫານມີໃຫ້ທຸກຄົນ ທີ່ຈະກະກຽມຕົວເອງ. ແຕ່ກ່ອນເຂົາເຈົ້າສາມາດເຂົ້າໄປໃນພຣະວິຫານທີ່ຖືກອຸທິດແລ້ວນັ້ນ, ເຂົາເຈົ້າຕ້ອງມີຄວາມເໝາະສົມກ່ອນ. ພຣະຜູ້ເປັນເຈົ້າປະສົງໃຫ້ລູກທຸກຄົນຂອງພຣະອົງ ໄດ້ຮັບພອນນິລັນດອນ ຢູ່ໃນພຣະວິຫານຂອງພຣະອົງ. ພຣະອົງໄດ້ຊີ້ນຳສິ່ງທີ່ທຸກຄົນຈະຕ້ອງເຮັດ ເພື່ອຄວາມເໝາະສົມທີ່ຈະເຂົ້າໄປໃນບ້ານທີ່ສັກສິດຂອງພຣະອົງ.

ບ່ອນທີ່ດີສຳລັບເຮົາທີ່ຈະເລີ່ມຕົ້ນໂອກາດສິດສອນເຊັ່ນນັ້ນ ແມ່ນການຊີ້ບອກຖ້ອຍຄຳທີ່ສະຫລັກຢູ່ຝາພຣະວິຫານ ທີ່ວ່າ: “ສັກສິດແດ່ພຣະຜູ້ເປັນເຈົ້າ; ບ້ານຂອງພຣະຜູ້ເປັນເຈົ້າ.” ຂ່າວສານຂອງປະທານເຮັນຣີ ບີ ໄອຣິງ ໃນມື້ນີ້ ແລະ ຫລາຍໆທ່ານອື່ນອີກ ກໍໄດ້ດົນໃຈເຮົາໃຫ້ກາຍເປັນຄົນບໍລິສຸດຫລາຍກວ່າເກົ່າ. ພຣະວິຫານແຕ່ລະແຫ່ງເປັນສະຖານທີ່ສັກສິດ; ຜູ້ໄປພຣະວິຫານທຸກຄົນ ກໍພະຍາຍາມກາຍເປັນຄົນບໍລິສຸດຫລາຍກວ່າເກົ່າ.

ເງື່ອນໄຂທີ່ຈະສາມາດເຂົ້າໄປໃນພຣະວິຫານ ແມ່ນກ່ຽວຂ້ອງກັບຄວາມບໍລິສຸດຂອງບຸກຄົນ. ໃນການກະກຽມທີ່ຈະເຂົ້າໄປ, ແຕ່ລະຄົນທີ່ຢາກໄດ້ຮັບພອນຂອງພຣະວິຫານ ຈະຕ້ອງໄດ້ຮັບການສຳພາດສອງເທື່ອ: ເທື່ອທຳອິດແມ່ນກັບອະທິການ, ທີ່ປຶກສາຂອງອະທິການ, ຫລື ປະທານສາຂາ; ເທື່ອທີສອງແມ່ນກັບປະທານສະເຕກ ຫລື ປະທານເຜີຍແຜ່ ຫລື ທີ່ປຶກສາຂອງເພິ່ນ. ຢູ່ໃນການສຳພາດເຫລົ່ານັ້ນ, ຄຳຖາມຫລາຍຂໍ້ຈະຖືກໃຊ້ຖາມ.

ຄຳຖາມບາງຂໍ້ເຫລົ່ານັ້ນ ຫາກໍໄດ້ຖືກດັດແປງໃໝ່ ເພື່ອໃຫ້ແຈ່ມແຈ້ງຫລາຍຂຶ້ນ. ຂ້າພະເຈົ້າຈະທົບທວນຄຳຖາມເຫລົ່ານັ້ນກັບທ່ານຕອນນີ້:

ເຈົ້າມີສັດທາໃນພຣະເຈົ້າ ແລະ ມີປະຈັກພະຍານເຖິງພຣະເຈົ້າ, ພຣະບິດາຜູ້ສະຖິດນິລັນດອນ; ພຣະບຸດຂອງພຣະອົງ, ພຣະເຢຊູຄຣິດ; ແລະ ໃນພຣະວິນຍານບໍລິສຸດບໍ?
ເຈົ້າມີປະຈັກພະຍານເຖິງການຊົດໃຊ້ຂອງພຣະເຢຊູຄຣິດ ແລະ ເຖິງບົດບາດຂອງພຣະອົງ ໃນການເປັນພຣະຜູ້ຊ່ວຍໃຫ້ລອດ ແລະ ເປັນພຣະຜູ້ໄຖ່ບໍ?
ເຈົ້າມີປະຈັກພະຍານເຖິງການຟື້ນຟູພຣະກິດຕິຄຸນຂອງພຣະເຢຊູຄຣິດບໍ?
ເຈົ້າສະໜັບສະໜູນປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ວ່າເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍ ແລະ ວ່າເພິ່ນເປັນຄົນດຽວເທົ່ານັ້ນຢູ່ໃນໂລກນີ້ ທີ່ມີສິດອຳນາດທີ່ຈະໃຊ້ຂໍກະແຈຂອງຖານະປະໂລຫິດທັງໝົດບໍ?

ເຈົ້າສະໜັບສະໜູນສະມາຊິກໃນຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ ວ່າເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍບໍ?

ເຈົ້າສະໜັບສະໜູນເຈົ້າໜ້າທີ່ຊັ້ນຜູ້ໃຫຍ່ຄົນອື່ນໆ ແລະ ເຈົ້າໜ້າທີ່ໃນທ້ອງຖິ່ນຂອງສາດສະໜາຈັກບໍ?
ພຣະຜູ້ເປັນເຈົ້າໄດ້ກ່າວວ່າ ທຸກສິ່ງຕ້ອງຖືກ “ສຳເລັດໃນຄວາມສະອາດ” ຕໍ່ພຣະອົງ (ຄຳສອນ ແລະ ພັນທະສັນຍາ 42:41).

ເຈົ້າພະຍາຍາມໃຫ້ສະອາດທາງສິນທຳ ໃນຄວາມຄິດ ແລະ ການປະພຶດບໍ?

ເຈົ້າຮັກສາກົດພົມມະຈັນບໍ?
ເຈົ້າເຮັດຕາມຄຳສອນຂອງສາດສະໜາຈັກຂອງພຣະເຢຊູຄຣິດ ເລື່ອງການປະພຶດຢູ່ໃນບ່ອນລັບລີ້ ແລະ ໃນສາທາລະນະ ນຳສະມາຊິກໃນຄອບຄົວຂອງເຈົ້າ ແລະ ຄົນອື່ນໆບໍ?
ເຈົ້າສະໜັບສະໜູນ ຫລື ສົ່ງເສີມການສິດສອນ, ການປະຕິບັດ, ຫລື ຄຳສອນທີ່ກົງກັນຂ້າມກັບຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍບໍ?
ເຈົ້າພະຍາຍາມຮັກສາວັນຊະບາໂຕໃຫ້ສັກສິດ, ທັງຢູ່ທີ່ບ້ານ ແລະ ຢູ່ທີ່ໂບດ; ໄປຮ່ວມການປະຊຸມ; ກະກຽມສຳລັບການຮັບສ່ວນສິນລະລຶກຢ່າງມີຄ່າຄວນ; ແລະ ດຳລົງຊີວິດໃຫ້ສອດຄ່ອງກັບກົດ ແລະ ພຣະບັນຍັດແຫ່ງພຣະກິດຕິຄຸນບໍ?
ເຈົ້າພະຍາຍາມຊື່ສັດໃນທຸກສິ່ງທີ່ເຈົ້າເຮັດບໍ?
ເຈົ້າຈ່າຍເງິນສ່ວນສິບເຕັມຈຳນວນບໍ?
ເຈົ້າເຂົ້າໃຈ ແລະ ເຊື່ອຟັງຕາມພຣະວາຈາແຫ່ງປັນຍາບໍ?
ເຈົ້າມີຂໍ້ຜູກມັດເລື່ອງການເງິນ ຫລື ຂໍ້ຜູກມັດອື່ນໆນຳສາມີພັນລະຍາຄົນເກົ່າ ຫລື ນຳລູກໆບໍ?

ຖ້າມີ, ເຈົ້າໄດ້ຮັກສາຂໍ້ຜູກມັດເຫລົ່ານັ້ນບໍ?
ເຈົ້າຮັກສາພັນທະສັນຍາທີ່ເຈົ້າໄດ້ເຮັດໃນພຣະວິຫານ, ລວມທັງການນຸ່ງຖືເສື້ອຜ້າສັກສິດຂອງພຣະວິຫານ ຕາມທີ່ໄດ້ແນະນຳຢູ່ໃນພິທີຮັບຂອງປະທານສັກສິດບໍ?
ມີຄວາມຜິດບາບທີ່ຮ້າຍແຮງໃນຊີວິດຂອງເຈົ້າ ທີ່ຄວນແກ້ໄຂກັບຜູ້ມີສິດອຳນາດຖານະປະໂລຫິດ ເພື່ອເປັນພາກສ່ວນຂອງການກັບໃຈຂອງເຈົ້າບໍ?
ເຈົ້າຖືວ່າ ເຈົ້າມີຄ່າຄວນພໍທີ່ຈະເຂົ້າໄປໃນບ້ານຂອງພຣະຜູ້ເປັນເຈົ້າ ແລະ ມີສ່ວນໃນພິທີການ ທາງພຣະວິຫານບໍ?

ມື້ອື່ນນີ້, ຄຳຖາມທີ່ດັດແປງໃໝ່ເຫລົ່ານີ້ ຈະຖືກແຈກຢາຍໃຫ້ຜູ້ນຳໃນສາດສະໜາຈັກ ຕະຫລອດທົ່ວໂລກ.

ນອກເໜືອໄປຈາກການຕອບຄຳຖາມເຫລົ່ານັ້ນຢ່າງຊື່ສັດແລ້ວ, ຜູ້ໃຫຍ່ທຸກຄົນທີ່ໄປພຣະວິຫານກໍເຂົ້າໃຈວ່າ ເຂົາເຈົ້າຈະນຸ່ງເສື້ອຜ້າສັກສິດຂອງຖານະປະໂລຫິດ ຢູ່ຂ້າງໃນຂອງເຄື່ອງນຸ່ງ. ມັນເປັນສັນຍາລັກເຖິງຄວາມຕັ້ງໃຈພາຍໃນ ທີ່ຈະພະຍາຍາມທຸກວັນ ເພື່ອກາຍເປັນເໝືອນດັ່ງພຣະຜູ້ເປັນເຈົ້າ. ມັນກໍຍັງເຕືອນໃຈເຮົາທຸກວັນ ໃຫ້ຊື່ສັດຕໍ່ພັນທະສັນຍາທີ່ເຮົາໄດ້ເຮັດ ແລະ ທີ່ຈະເດີນໄປໃນເສັ້ນທາງແຫ່ງພັນທະສັນຍາທຸກວັນ ໃນວິທີທາງທີ່ສູງກວ່າ ແລະ ສັກສິດກວ່າ.

ບັດນີ້, ຂ້າພະເຈົ້າຂໍກ່າວກັບຊາວໜຸ່ມຂອງເຮົາຈັກບຶດໜຶ່ງ. ພວກເຮົາຊຸກຍູ້ພວກເຈົ້າໃຫ້ມີຄວາມເໝາະສົມສຳລັບໃບຮັບຮອງເຂົ້າພຣະວິຫານທີ່ຈຳກັດ. ພວກເຈົ້າຈະຖືກສຳພາດດ້ວຍຄຳຖາມທີ່ກ່ຽວຂ້ອງກັບພວກເຈົ້າເທົ່ານັ້ນ ໃນການກະກຽມຕົວເອງ ສຳລັບພິທີການບັບຕິສະມາ ແລະ ການຢືນຢັນແທນ. ພວກເຮົາຮູ້ບຸນຄຸນສຳລັບການມີຄ່າຄວນ ແລະ ຄວາມເຕັມໃຈຂອງພວກເຈົ້າ ທີ່ຈະມີພາກສ່ວນໃນວຽກງານພຣະວິຫານທີ່ສັກສິດນັ້ນ. ພວກເຮົາຂໍຂອບໃຈພວກເຈົ້າຫລາຍໆ!

ຄວາມມີຄ່າຄວນສ່ວນບຸກຄົນທີ່ຈະເຂົ້າໄປໃນບ້ານຂອງພຣະເຈົ້າ ຮຽກຮ້ອງຫລາຍສົມຄວນ ເພື່ອໃຫ້ກະກຽມທາງວິນຍານ. ແຕ່ດ້ວຍຄວາມຊ່ວຍເຫລືອຈາກພຣະຜູ້ເປັນເຈົ້າ, ບໍ່ມີສິ່ງໃດທີ່ເປັນໄປບໍ່ໄດ້. ໃນບາງປະເດັນ, ການສ້າງພຣະວິຫານແມ່ນງ່າຍກວ່າ ການສ້າງຜູ້ຄົນໃຫ້ພ້ອມສຳລັບພຣະວິຫານ. ຄວາມມີຄ່າຄວນສ່ວນບຸກຄົນຮຽກຮ້ອງການເຫລື້ອມໃສທີ່ແທ້ຈິງຂອງຄວາມຄິດ ແລະ ຈິດໃຈ ເພື່ອຈະໄດ້ກາຍເປັນເໝືອນດັ່ງພຣະຜູ້ເປັນເຈົ້າ, ເປັນພົນລະເມືອງທີ່ຊື່ສັດ, ເປັນຕົວຢ່າງທີ່ດີກວ່າເກົ່າ, ແລະ ເປັນຄົນບໍລິສຸດຫລາຍກວ່າເກົ່າ.

ຂ້າພະເຈົ້າເປັນພະຍານວ່າ ການອອກແຮງກະກຽມເຊັ່ນນັ້ນ ຈະນຳພອນຢ່າງຫລວງຫລາຍຈົນນັບບໍ່ຖ້ວນມາໃຫ້ທ່ານໃນຊີວິດນີ້ ແລະ ຈະນຳພອນທີ່ບໍ່ຄາດຄິດມາໃຫ້ທ່ານ ໃນຊີວິດຕໍ່ໄປ, ລວມທັງຄອບຄົວຂອງທ່ານທີ່ມີຕໍ່ເນື່ອງ ຕະຫລອດຊົ່ວນິລັນດອນ “ໃນສະພາບແຫ່ງຄວາມສຸກທີ່ບໍ່ມີວັນສິ້ນສຸດ.”¹

ບັດນີ້ ຂ້າພະເຈົ້າຈະກ່າວກ່ຽວກັບຫົວຂໍ້ໜຶ່ງອີກ ນັ້ນຄື: ແຜນການສຳລັບປີທີ່ຈະມາເຖິງ. ໃນລະດູໃບໄມ້ປົ່ງຂອງປີ 2020 ນີ້, ກໍຈະຄົບ 200 ປີພໍດີ ນັບແຕ່ໂຈເຊັບ ສະມິດ ໄດ້ເຫັນພຣະເຈົ້າມາປະກົດ ຊຶ່ງເຮົາຮູ້ຈັກກັນວ່າ ພາບທີ່ມາໃຫ້ເຫັນຄັ້ງທຳອິດ. ພຣະເຈົ້າອົງເປັນພຣະບິດາ ແລະ ພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ໄດ້ມາປະກົດຕໍ່ໂຈເຊັບ, ຊາຍໜຸ່ມອາຍຸ 14 ປີ. ເຫດການເທື່ອນັ້ນໄດ້ເປັນຈຸດເລີ່ມຕົ້ນການຟື້ນຟູພຣະກິດຕິຄຸນຂອງພຣະເຢຊູຄຣິດ ໃນຄວາມສົມບູນຂອງມັນ, ຕາມທີ່ໄດ້ບອກໄວ້ລ່ວງໜ້າ ຢູ່ໃນພຣະຄຣິສຕະທຳຄຳພີທີ່ສັກສິດ.²

ຈາກນັ້ນ ຜູ້ສົ່ງຂ່າວຈາກສະຫວັນກໍໄດ້ມາຢ້ຽມຢາມ, ລວມທັງ ໂມໂຣໄນ, ໂຢຮັນບັບຕິສະໂຕ, ແລະ ອັກຄະສາວົກລຸ້ນທຳອິດ ເປໂຕ, ຢາໂກໂບ, ແລະ ໂຢຮັນ. ຜູ້ອື່ນອີກກໍໄດ້ມາຄືກັນ, ລວມທັງ ໂມເຊ, ອີລາຍ, ແລະ ເອລີຢາ. ແຕ່ລະທ່ານກໍໄດ້ນຳສິດອຳນາດແຫ່ງສະຫວັນມາໃຫ້ ເພື່ອເປັນພອນໃຫ້ແກ່ລູກໆຂອງພຣະເຈົ້າ ຢູ່ເທິງໂລກອີກຄັ້ງ.

ເຮົາໄດ້ຮັບພຣະຄຳພີມໍມອນຢ່າງໜ້າອັດສະຈັນ: ຊຶ່ງເປັນປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ, ເປັນເຫລັ້ມໜຶ່ງທີ່ຄຽງຄູ່ໄປກັບພຣະຄຣິສຕະທຳຄຳພີທີ່ສັກສິດ. ການເປີດເຜີຍທີ່ຈັດພິມຢູ່ໃນພຣະຄຳພີ ຄຳສອນ ແລະ ພັນທະສັນຍາ ແລະ ໄຂ່ມຸກອັນລ້ຳຄ່າ ກໍຊ່ວຍເຮົາໃຫ້ເຂົ້າໃຈຫລາຍຂຶ້ນ ເຖິງພຣະບັນຍັດຂອງພຣະເຈົ້າ ແລະ ຄວາມຈິງນິລັນດອນ.

ຂໍກະແຈ ແລະ ຕຳແໜ່ງຂອງຖານະປະໂລຫິດ ກໍໄດ້ຖືກຟື້ນຟູ, ລວມທັງຕຳແໜ່ງຂອງອັກຄະສາວົກ, ສາວົກເຈັດສິບ, ປິຕຸ, ມະຫາປະໂລຫິດ, ແອວເດີ, ອະທິການ, ປະໂລຫິດ, ຄູສອນ, ແລະ ມັກຄະນາຍົກ. ແລະ ຜູ້ຍິງທີ່ຮັກພຣະຜູ້ເປັນເຈົ້າ ກໍໄດ້ຮັບໃຊ້ຢ່າງກ້າຫານ ຢູ່ໃນສະມາຄົມສະຕີສົງເຄາະ, ຢູ່ໃນຊັ້ນປະຖົມໄວ, ອົງການຍິງໜຸ່ມ, ໂຮງຮຽນວັນອາທິດ, ແລະ ໃນການເອີ້ນອື່ນໆຂອງສາດສະໜາຈັກ—ທັງໝົດເປັນພາກສ່ວນທີ່ສຳຄັນຕໍ່ການຟື້ນຟູພຣະກິດຕິຄຸນຂອງພຣະເຢຊູຄຣິດ ໃນຄວາມສົມບູນຂອງມັນ.

ສະນັ້ນ, ປີ 2020 ນີ້ ກໍຈະເປັນວັນຄົບຮອບສອງຮ້ອຍປີ. ກອງປະຊຸມໃຫຍ່ສາມັນຄັ້ງຕໍ່ໄປໃນເດືອນເມສາ ຈະແຕກຕ່າງຈາກກອງປະຊຸມໃຫຍ່ທີ່ຜ່ານມາ. ໃນລະຫວ່າງຫົກເດືອນຂ້າງໜ້າ, ຂ້າພະເຈົ້າຫວັງວ່າ ສະມາຊິກທຸກຄົນ ແລະ ທຸກຄອບຄົວ ຈະກະກຽມສຳລັບກອງປະຊຸມພິເສດດັ່ງກ່າວ ເພື່ອສະເຫລີມສະຫລອງພື້ນຖານທີ່ແທ້ຈິງຂອງພຣະກິດຕິຄຸນທີ່ຖືກຟື້ນຟູ.

ທ່ານສາມາດເລີ່ມຕົ້ນກະກຽມຕົວເອງ ໂດຍການອ່ານເລື່ອງລາວຂອງໂຈເຊັບ ສະມິດ ກ່ຽວກັບພາບທີ່ມາໃຫ້ເຫັນຄັ້ງທຳອິດ ຊຶ່ງບັນທຶກຢູ່ໃນ ໄຂ່ມຸກອັນລ້ຳຄ່າ. ຫລັກສູດສຳລັບປີທີ່ຈະມາເຖິງ ຢູ່ໃນປຶ້ມ ຈົ່ງຕາມເຮົາມາ ແມ່ນ ພຣະຄຳພີມໍມອນ. ທ່ານສາມາດໄຕ່ຕອງກ່ຽວກັບຄຳຖາມທີ່ສຳຄັນ ດັ່ງເຊັ່ນ, “ຊີວິດຂອງເຮົາຈະເປັນແນວໃດ ຖ້າຫາກຄວາມຮູ້ຂອງເຮົາ ທີ່ໄດ້ຮັບຈາກພຣະຄຳພີມໍມອນ ໄດ້ຖືກເອົາໄປຈາກເຮົາໃນທັນທີທັນໃດ?” ຫລື “ເຫດການຕ່າງໆທີ່ໄດ້ເກີດຂຶ້ນຫລັງຈາກພາບທີ່ມາໃຫ້ເຫັນຄັ້ງທຳອິດ ສ້າງຄວາມແຕກຕ່າງໃຫ້ແກ່ເຮົາ ແລະ ຄົນທີ່ເຮົາຮັກແນວໃດ?” ພ້ອມນີ້, ກໍມີວິດີໂອເລື່ອງພຣະຄຳພີມໍມອນນຳອີກ ທີ່ມີບໍລິການແລ້ວ, ຊຶ່ງທ່ານສາມາດໃຊ້ມັນໃນການສຶກສາສ່ວນຕົວ ແລະ ເປັນຄອບຄົວ.

ໃຫ້ເລືອກຄຳຖາມດ້ວຍຕົວເອງ. ໃຫ້ອອກແບບແຜນການດ້ວຍຕົວເອງ. ໃຫ້ເຂົ້າຫາຄວາມສະຫວ່າງຂອງການຟື້ນຟູທີ່ສະຫງ່າລາສີດ້ວຍຕົວເອງ. ເມື່ອທ່ານເຮັດເຊັ່ນນັ້ນ, ກອງປະຊຸມໃຫຍ່ສາມັນຄັ້ງຕໍ່ໄປ ໃນເດືອນເມສາ, ບໍ່ພຽງແຕ່ຈະເປັນທີ່ໜ້າຈື່ຈຳເທົ່ານັ້ນ; ແຕ່ມັນຈະເປັນສິ່ງທີ່ບໍ່ເຄີຍລືມນຳອີກ.

ສຸດທ້າຍນີ້, ຂ້າພະເຈົ້າຂໍມອບຄວາມຮັກ ແລະ ພອນຂອງຂ້າພະເຈົ້າໃຫ້ແກ່ທ່ານ ວ່າທ່ານແຕ່ລະຄົນຈະມີຄວາມສຸກ ແລະ ບໍລິສຸດຫລາຍກວ່າເກົ່າ ໃນແຕ່ລະວັນ. ໃນຂະນະດຽວກັນ, ຂໍໃຫ້ທ່ານໝັ້ນໃຈໄດ້ວ່າ ການເປີດເຜີຍຍັງມີຢູ່ຕໍ່ເນື່ອງໃນສາດສະໜາຈັກ ແລະ ຈະມີຢູ່ຕໍ່ໄປພາຍໃຕ້ການຊີ້ນຳຂອງພຣະຜູ້ເປັນເຈົ້າ ຈົນກວ່າ “ຈຸດປະສົງຂອງພຣະເຈົ້າຈະສຳເລັດຄົບຖ້ວນ, ແລະ ພຣະເຢໂຮວາທີ່ຍິ່ງໃຫຍ່ຈະກ່າວວ່າ ວຽກງານສຳເລັດແລ້ວ.”³

ຂ້າພະເຈົ້າຂໍອວຍພອນທ່ານ, ຢືນຢັນຄວາມຮັກຂອງຂ້າພະເຈົ້າທີ່ມີຕໍ່ທ່ານ, ດ້ວຍປະຈັກພະຍານວ່າ ພຣະເຈົ້າຊົງພຣະຊົນຢູ່! ພຣະເຢຊູ ຄືພຣະຄຣິດ! ນີ້ແມ່ນສາດສະໜາຈັກຂອງພຣະອົງ ແລະ ເຮົາເປັນຜູ້ຄົນຂອງພຣະອົງ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.