Bing far Mo’olung
Ngaed gayed rogon, ko urngin rogon nrayag, ningaed motoyilgaed ngak Yesus Kristus, nibe non ngodaed u dakean fare gelngin nge pigpig rok fare Kan ni Thothup.
Brothers nge sisters, napan ni gamaed be pining e magar ngomed ko re April ney ko 2020 ko fare general conference ko Fare Galasia ku Yesus Kristus ni Fan ko Gidii’en Got ko Tin Tomur e Rran, woed ni gamanang fan, gub saki’y ulane rigin’ey nde moy be’ riy!
Ridan gunang, napan nigu micheg ngom ko fare general conference ko October 2019 ni biney e mo’olung ko April era “thil” ma “dabin pagtilin,” ni non ngak e gidii’ ni karimus ni buchu’uw ko ragag era fal’ag e biney e conference nib thil ma dabin pagtilin nifan ngog Machane fare ningaen’ rog nigu manang ni gamed be un ko re mo’olung ney nibe yib ya’an ko fapi electronic, nge fare choir ni yon e tang ko “It Is Well with My Soul,” e be pii’ e gapas ko dogur e rog ya’el.
Woed ni gamnang, wub ko biney e general conference e kan siyeg ni bachane gadaed ba’adag ningaed ayuweged e n’en nibe buch u dakean e fayleng magdaed rrin’ e tin nrayag rodaed ningan saga’alnag fare m’ar ko COVID-19. Biney e m’ar e bay u dakean ga’ngin yang e fayleng. Nike thilyeg rogon ni gadaed ma mo’olung ko Madnom, murwel ko fapi missionaries, nge fapi murwel ko temple.
Arrogon daba’ nib bo’or e tin ndabin rrin’ ni bachane biney e m’ar, mo’owar ulane yafos e kab gel ko biney e m’ar nibe garari yaen. Tin nga mm’on e mo’owar e woed e mad’ad, fa yiko’, fa krayag ni banan nibe kirbaen’ nagdaed.
Uw rogon nrayag ningaed gelgaed ko tiney e mo’owar? En Somoel ke yoeg ngodaed “fa’an ra fal’eg rogon, da mu rus.”1 Arrogon, rayag ningaed cha’ariyed e ggan, ran, nge salpiy. Machane n’en nib ga’fan e ngaed suguyed lane na’un ko mich rodaed, tin ritual’, nge mich.
Ya fan fare yafos rodaed e ngaed fal’aged rogondaed ni ngaed mada’ niged e eni Sunmiydaed. Gadaed ra rrin’ e biney ni gadaed be gay rogon ni gubin e rran ni ngaed boded e Tathapeg rodaed, Yesus Kristus.2 Ma gadaed ra rrin’ e biney napan ni gadaed ra kalngaen’ ni gubin mara be’ech nagdaed, me fosegdaed, me pii’ ngelngindaed. Ma arram e rayag ningaed thamiyed fare gapas nge falfalaen’, min mu’un e ngiyal’ ngay nib gel e mo’mow’ riy. Irraray fan nike yoeg Somoel ngodaed ningaed sak’iygaed nga dakean farengi n’en nib thothup ma “dabin chuw riy.”3
Biney e duw, ma gadaed be madnom nag nike gaman 200th e duw riy ni rib ga’fan ulane biney chep u fayleng—ni rib ga’ ni, yibi m’ug Got ni Chitamangiy nge fare Fak ni kari maagirag Rok, Yesus Kristus, ngak Joseph Smith. Napan e binem e yi’iy, Got ni Chitamangiy e yip’ pa’ ngak Yesus Kristus me ga’ar: “Irraray Fakag ni kari Maagirag Rog. Motoyil Ngak!”4
Ran’ey nin pii’ ngak Joseph e fan ngodaed ni gubin. Ngaed gayed rogon, ko urngin rogon nrayag, ningaed motoyilgaed ngak Yesus Kristus, nibe non ngodaed u dakean fare gelngin nge pigpig rok fare Kan ni Thothup.
Fan e biney nge fapi general conference e nge ayuwegdaed ni ngaed rung’aged lungun. Kug meybilgaed, ma gamaed be piningngem ningam meybil, ni fare Thothup rok Somoel e bayi par rom ni gubin ngiyal’ nrayag ningam rung’ag fapi mulwol rok fare Tathapeg nib ga’ nifan ngom—fapi mulwon nra pii’ e gapas ngom. Fapi mulwol nra foseg gum’ircha’en nike gafgow. Fapi mulwol nra tamilangnag e man’aey rom. Fapi mulwol nra ayuwegnem ningam nang ko mang ab tu’uf ningam rrin’ ulane yafos rom ko tiney, tin nga mm’on, nge pi ngiyal’ ney nib bo’or e gafgow nge mo’owar riy.
Gamaed be meybilnag ni biney e mo’olung era par nib thil ma dabni pagtilin ni bachan fapi thin ni garam rung’ag riy, fapi thin nibay goged riy, nge rogon nibay ni piningmed ni ngan uned ngay.
Woed ni, tomuren e mo’olung ko Madnom ni kadbul, ma gadaed ra mukun nga ta’abang ni baygu fekdaed i pining e magar ni yibe yoeg e Hosanna ni yibe tululnag. Gamaed be meybil ni biney era par nib ga’fan ulane yafos rom ko napan ni gadaedra ognag e magar ngak Got ni Chitamangiy nge fare Fak ni kari Maagirag Rok u dakean ga’ngin yang e fayleng min pining e magar ngorow ni arrogon ya’an nib thil.
Biney ni bayi buch nib thothup, ab tu’uf fa nochi mad ko hangkerchif nib wechwech. Fa fa’anra dariy rom, ma rayag nikemus ningam tining pa’am ngalang. Ma tomuren ere Hosanna ney ni yibe tululnag, fare congregation e bayi yon e tang ko “The Spirit of God.”5
Brothers nge sisters, biney e mo’olung e rib falel’. Biney e duw e dabin pagtilin napan ni gadaed be sap ngak fare Tathapeg nge fare gospel Rok nike sulyarmen. Ma bin nib ga’fan ko biney e mo’olung e gum’ircha’endaed ninge thil ma gadaed gay rogon ningaed rung’aged lungun.
Mbaed ko fare mo’olung ko general conference ko April 2020! Gu manang ni Got ni’ir e Chitamangiy nibay u Tharmiy nge fare Fak, Yesus Kristus, e yaed manangdaed. Yowra yib ngodaed ko gali rran ney napan ni gadaed be gay rogon ma gadaed be chuchgur Ngorow min tayfan Row. U dakean fithngan Yesus Kristus nib thothup, amen.