Tin Th’abi Fel’ e Tabinaw
En Tathapegdad e bin machalbog e engineer, ta toey, nge ta yarimy. Fan Rok e ngan machalbog nag min falfalan’ nag pi ya’el rodad.
De n’uw napan ku guy e pow nib ga’ u Salt Lake City. Ke dag e chiya nge n’en ngan tay nga lan e na’un. Ni ga’ar, “Pigpigey Tin Th’abi Fel’ e Tabinaw ko Salt Lake City.“
Re mulwol nem e rib thil riy’—mang e “tin th’abi fel’ e tabinaw”? Kug lemnag re duwer ney, mug sap ko pifakag ni gag nge ppin rog, Kathy, kug matangiy gow nge pifakrad ni kar faked daba’. Woed rogon fapi pilibthir ubang, kug matangiy min meybil ni fan e tabinaw romow. Gu athamgil gow chiney. Gu ba’adag gow tin th’abi fel’ ban’en ngorad. Ke uragon nrayog ngorad ngo pifakrad tin th’abi fel’ e tabinaw? Kug sulaen’ug ko pi tabinaw ko chonggin e Galasia ni gag nge Kathy kug ba’adag ni nggu waen nga lang. Ke pinning mow nga langin pi tabinaw u Korea nge Kenya, u Manila nge Peru, u Laos nge Latvia. Aygu welthin aningeg e tin ni kug gu’ ngay.
Somm’on, u lan p’owchen Somoel, ngan toey tin th’abi fel’ e tabinaw e ma un ko pi pangin e gidii’ nibe paer nga langin riy’. Pi tabinaw e dani toey nib th’abi fel’ ni bachan e chiya fa salipiy fa fla’ab ko picha’an nibe paer riy’. Bin ga’fan e n’en ko tabinaw e fa’ani ran guy yalen Kristus nga langin pi p’owchen e gidii’ nima paer nga langin riy’. Tin th’abi ga’ fan e ke uragon nibe yarimy fapi ya’el e gidii’, gathi ke uragon nibe yarimy fare na’un.
Pangin ney rok Kristus ma yib “bayil’ ngo dakaen e bayil’”1 nu dakaen e mon’og nibe tiyaen’uy ngay. Pangin woed Kristus ma tawath nag pi yafos e gidii’ nibe gay rogon ni ngan paer nib fel’ rogoy. Ma suguy pi na’un ko tamilang e gospel, mus ni ra but’ e kan fal’eg ko but’ fa malang. Fa’anre yigo’ gur ko tabinaw rom nibe fol ko re thin ni ngan “gay e pin’ey,”2 rayog ni ngam gel nag nrogon kan yarimy tin thothup ko tabinaw rom.
Napan gadad ma fol pi thin rok Somoel ni ngad “yarimy [nagdad]; fal’eg rogoy urgngin nib t’uf riy; min toey e na’un“ nrogon e yarimy, fal’eg rogoy, min gagiyeg nag e yafos nib thothup rodad, gathi yoror rodad. Fini gadad ma fol kanawo’en e m’ag rok Somoel riy’, pi tabinaw rodad ra mang e “tabinaw nib fla’ab, tabinaw kan yarimy nib mangil, nge tabinaw rok Got.“3
Bin l’agruw, picha’an nibe paer ko tin th’abi fel’ e tabinaw ma duwgily e ngiyal’ ni ngan bi’eg pi scripture nge pithin ko fapi profet gubin e rran. President Russell M. Nelson ke pinning dad ni ngad “thiliyeg” nge “bi’ech nag” pi tabinaw rodad nu dakaen fil rogon e gospel.4 Pinnning rok ma weliy fan ni tin th’abi fel’e tabinaw ma ba’ riy’ re muruwel nib m’udugil mab t’uf ni ngan mon’og e paer rodad nge thiliyeg e tin nib waer rodad riy’. Kalangan’ ni gubin e rran e talin e thiliyeg rodad nra pag dad ni ngad bugol, adag dakaen, min nang fan bagdad ngodad. Fil rogon pi scripture ma fek dad i yaen ngak Tathapeg dad, ni’r ba’ t’ufeg nge fala’ab nra mon’og e paer rodad.
Fare Bible ni Thothup, Babyor ku Mormon, nge fare Pearl of Great Price ma welthin chepin e tabinaw, ya dani thil’thil riy’ ni yow babyor ra weliy fan rogon ni ngan toey th’abi fel’ e tabinaw riy’. Ma weliy fan pi magaf ko palibthir, re mad’ad’ ko lumel, ra falfalan’ ko paer nib mat’aw, pi magowan ko bilig nge bo’or, re mogoth’goth’ ko mael nge re fla’ab ko gapas. Bayay ngo bayay pi scripture ma weliy fan ke uragon pi tabinaw mra gel nag udakaen e paer nib thothup nge uragon nibe mul nagrad fa’ani thil rogon e kanawo’ rad.
Bin dalip, tin th’abi fel’ e tabinaw e kan toey nga dakaen tunom Somoel ni fan bin fel’ e na’un rok, fare temple. Ngan toey e temple ra tabab nib moem riy’—ngan th’aeb pi gak’iy min fal’eg e but’. Som’on e muruwel nem ni ngan fal’eg rogoy e but’ e ngan ta’areb nag ni ngan fol ko motochiyel nib moem riy’. Pi motochiyel e dayif ni kan toey pi gachalpen nga dakaen. Ngan mang e gachalpen mra fek dad iyaen ni ngad dabra mithmith gaed,5 woed fare lay i wasaey ni fan ko temple. Re yil ney ma pag Somoel ni nge l’oeg Kan Thothup Rok ni nge thiliyeg gum’ir’cha’ dad.6 Ni ngan thiliyeg nib gel e gum’ir’cha’ey e woed nin gan bi’ech nag pi sengil nga langin e temple.
Fini gadad ma ul’ul’uy ko mich, Somoel ma thiliyeg dad buchuw ngo buchuw. Ra athapeg dad pangi Rok nga lan p’owech dad mra tabab i sulaen’dad ko re t’ufeg nge fla’ab e pangin Rok.7 Napan gadad boeded Ir, ra toffan rodad nga langin e na’un Rok, mra toffan Ir nga langin fapi na’un rodad.
Ra matangiy e peth’ ko fapi na’un rodad ngak fa na’un Rok ni ngad koeled e temple recommend min use nag riy’ ni gubin ngiyal’ ni rayog dad. Napan gadadma rin’ey, re thothup nga langin fare na’un Somoel ra paer nga langin fapi na’un rodad.
Fare Salt Lake Temple nib fel’ ma paer ni chugur. Kan toey rok pi pioneer niba’ talin nu kakrom, malang ko ted, nge muruwel nib gel nib gel riy’, fare temple kan toey u 1853 mada ko 1893. Bin fel’ e gonop ko pi chongin e Galasia faram ko engineer, tunom nag, nge yarimy ke toey e na’un nib fla’ab nibe nang biyuw ngo biyuw e gidii’ riy.
Ke thimur 130 e duw ko ngiyal ni kan yibliy nag binem e temple. Woed ni Elder Gary E. Stevenson keyog fooplaan, pi rogon ni kan toey nu kakrom e kan toey bayay nib bi’ech mab fel’ riy. Fa’anre dabda toey bayay min bi’ech nag pin’en nib m’ing riy e re dani liyoer nag fare miligach ko pi pioneer, ni kar pii’d gubin ni ba’raed min sap ngodad ni ngad matangiyed riy’.
Fare Galasia ke tabab e muruwel nra taw aningeg e duw riy’ ni ngan gel nag fare rungin e temple.8 Fare dayif, but’ nge rungin e ra gel nag rad. Bin th’abi fel’ e llowaen ni ba’ daba’ e ra kunuy nga ta’abang ko rogon ni ngan toey fare temple. Dabra guy u wuru’ nrogon ni kan thiliyeg fare temple riy’, machane pin’en e riyul’ mra gel nag fare temple. U fithik re muruwel ney, rogon nikan yarimy fare temple nga langin e ra magaey.
Thingarda fol gad ngak fare wok nibe dag e gel’nag ko fare Salt Lake Temple ngodad min sulaen’dad ko rogon nikan toey e yafos rodad min thiliyeg fa’anre ke t’uf riy’. Ni ngan sul yarmen, nge mu peth ni ngam fith Somoel, ”mang e n’en ni kabay nthingar gu rin’?”9 mra ayuweg dad ni ngad ayuweg ma toey gad bin th’abi fel’ e tabinaw.
Bin aningeg, th’abi fel’ e tabinaw riy’ ma damiiteg nifan e yoko’ ko yafos. Somoel ke micheg ni enra fol ko pi motochiyel rok Gor e ra “felʼ rogoy u dakean e nam.”10 Fla’ab rok Got e gelingin ni ngan mon’og i yaen dem turug pi magowan e yafos.
Lan e duw ni 2002 kug fil rogon marunga’agen e magowan. Napan ni gag u Asunción, Paraguay, kug mada’ nag pi stake president ko fare binaw. Chirofen nem, ke bay e magowan ko salipy u Paraguay, nge bo’or i chongin e galasia kar gafgow gad nib almarin. Dawor ku sul ngak South America tomuren e mission rog ma dawor kug waen nga Paraguay. Kug muruwel ko Area Presidency kemus boech e wik. Kug murus bachan dab kug lemnag nrayog nggu ayuweg pi stake president nem, mug fith nagrad ni ngar weliy fan tin nib fel’ ko pi stake rorad. Bin som’on e stake president ke weliy fan pin’en nib fel’. Bin magid ke weliy fan boech e tin nib fel’ mab boech e magowan. Fini taw gad nga bin tomur e stake president, ke weliy fan kemus bo’or e magown ngog. Napani weliy fan fapi stake president urngin e magowan, kug gin’ riy, mug ba’agdag nggu gog ngorad, machane dab kug nang mang ngu gog riy’.
Napan ke ma’ e non rok tomuruen e stake president, ke yib e lem ngog u tafney rog: “Elder Clayton, mu ningrad re duwer ney: ’Pi president, ko pi chonggin e galasia ko pi stake nibe pii’ tithing rorad, pii’ e fast offering ngay, mugu’uliy pi calling rorad, ma waen ko pi tabinaw nin gan machib nag ngay10 gubin e pul, tay e family home evening, bi’eg pi scripture, min meybil gad gubin e rran, in e yaed ma bay e magowan ni de yoeg ni ngar fulweg rorad yad ni dar t’uf gad fare galasia ni nge fal’eg pi magowan ni fan rad?”
Kug fol re thin ko Kan Thothup, mug ning fapi stake president re duwer nem.
Kar sap niged ngog nib gin’ riy’ mar rogned, “Pues, ninguno,” nibe yup fan, “Ere, dariy.” Kar rogned ngog ni dariy chongin e galasia nibe rin’ e ren’y ni bay e magowan ni de yoeg ni ngar fulweg riy’ ni yad. Mang fan? Bachan kar pired nga langin tin th’abi fel’ e tabinaw. Re mich rorad ke pii’ rad gelingin, llowan, nge ayuw nu tharimy nib t’uf rad ni ngar athamgil gad min gel nag fare magowan ko nam rorad.
Dani yup fan ni picha’ mat’aw e dani m’ar, dol’, malog e muruwel, fa mada’ niged bo’or e magowan ko yafos rorad. Yafos ma gubin ngiyal’ pi magowan riy’, machane bo’or i yay kug guy ni enra gay rogoy ni ngan fol ko pi motochiyel e kan tawath nag ni ngan piri’eg rog Pi tawath nem e rayog ngak gubin e gidii’.12
David ni ga’ar, “Fa’anra gathi SOMOL e be toy ba naun,ma maruwel ko pi’in be toy e mm’ay fan.”13 Dem turug e gin ni gabe paer riy’, dem turug mang i yaen e na’un rom, nge dem turug ni minii’ ko tabinaw rom, rayog ni ngam toey tin th’abi fel’ e tabinaw rom. Fare gospel ko Yesus Kristus nikan fulweg ma pii’ pi tunom ko re tabinaw nem En Tathapegdad e bin machalbog e engineer, ta toey, nge ta yarimy. Fan Rok e ngan machalbog nag min falfalan’ nag pi ya’el rodad. Nu dakaen ayuw nib suguy ko t’ufeg rok, mrayog ya’el rom urngin ni Ir ba’adag ngay mrayog ni ngam mang e cha’ nib fel’ rogon.
Gube oge magaer ni fare Got nge en Chitimangiy rodad ab fos. Fak, fare Somoel ni Yesus Kristus, ni’r fare Tathapeg nge Tabayul ko gubin. Yow ba’adag dad nib machalbog. Fare Galasia ku Yesus Kristus ni Fan ko Gidii’en Got ko Tin Tomur e Rran e ba gil’ilungun Rok Got nga dakean e fayleng. Pi profet nge apostles nib fos ma gagiyeg nag dabay’. Ba riyul’ fare Babyor ku Mormon. Fare gosepl nib sulyarmen rok Yesus Kristus ma dag nodad e rogon ni ngan toey th’abi fel’ e tabinaw riy’. U dakean fithngan Yesus Kristus, amen.