Ba Mich nib Fos rok Kristus nib Fos

Rok Bishop Gérald Caussé

Presiding Bisof

N’en ni tha’abi ga’fan ni mornga’agen farke Babyor ku Mormon e ir fare bin riyul’ e llowaen’ ko mornga’agen e murwel rok Yesus Kristus ko rogon ninge thap e gidii’ riy.

Boran ko 2017, fare Temple u Paris France e ni madnom nag nib sug e gidii’ nibe dugliy e gin ninge sor e gidii’ ngay me yib bani mo’on nibe milekagnag lan fare temple ngak reb fapi gidii’ nibe dugliy e gin ninge sor e gidii’ ngay nib yip’ lolgen nga but’ ni kari kirbaen’. Me yoeg ni’i par u barba fare temple me yoeg ni’ir be’ ndabun ningan toey fare temple ngaram. Ke yoeg ni boran riy nibe sap u langan e winda rok ngawan, me guy ya’an ba statu ni ya’an Yesus ni yibe fek i yib ngan tay nga dakean farngi but ko farngi temple. Me yoeg ere mo’on ney ni biney ni guy e thilyeg rogon nibe thamiy ko Galasia rodead. Ke nang ni gadaed pi gidii’en Yesus kristus me wenig ningan n’agfan rok ko n’en nike rrin’.

Fare statu ko fare Christus, nibay ya’an ko farngi Temple nu Paris nge ku boech e but’ nib milfan ko Galasia, e be micheg fare tu’ufeg rodaed ngak fare Tathapeg. Fapi malang nikan fal’ag ko fare statu e murwel rok be’ nib Danish nib artist ni kanoeg Bertel Thorvaldsen ngak, ni ngongliy napan e 1820—ta’ab duw ko fare bin Somm’on e Yi’iy. Re statu ney ab thil ya’an ko tin kakrom e murwel ko artis, nib ga’ nibe dag ya’an Kristus nibe gafgow u dakean fare kuruth. Murwel rok Thorvaldsen e be dag ya’an Kristus nib fos, ni foskoyam’, nibe pithig pa’, nibe pining e gidii’ ninge yib Ngak. Ma karimus ni loen e richib ulan pa’ nge rifrifan’ay nge fath nibay u barba’ i p’eyoen e be dag gelingin fare gafgow ntay Ngak ninge thapeg gubin e gidii’.

Paa’angin Tathapeg ni kan dag ko fare Christus

Sana fan ni gadead gidii’en Fare Galasia ku Yesus Kristus ni fan ko Gidii’en Got ko tin Tomur e Rran e rigadead ba’adag e biney e statu ni bachane be pugoran ngodead ni woed rogon nibay ulan fare Babyor ku Mormon napan ni yibe m’ug fare Tathapeg ngalan u Mariken:

“Ere yibi buch, ra guyed bee’ nib Mo’on nibe yib u tharmiy nga but’; ma ke chuw nga ba mad nreb u lang nga but’ nib wechwech’ me yib nga but’ nge yibe sak’iy nga lukungun e ulung roraed; …

“Me yibi buch ni kʼiyeg paʼ me non ngakʼ fapi gidiiʼ, ni gaʼar:

“Musap gaed, I gag Yesus Kristus, …

“… Kug unum ko fare kap ni mo’oy ni pii’ facha’ ni Chitamangiy ngog, ma kug tafyan facha’ ni Chitamangiy u dakean e pi denen ko gidii’ nu fayleng.”¹

Me pining gubin e pumo’on, bpin, nge bitir ningar baed ngak ningar math gaed ko fath u p’eyoen nge ku arragon ni nge yog ni ngar math gaed nga fathan e richib u lan pa’ nge rifrifan’ay, ma riyul’ u wun’read mar fal’eged babyoren ni irraram facha’ ni i yoloey fapi profet mornga’agen ni bay yib.²

Irraray e ggin ni th’abi ga’fan ulan farke Babyor ku Mormon. Ga’angin e n’en nib “mangil ko marnga’agen” fare gospel e ir e ya’an fare Tathapeg, nibe dag nibe k’iyag “fagal raba’ i pa’ayif ko murnguy”³ nibe pining gubin e gidii’ ni ngar baed Ngak ningar thapegned fare tawa’ath ko fare Bayul Rok.

N’en ni tha’abi ga’fan ni mornga’agen farke Babyor ku Mormon e ir fare bin riyul’ e llowaen’ ko mornga’agen e murwel rok Yesus Kristus ko rogon ninge thap e gidii’ riy. Biney ab sug ulan fare tabolingin ko mornga’agen farke babyor nge mada’ ko gin tomur e guruy. N’umngin napan ni mathmit gachalpen Kristus u fayleng me gel e ma’alfath ko tin nib thothup banan, tin ni mornga’agen e n’en ni’i rrin’ Kristus u Gethsemane nge Golgotha e l’obochnag mornga’agen. Gu manang ni ri thamiy Joseph Smith e falfalaen’ ko napan, nibe pilyeg fapi thin 1 Nephi, me pir’eg e biney e micheg: “Tiney nib tomur e chep [fare Babyor ku Mormon] … e bay yaramiy e tin riyul’ ko fa tin somm’on e chep [fare Bible] … me dag fapin’en nib taming ma th’abi ga’fan ni’ir faram e kan chuweg riy; me dag ngak’ gubin e pi mfen, nge pi thin, nge pi gidii’, ni fare Saaf ku Got e ir Fak facha’ ni Chitamangiy ni Gubinfen, ma ire Tathapeg ko fayleng; ma gubin e gidii’ ma thingar rabaed ngak’, ere dabiyog ni ngar thap gaed.”⁴

Tin nib riyul’ ni mornga’agen fare Bayul rok fare Tathapeg e bay ni gubin yang ulan farke Babyor ku Mormon. Woed ni kug yoloey boech e pin’ey nib riyul’, gube piningmed ningam sapgaed ngay ko rogon ninge thilyeg e yafos rom fa uw rogon nike thilyeg e yafos rom.

Fare Bayul rok Yesus Kristus ab tawa’ath ndariy pilwon nikan pii’ ngak gubin e gidii’ ni’i moy u fayleng, gidii’ nibay e chiney nib fos, nge gidii’ ni bayi yib nga fayleng.⁵
Ma bay iyaen ni be gafgow ko pi amith nge kirbaen’ nge pi lumel ni gubin mit. Ma biney e aray rogon ni fan ko fare thin ni gomanga mugu’ul ni yoeg nra fek nga dakean e pi amith nge pi m’ar ko gidii’ rok’.⁶
Fare bayul rok fare Tathapeg e ke fal’ag rogon ni ngayag ningaed thap gaed ko fare Mul ni tay Adam, nib mu’un e yam’ ko dogur nga’. Bachan Kristus, gubin pi fak Got nin gargelnag ulane re fayleng ney, ndemuturug gelingin fani fel’, e ran faseg ko yam’ u dakean gelingin fare Foskoyam’⁷ min sul Ngak ningan “pufthin nagraed … ko rogon e riyul’ nge thothup ni bay [roraed].”⁸
Machane, rogon ni gadaed ra thapeg ga’angin fare tawa’ath ko fare Bayul Rok fare Tathapeg e be yaen u rogon ni gadaed ra motoyil ko thin rok’⁹ ni yibe fol ko fare “thin rok’ Kristus.”¹⁰ Ulane lik’ay rok, Lehi e guy “chi pa’ i kanawo’ nib k’ik’iy mab wu’in’in”¹¹ nibe yaen iyaen ko fare ke gak’iy ko yafos. Fare wa’amngin, e be yip fan fare tu’ufeg rok Got ni yib ko fare tawa’ath ko Bayul rok’ Kristus, “ni wa’amngin e rib ga’fan ma th’abi fel’ lamen u fithik’ urngin mit e wa’amngin … [nge] ma ire th’abi fel’ ko gubin e pi tawa’ath rok’ Got.”¹² Ra ngan thapeg e biney e wa’amngin, thingari michuwaen’ daed ngak Yesus Kristus, min kalngaen’uy, “min motoyil ko thin rok’ Got,”¹³ min thapeg e tin nib ga’fan e gum’ing, min ayuweg fapi m’ag nib thothup nge mada’ ko ngiyal nikad m’ad.¹⁴
Udakean fare Bayul Rok, Yesus Kristus ma gathi kemus nike chuweg e denen rodaed, machane ke pii’ gelingin ni ngeyag ni fapi gachalpen e ngar “[paged e] fekyath,”¹⁵ mi yaed mon’og “ni bayil’ nga dakean bayil’,”¹⁶ me mon’og e thothup roraed¹⁷ ni ngeyag ningar athamgil gaed ngar machalbog gaed ngak Kristus,¹⁸ mi yaed par rok’ Got bayay¹⁹ ma aram ni gamed ra par ni dariy thibnginmed.²⁰

Reb nib riyul’ ni mornga’agen nibay ulan farke Babyor ku Mormon e, aram rogon ni fare Bayul e rayag ngak gubin e gidii’, re Bayul ney rok Somoel ab tawa’ath nib machalbog, nifan ngodaed.²⁰ Woed rogon ni pining Yesus gubin fapi Nephites ningar thamiyed fapi fath nibay Rok, ke yim’ nifan nogdaed ni gubin, fan ngom, ni woed nikemus ni yigogur nge gag e gadow bay u fayleng. Ke piningdaed ni ngaed bad Ngak min fanay fare tawa’ath ko Bayul Rok.²¹

Fare Bayul rok Kristus e rib riyul’ ni fa’anra gadaed ra fil mornga’agen rogon ni buch rok e pi pumo’on nge bpin nibay ulan fare Babyor ku Mormon. Boech e pi gidii’ ney e Enos, Alma, Zeerom, Pilung Lemoni, nge pin rok, nge fapi gidii’ rok Benjamin ni Pilung. Mornga’agen raed nge michaen’ roraed e be dag fare mich ko rogon nrayag nira thil gum’ircha’en daed ni bachan fare tu’ufeg nge murunguy rok Somoel.²²

Fare profet Alma ke fith e duwer ney nib gaa’ ngak e gidii’ rok. Profet Alma e fith ngak pi gidii’en e biney e duwer: “Fa’anra kam thamiyed gum’ircha’med ni ke thil, ma fa’anra kam thamiyed ni gimed ba’adag ni nga mun’ed tangin e falfalaen’ u dakean e bayul, me ere guba’dag ni nggu fithmed, be yog ni ngam thamiyed e chiney²³ Biney e duwer e rib ga’fan e daba’, bachane gadaed pi gachalpen Somoel, ninge par fare tabayul Rok rodaed, me pii’ e ayuw ngodaed, me thilyeg daed ni gubin e rran.

Duwer rok Alma e krayag ni ngan fith ni arrogon: wi’in e tomur riy ni kam thamiy fare Bayul rok fare Tathapeg ulane yafos room? Biney e ma buch u napan ni kam thamiy “fal’ngin” fare falfalaen’²⁴ ni gara thamiy ulan gum’ircha’em ni fapi denen rom e kan n’agfan; ma tin ni gabe mo’war riy e ran ba’udnag ngom; fa ni munguynag gum’ircha’em ni ngeyag ni ngam n’agfan ku bee’ nike amith nigem. Fa krayag ni garam guy nibe ga’nag e tu’ufeg rom ngak e gidii’, fa biney e rayag ninge thiliyegnem, ni gabe gay rogon ningam rrin’ ni woed rogon wo’en fare Tathapeg.²⁵

Gube micheg ni gubin e pi n’ey nike buch ab riyul’ ma pow riy ni yafos e rayag ninge thil u dakean e mich ngak Yesus Kristus nge fare Bayul Rok. Fare Babyor ku Mormon e ke weliy e biney ni rib fel’ rogon make ga’nag e llowaen’ rodaed ko mornga’agen e biney e tawa’ath nib thothup. Napan ni garam fil mornga’agen e rake babyor ney, ma garam rung’ag laman Kristus nibe piningem ningam mub Ngak. Gube micheg ni fa’anra gara yib ngak mag gay rogon ninge par e yafos rom ni woed Ir, mara yib nge ayuwegnem ulane yafos rom. Udakean fare gelingin fare Kan ni Thothup, fare Tathapeg ere thiliyeg e yafos rom ni gubin e rran “nge mada’ ko ngiyal’ ko fare rran nib polo’”²⁶ napan ni garam rrin’ ni woed rogon nike yoeg, “Ma gara guy owcheg ma gara nang ni’i gag Somoel.”²⁷ U dakean fithngan Yesus Kristus, amen.