Rogon fare Priesthood nibe Yibliy e pi’in nib Fal’yangren
Kan pi’ ngodead ningan pigpig ni woed rogon fapi angel, ningan machibnag fare gospel ko gubin yang u dakean e fayleng, min ayuweg e gidii’ ninge yib ngak Kristus.
Pi walageg, ri gub falfalaen’ ngay ni nggu non ngomed ko re mithigyal’ ney ko mornga’agen fare tawa’ath nib thothup ko priesthood nge gelingin ni rib ma’ang’ang nike yibliy e pi’in nib fal’yangren ko biney e mfen. Gube meybil ni demtrug gelingin e mo’war rog, fare Thothup e ra ayuwegneg nggu fil e tin nib riyul’.
Fare Bin Somm’on e Presidency e ke pug oran ngak e pi’in nibay fare Aaronic Priesthood rok ni “gab fos ko biney e rran nib sug ko tin nib fel’ nge tin nib mo’maw’,—ba rran nikan fulweg yarmen fare priesthood riy. Bay matawom ni ngam pi’ e pi gam’ing ko fare Aaronic Priesthood. Napan garam meybil mag fanay matawom nib yul’yul’, ma gara tawa’ath nag e yafos ko pi gidii’ nibay u to’bem.”1 Woed e pagal ni fal’yangren ko Galasia, kan pug oran ngodead ni gadead “ba tu’uf [pagal] rok Got, ma bay e murwel [rodead] nike tay nifan [ngodead] ni ngead rrin’ed”2 ma ngad pi’ed e ayuw ko murwel Rok “ningan thapeg e yafos ndarmamus nge yafos ni gubinfen” (Moses 1:39
Fare priesthood e ir gelingin ninge pi’ fare pi gam’ing nge pi michmich ko fare gospel rok Tathapeg ngak e pi’in nibe kol folen ninge thapeg. Udakean e pi gam’ing ko priesthood nge michmich nib thothup e ra yib fare tawa’ath riy nib polo’ ko fare Bayul rok fare Tathapeg nra ayuwegdead ngad thapegned fal’ngindead.
Joseph Smith e ba pagal nib fal’yangren ni pining Got ninge fulweg yarmen fare gospel rok Yesus Kristus ma, bachane biney, kan pi’ ngak fare priesthood, ni fanay ninge yibliy e gidii’. Doctrine and Covenants 135 be weliy mornga’agen fapi tawa’ath ni fanay Joseph ni yibliy e fal’yangren ko biney e mfen. Ngad be’egned: “Joseph Smith … e ke rrin’ bo’or ba’nen, ma kemus ni Yesus e ke rrin’ nib bo’or ngak, nifan ko thap ko gidii’ ulane re donop ney, ndariy be’ nike rrin’ ni aram rogon gelingin ma kemus ni’ir. … Ke pi’ fare Babyor ku Mormon … ; ke pi’ fare gospel ni ga’angin ndarmamus … ngak ga’angin yang u dakean e fayleng; ke pi’ fare yi’iy nge fapi motochiyel nibay ulan [fare] Doctrine and Covenants … ; ke kunuy pi gidii’en Got ko Tin Tomur e Rran, … me chuw nge yaen me pag fithingan nge murwel rok ndabyiyag ningan gathay” (Doctrine and Covenants 135:3
Fa’anra ngan pigpig ni woed rogon Joseph ke rrin’, ma thingar da pired ni gadead be’ech ni ngeyag ni ngad fanayed gelingin fare priesthood rok Somoel. Napan ni yibe piliyeg e thin ko fare Babyor ku Mormon, Joseph nge Oliver Cowdery e yow ba’dag ni ngar tawfe gow, machane dariy mata’won gelinginread. Rofen ni May 15, 1829, kar garbug gead nga but’ ni yead be meybil me yibi m’ag John nima Tawfe ngoread, ni’ir e pi’ ngoread fapi kiy nge fare mata’won ni Aaronic Priesthood, ke ga’ar, “Udakanem o pi ta pigpig rog, udakaen fithing fare Messiah kug pi’ mata’won ngom fare Priesthood rok Aaron, ni’ir e bay fare fapi kiy riy ko pigpig ko fapi angel, nge fare gospel ko kalngaen’, nge tawfe ningan litheg nga’ar nifen ko pi denen” (Doctrine and Covenants 13:1).
Kan pi’ ngodead ningan pigpig ni woed rogon fapi angel, ningan machibnag fare gospel ko gubin yang u dakean e fayleng, min ayuweg e gidii’ ninge yib ngak Kristus. Biney e murwel e kan chagliydead riy ngak John nima Tawfe, Moroni, Joseph Smith, President Russel M. Nelson, nge ku boech e ta pigpig rok Somoel nib yu’yul’.
Pi murwel rodead nib chagil fare priesthood Rok ngay e ma kunuy e gidii’ nga ta’abang ni tin ba’aray e gidii’ nib yul’yul’ nibe leak wo’en fapi michib rok Somoel ni ri woed rogon nikan nog, ni gu manang ni rib mo’mow’ ni baga’ ni gadead be guy e tin nibe mo’war fapi fal’yangren riy. Machane u ta’abang ngak e pi ta pigpig rok Somoel ningan mu’nag e murwel Rok e ra gelnagdead ngak fare lumel rok mo’oniyan’. Rayag ningam mang e tamilang ngak e gidii’ nibe marwar e tafney roread. Re tamilang ney nibay rom e ra mat rama’en ni rib gel ni gubin e gidii’ ni gabe mada’nag e ra tawa’ath nibay u to’bem. Rayag nibay boechi ngiyal’ nib mo’maw’ ningead guyed fare thothup nibay rodead, machane ri gub falfalaen’ ngay ni gag be’ ko fare ulung ko priesthood quorum nib yul’yul’ nrayag ni nggu murwel riy ni nggu chuchgur ngak Kristus.
Woed e pi tafagar nge gathon e tabinaew rodead, fare Kan ni Thothup e ir e bin th’abi yul’yul ma rayag ninge pagan’uy ngak. Machane fa’anra ngan pining ninge yib ngodead, ma ba tu’uf ninged ted gadead nga biyang nrayag ma ba’dag ninge yib ngay. Biney e rayag ninge buch ulane tabinaew rodead, napan ni gadead be tay ni’ir e tigil’ e thothup ma biyang ni yima be’eg e thin nib thothup riy ma yibe meybil riy u ta’abang ni gathon fare tabinaew, machane bin th’abi ga’fan e gur rom ningan fil mag meybil rom ni yigogur.
Buchu’uw kafram ko biney e duw ku rrin’ ba’nen ni ri gub falfalaen’ ngay make sobut’aen e tafney rog napan ni kug ayuweg walageg nib bitir nib bpin, Oceane, nike ul’ul’ ko fare pi’ i kanawo’ ko motochiyel nike thapeg fare tawfe make rrin’ reb fare murwel nib tu’uf ni ngeyag ninge thap ko fare celestial kingdom. Yon’ yaran e tawfe rok ni ta’areb e pul ngay, nge mada’ ko ngiyal’ nikan ordain nag ngog fare priest, ni ngeyag ni nggu rrin’ fare gam’ing, me mang walageg ni bpin ni kube murwel utan pa’ e ra murwel ko priesthood ney ninge sak’iy ninge mang pow nge mich ro rofen nem. Napan ni gamead ba sakiy u barba’ fare gin ni yima tawfe riy, ni aram e gamow be yan ni yan ngalan fargi ran, ma kug guy ni kari falfalaen’, napan ni puluw e changar romow. Mug thamiy ni gamow ta’areb mug guy nike mel’eg ninge rrin’ e tin nib mangil. Biney ni kug rrin’ nibay fare priesthood riy e ke tu’uf rog ni nggu tiyan’ug mug fol ko fare gospel ni rib fal’ rogon. U mm’on ni nggu fal’ag rogog, kug wan nga temple ko re wiik nem ni gubin e rran, nibe ayuwegneg e nina’ rog, titaw rog, nge walageg ni bpin, ni nggu tawfe nifen ngak e gidii’ nike yim’.
Biney nike buch rog e ke fil ngog bo’or ba’nen ni mornga’agen fare priesthood nge rogon nrayag ni ngu fanay nib mat’aw rogon. Gu manang ni gubin e gidii’ nibay e priesthood rok e rayag ninge thamiy e biney ni kug thamiy ni fa’anra gadead ra leak wo’en Nephi ningan “yaen ngan rrin’” (muguy ko 1 Nephi 3:7). Dabyag ni ngead pired ndariy ba’nen ni gadead be rrin’ min taga’ ngak Somoel ninge fanaydead ko murwel Rok. Dabda soen gead nge mada’ ko ngiyal’ ni gidii’ nike tu’uf e ayuw rok e nge lekdead; irraray e murwel ko gidii’ nibay e priesthood rok ninge mang wo’en ma sak’iy ninge mang mich rok Got. Fa’anra gadead be rrin’ boech ba’nen ndani fel’ ma dar fekdead ko tin nima mon’og ndarmamus, thingar da thilyeged pingindead e chiney. Mo’oniyan’ e ra gay rogon nib gel ninge taydead ko gin ba’aray nib mom ngodead. Machane gu manang ni fa’anra gadead ra gay rogon nib gel, pir’eged e gidii’ nra ayuwegdead, min kalngaen’uy ni gubin e rran, ma uringin fapi tawa’ath nra yib e bo’or ma yafos rodead e ra thil ma gadead ul’ul i yaen nga mm’on ulan fare pi’ i kanawo’ ko motochiyel.
Gu manang ni irraray e bin riyul’ e Galasia ku Yesus Kristus, i ir e Tathapegdad nge ke pii’ kiis ko fare priesthood ngak fapi Apostle Rok, nima gagyeg nagdad udakaen en,u fithik e rran ney nib mom’ow, nge ni ngeyag ningan fal’ag rogon fare donop ninge sul ngay.
Gu manang ni Joseph Smith ir fare profet ko fare Sulyarem ma President Nelson e profet rodaed nib fos e daba’. Gube pining dead ni ngad filed mornga’agen e pi gidii’ ney nibay gelingin fare priesthood roread min gay rogon ningead mon’og gead ni ngeyag ni ngead mada’ niged e en ni sunmiydead. U dakean fithngan Yesus Kristus, amen.