Fare Tonom nib Mangil
Gadaed manang e tomon rok Got makad fal’aged e m’ag bayi muruwel rodad ningad filed fatin riyul’ ney nga reb e gidii’.
Pi brothers nge sisters rog, arrogon ni gadaed bay u fithik’ e magawon, ma riyul’ ni gadaed btawa’ath! Biney e general conference e ke pii’ e fla’ab nge falfalaen’ ngodaed nib bo’or ko mornga’agen fare Sulyarmen ko fare gospel rok Yesus Kristus. Makad falffalaen’gaed ko fare yi’iy ko fare Chitamangiy nge fare Fak nra sunmiyew fare Sulyarmen. Kan pugoran ngodaed mornga’agen fare wub ko fare Babyor ku Mormon, nifan e nge micheg ku Yesus Kristus nge fapi yalen Rok. Makan mu’i be’ech nagdaed ko fare falfalaen’ ni mornga’agen e yi’iy, ngak fapi profets nge fan ngogdaed. Makad rung’agned e mich ni mornga’agen fare Bayul rok Yesus Kristus nge fare foskoyam’ ni tay. Makan fil ngodaed boech e tin nib riyul’ ko fare Gospel Rok’ nib polo’ nin ndag ngak Joseph Smith u tomuren ni pining Got ni Chitamangiy ninge mang fare profet nib be’ech: “Irraray Fakag ni kari Maagirag Rog. Mu Motoyil Ngak!” (Joseph Smith—History 1:17).
Kan micheg ko llowaen’ rodaed ko fare sulyarmen ko fare priesthood nge fapi kiy riy. Makan mu’i be’ech nagdaed ko fare fithingan e Galasia rok Somoel ko fabin ni mat’aw i fithingan ni’ir, Fare Galasia ku Yesus Kristus ni Fan ko Gidii’en Got ko Tin Tomur e Rran. Makan mu’i piningdaed ningaed uned ko fare balaynag e abich nge meybil ninge achignag fare m’ar nibe gathay nag e fayleng ni ga’nginyang. Biney e kadbul make thothup nagdaed fare profet rok Somoel nib fos ko mornga’agen fare mulwol ni kakrom ko fare Sulyarmen. Gamaed be micheg fapi thin ni “pi gidii’ nira meybil me fil mornga’agen fapi mulwol ko fare Sulyarmen me rrin’ ni woed rogon fare mich e ran tawa’ath nagraed ni ngeyag ngoraed e biroraed e mich mafan e biney e nge fal’agin rogon fare fayleng ko fare bin Migid e Wub ni micheg fare Somoel nge fare Tathapeg, Yesus Kristus.”1
Fare Tonom
Gubin e pin’ey ma kabang ko fare tonom nin ngongliy nifan e ngeyag ninge ayuweg pi fak Got ningar boded Ir. Nibay ulan fapi thin nib thothup ni kanoeg fare “wo’en e falfalaen’ nib gel,” “wo’en e thap,” nge “fare … wo’en e bayul” (Alma 42:8, 11, 5) binem e tonom—e kan dag ko fare Sulyarmen—ni tabab ko mo’olung u tharmiy. Napan ni gadaed ba ulungi engel, ma gadaed ba’adag ni ngeyag ngodaed fare yafos ni manemus nibay rok e galibthir rodaed nibay u tharmiy. Binem e ngiyal’ makaed mon’oggaed ko gin nrayag ningaed mus gaed riy ndariy fare dogur rodaed nge yafos u fayelng. Ni ngeyag e binem e yafos, i Got ni Chitamangiy e dugliy ba tonom ninge sunmiy ere fayleng ney. Ulan fare tonom ko yafos u fayleng, ma gadaed ra denen ni ngeyag ningaed mon’oggaed ko tin nib thothup banan. Ma kagdaed ra yim’. Ni ngeyag ningan fulwegdaed ko denen nge yam’, tonom ko Chitamangdaed nibay u Tharmiy era pii’ fare Tathapeg. Fare Foskoyam’ nra tay ere fosag gubin e gidii’ ko yam’, ma fare bayul Rok era pii’ pilwon urngin nib tu’uf nifan ngak gubin e gidii’ ningan be’ech ko denen ni woed rogon ni kanoeg nra ayuwegdaed ngaed mon’oggaed. Biney e Bayul rok Yesus Kristus e i’ir fare lukungun ko fare tonom rok e Chitamangiy.
Napan fare Mo’olung ntay u Tharmiy, gubin fapi engel ni fak Got e ndag ere tonom ney rok e Chitamangiy ngoraed, nib mu’un fapi lumel nge tin nra buch u fayleng, nge fapi ayuw nra yib u tharmiy, nge fal’ngin e biney e milekag. Kad guyed rogon taboelngin ko somm’on riy. Urngin e gidii’ nib bo’or nikan gargelnag ulane re fayleng ney e ke mu’i mel’eg ere tonom rok e Chitamangiy ni unngay ko cham riy u tharmiy u mm’on ninge yib. Bo’or i gadaed e fal’eg fare m’ag ngak e Chitamangiy ko pi n’en ni gadaed ra rrin’ u roy u fayleng. Nib bo’or kanawo’en ndawrin thapeg, ya n’en nikad rrin’ed u tharmiy era thilyeg rogon e par rodaed u fayleng.
Par u Fayleng nge Fayleng ko Thothup
Arame chiney e nggu weliy boech mornga’agen fapi yalen ko fare tonom rok e Chitamangiy, nra ayuwegdaed ko biney e melikag ko yafos u fayleng nge fayleng ko thothup.
Fan e biney e yafos u fayleng nge bin migid e yafos ni bayi yib e fan fapi fak Got ni ngar boded Ir. Irraray e n’en ni ba’adag e Chitamangiy nibay u Tharmiy nifan Ngak pi fak. Rangan thapeg e biney e wo’, ma fapi motochiyel nu tharmiy e ba dag nib tu’uf ningan be’ech nagdaed u dakean fare Bayul rok Yesus Kristus, ni ngeyag ningaed pired rok e Chitamangiy nge fare Fak min falfalaen’ ko fapi tawa’ath ni manemus. Ni woed rogon fare Babyor ku Mormon ni fil, ke pining “gubin ni ngar baed ngakʼ ngar feked boech e murnguy rokʼ; ma dar fek yathin e piʼin nibe yib ngakʼ, ni talimor nge wechwech, ni kalbus nge de kalbus, ni pumoʼon nge ppin; ma kubay u waenʼ fa piʼin dariy loren Got u wunʼraed; ma gubin ma taʼareb rogon rokʼ Got” (2 Nephi 26:33; kumguy ko Alma 5:49).
Fare tonom nib thothup nifan ngodaed ningaed manged rogon nikan dugliy ab tu’uf ningaed subthiyed e lumel nibe yib ngodaed u fayleng nib togan ko motochiyel rok Got nge fare tonom Rok. Ma krayag nib tu’uf ni gadaedra thapeg e dowef nib togan biyang riy, ni woed nima yib ni bachane boech e denen ko gidii’ fa bachane gargel. Boechi ngiyal’ ma tin nib tu’uf nra ayuwegdaed ngan mon’og e ma yib ko fapi gafgow nge lumel ko mo’oniyan’ fin aram fani yib e gapas nge pagaen’. Ra m’ayfan e biney e yafos u fayleng nge fan nib thothup ni fa’anran pii’ ngodaed gubin banan nib tu’uf rodaed u roy u fayelng.
Fare tonom e ke dag fare wo’ rodaed u tharmiy, fan nge mang e ra buch riy u roy u fayelng, nge fapi ayuw nra yib u tharmiy ni gadaedra thapeg. Fapi motochiyel rok Got e ta’magrean ngodaed ko fapi kanawo’ nra fekdaed ko riya’. Fapi michib rok e tiyugang’ era ayuwgdaed nge powi’iydaed ko fare pi’i kanawo’ nra fekey ko fare milekag ni manemus.
Tonom rok Got e pii’ ngodaed aningeg i banan nib mudugil ninge ayuwegdaed ko re milekag rodaed ney u fayleng. Gubin e gidii’ makan pii’ ngak fare Bayul rok Yesus Kristus, ni’ir fare lukungin ko fare tonom. Fare bin somm’on nin mudugilnag ngodaed ko fare gafgow nitay e fan ko fapi denen nikaed kalngaen’ gaed riy, ma ran be’ech nagdaed ko pi denen nem. Mara tomur riy ko fare pufthin ni tomur “ma dab kug leamnag e denen rorad” (Doctrine and Covenants 58:42).
Bin migid, biyang ko fare Bayul rok fare Tathpeg, ke fek nga dakean gubin mit e m’ar nibay u fayelng. Biney e rayag ningan pining ninge pii’ gelngindaed ningan gel ko fapi gafgow nibay ko biney e yafos, tin nibay ulane yafos rom fa demuturug banan, ni woed e m’ar nge maal. Fare Babyor ku Mormon e weliy e biney ni rib tamilang rogon ko mornga’agen gelngin fare Bayul. Fare Tathapeg e fek nga dakean “e pi [amith] nge pi m’ar ko gidii’ rok’. … Ma rafek nga dakean e pi moʼowaer ko gidiiʼ rokʼ, ni nge yog ni sug lan ngorngoren ko murnguy, u rogon e dagur, ni nge yog ni nang ko dagur u rogon ni nge ayuweg e gidiiʼ rokʼ u rogon e pi moʼowaer roraed” (Alma 7:11–12).
Bin dalip, fare Tathapeg, u dakean fare Bayul rok ndarmamus, me chuweg fare gin tomur ko yam’ me mudugliynag fare falfalaen’ ngodaed ni gadaed gubin ma gadaedra foskoyam’. Fare Babyor ko Mormon e fil, “Biney e sulyarmen e rayog ngak’ gubin e gidii’, ni pilibthir nge bitir, ni kalbus nge gathi kalbus, ni pumo’on nge ppin, ni pi’in ni kireb nge pi’in mat’aw; ma mus nga bagaf i piyen loelugraed ma dabi yaen ngabang; machane gubin ban’en ma yira sulweg nga rogon, ni boed ni bay e chiney” (Alma 11:44).
Gadaedra modnam nag e biney e Easter nifan ko Foskoyam’. Biney e be ayuwegdaed ningaed nangfaned magdaed athamgil ko pi gafgnow nibay u fayleng nibe yib ngodaed ma kube yib ngak e gidii’ nib tu’uf rodaed, ni woed e gafgow ko dowef, man’aey, fa thamtham rodaed nin gargelnagdaed ma bay riy fa tin nibe buch ko biney e yafos rom u fayleng. Bachane biney e Foskoyam’, gadaed manang ni tiney e m’ar e kemus ni yigo fan e chiney!
Fare gospel nike sulyarmen e be mudugilnag ngodaed ni fare Foskoyam’ e rayag ninge fek gathon e tabinaew rodaed nga ta’abang—matam, mitin, bitir, nge galabthir. Biney e ba athamgil nib gel nifan ngodaed ni ngeyag ningaed rrin’ed fapi murwel rodaed nifan e tabinaew u roy u fayleng. Be ayuwegdaed ngaed pired u ta’abang u fithik e tu’ufeg ko biney e yafos nibe yaen ko bin migid e yafos.
Bin aningeg ma bin tomur, yi’iy ko chiney e be fil ngodaed ni fapi murwel rodaed u fayleng e darmamus u roy. Ri buchu’uw e kandag ko ran’ey nikan mudugilnag. Kan noeg ngodaed ni biney e yafos e ireray e re ngiyal’ i n’en ni fan ko gidii’ ni ngar mugu’uliyed yaed ni ngar mada’ gaed Got ni dab ku mun’ed yaran e rran ko kalngaen’ romed (muguy ko Alma 34:32–33). Maka arrogon, nikan fil ngodead ni gin nima par e ya’el riy e ki yima michibnag fare gospel ngak “fapi gidii’ nib ta denen nge fapi gidii’ ndan’i fol ma dabun fare riyul’” (Doctrine and Covenants 138:29) ma gidii’ ni yibe michibnag u rom e rayag ninge kalngaen’ u mm’on ko fare bin Tomur e Pufthin (muguy ko verses 31–34, 57–59).
Ba’aray boech e tin nib ga’fan ni mornga’agen fare tonom rok e Chitamangiy nibay u Tharmiy.
Fare gospel rok Jesus Kristus nikan sulweg yarmen e ke pii’ ngodaed e llowaen’ ni mornga’agen e golong. Ke fil ni fare mabgol e rib tu’uf ninge mu’nag fare tonom rok Got, ni ngeyag ningan fakay e bitir, min fal’ag rogon gathon e gidii’en e tabinaew nifan e yafos ni manemus. “I Got e pii’ motwon e mabgol ngak e gidii’,” me ga’ar Somoel, “… ni arram fan nigu sunmiy fare fayleng” (Doctrine and Covenants 49:15). Ko biney, fare tonom Rok, e riyul’, nibe yaen nib thil rogon ko tin nu fayleng e yalen nge motochiyel.
Fare gelngin ningan sunmiy e bitir e irraram e bit tha’abi tolang gelngin Got ni pii’ ngak pi fak. Rogon i fanay e biney e rib ga’fan ulan fare bin somm’on e motochiyel, machane kabay reb fare motochiyel ngay ni dabin gathay rogon i fanay. Wuru’ fare mabgol, gubin mit e fanay ko sunmiy e bitir e ta’areb rogon fa reb e denen ni’ir e bin tha’abi ga’fan nin pii’ ngak e pumo’on nge bpin. Fare gospel nike sulyarmen e weliy mornga’agen e machelbog ko golong nib ga’fan ni bachane ir fare gelngin nibay rodaed ningan fakay e bitir ko rogon fare tonom rok Got.
Mang e Migid?
Napan e biney e duw nike gaman e 200th ngay fare bin Somm’on e Yi’iy napan ni Sulyarmen, gadaed manang fare tonom rok Somoel ma kan pii’ e athamgil ngodaed nike gaman l’agruw e ra’ay e duw ngay nib mu’un fapi tawa’ath ngay nibe yib ko Galasia Rok nike sulyarmen. Ko biney e duw ko 2020, ma yoeg e togta e 20/20 ko changar ngay nge tin nike thumur.
Ya napan ni gadaed be sap nga mm’on, ma changar rodaed e danki dugil. Gadaed manang ni tomuren l’agruw nge ra’ay e duw nike thumur ko fare Sulyarmen, fare tofen e ya’el e chiney e ke sugnag gidii’en e murwel nibe rrin’ fapi murwel ko michib nibe buch u rom. Ma gadaed manang ni chiney e ke yo’or fapi temple ningan rrin’ fapi gam’ing ko gubinfen nifan ngak e pi gidii’ nike kalngaen’ make fanay fare gospel rok Somoel ndemuturug ko gin ngan u barba’ fare veil nibay riy ko yam’. Gubin e pin’ey nibe chugurnag ko fare tonom rok e Chitamangiy nibay u Tharmiy. Tu’ufeg rok Got e rib ga’, makemus ndani ga’ ngak fapi gidii’ nra laked mo’oniyaen, ma ke pii’ wo’en e riir ngak gubin pi fak (mu guy Doctrine and Covenants 76:43).
Gadaed manang nra sul fare Tathapeg ma bay fare millennium nra par e gapas riy ninge mu’nag fagnem ko fare tonom rok Got. Ma kagdaed manang nibay reb e foskoyam’ nib thil, ko mat’aw nge tin demat’aw, nibay fare pufthin riy ko tomur nifan ngak gubin e gidii’ u tomuren fare foskoyam’ nra tay.
Ran pufthin nagdad nrogon e pi ngongol rodad, pi athapeg ko gumircha’dad, nge mit e gidii’ ni kad manged. Biney e pufthin era fek pi fak Got ngar tababgaed iyaen ko fare rir nike yaen u rogon e fol nikar ted ni irraram e gin nran tayraed riy. Cha’an ninge pufthin nigey ni tomur e Tathapeg rodaed, Yesus Kristus (muguy ko John 5:22; 2 Nephi 9:41). Bachane llowaen’ Rok ni manang gubin banan ko gubin fapi ngongol nge mithmith rodaed, gubin e tin nikan kalngaen’ riy fa dawrin kalngaen’ riy fa tin nikan kalngaen’ riy fa tin nib mat’aw. Ere chiney, u tomuren fare pufthin Rok ma gadaed gubin ni gadaedra yoeg “pi pufthin rok’ e ba mat’aw” (Mosiah 16:1).
Tomuren e thin rog, gube nangfan e thin nibe yib ko fapi babyor ngog ni guma be’eg ni bo’or e gidii’ e be fith ninge sul ko fare Galasia u tomuren nikan luf fa kan chuweg fithingan riy. Bo’or gidii’en e Galasia ndar nangfan e biney e tonom ko thap, niba’ nibay mornga’agen fare yalen nge motochiyel ko fare Galasia riy nike sulyarmen. Gadaed manang e tomon rok Got makad fal’aged e m’ag ningaed uned ngay, mu nangfan rogon e murwel ko pin’ey mag fil e pin’ey nib riyul’ magdaed rrin’ e tin nrayag rodaed ngaed ayuweged boech e gidii’ nibay u roy u fayleng. Gube micheg ku Yesus Kristus, ni’ir fare Tathapeg nge Tabayul, ni’ir e gubin ma rayag rok, u dakean fithingan Yesus Kristus, amen.