Ya Ngar Guyed
Musap nge meybil ni fan ko nrayog ni ngan chibiy ngalang e tamilang rom ya ngar guyed e gidii’ kanawo’en Yesus Kristus.
Pi walageg, e gum’racha’daed kan thapeged e taw’ath ko Ya’el nap’an e mo’olung ney.
L’agruw miri’ay e duw faram, bael’ e tamilang nga dakaen e pagael u fithik e paen. U langin re tamilang nge, Joseph Smith ke gu’ Got en Chitimangiy nge Fak Rok, Yesus Kristus. Fare tamilang rorow ke chuweg fare ya’el nib talimar nike up’nguy re fayleng ma ke yip i yaen ko Joseph Smith— nge gadad gubin. Ni bachan fare tamilang kan m’ug ko re rran nem, rayog rodad gubin pi tawath ni ba’ ko fare Bayul ko Tathapeg rodad, Yesus Kristus.
Bachan fare Sulweg nib Chilan Rogon ko gospel Rok, rayog ni ngad sul gad ko fare tamilang rok Tathapeg rodad. Machane, fare tamilang nem e gathi ni fan gur nge gag kemus. Yesus Kristus ke pinning dad ni ngad “paged e magael romed nge mat nga dakean pi gidiiʼ ney, ni nge yog ni ngar guyed e muruwel romed nib mangil mi yaed taʼfan e Chitamangmed ni bay u tharmiy.”1 Kug adag dakaen pi thin “ya ngar guyed.” Ni’r e fonow nib gel rok Somoel ni ngan tiyaenʼum ni ngam ayuweg e gidiiʼ ni ngan guyed kanawoʼen ni ngar baed ngak Kristus.
Napan i gag 10 e duw, tabinaw rog ke falfalanʼ ni ke paer romad Elder L. Tom Perry ko fare Ulung ko fare Ragag nge Lʼagruw i apostles napan i muruwel ko binaw romad.
Fini muʼ re rran nem, tabinaw rog nge tabinaw ko Elder Perry pired nga butʼ ko naʼun romad ni ngad kayed e apple pie nike lum e nina rog, napani yoeg pi fanathin marungaʼagen e Gidiiʼen Got u bang ko fayleng. Kug ginʼ ngay.
Ke nep napan e nina rog ke pinningeg nga kitchen me ningeg e duwer: “Bonnie, kam piiʼ e gaan ngak fapi nimen?”
Ke aw gumʼirchaʼeg; ya dawor. Dabug nggu digey e Apostle rok Somoel, ere gug gog ni sana fapi nimen mrayog ni ngar baley niged e abich ko kakadbul.
Nina rog ke fulweg nib gel “dangay.” Mrib papʼay riy, Elder Perry ke un ngomow me yoeg nib gaʼ laman mab falfalanʼ riy, “Kug rungʼag ke tʼuf beeʼ ni nge piiʼ gaan ngak fapi nimen? Mrayog gag nge pagael rog un ngay?”
Ya, rib falfalanʼ rog nggu piiʼ e gaan ngak fapi nimen! Kug miil mug fek e magael romad nib gaʼ. Kug ginʼ riy, mug powiʼirow nib papʼay nga dakaen kanawoʼen ngak naʼun ko pi nimen. Ni baʼ re magal ko paʼag, kug thʼaebed re millay ko corn mug waen nu fithik e falang ko wheat.
Fini kug taw nga garog nibe thʼaeb fare kanawoʼ, kug yanyan u tomuren woed rogon kug rinʼ boʼor e nap faram. Dab kug lemnag ko Elder Perry nibe gay rogon ni nge lekeg ko kanawoʼ nib talimar nib thilʼthil. Churuʼ rog de ayuweg ir ni nge guy fare garog. Ni dariy e tamilang ni nge guy banʼen, ke yaen nga lang fare raen nibaʼ ko garog me yoer. Kug murus, kug chel nggu guy tafagaer nib biʼech rog tuluf pi sus rok ko ay min tuluf e raen nib yoʼor riyʼ.
Ni baʼ e su nib sug ko raen riyʼ, ke ayuweg neg Elder Pery nggu piiʼ e gaan ngak fapi nimen. Napani muʼ romad, ke fonow nib tʼufeg riy, “Bonnie, bʼtuf nggu guy re kanawoʼ. Rib tʼuf fare tamilang ko kanawoʼ ni gube waen ngay.”
Kug tay e magael rog, machane gathi ko tafen ni ra ayuweg Elder Perry ngay. Chiney, ni kug nang fan ni ke tʼuf e magael rog ni nge yaen nga butʼ, kug tay e magael rog u toʼoben ir ni nge yoeg ni ngad sul gad nga fare naʼun rog nib felʼ rogon.
Pi walageg nib tʼuf rog, bo’or e duw kug lemnag ko pinʼen kug fil rogon rok Elder Perry. Fonow rok Somoel ni ngad ted pi magael rodad e gathi kemus ni ngad ted e magael rodad ni ngad tamilang nag boech iyang ko fayleng. Niʼir marungaʼagen ni ngan gagyeg nag re tamilang nem ni ngan guy e gidiiʼ re kanawoʼ nibe soer ngak Kristus. E mukun ko Israel u bin barba’ e veil—ayuweg e gidii’ ningar guyed e tin ningar rrin’ed e michmicheg nib thothup nga Got.2
En Tathapegdad ke yoeg, “Musap gaed, i gag fare tamilang; kug dag ba wok nib felʼ ni fan ngomed.”3 Aygi sap gad ko boechi rungin Rok.
Fare ppin ni baʼ ko re luwed e beeʼ nu Samaria ni de nang Yesus Kristus me guy e gidiiʼ riy nib nʼag ko gidiiʼ rok. Yesus madaʼ nag ir me tabab i non. Ke yoeg marungaʼagen e raen. Me powiʼiy i yaen ngak boech e tamilang fini ke yoeg Niʼir fare “ran ngom nima piiʼ e yafos.”4
Kristus ba murnguy ngak nge tin nib t’uf ngak. Ke mada’ nag reb pinn me tabab ninge non ngak marunga’agen e ban’en rorow. Faʼani ke talʼeg, e ra mang e thaʼ nib felʼ. Machane e dani fekey i yaen ni ngan miil ngak fare binaw ni gaʼar, “Mired, ngam guyed … : i ir fare Messiah?”5 Bayilʼ ngo dakaen e bayilʼ, ke pirieg niʼir Yesus Kristus, nge dariy fan e yafos rok uʼmon, ke mang talin e tamilang, nikan tay ya ngar guyed e gidiiʼ.6
Chiney ngad sap gad ko lʼagruw e fanathin nibe fol e rungin Somoel ngan tay e magal ngalang riyʼ. Deʼ nʼuw napan fagar rog Kevin ke paer nga butʼ ko e business executive ko abich. Ke murus ni ngan nang ko mang ra puruy nigew ko lʼagruw e awa. Ke motoyil ko Kan Thothup me fith Kevin, “Mog ngog marungaʼagen e tabinaw rom. Buʼuw kar uthmed riyʼ?”
De nang fachaʼ boʼor ko likʼegal rok, ere Kevin ke fek e cell phone rok, me yoeg, “Baʼ app rog nibe weliy fan pichaʼ e likʼegal rorad. Ngad sap gow riy.”
Tomuren boech e thin, tafagaer rok Kevin ke fith riy, “Mang fan tabinaw e ba gaʼfan ko galasia rom?”
Me fulweg Kevin, “Mich u wunʼmad nibe ulʼulʼ e paer rodad tomuren e yamʼ, Nge faʼanre gadadma nang pi likʼegal rodad min fek pi finthingrad nga tafen nib thothup ni temple ngay, rayog ni ngad mabgol gad nrogon nira mʼag dad nga taʼabang mus ni tomuren e yamʼ.”7
Kevin ke tabab riyʼ ko banʼen nib tʼab rogon ko ir nge tafagaer rok. Me piriʼeg rogon ni nge dag e tamilang nge tʼufeg Somoel riyʼ.
Bin lʼagruw e fanathin e marungaʼagen Ella, reb e basketball player ko college. Sasun rok i tabab napan i thapeg e mission call napan i baʼ ko skool. Ke melʼeg ni nge bing e call rok napan i baʼ ko team rok. Kar nang buchw marungaʼagen fare Galasia rok Yesus Kristus ma dar nang fan ra pigʼpig Ella ngay. Ke meybil boʼor ni nge nang ko rogon e welthin e mission call rok nrogon i nang fan pi teammate rok. Fulweg rok?
“Kug fal’eg e PowerPoint,” Ella yoeg, “bachan kug cheag.” Me yoeg ngorad ni yug ba 400 e mission nge sana ni ra fil rogon reb e thin riy’. Ke weliy fan biyuw ngo biyuw e missionary niba’ chiney. Me tal’ ko saseng rok Somoel nge re mich riy: “Basketball e reb e ban’en nrib ga’fan ko yafos rog. Kug waen nib palog ko binaw rog mug digey e tabinaw rog nggu fafal ko re coach nge team ney. Kemus l’agruw e ban’en nib ga’ fan ngog ko basketball ni’ir e mich rog nge tabinaw rog.”8
Ere chiney, fa’anre gabe lemnag, “Pi saseng ney e boed pi magael nib ta’tamilang riy’, machane gag e tamilang kan t’aer riy,” mu tiyaen’um ni ke yoeg Somoel, “i gag e tamilang niʼir e gimed ra tining ngalang.”9 Ma sulaen’dad ni Ir ra fekey fare tamilang fa’anre gadadma yip’i yaen picha’ ngak Ir.
Gur nge gag e ba’ tamilang rodad ni ngad tining ngalang chiney. Rayog rodad ni ngad ayuweg bee’ ni ngan chugur ngak Yesus Kristus, min waen i yan, ngo i yan.
Mu ning gur, “B’tuf minii’ fare tamilang ni ba’ rom ni ngan piri’eg fare kanawo’ nib t’uf rorad ni de yoeg i gu’ ngay?”
Pi walageg nib t’uf rog, mang fan ni ngan tinning ngalang e tamalang rodad? Ni ga’ar somoel ni bay yo’or e gidii ni ba’ ko fayleng ni dawor e tin riyul’ rorad kemus bachan dar nanged ko ningam riy’.10 Aygi ayuwegdad riy’. Aygi tinning gad ngalang pi magael rodad nrayog i gu’ rad. Rayog ni ngad pinningrad ngar baed.11 Aygi dared nga but’ u to’oben picha’a nibe gay nagrad Yesus, dem turug ko sasagal fa dangay. Rayog ni ngad kunuy nagdad Israel.
Gube micheg ni Somoel e ra ga’ nag urngin e muruwel nib chig riy’. Kan Thothup e ra kad’kad ngodad e n’en ngad rin’ mab mog. Yalen ney e ngariy t’uf ni ngad muruwel gad ngay, machane mrayog ni ngad pa’agaen’ gad ni Somoel ra ga’ ra’en e tamilang rodad.
Ri gu falfalan’ ko fare tamilang Somoel, nibe ul’ul’ ni nge powi’iyaen re Galasia ney ko thog’thog.
Gu pinning urngidad ni ngad fol wok ni Yesus Kristus nge sap gad ko tin’en nib t’uf ko gidii’ u to’ob dad. Musap nge meybil ni fan ko nrayog ni ngan chibiy ngalang e tamilang rom ya ngar guyed e gidii’ kanawo’en Yesus Kristus. Micheg rok e baga’: “En nra i lekeg e ke yag e tamilang ko yafos ngak ma dabki yan u fithik’ e lumor bi’id, ma fanay e magal ko yafas.”12 Gube micheg ni Tathapegdad, ni Yesus Kristus, i’ir fare kanawo’, tin riyul’, tin nib fos, tin nib t’ufeg ko re fayln. U dakean fithngan Yesus Kristus, amen.