Mired Ngak’ Kristus—Yafos ko Gidii’en Got ko Tin Tomur ea Rran
Rayog ni ngad rin’ed ea pin’en nib mo’maw ngad ayuweged ea gidii ni ngar rin’ed ni ta’ab rogon, ya gadaed ma nang facha’ ni ngad pagaen’daed ngak’.16
Kammagar, Elder Soares, nifan e mich rom nib gel’, nge rib thothup marunga’agen fare Babyior ku Mormon. Gathi n’uwnapan, ma kayog ni nggu kol bake babyor ko bin som’on ea yol ko fare Babyor ku Mormon Bay u dakean ea babyor ney, ni ya’an som’on u nap’an ea biney ea mfen, ke yol pithin ney ku Nephi ni ga’ar: “gag e bay guwaen nggu rinʼ e pinʼen ni ke motochiyel nag Somoel, ya gumnang ni Somoel e dabi piiʼ e motochiyel ngakʼ e gidiiʼ, me pag ni dabi bing woʼen ngoraed ni nge yog ni ngar muguʼuliyed e pinʼen ni ke motochiyel nag ngoraed.”1
Na’pan kug kol ea babyor ney, kug sug ko mager nib gel ko muruwel’ ko Joseph Smith ni ke 23 ea duw rok, ni pilyeg ea thin ko fare Babyor ku Mormon u dakean ea “towa’ath nge gelngin Got.”2 Kug thamiy ea magar ko pi thin ko Nephi nib bitir, ni kan ning ni nge rin’ ea ngongol ni reb gel ea mo’maw riy ni nge fek iyib ea plates ko brass rok’ Laban.
Me nang Nephi ni fa’anra ’ul’ul i lem nag Somoel, ma bayi mugu’uliy ea re motochiyel ney. Ke paer ea lem rok’ ngak fare Tathapeg u nap’an ea yafos rok’ ni yug amrogon ni gafgow nag ea lumel, gafgow ko dowef, nge ku togopluw ko boech ea chongin ea tabinaw rok’.
Ma nang Nephi ko bee’ ni rayog ni nge pagaen’ ngak’.3 Gathi n’uw nap’an u tomuren ni yoeg nib tolul, “O karug gafgow! Arrogon, gumircha’ rog e kari kirbaen’ ni bachan ea dowef rog,”4 Ga’ar Nephi, “Got rog e ke paer nib ayuw ngog; ke powiʼiyeg u fithikʼ e pi gafgow rog u lan wuruʼ e binaw; ma ke thapegeg u dakean farengi day nib toʼaer.”5
Gadaed ea gachalpen Kristus, ma dabi siyegdaed ea mo’maw nge gafgowu nap’an ea yafos rodaed. Ba t’uf nib bo’or ea yay ni ngad rin’ed ea tin mo’maw ni fa’an, ran gay rogon nigo’ ta’ bee’, me ra gel ngak’ ma dabiyog rok’. Napan ni ngad fulweged ea pinning ku fare Tathapeg ni “mired ngog,”6 ma bayi pii’ ea ayuw, gapasaen’uy, nge gapas nib t’uf, boed ni Ke rin’ ni fan Nephi nge Jospeh. Ku arrogon ko gafgow rodaed nib gel, ma rayog ni ngad thamiyed ea t’uf rok’ nib gowal buch’uw u nap’an ni gadaed be pagaen’daed ngak’ ngad fol gaed ko fiti laniyaen’. Rayog ni ngad thapeged ea falfalaen’ ni be soen nag ea gachalpen nib yul’yul’, ya Kristus ea falfalaen’.”7
Ke 2014, napan kug pigpig nag ko ba mission, me yib nib papay ko tabinaw rog ea gafgow. Napan ke yaen nga p’ening ko longboard, me doel’ ea fakag nib bitir me yib ngak’ ea kireb ni rayog ni nge fek’ pogofan rok’ ko lolugen. Fa’an kireb boech, me fek togtaa’ nib papay nge surgery nib almarin’.
Ke ragbug nga but’ chongin ea tabinaw rog u lan sengil ko ’aspital ni dariy reb ea bee’, ra pu’oged gumircha’med ngak’ Got. Nap’an ea ngiyal’ ko balyangaen’ nge amiith, ma ra sug gaed ko gapas nge t’uf rok’ Got.
Dag nanged ea tin ni nge yib ara rag guyed ea pagael romaed bayay ni be fos. Kug nanged ni fel’ rogon ni pogofan rok’ ea be paer u paa’ Got ma ra paer, ko changar ni manimus, nib mangil ngomaed nge ku ir. Udakaen ea towa’ath ko Kan Thothup, kug ta’ermadlydad ni ngad ba’adag demtrug e pi’nen ra buch.
Gathi ni moem! Ba paer u ’aspital ni l’agruw-pul nap’an ni gu muruwel gaed boech ko 400 ea pi missionary. Fakeg ea ke pagtalin ea bo’or. Gol rok’ ea ke ’un ngay ea pi session ko therapy ko dowef, lunguy, nge liw nib n’uw mab mo’maw. Be paer ea mo’maw, machane kad guyed ea ma’ang’ang.
Gadaed ma nang fan ni gathi gubin ea gafgow ni nge yib ngodaed ea ra yib nag ea tin ni gadaed ba adag. Machane, napan ni ra paer ea lem rodaed ku Kristus, ma ngad thamiyed ea gapas ngad guyed ea m’ang’ang ku Got, demtrug ea mit, ni rin’ ko nap’an ngu rogon.
Bay yib ea ngiyal’ ni dabiyog ni ngad guyed rogon ni nge tal’ ea nigyal’ nem ma sana’ ngannoeg, ni boed ea Nephi, “gumʼirchaʼ rog e kari kirbaenʼ ni bachan e dowef rog.”8 Bay yib ea ngiyal’ ni yigo’ Kristus ea be paer ni athap rodaed. Ba gaa’ ea towa’ath ni rayog ni ngad athpeged ngad pagaen’ gaed ngak’. Ma paer Kristus ni ta’ bee ni bayi mugu’uliy ea mich Rok’. Yibe micheg ea gapas Rok’ ko gubin ni ra yib Ngak’9
Toygang’ rodaed ba’adag gubindad ni ngad thamey ea gapas nge gapasaen’ ni ma yib u nap’an ni ra ni pagaen’ nge paer ea lem ku fare Tathapeg i Yesus Kristus.
Profet ba fas rodad, ni President Russell M. Nelson, ba weliy marunga’agen tin ba’adag fare Somoel nifan e feylang nge chon ko Galasia rok Kristus: “Ba ngongoch nge yul’yul ea mulwol rodaed iyaen ko fayleng: Gamaed be pining gubin ea bitir ku Got ni paer u l’agruw ea raba’ ko veil ngar baed ngak’ ea Tathapeg roraed, ngar thapeged ea towa’ath ko fare temple nib thothup, nge yib ea flaen’ nib athamgil, ngan fal’eg rograed ko yafos ni manimus.”10
Re pining ney ni “ngan baed ngak’ Kristus“ ea bay riy boech ea fan ko Gidii’en Got ko Tin Tomur ea Rran.11 Kad fal’eged ni gadaed ea gidii’en ea Galasia ko fare Tathapeg ea m’ag rok’ ma ke mang ya’al rodaed Fak ni ppin nge pumo’on.12 Kun pii’ ngodaed ni rayog ni ngad muruwel gad ni gadaed be un ku Somoel ma gadaed ra pininged kuboech ea gidii’ ngar baed Ngak’.
Napan ngad muruwel gaed ko Kristus, ma thingari paer ea muruwel rodaed nib alamrin u lane birodaed ea tibinaw. Bay yib ea ngiyal’ ni ra guy chongin e tabinaw nge fagar ea ngiyal’ nib mo’maw. Sana’ ra bucheg lungun ea fayleng, fa biroraed ea ’aar’aar’, nge yib ea marwaer u mich rok. Thingar da rin’ed gubin ni rayog rodaed ni ngad ayuwegraed ngar thamiyed ea t’uf ko fare Tathapeg nge t’uf rodaed. Be yib nge tafnaey rog boech e pi verse u scripture nike mang e fare tang nib thothup i “Love One Another” ni be fil ngodaed, “Bachan ea biney ma ra nang ea gidii’ ni gimed ea gachalpeg, ni ra mu t’ufeged ea gimed.”13
Ufithik e t’uf rodad nifan pi’in be marwaer e mich roraed, to’ogar ko gubin e falfalaen’ ma guyrogon ni nge pi ngodad e tafney ni kad pi amith ngak ea pi’in ni ba t’uf fa’an ngad ul’ul’ ko fasgad fare gosel nge machib e pi’nen nib riyul.
Rogon rodaed ni ngad ayuweg ed ea gidii’ ni ngar baed ngak’ Kristus ara ngar suled ngak’ Kristus ea rani dugiliy ea dugil rodaed udakaen e rayog rogdad ni ngad pired ko fare wo’en ea m’ag.
Fa’an ea athap rodaed ni ngad ayuweged ea pi’in nib t’uf rodaed, ma ba t’uf ni ngad pired ni dab da miithmiith gaed ni gadaed bay ku Kristus ni gdaed ra fol ko Galasia Rok’ nge Gospel Rok’ ni polo’.
Gadaed be sul ko yaat ku Nephi, ma gdaed ma nang ni ke ayuweg tafaney ku gallabthir rok’ ni ngar pagaen’ew Somoel nge wok’ rorow ni yobe kolchiya’ ea m’ag rorow tafanaey ku Nephi ni nge pagaen’ Somoel. Yibe guy nib fel’ rogon u lan ea lik’ay rok Lehi ko fare gakiy ko yafos. Tomuren Lehi ke ka’ ea wa’amngin ea gakiy nem nib ’athithib mab sug ko falflaen’ me “chachngar ni [be] sap nag chon e tabinaew [rok’].”14 Ke guy Sariah, Sam, nge Nephi, ni yaed be sak’iy “nib yaʼan e daryog ni ngar nanged e gin ni thingar sorgaed ngay.”15 Me yoeg Lehi,“nug ripoy paʼag ngoraed; ma gube piningraed nib gaʼlamag ni thingar rabaed iyib ngog, ngar kayed fare waʼamngin.”16 Musap ni de chuw Lehi fare gakiy ko yafos. Paer ko rogon ea ya’al ko Somoel me pining ea tabinaw rok’ ni ngarbaed ko gin ni kay ea wa’amngin.
Mo’oniyaen ea ba’adag ni nge lumel nag ea gidii’ ngar chuw ko fare falfalaen’ ko fare gospel napan ni ki’eg machib ea Kristus nge galasia Rok. Ba’adag ni nge michaen’daed ni rayog ni ngad pired ni dab da miithmiith gaed ni bachane birodaed ea muruwel, nge tin ko tharmiy rodaed, ma gathi nge ayuwegdaed ea Galasia Rok’.
Ulan ea tiney ea rran ni tomur, min fulweg ea Galasia rok’ Kristus ni fan ni nge aywueg ea gachalpen Kristus ngar pired u dakean ea wo’en ea m’ag.
Ulan fare Doctrine nge Covenants ma ngad bi’eged, “Musap, biney ea machib rog—cha’an ni nge kalngaen’ nge yib ngog, ma fanem ea Galasia rog.”17
Ufithik ea Galasia Ku Kristus, ma yibe gel nagdaed ko ngyial’ ni gadaed ea ’ulung ko gidii’en Got. Gadaed be runguy Lungun u dakean fapi profet, pilyeg ea changar, nge tayi’iy. Bin nib gaa’ fan, ma dakean ea Galasia Rok’ ma rayog ngodaed gubin ea towa’ath nib gaa’ fan ko Biyul Ku Kristus ni rayog ni ngan nang ni yigo’ dakean ea ma ’un ko gam’ing nib thothup.
Fare Galasia ku Yesus Kristus ni fan ko Gidii’en Got ko Tin Tomur ea Rran ea ma paer ni galasia ku Kristus ni bay u dakean ea fayleng, min fuleg u nap’an ea tin tomur ea rran ni fan ko bitir ku Got.
Gu be micheg napan ngad baed ngak’ Kristus nge pired ni gadaed ea Gidii’en Got ko Tin Tomur ea Rran, ma ra yib ea towa’ath ni kuboech ea t’uf Rok’, falfalaen’ Rok’, nge gapas Rok’. Boed rogon Nephi, ma rayog ni ngad rin’ed ea pin’en nib mo’maw ngad ayuweged ea gidii, ngar rin’ed ni arrogon, ya gadaed ma nang facha’ ni ngad pagaen’daed ngak’.18 Kristus I’ir ea tamilang rodaed, pogofan rodaed, nge thap rodaed.19 U dakean fithngan Yesus Kristus, amen.