Toʼaer nga lan Gumʼirchaʼdad

Keb rok Douglas D. Holmes

De n’ew napan ke pag e pigpig rok ko Bin Som’on e Counselor u lan fare Young Men General Presidency

Somoel ma gay rogon ni nge ayuwegdad—gadad gubin—ted e gospel Rok nib to’aer nga lan gum’ircha’dad.

Pi walageg, rib mangil e ningyal’ ni gadadba fos riy’. Napan gadadma madnom nag re tabab ko fare Sulweg nib Chilan Rogon, ke mangil ni ngan madnom nag fare Sulweg ni gadad ma sap gad ngay daba’. Gu falfalan’ romed nggu paer u tinney e rran.¹ Somoel ma athamgiliy ni nge pii’ ngodad gubin nib t’uff, ufithik e profet rok, ni ngan fal’eg rogdad ni ngad athapaged Ir.²

Reb e n’en nib t’uf rodad riy e bin bi’ech e Children and Youth Initiative. Bo’or i med manang re program ney nibe tay e goal, ba’ pow nibe un ngay riy’, nge pi conference ko For the Strength of Youth. Machane dabiyog ni ngad pagdad yad ni nge ma’athuk p’owechdad ko pi kenggin nib toey re program nga dakaen nge fan riy’: ni ngan tay fare gospel ku Yesus Kristus toʼaer nga lan gumʼirchaʼey ko pifakdad.³

Mich u wun’ug ni napan gadad ma gu’ pi kenggin ney, ra ngad nanged fan ko re program nem ni’ir yug boech ko kemus program ni fan pifak 8 mada’ ko 18 e duw Ra guy nagdad nrogon Somoel ma gay rogon ni nge ayuwegdad—gadad gubin—ted e gospel Rok nib to’aer nga lan gum’ircha’dad. Gu meybil ni Kan Thothup ra ayuwegdad ni ngad filed nga ta’abang.

Tha’—“Mu Ba’ Ngorad”⁴

Somm’on e kenginn ir e tha’ u thil dad. Pi tha’ e bang nib moem ko fare Galasia ku Yesus Kristus, ya bingyal’ gadad ma pag talin gad e ga’fan ko fapi tha’ ulan e milekag rodad nga Kristus. Dabki yoeg ni ngad piri’eg fa yaen nga dakaen fare kanawo’ ni yogo’ dad. Gadad b’tuf adag nge ayuw ku pilabthir, gidii’ ko tabinaw, ta fagaer nge tapowi’iy nibe yaen ko kanawo’ riy.

Pi mit e tha’ ney ma t’uf ngiyal’. Ngiyal’ ni ta’abang. Ngiyal’ ni ngan minmin, gosgos, fil rogon, min pigpig nag. Ngiyal’ ni ngan motoyil bagdad ngak bagdad ko tin ni ba’adag nge tin ma’awaer. Ngiyal’ ni ngan motoyil nge mog e thin riyul’ napan ni ngad muruwliy nga ta’abang. Tha’ ney ir nib ga’ ni gadad ma kunuy ni tabinaw, quorum, class, nge chongin e galasia. Ireray fare dayif ko machib.⁵

Elder Dale G. Renlund ke pii’ ngodad e kiy ni ngad fal’eg rogoy pi tha’ ney napan i yoeg: “Ngad pigpig nag bee’ thingarda guy nagrad … udakaen p’owchen Chitimangiy nu Tharimy. Kemus amrogon rayog ni ngad nang fan re pulwon’ ko fapi ya’el. Kemus ni amrogon gadad ra nang fare adag ni ba’ Chitimangdad nu Tharimy ni fan ko pifak Rok.”⁶

Ni ngan sap ngak bee’ boeded Got ni’ir e tawath. Gu pinning gadad gubin ni ngad gayed re tawath ney. Fini ke bing owechdad ni ngad gu’,⁷ rayog ni ngad ayuweg e gidii’ u bang ni ngar guyed yad boed ni Got ma guy nagrad.⁸ President Henry B. Eyring ni ga’ar: “Tin ni th’abi ga’ fan e mang [reb gidii’] ma fil [rom] marunga’agen yad minii’ nib riyul’ nge mang e rayog ngar manged ngay. Gu lemnag ni dabra fil rogoy ko sabethin. Ra fil rogon nu dakaen pi thamiy ko gur minii’, minii’ gur ra lemnag yad, nge mang gabe lemnag ni yad ra mang.”⁹ Bin thabi’ ga e to’owath napan ni ngad ayuwegdad ma nang en nge fan rok bee’ ni rayog ni ngad pii’.¹⁰ Napan ngad sapgad ngodad me tay fapi gum’ircha’dad uta’abong u ”gadad guben me peth ulan t’ug.”¹¹

Ba’ pi to’ogor ko fayleng nibe cham ngodad, ya b’tuf fare gelingin nibe yib ko pi tha’ ni suguy ko adag. Ere napan gadadma duwgiliy pi gosgos, mo’olung, nge pi kunuy ngay, aygi sulaen’dad ni fan ko pi mo’olung ney e ngan toey pi tha’ nra peth nagdad ufithik e tu’uf, min ayuweg fare gospel ni ngan yaen to’aer nga lan gum’ircha’dad.¹²

Thog’thog, Puf Mataway, nge Kalngan’—”M’ag i Raed ngak Tharimy”¹³

Riyul’, e gathi fel’ fa’an ni kan m’ag ngodad nga ta’abang. Bay yo’or e ulung ni kan t’ab nag ko bo’or ban’en riy’. Machane, fare t’ab nag ni gadad ba’adag e ngad t’ab gad u Kristus, ni ngad peth gad Ngak.¹⁴ Ni ngad m’ag pi gum’ircha’dad ngak tharimy, b’tuf pi tham’tham’ nib thothup rodad ngodad, woed Elder Andersen ni ke fil ngodad.¹⁵ Pi thamiy ra yoeg ngodad napan fare Kan ni Thothup ma pii’ fare thin nge adag ku Got nga lan pi lem rodad nge gum’ircha’dad.¹⁶

Re thog’thog’ ney ma yib ngodad udakaen pi scripture, nib gel’ ufithik Fare Babiyor ku Mormon udakaen pi thin thothup rok pi profet nib fos nge yug gachelpen, ngo udakaen fare lam nib mocho’.¹⁷ Pi thin ney e boech i yaen ko thin u babyor, lam u tel, fa lem u lolugen nge gum’ircha’dad. Re thin ku Got e gelingin thothup riy’.¹⁸ Ni’ir tin riyul’ nge tamilang.¹⁹ Ni’ir uragon be rungaged Ir! Be tabab nag min ga’ nag e mich rodad ngak Kristus ma be suguy ngodad ko athap ni ngad boeded en Tathapegdad, ni ngad kalngan’ dad min dared nga kanawo’en e m’ag.²⁰

Bin tomur e April, President Russell M. Nelson ke ayuwegdad ni ngad nang fan ni mang fan kalgnan’ nifa e milekag ney.²¹ Me yoeg: “Nap’an ni gadaed ra kalngaen’, ma kad mel’eged ni ngan thil gaed! Gadaed ma ba’adagdad fare Tathapeg ni nge thilyeg daed ngad mangil gaed. … Gadad ma mel’eg ni ngad boeded Yesus Kristus!”²² Pin’ey, kan ayuweg ngay nu dakaen e thin ku Got, e rarogon ni ngad m’ag dad nga tharimy.

Ga’ fan e pinning rok President Nelsen ni ngad kalgaed ngaen’dad. Ba t’uf ni ngad mel’ig kalingan’ ngodad. Dabiyog ni nge gagyeg nag e gospel ulan e gum’ircha’dad. Napan Elder Renlund ni ga’ar, “Fan e Chitimangdad nu Tharimy ni’ir palibthir rodad e gathi ni gadad ma ngongoliy’ tin nib mat’aw ngay; ni’ir ni gadad ma mel’eg ni ngad ngongoliy e tin mataw ban’en.”²³

Ko pi program kan replace nag ko fare Children nge Youth program, ba’ gonopon 500 requirement nib t’uf rad ni ngar mugu’uliy ni ngan thapeg re tawath nge liyor rorad.²⁴ Dabay, ba’ kemus ta’areb. E rogom ran thilyeg ningam mang woed rogon Tathapeg. Ngad pinning fare Kan Thothup ngodad napan ni ngam thapeg e thin rok Got nge powi’iydad min pag Kristus ni nge thiliyeg dad ni ngad manged bin th’abi fel e gidii’ rodad.

Ireray yug boech ko goal fa mon’og e paer rom. Ni’ir e ngiyal’ ni ngad chugur gad ngad tharimy udakaen e thog’thog’, puf matawon’, nge kalngan’—ni ngan bad ngak Kristus min athapeg gospel Rok nib to’aer nga lan gum’ircha’dad.

Muruwel nge Miligach—“Pag rad ni ngar Powi’iyed”²⁵

Tomur, ni nge yaen fare gospel ku Yesus Kristus nib to’aer nga lan gum’ircha’dad, thingarda muruwel gad riy’—ni ngad pii’ed ngiyal nge sasalap rodad ngak, ni ngad miligach ni fan.²⁶ Gadad gubin ma athap e yafos rodad e mangil, ma rib riyul’ e ren’ey ko pifakdad. Yad ba’adag fan e yafos.

Fare gospel ku Yesus Kristus e bin ga’ e fan ko fayleng. President Ezra Taft Benson ni ga’ar: “Kan motochiyel ngodad Got ni ngad feked fare gospel ngak gubin e gidii’. Ireram re fan ni thingar i m’ag ngodad nga ta’abang daba’. Kemus fare gospel e ra thapeg fare fayleng ko re mogoth’goth’ nra aw e tin tagan riy’. Kemus fare gospel ra t’ab gad pi pum’on [nge ppin] ko gubin e nam nge am ko gapas. Kemus fare gospel ra fekey e falfalan’, gapas, mra thapeg e gidii’ nib pum’on nge ppin.”²⁷

Elder David A. Bednar nike micheg nagdad, “Fa’ani gadad ma pii’gelingin ngak picha’ nib fel’ yangrad min pag rad ngar ngongoliy tin yad, re galasia ra mon’og nu dakaen e ma’ang’ang’ riy’.”²⁸ Ya bo’or e yay dawor da pinning fa pag picha’an yangren ni ngan tay e miligach ngorad ni fan Kristus. Elder Neal A. Maxwell ke gu’, “Fa’anre pifak [dad] e dani ba’adag tin [nibe muruwel Got] ra buch ni ra sap ngorad ngak tin nibe muruwel re fayleng.”²⁹

Re Children nge Youth program nib bi’ech ma gel nag picha’ yangrad. Yad mel’eg ned pin’en ni yad ba’adag riy’. Quorum nge pi presidency ko class e ma sum e lung rorad. Fare ward youth council, woed ni fare ward council, ma tiyaen’dad ko fare muruwel ko thapegey e gidii’³⁰ Nge pi quorum nge class ma tabab pi mo’olung ni ngar puruy niged ke uragon ngan mugu’uliy re muruwel ke pii’ Got ngorad.³¹

President Nelson ni ga’ar ngak picha’ nib fel yangren ko Galasia: “Fa’anre gabe mel’eg riy’, … fa’anre mu adag dakaen’ … mrayog rom un ban’en nib ga’, nib fla’ab, nib manemus! … Gimed bangi gidii’ ni th’abi fel’ ni ke l’oeg Somoel kakrom mada’ ko chiney nga fayleng. Rayog rorad ni ngam cheag nag min gonop gad min thilyeg re fayleng nib ga’ riy ko enra ke paer u’mon!”³² Yug reb ngiyal’, President Nelson ni ga’ar ngak picha’ nib yangern: “Gu pa’gaen’ ngomed. Gimed b’tuf rog, nge rok Somoel. Gadad e gidii’ Rok, nibe muruwliy u ta’abang ko tin nibe pii Ir ngodad.”³³ Picha’an nib yangren, rayog ni ngam thamiy fare pa’agaen’ ni kan tay President Nelson ngom nge ke uragom nib ga’fan ko re muruwel ney?

Pi labthir nge tapowi’iy nib ilal, gu pinningmed ni ngam guy picha’ yangrad nrogon nibe guy President Nelson ngorad. Napani picha’an fel yangraed re thammiy adag nge pa’agaen rom, ma napan mu ayuweg raed ni ngar powi’iy iraed—min pagrad ngar lung gad—ram gin’ ko llowan’, cheag, nge pa’agaen’ rorad ko gospel.³⁴ Yad ra thamiy e falfalan’ ni be un ngay ko miligach ni fan fare Kristus. gospel rok e re yan to’aer nga lan gum’ircha’rad, ma muruwel ra mon’og nib ma’ang’ang rogon.

M’ag nge Mich

Gube micheg, ni napan gadadma tiyaen’dad ko pi kenggin ney—tha’, thog’thog, puf matawon, kalngan’, nge miligach ni fan e gospel—fare gospel rok Yesus Kristus ra yaen nib to’aer nga lan gum’ircha’dad. Ra guy fare Sulweg nib Chilan Rogon mon’og nge mugu’uly fan riy’, fare thapeg ku Israel nge toey Zion riy’,³⁵ napan Kristus ra pufthin nagdad ni Piluung ko Piluung.

Gube micheg ni Got ma ul’ul’ ni nge ngongoliy gubin tin nib t’uf ni nge fal’eg rogon e gidii’ Rok ko re rran nem. Aygi guyed pa’ Rok u lan fare muruwel nib ga’ napan gadadma gay rogon ngad “baed ngak Krustus, min machalbog udakaen.”³⁵ U dakean fithngan Yesus Kristus, amen.