Pir’eg e Na’un ko napan e Yiko’ ko Yafos
Yesus Kristus nge fare Bayul Rok e ir fare na’un ni’ir e ba tu’uf ngodead, ndemuturug ko miti mang yiko’ e be yibiyib ngalan e yafos rodead.
Kafram nikab kakrom, napan ni gubay u college, gag be’ ni ug moy ko fare Forth Company ko fare Santiago Fire Department u Chile. Napan ni ug murwel u rom, guma par ko fare station nifen e mathang nifiy ni gube murwel nnap. Tomren ere duw nem, kanoeg ngog nib tu’uf ni nggu par ko fare station nifen e mathang nifiy ko re blayaal’ nem u mm’on ko New Year ni bachan ere rran ney e bo’or e magawon nima buch riy. Ke ggin owcheg ngay, mug ga’ar, “Arragon?”
Woed, ni kug manang ni rofen nem ni gamead be soen gidii’en e murwel, napan ni lukungun e nap, ma aram ntabab i urfiy fapi fireworks ulan yu Santiago. Ma aram ma gamead tabab ko gamuchmuch u ta’abang nra be’ ma be yoeg e happy new year nifen fare duw nib be’ech. Dani n’uw napan ngay me tabab langan fare bell ulan fare station nifen e mathang nifiy, nibe dag nibay e magawon u biyang. Ma gamead fek talne murwel romead magmad yean ngalan fare karo nifen e mathang nifiy. Napan ni gamead be yaen ko gin ba’aram nibay e magawon riy, ma bo’or e gidii’ ni gamead be guy u kanawo’ nibe madnom nag e new year, ma kuguy niyead ba gapas ma susan ndariy banan nibe buch. Ma woed ni yead ba gaer ma yead be falfalaen’ u ta’abang ko re mithigyal’ nem. Machane biyang nib chuchugur ko giney, fapi gidii’ ni gamead be papay nagmead ni nggu ayuweged e rib gel e riya’ roread.
Biney nike buch e kuguy ni boechi ngiyal’ ma yafos rodead e ba gapas, machane rataw nga bangiyal’ riy ma gadead gubin mara yib e gafgow ngodead ndariy be’ ni manang ko ggin nike yib riy nge yiko’ nra pi’ e gafgow nib mo’maw’ rogon ningan athamgil riy. Gafgow ko dogur, gafgow ko man’aey, gafgow u tabinaew, gafgow ko murwel; gafgow nibe kirebnag e fayleng; nge ku boech banan ni woed e yiko’ ulane yafos rodead fa yam’ nibe buch ulane yafos rodead.
Napan nibe buch e tiney e yiko’ ulane yafos rodead, ma baga’ ni gadead ra thamiy e murus fa tamdag. President Russell M. Nelson e ga’ar, “Mich e ir fare flayna murus” —faith in our Lord Jesus Christ (“Let Your Faith Show,” Liahona, May 2014, 29). Kuguy e mitney e yiko’ ulane yafos ko gidii’ nibe gafgow nagread, ma kugoeg ni demuturug ko miti mang yiko’ e be yib ngodead—demuturug ko bay banan nrayag ni ngan rrin’ ngay fa woed nra tal—kemus nibay ta’areb e na’un, nra na’un ney e ir fan ko gubin mit e yiko’. Ni biney e na’un e ke pi’ e Chitamangdad nibay u Tharmiy ni’ir fare Somoel ni Yesus Kristus nge fare Bayul Rok.
Dariy bagdead ndabi buch e mitney e yiko’ rok. Helaman, ba profet ulan fare Babyor ku Mormon, e fil ngodead ni ba’aray rogon: “Mu tayew u wun’mew ni fare war ni Tabiyul rodaed, ni’ir Kristus, ni facha’ ni Fak Got, e thingar mu ufungew e dayif romew nga dakean; ya nap’an ni fare mo’oniyan’ e nge pii’ e nifeng rok’ nib gel, arragon, nifngin e yoko’ rok’, arragon, u nap’an ni gubin e n’uw ni ays nge yoko’ rok’ nib gel e nge aw ngomew, ma dariy gelingin ni nge miliymew iyaen nga but’ ko fare dodow ko gafgow ni dariy n’umngin i nap’an, ni bachan fare malang ni kam dumow gow nga dakean, ni’ir ba dayif nib miyuluy, nib dayif ni fa’anra toey e gidii’ e na’un nga dakean ma dabi puth nga but’” (Helaman 5:12
Elder Robert D. Hales, nike boech rok e mitney e yiko’, e ga’ar, “Gubinyang ma bay e gafgow riy; rogon ni gadead be sap ko gafgow e milfan ngodaed. Gafgow e rayag ninge fekdead ni l’agruw kanawo’en. Rayag ninge gelnag me be’ech nag e tin nibe buch rodead nib mu’un e mich ngay, ma krayag nra kireb nag e yafos rodead ni fa’anra dariy e mich rodead ngak Somoel nge fare miligach rok” (“Your Sorrow Shall Be Turned to Joy,” Ensign, Nov. 1983, 66).
Ra ngan falfalaen’ ko fare na’un nike pi’ Yesus Kristus nge fare Bayul Rok, thingari michuwaen’dead Ngak—ba mich ninge dag ni gadead bagel ko mitney e gafgow, nibe yib ko fayleng. Ke micheg nra ba’udnag e gafgow rodead ni fa’anra gadead ra yib Ngak.
“Mired ngog,” me ga’ar, “ni gimed gubin e pi’in ke aw parowmed i fek e n’en nib tomal ni gimed be fek, mu gu’ pi’ e toffan ngomed.
“Mfeked e mat’ rog ngam teg nga pomed, mi gimed folwok rog, ya gub munguy ma gub sobut’aen’; mi gimed pir’eg e toffan.
“Ya re mat’ ni gu ra pi’ ngomed e bmom, ma tomalngin e ren’en ni gu ra tay nga pomed e bba’ud” (Matthew 11:28–30; kum guy ko Mosiah 24:14–15).
Woed ni yima yoeg “be’ nibay e mich rok, e dariy fan ni ngan weliy ngak ko mang e nge buch. Ma be’ ndariy e mich rok, e dariy rogon ni yira weliy ngak ya dabi nangfan.” (Biney e thin e ke yib rok Thomas Aquinas machane bay nikan thilthilyeg yuyang riy ko rogon nike fil.) Machane, bachig e na’ab rodead ko tin nibe buchbuch u dakean e fayelng, ma orani ngiyal’ e bo’or e duwer ndar da ninged e fulweg riy ko mangfan. Mangfan e biney nibe buch? Mangfan e biney nibe buch rog} Mang e bay riy nib tu’uf ni nggu fil? Napan nra chuw e tin ni gadead be nangfan, ma irraram e ngiyal’ ni kari tu’uf fare thin rok fare Tathapeg ngak fare Profet Joseph Smith ulane Kalbus u Liberty:
“Fakag, nge yib e gapas nga daken e ya’al rom; ma tomal nge pi lumel rom e ra par ni dab ki n’uw napan;
“Ke yoeg ngak ni fa’anra yaen u fithik nib mangil rogon, me Got e ra falfalen’ ngak u tharmiy” (Doctrine and Covenants 121:7–8).
Arragon bo’or e gidii’ nib michuwaen’ ngak Yesus Kristus, machane n’en nib tu’uf ningad fithed e michuwaen’dead Ngak ma be michuwaen’dead ko pi n’en nike fil ngodead ningead rrin’ed. Bay nra ga’ar be’, “Mang e manang Yesus Kristus ko n’en nibe buch rog e chiney? Mang e manang ko mornga’agen e tin nib tu’uf ni ngeyag ni nggu falfalaen’?” Riyul’, i’ir fare Tabayul nge fare Wo’en ni’i weliy fare profet Isaiah napan ni ga’ar:
“Kad dariyfan niged ma kad dabuyed; i athamgil u fithik’ e gafgow nge amith, ma dariy be’ ni dag ni nge changar ngak. …
“Machane me athamgiliy fare gafgow ni susun e gadad e nge aw ngodad, nge amith ni susun e gadad e ngad pired nga fithik’. …
“Machane ni maadʼad ngakʼ ni bachan e pi denen rodad, mi ni pirdi’iy ni bachan e kireb ni kad ngongliyed: Gechig ni gafgow riy e ke palo’ nagdad; dumow ni aw ngak e ke gol nagdad” (Isaiah 53:3–5).
Fare Apostle Peter e ki fil ngodead mornga’agen fare Tathapeg, ni ga’ar, “Kristus e ir e girngiy urngin e denen rodad nga daken me fek nge yan nga daken e kuruth, ni fan e, kad m’ad rok e denen, ni gadad par rok ngad chuwgad rok ma gadad par ni gadad be rin’ e tin nib mataw’: maad’ad nike tay e ir e ke gol nagmed” (1 Peter 2:24).
Amarrogon nibe chuchgur ko ngiyal’ nin lii’ Peter, thin rok e dani sug ko murus; machane, ke fil ngak pi gidii’en Got ni ngar “falfalaen’gead,” ndemuturug ni arram rogon nib bagel “e lumen nge gafgow nibe yib ngoread.” Peter e ke fanownag ngodead ni “fare gafgow ni [gadead] be tay, … ma yima sikengnag ko nifey,” era fekdead “ma aram e ranog e sorok nge fla’ab ngomed min tay famed ko fare Rran nra yib i m’ug Yesus Kristus riy” ma “aram e kam [thapgad] ngak Got” (1 Peter 1:6–7, 9).
Me ul’ul’ Peter:
“Pi tafager rog ni gimed ba t’uf rog, dab mu gin gad ko gafgow nib gel ni yibe tay ngomed ni ba sikeng ngomed, ni gowa ban’en ni kam gin gad ngay:
“Machane ngam felfelan’gad, ni gimed be un ko gafgow ni i tay Kristus; nge yag, ni ngar mu felfelan’gad ko nigal’ ni bay yib i m’ug nni be galgel ram’en” (1 Peter 4:12–13).
President Russell M. Nelson e fil ni “Pi gidii’en Got e rayag ningar falfalaen’gead ndemuturug ko mang e be buchbuch roread. … “Napan ni gadaed ra sap ko tonon rok’ Got ko fare thapeg … nge Yesus Kristus nge fare gospel Rok, rayag ni ngead thamiyed e falfalaen’ ni demuturug ko mang e be buchbuch—fa tin ndar buch—ulane yafos rodead. Falfalaen’ e ma yib ni bachan Ir. I Ir suwon uringin mit e falfalaen’” (“Joy and Spiritual Survival,” Liahona, Nov. 2016, 82).
Arragon, moem i weliy e pin’ey ko ngiyal’ ndan moy u fithik e yiko’ ko bin ba’aray ni yibe gay rogon ni ngan rrin’ ko ngiyal’ ko yiko’. Machane I gag ni walagmed, e gube athapeg nrayag ni ngam thamiy nri guba’dag ni nggu weliy ngom fan nrib ga’fan ningam nang ni Yesus Kristus nge fare Bayul Rok e ir fare na’un ni’ir e ba tu’uf ngodead, ndemuturug ko miti mang yiko’ e be yibiyib ngalan e yafos rodead.
Gu manang ni gadead gubin ma gadead pifak Got, ma gadead ba tu’uf Rok, ma bay rodead ni gubin ngiyal’. Gube piningmed ningam bad ngam guyed nrayag ninge ba’udnag fapi magawon rom me mang fare na’un rom ni gabe sapnag. Moy ngam pi’ e ayuw ngak boech e gidii’ ninge pir’eg fare na’un niyead be athapeg ningar pir’egned. Moy ngam un ngomead ngead pired ulan fare na’un, ni’ir era ayuwegnem ngam sibthiy e yiko’ ko yafos. Michuwun’ug ngay ni fa’anra gara yib, ma garam guy, ma garam pi’ e ayuw, ma garam par.
Fare profet Alma e michegnag e pin’ey ngak fak i Helaman: “Ya gumnang ni piʼin ni yaedra tay e pagaenʼ roraed ngakʼ Got e yira ayuwegraed u fithikʼ e pi moʼomawʼ roraed, nge magawon roraed, nge pi kirbaenʼ roraed, ma yira chibiy raed ngalang ko bin tomur e rran” (Alma 36:3).
Fare Tathapeg e ga’ar:
Fare Tathapeg e ga’ar: “Par e gapas ulan gum’ircha’em … ; ya gubin e yafos ma bay ulan pa’ag; pasalog nigem ma garanang ni I gag Got. …
“Ere, damurus ni mus ko yam’ ma dam rus ngay; ya falalaen’ rom ulane biney e donop e dawrimus rogon, machane I gag ma falaflaen’ rom ab polo’” (Doctrine and Covenants 101:16, 36).
Fare tang, “Be Still, My Soul,” nima kan nga gum’ircha’eg nike bukun yay, e bay e mulwol riy nra gapasnag lane yafos rodead. Ba’aray e thin riy:
Be still, my soul: The hour is hast’ning on
When we shall be forever with the Lord,
When disappointment, grief, and fear are gone,
Sorrow forgot, love’s purest joys restored.
Be still, my soul: When change and tears are past,
All safe and blessed we shall meet at last” (Hymns,no. 124). (Hymns, no. 124)
Napan nibe yibe yiko’ ko yafos ngodead, gu manang ni fa’anra gadead ra gay rogon nib gel ningead taga’gead ngak Yesus Kristus nge fare Bayul Rok ni’ir fare na’un rodead, ma ran tawa’ath nagdead nra ba’ud e tafney rodead, me pagaen’dead, yib gelingindead, ma gadead athamgil, nge gapas ni gadead be gay, ma gadead ra nang u gum’ircha’endead napan nra taw ko ngiyal’ rodead u roy u fayleng, ma gadead ra rung’ag fapi thin rok e Masta rodead: “Ri gab mangil, ya gur reb e tapigpig ni gab fel’ ma gab yul’yul’: ere moy ngam un ngog ko felfelan’” (Matthew 25:21). U dakean fithngan Yesus Kristus, amen.