Fare Tawa’ath ko Yi’iy nibe Ul’ul’ ngak fapi Profet nge Yi’iy nifan Ngodaed nibe Pow’iydaed Ulane Yafos Rodaed

April 2020 General Conference

2:3

Fare Tawa’ath ko Yi’iy nibe Ul’ul’ ngak fapi Profet nge Yi’iy nifan Ngodaed nibe Pow’iydaed Ulane Yafos Rodaed

Rok Elder Quentin L. Cook

Ko fare Ulung ko fare Ragag nge L’agruwi Apostles

Gube yoeg nibay e yi’iy nib ul’ul’ nibe yib ma yibe thapeg nibe yib rok Someol nike mu’ i lemnag rogon.

Daba’ e gura weliy mornga’agen fapi yi’iy nibe ul’ul’ ngak fapi Profet nge yi’iy nifan ngodaed nibe pow’iydaed ulane yafos rodaed

Boechi ngiyal’ ma gamaed ma thapeg e yi’iy ni dagur nanged fan nibe yib rok Somoel. De n’uw napan ngay min pining Elder Jeffrey R. Holland ninge mang reb fare Apostle ko June 1994, min thogthog nag ba yi’iy ngog ni gunang nran pining. Kemus ni gag bee’ ni guma noen ni pa’ e gidii’ madan gu nangfan e biney e llowaen’ nikan pii’ ngog. Gamow l’agruw ni’ug pigpig gow ta’abang ni missionary u England napan e 1960s, ma rib tu’uf rog. Kuguy e ran’ey nib murnguy nifan ngog. Boech e duw ngay, ma guma tafneynag ni fa’anra Somoel e be fal’ag rogon ni nggu mang bee’ nib bitir ko fare Ragag nge L’agruw nib mu’un facha’ ngay n’ug pigpig gow u ta’abang ni missionary.¹ Boechi ngiyael’ ma gama yoeg ngak e tin ba’aray e missionary nikab bitir ningar folgaed ko tin ba’aray e missionary nib ilal ya dabra nanged ko wi’in e ran tayraed nga ta’abang ni tin ba’aray e missionary nib ilal ab ga’ lungun ngoraed.

Bay e mich rog nib gel ko re Galasia ney nikan sulwegyarmen ni fare Tathapeg rodaed ab ga’ riy, ni’ir Yesus Kristus. Manang ko mini’ e nge pining ninge mang Apostle Rok nge rogon nib yaram ningan piningraed. Ma kamanang rogon ninge fal’eg rogon fare Apostle rok ni bin nganni’ ninge mang President ko Galasia.

Kan tawa’ath nagdaed ko re kadbul ney nikad rung’aged e thin rok fare profet nib tu’uf rodaed, President Russell M. Nelson, nibe weliy mornga’agen fare l’agruwi ra’ay e duw nikan mulwol nag ko fayaleng ni yibe tayfan fare Yi’iy ni aram urngin nibay ko fare gospel rok Yesus Kristus.² Biney ni weliy President Nelson mornga’agen e ke yoeg nib tamilang ni fare Galasia rok Yesus Kristus e yaed roraed, rogon ni sum, nge rogon ni yibe pow’iy nibe ul’ul’ fapi yalen e yi’iy riy.3 Fare mulwol nib be’ech e be yip fan e tu’ufeg rok e Chitamangiy nibe non ngak pi Fak.

Boech kafram, President Spencer W. Kimball e weliy ba thamtham ni gube thamiy e daba’. Ni ga’ar: “Ko gubin banan, ma … thingarda og niged e magar [ko] tharmiy nib mab ni fare galasia nike sulyarmen rok Yesus Kristus e kan toey nga dakean e malang ko yi’iy. Yi’iy nibe ul’ul nibe yib e ir fare racha’en fare gospel rok fare Somoel nge fare Tathapeg nib fos, ni’ir Yesus Kristus.”⁴

Fare profet ni kanoeg Enok ngak e guy e pi rran rodaed. Llowean’ rok Somoel ni pii’ ngak Enok ko rogon fare fayleng nra gel e kireb riy nge fare “gafgow niib alamrin” nra yib ngay. Machane, fare Somoel e micheg, “machane gura ayuweg pi gidii’eg.”⁵ “Ma tin ni mat’aw e baygu pii’ u tharmiy ninge yib nga but’; nge tin nriyul’ ni baygu pii’ ninge garar u dakean e fayleng, ninge micheg fare mich rok Fakag ni kari Maagirag Rog.”⁶

President Ezra Taft Benson e fil nib gel gelngin ni fare Babyor ku Mormon, ni’ir fare malang nibay u lukngun fare tiliw rodaed, ni yib u fithik’ e but’ ngalan ni woed rogon ni yoeg Somol ngak Enok. Fare Chitamangiy nge fare Fak nge fapi engel nge fapi profet ni yibi m’ug ngak fare Profet Joseph Smith e “yib u tharmiy ninge sulweg yarmen ko tin nib tu’uf ko fare gil’ilungun.”⁷

Fare profet Joseph Smith e thapeg e yi’iy nge tomuren reb e yi’iy. Boech e pi yi’iy ney e kan mu’i weliy mornga’agen ko re mo’olung ney. Fapi yi’iy nib bo’or ni thapeg fare Profet Joseph e kan yoloey ngalan fare babyor ko Doctrine and Covenants. Urngin mit e murwel ko Galasia e bay e tafney nge wo’en Somoel riy nifan ngodaed ko biney e mfen.⁸

Nib mu’un e pi thin ney ngay ni kakrom nib thothup, gadaed ba tawa’ath ko yi’iy ni kabe ul’ul nibe yib rok fapi profet nib fos. Fapi profet e “yaed e talne murwel rok Sonoel, nikan pi’ matwon ningar nonad ni Pa’.”⁹

Boech e yi’iy e rib ga’fan, ma boech e kemus nibe ayuwegney ningan nangfan e tin nib riyul’ me powi’iydaed ko rran rodaed.¹⁰

Kan tawa’ath nagdaed ko fare yi’iy ni yib ngak President Spencer W. Kimball ni gubin e pumo’on nib yul’yul’ ko fare Galasia e rayag ninge thapeg fare priesthood nge fapi gam’ing nu temple ko June 8, 1978.¹¹

Kug pigpig u fithik’ e pi Ragag nge L’agruw nibe yip fan ma be un ko biney e yi’iy nikan thapeg. Yaed gubin, ni kug nonaed, nike micheg fare gelngin make thamiy fare powi’iy ko thothup rok President Kimball. Orani yaed e yoeg ni irraray reb e yi’iy nikar thamiyed ni rib alamrin ko somm’on fa ko binem e ngiyal’.¹²

Gamaed e tiney ni gamaed ma pigpig ulan fare Ulung ko Ragag nge L’agruwi Apostles e kan tawa’ath nagmed ko rran romed ni gamaed be guy fapi yi’iy nibe yib rok fapi profet nib be’ech.¹³ President Russell M. Nelson e ke mang talne murwel ni pa’ Somoel nrib gaa’ nifan ko tabinaew ningan ayuwegney ulane tabinaew, min ayuweg ngan kunuy pi u Isreal ulan l’agruw raba’ fare veil, min tawa’ath nag fapi gidii’ nikan endow nagraed ulan fare temple nib thothup ni yibe rrin’ fapi gam’ing riy.

Napan noeg fapi n’en ninge thil ulane tabinaew rodaed ko October 2018 ko fare mo’olung ko conference, kug micheg “napan fare mo’olung nibe tay gidii’en e Council ko fare Bin Somm’on e Presidency nge fare Ulung ko fare Ragag nge L’agruwi Apostle ulan fare temple, … tomuren ni fith fare profet rodaed ngak Somoel ko mornga’agan fare yi’iy… , me yib gelngin nin micheg nug thamiyed u dakeanmad ni gubin.”¹⁴

Ngiyal’ nem, bay boech e yi’iy nifan e gam’ing nu temple nib thothup nikan thapeg machane dawrin weliy mornga’agen.¹⁵ Biney e powi’iy ko fare yi’iy nikan pii’ ngak President Russell M. Nelson ab michuwean’ ko gubin fapi gidii’ niyaed ni yaed be un ko biney’. President Nelson e uneg fapi sisters ngay nib ga’ lungunraed ko Relief Society, fapi Young Women, nga fapi ulung ko Primary. Ma bin tha’abi tomur nikan powi’iy, ulan fare temple, ngak fare Bin Somm’on e Presidency nge fare Ulung ko fare Ragag nge L’agruwi Apostles ab gel gelngin e thothup riy. Ma gamaed gubin ni kug nanged ni kug thapagned e tafney, murwel, nge laman Somoel.¹⁶

Gube yoeg nibay e yi’iy nib ul’ul’ nibe yib ma yibe thapeg nibe yib rok Someol nike mu’ i lemnag rogon. Gube micheg ni fare mulwol nike yoeg President Nelson ko re kadbul ney ab yi’iy nra ayuweg gubin e gidii’.

Gamaed be pining e gidii’ ni gubin ningar bad ngar Abich Gaed ko fare Tebel rok Somoel

Ma kagmaed ba’adag ningan pining e gidii’ nibe mo’war ko mich rok, nge tin ni dakir ma un ko missa, fa kan chuweg fithinganraed ko fare babyoren e Galasia. Gamaed ba’adag ni nggu uned ngomed ko abich, “mu duruw’iyed gimed ko thin rok’ Kristus,” ko fare tebel rok Somoel, magdaed fil e tin nib tu’uf ningaed rrin’ed.¹⁷ Gamed btu’uf romaed! Gamed btu’uf ko Galasia! Gamed btu’uf ku Somoel! Meybil romed ningan uned ngomaed ngan tayfan fare Tathapeg ko fare fayleng. Gamaed manang nibay boechi gamed ni kanoeg e thin ngak nib kireb, ma yibe dag ngak e ngongol nde munguy, fa ngongol ni gathi ngonglen Kristus. Ma kagamaed manang ni bay boechi gamed nibe mo’war e mich rok, fa danur nangfan, fa rogon ningan ayuweg.

Boech gidii’en e galasia nib gel e bay ni yaedbe gafgow ko mich roraed ni bachan banan. Rug ba’adag e ran’ey ni mornga’agen i W. W. Phelps, ni digey e Galasia me yoeg ndani riyul’ fare Profet Joseph Smith ulan farengi court u Missouri. Tomuren nike kalngaen’, me yol ngak Joseph, “Gu manang ko mang e be buch rog, ma gamanang, ma Got e manang, ma gu ba’adag ningan thapageg ni fa’anra ayuwegneg fapi tafagar rog.”¹⁸ N’agfan Joseph rok, me fulweg nga pii’ ngak e murwel, me yoloey, “Tafagar ni somm’on nge tafagar ni tomur.”¹⁹

Pi brothers nge sisters, demuturug ko n’en nibe buch rom, wenig mu nang ni fare Galasia nge gidii’en e Galasia e yaedra fekem ngalan rongranraed!

Yi’iy nifan Ngodaed ninge Powi’iy e Yafos Rodaed

Yi’iy nifan ngom e bay nifan ngak gubin e gidii’ nibe gay fare powi’iy rok Somoel. Rib ga’fan ni ku woed fapi yi’iy nibe yib rok e profet. Tin nifan ngom, yi’iy nib thothup nibe yib rok e Kan ni Thothup e ke thapeg biyu’ e gidii ni aram rogon nikar thapagned e mich roraed ningan tawfe mi yaed mang gidii’en Fare Galasia ku Yesus Kristus ni Fan ko Gidii’en Got ko Tin Tomur e Rran.

Yi’iy nifan ngom e ir fare tawa’ath nib gel ni yima thapeg u tomuren fare tawfe “nge yog ni ngam machalbog gaed u dakean fare Kan ni Thothup.”²⁰ Ku gumanang reb e yi’iy nug thapeg u napan ni 15 e duw rog. Walageg ni pagal e be gay e powi’iy rok Somoel ko rogon ninge fulweg lungun e chitamanginmow, ndabun ninge yaen walageg ko fare mission rok. Kug meybil nib polo’ gum’ircha’eg mug thapeg e yi’iy nifan ngog ko ga’angin nib riyul’ ko fare gospel.

Fare murwel ko fare Kan ni Thothup.

Yi’iy nifan ngom e be yaen u rogon fare thothup nib riyul’ nibe yib rok fare Kan ni Thothup.²¹ Fare Kan ni Thothup e ir fare tadag nge michaen’ ko gubin e riyul’, nib baga’ nima yib ko fare Tathapeg. Fa’anra dariy fare Kan ni Thothup, ma dabyag ningaed nanged ni Yesus e ir fare Kristus. Murwel rok e be micheg ko fare Chitamangiy nge fare Fak nge liiw Rorow nge gil’il’ungun Row.

Fare kan ni Thothup e rayag ninge gagiyegnag gubin e gidii’ ko rogon ni rib gel.²² Biney nibe gagiyegnag e dariy ni gubin ngiyal’ makemus ni fa’anra kan tawfe nigem ma kam thapeg fare Kan ni Thothup. Fare Kan ni Thothup e kama par ni’ir e ma be’ech nagdaed napan ni yira kalngaen’uy min n’agfan.

Fare Thothup e ma noen ngodaed nib ma’ang’ang wo’en. En Somoel ke weliy’ nib fel’ rogon:

Somoel e weliy e biney e thin nib fal’ lingan: “Bay gu non ngom u tafney rom nge ulane gum’ircha’em, u dakaen e Kan ni Thothup, ni ra yib nga dakaenem nira paer ulane gum’ircha’em.

Ere chiney, irraray, fare yi’iy nib thothup.”²³

Arram rogon ni gelngin ab gel, machane baga’ nima yib nib sumunguy mab achig, ni gowa ba kathkath.²⁴ Fapi thin nib thothup e bo’or rogon wo’en nima thogthog ko man’aey, nib mu’un nima noen ninge munguynag e tafney rodaed,²⁵ ra par ma be yib ko tafney rodaed,²⁶ nibe tamilang nag lan’iyaen’daed,²⁷ ma kama yib u dakean loelugraed.²⁸

Boech e yalen nra fal’ag rogondaed ningaed thapaged e yi’iy e:

Meybil nifan ningan powi’iydaed nib thothup. Ngaed ninged u fithik’ e sobut’aen’²⁹ nge gumaen’ min soen.³⁰
Fal’ag rogon ko fare thogthog. Biney ab tu’uf ningaed ta’arebgaed ngak e michib rok Somoel ma gadaed be fol ko fapi motochiyel Rok.
Ni yibe kay fare sacrament ni yib yul’yul’. Napan ni gadaedra rrin’ e biney, ma arram ni gadaed be micheg ma gadaed be motochiyel ngak Got ma gadaed be fek nga dakeandaed fithingan Fak nib Thothup ningaed ted u wun’daed ma gadaed be fol ko fapi motochiyel Rok.

Tiney e yalen e be fal’ag rogondaed ngaed thapagned, min poey, min lek wo’en fare thogthog rok fare Kan ni Thothup. Biney ab mu’un “e tin nib gapas ngay … nima pii’ e falfalaen’ [nge] … yafos ni manemus.”³¹

Fal’ag rogoy nib thothup e ran ga’nag u napan ni gadaed ra fil fapi thin nib thothup ko gospel min tay u wun’uy fapi powi’iy ni gadaed be gay. Machane nge pagan’um ngak Somoel nge ngiya’ rok. Powi’iy e ma yib rok Somoel ni manang urngin banan napan ni “mel’eg ninge sukul nagdaed.”³²

Yi’iy ko fapi Pigpig Rodaed nge fapi Murwel

Fare Kan ni Thothup e kuma pii’ fare yi’iy nifan fapi pigpig nge murwel rodaed. Tin nike buch rog, powi’iy ko thothup e ma yib napan ni gadaed be gay rogon ningaed tawa’ath niged e gidii’ u napan ni gadaed be rrin’ e murwel rodaed.

Ku gumanang napan ni gub bisof me kol nigeg l’agrowi bogol u mm’on ni Nggu wean nga skuki nifan ko murwel nikan mu’ i dugliy. Mug wenig ngak Somoel ni nggu nang rogon nrayag ni nggu ayuweg row. Min thogthog nagngog ko mang ab kireb ko fare n’em min ndag ngog ko mang ab tu’uf ni nggu rrin’. Binem e yi’iy nike powi’iy nigeg e kayag ni nggu rrin’ fapi murwel rog nib thothup napan ni gub bishof ni arram rogon ni buch’uw e tym nibay. Bishof u dakean ga’ngin yang e fayleng e kama buch roraed ni arrogon nike buch rog. Napan ni gub stake president, ma gathi kemus ni kug thapeg e yi’iy nib ga’fan machane kug thapeg e yi’iy nib tu’uf ni nggu fal’ag rogon nib tu’uf ni ngeyag ni nggu rrin’ e murwel rok Somoel.

Gube micheg ngom ni powi’iy ko yi’iy e rayag ningaed thapeged u napan ni gadaed be murwel u fithik e sobut’aen’ ulan farengi milady’ rok Somoel. Baga’ ni urngin fapi powi’iy rodaed e be yib rok fare Kan ni Thothup. Boechi ngiyael’ nibay rogon, ma yib rok Somoel. Gube micheg ni biney e ba riyul’. Powi’iy nifan ko Galasia, ni ga’angin, e ma yib ngak e President nge profet ko Galasia.

Gamaed, e Apostle ko biney e mfen, e kan tawa’ath nagmaed ni gamaed be un nggu murwelgaed ma gamaed be malekag fare profet rodaed e chiney, i President Nelson. Ngu weliy e thin rok Wilford Woodruff ni yoeg ni mornga’agen fare Profet i Joseph Smith; nta’ab rogon e ran’ey nib riyul’ ngak President Nelson. Kug guy “fapi murwel ko Thothup rok Got u dakean, nge fapi yi’iy rok Yesus Kristus ngak nibe buch ni woed rogon e pi yi’iy ney.”³³

Gube wenig nag ni gadaed gubin ma ngad gayed fare yi’iy nibe ul’ul’ ninge powi’iy e yafos rodaed min lek fare Thothup ko napan ni gadaed be tayfan Got ni fare Chitamangiy u dakean fithingan fare Tathapeg rodaed, Yesus Kristus, ni’ir e gube micheg u dakean fithingan Yesus Kristus, amen.