Fare Melchizedek Priesthood nge fapi Kiy
Lane Galasia, mat’won e priesthood yibe murwel ngay u tan pa’ be’ nib ga’ lungun ko priesthood cha’an nima koel e pi kiy ko binem e priesthood.
Ku mel’eg ni nggu weliy boech mornga’agen e priesthood rok Got, dalip ni’ e ke weliy mornga’agen e biney ni kar filed ngodaed mornga’agen rogon nima tawa’ath nag e priesthood e pi ppin, bpin ni rugod, nge pu’moon ni yangren.
Fare priesthood e gelngin nge mat’woy ni yibe feek u fithik e pagan’ ni fan ko murwel rok Got ni nge ayuweg gubin e bitir Rok. Priesthood e gathi fan e pi’in nikan yibliy raed ko ofis ko priesthood fa pi’in nima murwel ko mat’won. Pumo’on nibe koel fare priesthood e gathi yaed e priesthood. Dabin sap gaed ngay ni pumo’on nikan yibliy raed ni yaed fare priesthood, ma fal’ boech ni ngan sap ngoraed ni yaed e pi’in nibe koel fare priesthood.
Gelngin fare priesthood e bay u lane Galasia nge lane tabinaew. Machane gelngin fare priesthood nge mat’won fare priesthood e ma murwel nib thil rogon u lane Galasia ko rogon u lane tabinaew. Gubin e pinn’ey ma be yan ko rogon e motochiyel nike fal’eg Somoel. Fan e tanam rok Got e nge powi’iy pifaak ko yafas nib manemus. Tabinaew u fayleng e baga’ fan ko re tanam nem. Ba’ e Galasia ninge pi’ e machib, nge mat’woy, nge pi gam’ing ni nge gel nag e tha’ ko tabinaew ni nge manemus. Ere, tabinaew nge Galasia rok Yesus Kristus e ba’ rogon row ngorow. Fapi tawa’ath ko priesthood—ni woed fare gospel nge pi gam’ing ni woed e tawfe, thapeg fare Kan ni Thothup, endowment u lane temple, nge mabgol nib manemus—e ba’ ni fan ngak e pumo’on nge bpin ni ta’abrogon.1
Re priesthood ni gadaed be weliy u roy e fare Melchizedek Priesthood, nikan fulweg ko tabolngin fare gospel nike Sulyarmen. Joseph Smith nge Oliver Cowdery e yibliy row Peter, James, nge John, ni yaed be yoeg ni yaed “e bay e pi kiy roraed ko gili’ilunguy, nge fan ko mfen e ngiyal’ ni rib falel’” (Doctrine and Covenants 128:20). Pi Apostle ney ni yaed ba ilal e kar thapeged e binem e mat’woy nike yib rok fare Tathapeg. Gubin boech e mat’woy fa ofis u lane priesthood e bang ko fare Melchizedek Priesthood (muguy Doctrine and Covenants 107:5), ya “ya ba’ ko presidency, ma bay gelngin nge mat’won u dakean gubin e ofis u lane galasia ni demtrug e yangar u dakean e fayleng” (Doctrine and Covenants 107:8).
Lane Galasia, mat’won e priesthood nib ga’, e fare Melchizedek Priesthood, ma bin nib migid ngay e Aaronic Priesthood ni yibe murwel ngay u tan pa’ be’ nib ga’ lungun ko priesthood, ni woed e bishop fa president, cha’an nima koel e pi kiy ko binem e priesthood. Ra ngan fan rogon ni yima murwel ko mat’won e priesthood u lane Galasia, ma ngarin nanged fan e motochiyel ko fapi kiy ko priesthood.
Fapi kiy ko Melchizedek Priesthood ko gil’ilunguy e ke pi’ Peter, James, nge John, machane gathi ga’angin nikan fulweg fapi kiy ko priesthood. Boech e kiy ko priesthhood e yib ko ta’aboch riy. Tomuren nikan yibliy e bin somm’on e temple ko biney e mfen u Kirtland, Ohio, ma dalip e profet—ni Moses, nge Elias, nge Elijah—e ri fulweg ned “fapi kiy ko biney e mfen,” nib mu’un i kunuy e Israel nga ta’abang nge murwel ko temple rok Somoel (muguy ko Doctrine and Covenants 110, woed President Eyring ni keyog nib fel’ rogon kafram.
Bin tha’abi ga’fan e murwel ko fapi kiy e rogon e murwel riy ko fapi gam’ing ko priesthood. Gam’ing e rogon ni gadaed be dag e pow riy ko pi m’ag ni yibe ngongoliy nge pi micheg ni bay e tawa’ath riy. Lane Galasia ma gubin e gam’ing ma kan ngongliy u tan pa’ bee’ ko priesthood nib ga’ lungun nibe koel fapi kiy ko binem e gam’ing.
Gam’ing e baga’ ni yi manang ni bee’ nikan yibliy nga lan reb e ofis ko priesthood nibe mithmith u tan pa’ e cha’an niba’ fapi kiy ko priesthood rok. Woed nib, pi’in niba’ ko pi ofis ko Aaronic Priesthood e ma un ko gam’ing ko sacrament u tan e pi kiy nge tan pa’ e bishop, nibe koel fapi kiy ko Aaronic Priesthood. Ta’ab motochiyel e bay ko pi gam’ing ko priesthood nima un e bpin ngay ulane temple. Demtrug ni dariy e ofis ko bpin u lane priesthood, yaed ma rrin’ e gam’ing nib thothup u lane temple u tan pa’ e president ko temple, nibe koel fapi kiy ni fan e pi gam’ing ko temple.
Reb ni mornga’agen e mat’won e priesthood u tan pa’ e cha’an nibe koel fapi kiy e tin ni yibe fil ko pumo’on nge bpin nikan pining raed ni ngad machib niged fare gospel, demtrug ko lane clas fa lane biroraed e ward fa lane mission. Reb e pi’in niba’ ko leadership u lane ward ma be murwel ko mat’won e priesthood u lane leadership roraed ni cha’an nike pining raed ma ke yibliy raed nge tan pa’ e priesthood nibe koel fapi kiy u lane ward fa stake. Iraray rogon ni yima murwel ko mat’woy nge gelngin e priesthood man falfalen’ ngay u lan Fare Galasia ku Yesus Kristus ni fan ko Gidii’en Got ko Tin Tomur e Rran.2
Mat’won e priesthood e ku rayog ni ngan murwel ngay ma tawa’ath riy kan nang u lane tabinaew ko Gidii’en Got ko Tin Tomur e Rran. Ra goeg e tabinaew ma fare priesthood e be koel fare mo’on nge bpin ni kar mabgol gow nge pifaak row. Kugu uneg boech e tha’ ngay nike buch ko yam’ nge mabgol nike dar.
Motochiyel ko mat’won e binem e priesthood e rayog ni ngan murwel ngay u tan pa’ e cha’an nibe koel fapi kiy ni fan e binem u lane Galasia, machane dariy rogon e biney u lane tabinaew. Woed ni, fare chitamangiy e be powi’iy ma be muruwliy fare priesthood u lane tabinaew rok u tan mat’won fare priesthood nibe koel. Dani tu’uf ni nge thapeg rogon fa nge pi’ be’ mat’won niba’ fapi kiy rok ko priesthood ni nge rrin’ e tin nib tu’uf ko tabinaew rok. Tiney e mu’un e thin ko tabinaew rok ngay, mo’olung ni yibe tay u lane tabinaew, tawa’ath ko priesthood nibe pi’ ngak e bpin rok nge pifaak, fa be yibliy e tabinaew fa boech e gidii’.3 Gidii’ ko galasia e ri filed ko chonggin e tabinaew machane dani ma yog ko mang e ngan rrin’ ko priesthood u lane tabinaew.
Ta’ab motochiyel e ba’ napan ni demoy fare chitamangiy nge chitinngiy ni baga’ lungun u lane tabinaew. Ma powi’iy e tabinaew rok ma feek gelngin nge meybil ko fare priesthood nga lane tabinaew rok u dakean e endowment rok nge chiyliy u lane temple. Ya dan pi’ mat’won ni nge pi’ e meybil ko priesthood ma kemus ni rayog ninge pi’ e cha’an nibe koel fare priesthood u lane reb e ofis, rayog ni nge rirn’ boech e murwel u lane tabinaew nibe gagyeg nag. Ra rrin’ ma be murwel ko fare gelngin fare priesthood ni fan ko bitir nibe powi’iy nib ga’ lungun u lan fare tabinaew.4
Fa’anra chitmangiy e rayog ni ngar rirn’ed e murwel roraed ko priesthood u lane tabinaew roraed, ma ra yan nag e murwel u lane Galasia nib machrag. Chitamangiy nima koel fare Melchizedek Priesthood e thingari murwel ko mat’won “u fithik e michan’, nge athamgil, nge gapas nge munguy, nge tu’ufeg ni dabi m’ay” (Doctrine and Covenants 121:41). Re priesthood nem ni yibe murwel ko mat’won e bin tha’abi ga’fan u lane tabinaew. Pi’in nibe koel fare priesthood e thingari fol ko fapi motochiyel ya ngeyag ni bay gelngin fare priesthood roraed ni ngar pi’ed e meybil ni fan e tabinaew roraed. Thingari gel niged e tha’ ko tabinaew ngeyog ni nge adag fare tabinaew ni ngan fith raed ni ngar pi’ed e meybil. Ma galabthir e thingari pi’ed e athamgil ni ngan pi’ e meybil ko priesthood u lane tabinaew.5
Lane biney e mo’olung ma kan fil ngodaed e tin nib ga’fan ko manemus. Gube pi’ e athamgil ngodaed ni nge “ta’areb e sap rodaed ni ngad thapeged e tiney nib riyul’ ko manemus ya ngeyag ni dowef rodaed e nge “sug ko tamilang.” (3 Nephi 13:22).
Lane machib rok ngak bukun e gidii’ nikan noeg u lane Bible nge lane Babyor ku Mormon, ma ke fil fare Tathapeg ni dowef rodaed e rayog ni nge sul ko tamilang fa nge sug ko lumor. Arrogon, gadaed, ba’adag ni ngad sug gaed ko tamilang, ma Tathapeg rodaed e ke fil ngodaed rogon ni rayog ni nge buch e biney rodaed. Thingar di motoyil gaed ko pi mulwol ni mornga’agen e tin riyul’ nib manemus. Ke weliy mornga’agen owchen daed, ni gadaed ma feek e tamilang riy nga lane dowef rodaed. Fa’anra owchen daed e ra “ta’areb”—fa reb e thin, riy e yibe thapeg e tamilang nge gonop—nibe ga’ar, “dowef romed ni poloʼ e bayi sug ko tamilang” (Matthew 6:22; 3 Nephi 13:22). Machane “owchendaed e ra kireb”—fa’anra gadaed be yaliy e tin kireb ban’en me feek e binem nga lane dowef rodaed—me ga’ar, “doewmed ni polo’ e ra sug ko lumor” (verse 23). Reb e thin riy, ma tamilang fa lumor u fithik e dowef rodaed e be yan ko rogon ni gadaed be sap—fa thapeg—e tin nib riyulʼ nib manemus ni kan fil ngodaed.
Thingarin fol gaed ko thin nike yoeg e Tathapeg ni ngan gay man nang fan e tin nib riyulʼ nib manemus. Ke micheg ni Chitamangdaed nu Tharmiy e baʼadag ni nge fil e tin riyulʼ ngak gubin e piʼin nibe gay (muguy ko 3 Nephi 14:8). Fa’anra gadaed ba’adag e biney ma ta’areb e sap rodaed ni ngad thapeged rad, ma ke micheg e Tathapeg ni tin nib riyul’ nib manemus ”min bing” ngodaed (muguy ko 3 Nephi 14:7–8).
N’en nib thil riy, e ri ba’adag Satan ni nge balyang nag e tafney rodaed fa nge chuweg daed ko tin nib ga’fan ni woed e murwel ko fare priesthood rok Got. Ke yoeg Tathapeg mornga’agen e “pi profet ni deriyul’, ni bay rabaed ngomed ni boed bunu’en e saaf wuru’ i doewraed, machane nga fithik’ i doewraed e boed e pi wolf ni ma kʼaad” (3 Nephi 14:15). Ke pi’ ngodaed e biney e sikeng ni nge ayuweg daed ngad mel’eged e n’en nib riyul’ u fithik e fanow ni ra balyang nag e tafney rodaed: “Gimed ranang u waamngiraed,” e fil (3 Nephi 14:16). “Bake gak’iy nib mangil e dabiyog ni nge pii’ e waʼamngin nib kireb, ara [bake] gak’iy nib kireb e dabiyog ni nge pii’ e wa’amngin nib mangil” (verse 18 Ere, thingarin sap gaed ko pow riy—“waamngiraed”—ko motochiyel ni yibe fil nge gidii’ nibe fanow nag. Binem e bin tha’abi mangil e fulweg ko bukun e togpluw nibe yib ko Galasia nge machib riy nge motochiyel riy nge toygang’ riy. Fol ko fare sikeng nike fil fare Tathapeg. Sap ko wa’amngin—n’en ni yibe rrin’.
Napan ni gadaed ra leam nag wa’amngin fare gospel nge fare Galasia rok Yesus Kristus nikan fulweg, ma gadaed be falfalenʼ nga rogon e Galasia, nike nʼuw napan nibaʼ e gidiiʼ riy, nike garer ko burey ko Ngael ni badake 16 milyon e chonggin e galasia u dakean e naam ko tin nu Mariken. Binem nike garer ma kad thamiyed e Galasia nibe gay rogon ni nge ayuweg chonggin. Ma gadaed rrinʼ e murwel rodaed ni ngad machib niged fare gospel nikan fulweg, ni ngan ayuw ngan kunuy Israel, man toey e temple u dakean e fayleng.
Profet e be gagyeg nag daed, President Russell M. Nelson, ni gin ni bay riy me ke murwel Somoel ngay ni nge rrinʼ e murwel rok ni kad thamiyed napan nike gaman lʼagruw e duw ngak nib toygangʼ rodaed. Chiney e gadaed ba tawaʼath ni ngad motoyil ngak President Russell M. Nelson, ni ra filʼdad e rogon ni ngad monʼog nagdad boech ulan fare Yesus Kristus, ni Tathapeg nge Tabiyul rodaed.
Gube micheg e nʼen nib riyulʼ ko pinnʼey mug un ngomed ko meybil ni fen e profet rodaed, ni chiney e gadaed ra motoyil ngak, u dakean fithngan Yesus Kristus, amen.