Leam Fal’ngin Got nge Gelngin

Yib Rok Elder Dale G. Renlund

Ko fare Ulung ko fare Ragag nge L’agruwi Apostle

Gube pining med ni ngam leam nag e gelngin e Chitamangiy nu Tharmiy nge Yesus Kristus nge n’en ni Kar rrin’ew ni fan ngom gubin rran.

Kab kafram, ya ufithik e ningyal’ nib mom’aw, ma ki yoeg e profet ngodaed ni ngad leam niged gelngin Got man leam nag e n’en nike rrin’ ni fan ngodaed, nge tabinaew, nge girdi’.¹ Biney e kanawo’ e ran pir’eg u lane babyor nib thothup machane baga’ ni ba’ u lane fare Babyor ku Mormon Bin somm’on e page ko fare ke Babyor ku Mormon e weliy fan rok ni nge “ni ire nge dag ngakʼ e piʼin ni ke magaey ko gidiiʼ ku Israel ko mang e pinʼen nrib felʼ ni ke rinʼ Somoel ni fan ngakʼ e pi chitmangraed.”² Fare Babyor ku Mormon be tal’ ko thin rok Moroni: “Musap gaed, gubaʼadag u napʼan ni bay mu poeyed e pinnʼey … ni nge yib ngaenʼmed rogon e wurengaenʼ rokʼ Somoel ngakʼ e gidiiʼ, … magmed lemnag u lan gumʼirchaʼmed.”³

Gelngin e wenig rok e pi profet ni ngan leam nag e tin mangil rok Got e be alamrin.⁴ Chitamangdaed nu Tharmiy e ba’adag ni ngad leam niged e mangil Rok nge Faak nib Tu’uf Rok, gathi n’en ni Yow ba adag, machane rogon ni yow ba gol ngodaed. Ra leam nag e Gol Rorow, me ga’ rogon e sap nge gonop rodaed. Ra ni leam nag e tu’ufeg Rorow, ma gadaed ra sobutaen’, ma gadaed meybil, ma gadaed athamgil.

Ba m’ar nike buch ban’en rok nib kirbaen’ e dag rogon ni rayog ni nge thilyeg daed e tu’ufeg nge og magaer. Lane 1987, mug mada’ gow Thomas Neilson, ma mo’on ni rib mangil nib tu’uf reb e gumircha’ ngak. Ba 63 e duw rok nima paer u Logan, Utah, u dakean yu Mariken. Tomuren ni ki salthaw ko World War II, me la’ngiy Donna Wilkes u lane Logan Utah Temple. Ke mang be’ ni rib cheag nag i gaede simen. In e duw nga m’on ma baga’ ni ba’adag ni yow ma murwel Jonathan, ni cha’an tha’abi ilal ko fak fak, napan nike tal’ e skul. Rib fal’ rogon e puruy’ rorow, ya ma guy Tom ir boed rok Jonathan.

Ke chalban Tom i soen nag e reb e gumircha’. Ba mo’on niba gurgur e tafney rok. Gubin ngiyal’ ma baga’ nima rrin’ e tin nibe leam nag u fithik e murwel nib gel nike tay lanyan’ ngay. Gumircha’en nibe mo’owaer, ma ke ngoch rogon e yafos rok, ma boech ngiyal’ me fitheg Tom ko mange gube rrin’ ni nggu paey nag e taflay rok. Fithik e gosgos, me yoeg boech e ban’en ni rayog ni nggu rrin’ ni ngeyog nge papey ni nge thapeg reb e gumircha’ey nib papey.

Me reb e rran nib falel’ ma kub kireb, me yag reb e gumircha’ey ni fan ngak Tom. Me puluw e racha’ nge ga’ngin nib ta’abrogon, machane cha’an gumircha’en e ba bitir, kemus ni 16 e duw rok. Cha’an ni gumircha’en e ra Jonathan, fak fak Tom nib tu’uf rok. Roffen nem, me mad’ad Jonathan u karo nib gel napan nike chub e train ngak.

Napan ni gu waen ngguy Tom nge Donna nga aspital, ma kari kirbaen’ gow. Momaw’ ni ngan leam nag e n’en ni be buch rorow, ni yi manang ni yafos rok Tom e rayog ni nge n’uw fa’anra nge feek gumircha’en fak fak row. Somm’on, ma dabun row ni ngar fekew gumircha’en Jonathan rok e galabthir rok ni kar kirbaen’ gow, ni ppin ni fak row nge pumo’on rok. Machane, manang Tom nge Donna, ni ke yim’ e man’ay rok Jonathan, mar nangew fan ni meybil rorow ni fan gumircha’en Tom e gathi ke na’nggin ke mad’ad Jonathan. Danga’, gumircha’en Jonathan e ba tawa’ath ni rayog ni nge fal’eg wa’athan Tom ko ngiyal’ nib tu’uf rok. Kar guyew ban’en nib mangil ni rayog ni nge yib ko biney nike buch nib kirbaen’ mar dugliyew ni ngan feek.

Mangil rogon nike yan e taflay rok. Tomuren riy, me Tom e ba mo’on nike thil. N’en nike thil rok e ba alamrin ko rogon e dowef rok nge falfalen’ rok. I yoeg ngog nima leam nag Jonathan ni gubin e kadbul, nge ppin ni fan nge pumo’on rok, nge tawa’ath nike thapeg, nge n’en nike buch ko binem e tawa’ath nike thapeg. Mus ni ku rogon e malanang rok, ma ku guy nike munguy Tom, nike ta leam nag boech e girdi’, ma ke gol.

Yan 13 e duw ni paer Tom ko tomuren fare taflay ko gumircha’en, bukun e duw ni dabi thapeg fa’an dariy e taflay. Gameyag rok` e weliy ni pi duw ney e yag ni nge ayuweg e tabinaew rok nge boech e gidii’ u fithik e tu’ufeg nge gol. Bea’ nima pii’ e salpiy ni ayuw ma rogon e rogon nib pagan’.

Gadaed boed Tom, ni ra bagdaed ma ke thapeg e tawa’ath ni dabyog ni ngeygi poes me yib ngodaed, tawa’ath nikeb rok e Chitamangdaed nu Tharmiy nge Faak ni TU’uf Rok, nib mu’un e bayul ngay u dakean fare miligach rok Yesus Kristus.⁵ Kad thapeged e yafos u lane biney e donop; ma kad thapeged e yafas ko bin migid, nge thap nib manemus nge flafalen’—fa’anra kad mel’eged—gubin ni bachan e Chitamangiy nu Tharmiy nge Yesus Kristus.

Gubin ngiyal’ ma gadaed ma murwel ngay, ma ayuweg daed, fa gadaed ma leam nag e pi tawa’ath ney, ka gadaed ma leam nag ni ngad paged boech ban’en, gol, nge tu’ufeg. Gol ni fan ko pi’inm nibe pi’ e gathi kemus nima falfalen’ nag daed. Tafney nag e tawa’ath Rorow e rayog ma thingari thliyeg daed.

Ta’areb e thilyeg nib rib fe’ ea marunga’agen Alma ni bitir. Napan Alma ke “be yaen iyaen ni yaed be togopluw ngak’ Got,”⁶ ke yibi m’ug e angel. Bay “gaa’ laman ni boed ga’angin lingan e dirra’,”⁷ ke puwaen’ ngak Alna ni fan ke gafgow nag fare galasia nge “iring gum’ircha’en e pi gidii’”⁸ Fare angel ke ta’ e puwaen’ rok napan ke ga’ar, “Mman, mag tay u wunʼum fare kalbus ntay ngakʼ e pi chitamam …; mag tay u wunʼum u rogon fini felʼ e pinʼen ni rinʼ [Got] ni fan ngoraed;.”⁹ Fan gubin e puwaen’, binir e thin rok fare angel.

Alma ke kal’ngan nge puguran. Reb e rran ke weliy e puwaen’ rok fare angel ngak fak ni Helaman. Gubaʼadag ni ngam rinʼ ni woed ni kug rinʼ, ni ngam tay u wunʼum fare kalbus ntay ngakʼ e pi chitamangdaed; ya ur moyed u kalbus, ma dariy beeʼ ni yog ni nge pagraed ma kemus ni fare Got ku Abraham, … Isaac, nge … Jacob; ma rriyulʼ ni chuwegraed u fithikʼ e pi gafgow ko kirbaenʼ roraed.”¹⁰ Ke yoeg nib moem ni Alma, “gube tay e pagaen’ rok’ ngak’.”¹¹ Ke nang Alma napan ni puguraen ke chew e u pa’ e sib nge kalbus ufithik’ “pi mo’omaw’ nge pi magawon ni gubin mit,” ra ngad nanged Got nge dabi baen ngodad ko pi micheg Rok.¹²

Kemus buchuw ra feked biney boed Alma, machane thilyeg rodad ba mang nib ge’ ni ta’abrogon. Ke micheg fare Somoel nu kakrom:

“Ku gura pi’ reb e gumircha’ ngom nib bi’ech, mug ta’ e ya’el nib bi’ech ngom: mug chuweg e bin gumircha’ nib malang … , mug pi’ ngom e gumircha’ ni kab fas.

“Ma gura ta’ e ya’el rog ngom. …

“… Mag mang e gidii’ rog, mug mang e Got rom.”¹³

Fare Tathapeg nike fos ko yam’ e yoeg ngak fapi Nephite rogon ni yima tabab ko thil. I weliy e gin ni rib ga’fan u lane tanam rok e Chitamangiy nu Tharmiy ni ga’ar:

“Ma ke lʼugeg e Chitamag ni ngan chibiyeg ngalang u dakean e kuruth; ma tomuren ni kan chibiyeg ngalang u dakean e kuruth, ni nge yog nug miliy gubin e gidiiʼ ngog. …

“Ere arayfan ni kan chibiyeg ngalang; ere rogon gelingin e en Chitamangiy e gura miliy gubin e gidiiʼ riy ngog.”¹⁴

Mang e ngam rrin’ ni ngam chugur ngak e Tathapeg? Yesus Kristus nibe rrin’ e n’en ni ba’adag e Chitamangiy, nike gel ko yam’, nike feek nga dakean e denen rom nge oloboch rom, nike thapeg mat’won e Chitamangiy ni nge fal’eg e kanawo’ ni fan ngom, ma bayul Rok e fan ngom.¹⁵ Dani ga’fan e tiney ni ngam chugur Ngak? Nifan rog. Yesus Kristus e “be sak’iy nib puuf pa’, nibe athapeg ma ba’adag ni nge gol nigey, ni nge n’ag fan e kireb, ni nge bi’ech nigey, ninge gel nigey, ni nge ma’ang’ang nigey, me yibliy [nigem].”¹⁶

Tiney e thingari piʼ ngodaed e gumirchaʼ nib bi’ech me yoeg ngodaed ni ngad melʼeged ni ngad fol gaed rok e Chitamangiy nu Tharmiy nge Yesus Kristus. Machane mus ko gumirchaʼ nib biʼech ma ra “balyang nge sar nga biyang, …. ni ngan digey Got nib tuʼuf [rodaed].”¹⁷ Ra ngan gel ko biney, ma ba tuʼuf ni ngad leam niged e tawaʼath ni gubin e rran ni kad thapeged nge nʼen nib muʼun ngay. Benjamin ni Pilung e gaʼar, “Gu baʼadag ni ngam tayed u wunʼmed, ma nge gubin e ngiyalʼ ma bay u wunʼmed, falʼngin Got … nge falʼngin nge gafgow nib nʼuw napʼan ni ke tay ni fan ngomed.”¹⁸ Fa’an ni ngad rin’ed, rayog nag ngodaed e pi tawa’ath u tharmiy.

Leam nag e mangil nge runguy rok Got e ra ayuweg daed ngad gel gaed ni ya’el. Ma tawa’ath riy, e ra gel e thamtham rodaed ko tin tharmiy ban’en ni ngeyog ni ngad nanged e tin riyul’ ko gubin ban’en u dakean gelngin fare Kan ni Thothup.¹⁹ Biney e mu’un e mich ngak ni mornga’agen e tin riyul’ ko fare Babyor ku Mormon; ni ngan nang ni Yesus e ir Kristus, ni Tathapeg nge Tabiyul rodaed; man adag fare gospel Rok nikan fulweg ko tiney e rran ni tomur.²⁰

Napan ni gadaed ra leam nag e fal’ngin e Chitamangdaed nu Tharmiy nge Yesus Kristus nge n’en ni kar Rrin’ew ni fan ngodaed, ma dabin dariy niged fan, ni woed Tom ni dani dariy fan nag gumircha’en Jonathan. Fithik e falfalen’, me Tom e ma leam nag ni gubin e rran fare mad’ad nike pi’ e yafas ngak. Fithik e falfalen’ ma rayog ni ngad nanged ni rayog ni ngad thapeg daed ma gadaed falfalen’, ba tu’uf ni ngan tafneyed ni thap nge falfalen’ e ma yib u fithik e murwel nib gel.²¹ Rayog ni ngad munguy gaed u fithik e falfalen’ napan ni kad nanged ni ra demo’ Yesus Kristus, ma gadaed ba malog machane ra ba’ ma rayog ni ngad thapeged e bin tha’abi falel’ e tawa’ath ni rayog ni nge pi’ e Chitamangiy nu Tharmiy.²² Riyul’, biney e ra pag daed ni ngad falfalen’ gaed ko fare micheg “ko yafas nib manemus u lane re fayleng ney” nge lan e bin migid e fayleng.²³

Napan ni gadaed ra leam nag fal’ngin e Chitamangdaed nu Tharmiy nge Yesus Kristus, me pa’ e pagan’ rodaed Ngorow. Meybil rodaed e ra thil ni bachane kad nanged ni Got e Chitamangdaed ma gadaed e bitir Rok. Gathi gadaed be gay rogon ni ngad thilyegned e n’en ni ba’adag machane gadaed ra ta’reb ma gadaed thapeg e pi tawa’ath ni ba’adag ni nge pi’ ngoaed, ni ngad fithed.²⁴ Ri gadaed ba’adag ni ngad munguy gaed, ni ngad ma’ang’ang gaed, ni ngad gel gaed, ni gad boeded Kristus.²⁵ Tiney e thil e rayog nag ngodaed e pi tawa’ath u tharmiy.

Napan ni gadaed ra nang gubin e pin’en nib mangil nima yib rok Yesus Kristus, ma gadaed ra weliy boech e mich rodaed ngad boech e gidii’.²⁶ Gadaed ra thapeg e athamgil napan nike yib e gafgow nge tin momaw’ ngodaed.²⁷ Gadaed ra gel i fol ko fapi m’ag ni kad ngongliyed ni ngad laked fare Tathapeg.²⁸ Gadaed ra sug ko tu’ufeg rog Got, ma ran adag ni ngan ayuweg e girdi’ ni dariy e pufthin riy, tu’ufeg pifaak daed man chugliy raed u fithik e tin mat’aw, bi’ech nag ko pi denen rodaed, ma falfalen’gad ni gubin ngiyal’.²⁹ Tiney e boech wa’amngin nib fel’ ni ma yib napan ni ran leam nag e mangil nge runguy rok Got.

Tin nib Thil, ke ga’ar Tathapeg, “Dariy ban’en nima rrin’ e girdi’ nima domomow Got, fa ka’ring e puwan’ ngak, ma kemus ni pi’in ni darma tafney nag pa’ Got ko gubin ban’en.”³⁰ Dabgu leam nag nima puwan’ Got napan ni gadaed ma pagtilin. Machane, gube leam nag nima kirbaen’. Manang ni gadaed ma chuweg daed ko kanawo’ nima chuchugur nag daed Ngak ni ngan leam nag nge mangil Rok. Ma arame dakiyag ninge chugur ngodaed ma dabiyag ni ngad thapeged e pi tawa’ath nike micheg nag.³¹

Gube pining med ni ngam leam nag e gelngin e Chitamangiy nu Tharmiy nge Yesus Kristus nge n’en ni Kar rrin’ew ni fan ngom gubin rran. Mu leam nag boech nib gel rogon e mangil Rorow ni nge sap gumircha’en med Ngorow.³² Leam nag e tu’ufeg Rorow, ma ran tawa’ath nigem u tharmiy mag boed boech Kristus. Leam nag e runguy Rorow e ra ayuweg nem ni ngam “athamgil u fithik e yul’yul’ nge mada’ ko tomur,” nge taw ko ngiyal’ “thapegem nga tharmiy” ningam “paer rok Got u fithik e falfalen’ ni darma mus.”³³

Chitamangdaed nu Tharmiy, nibe yup’ fan ngak Faak ni Tu’uf Rok, e ga’ar, “Motoyil Ngak!”³⁴ Napan ni gara fol ko pi thin nem mag motoyil Ngak, mag leam nag, u fithik e falfalen’ nge sobutaen’, ni Tathapeg e ba’adag nima fulweg e n’en ni dabyog ni ngam fulweg nga rogon, ba adag ninge gol nag e kirbaen’ ni dabyog ni ngam gol nag, ma adag nima fal’eggin e n’en nike kari gel e kireb ngay,³⁵ ma pi’ ban’en nike fal’eg rogon e magawon nike yib ngom,³⁶ ma ba’adag nima gol nag gumircha’ey nib kireb.³⁷

Napan ni gube leam nag e pi tawa’ath ni ke yib rok e Chitamangiy nu Tharmiy nge Yesus Kristus, mug nang e tu’ufeg Rorow nib manemus nge tu’ufeg rorow ni dan nang fan ngak gubin pifaak e Chitamangiy nu Tharmiy.³⁸ Ganop ney ke thil nigeg, nge rayog ma thil med. U dakean fithngan Yesus Kristus, amen.