Pi Meybil ko Mich
Napan ni gadaed ra meybil u fithik e mich, ma gadaed ra mang bang ko murwel rok Somoel nib ga’fan napan ni ra fal’eg rogon e fayleng ko bin L’agruw e Wub Rok.
Fare meybil rok Elder Maynes ko tabolngin e bin somm’on e mo’olung ko re general conference ney e ke buch. Leam nib mangil e ke yib ngodaed u dakean e pi numon nge musik nib fe’. Fare micheg rok President Russell M. Nelson ni biney e conference ma dabin pagtilin e ke tabab i buch.
President Nelson e ke yoeg ni biney e duw e “ke gaman 200 e duw napan ni m’ug Got ni Chitamangiy nge Faak nib Tu’uf Rok, ni Yesus Kristus, ngak Joseph Smith.” President Nelson e pining daed ni ngad fal’eged e tanam ni ngad fal’eged rogdaed ko biney e conference, ni yoeg ni ra “bing bang ko Galasia nib ga’fan, ma gimed ba tu’uf riy.”1
Boed gag, ma sana kam rung’ag e thin rok mag fithem rom ni lingum, “Mang kanawo’eg nib ga’fan?” Sana kam bi’eg ma kam meybil nag e tin nike buch ko fare Sulyarmen. Sana, dawori buch biyay rom, ni kam bi’eg mornga’agen e ngiyal’ nem napan ni weliy Got ni Chitamangiy mornga’agen Faak nib Tu’uf Rok. Sana kam bi’eg napan ni non fare Tathapeg ngak pifaak e Chitamangdaed nu Tharmiy. Gu manang ni kam rrin’ gubin tiney nge bochi reb.
Ku pir’eg napan ni gube bi’eg mornga’agen e priesthood rok Got nge pi mfen nibe yib. Gu tabab i nang ni rogon ni ku fal’eg rogog ko biney e conference e ke ga’fan u lane yafas rog. Ku thamiy nike thil gumircha’eg. Ku thamiy e falfalen’ nib biech. Ku sug ko falfalen’ ni kan piningeg ni nggu un nge falfalen’ug ko biney madnam ko fare Sulyarmen ni kabe buch.
Gube leam nag boech e gidii’ ni yaed be thamiy ni bachane kar fal’eged rograed, ni kar sug gaed ko falfalen’, kar pasig gaed, ma kar adaged ni ngad pigpig gaed rogon nib tu’uf rok Somoel.
Pinʼen nib falelʼ nibe buch ni gadaed be tay fan e tabolngin e nʼen nikan weliy ni ra buch ko bin tomur e mfen, nibe falʼeg Somoel rogon e Galasia Rok nge Gidiiʼ Rok, nge piʼin nikar feked fithngan nga dakean raed, ni ngan thapeg. Bang riy ni gadaed be fal’eg rogdaed ni fan ko wub Rok, ra bagdaed ma ra chubiy ngalang ngeyog ni ngad gel gaed ko pi gafgow nge kanawo’ ni dawori buch biyay u dakean e fayleng.
U September, 1840, fare Profet Joseph Smith nge pi counselor rok ulan Bin Somm’on e Presidency kar yoeged biney: “Fare murwel rok Somoel u lane tiney e rran ni tomur, e reb e nen ni rib ga’ ma dabi nang fan e gidiiʼ. Rir riy e dabyog ni ngan weliy, ma fal’ngin e rib ga’fan ko gubin banʼen. Ba thin ni i paer ko profet nge pumoʼon ni yaed ba matʼaw ni tabab ko napan ni sunmiy e fayleng nge taw ko gubin e mfen ni kakrom nge mada’ ko chiney; ba mfen ko ngiyalʼ ni rib falelʼ, napan ni gubin banʼen ni bay rok Kristus ni Yesus, ni demtrug ko bay u tharmiy fa dakean e fayleng, ma ra mukun nGak, ma gubin banʼen e ran fulweg nga rogon, rogon nike weliy gubin e profet nib thothup napan ni tabab e fayleng; ya ir e gin ni ra buch e pi micheg ni kan ngongliy ko pi chitamangiy, napan ni ra mʼug gelngin e Chaʼan nib Tolang, nib falelʼ, ma rib maʼangʼang.”
Be ul’ul’ e non rorad: “Gadaed ra thamiy ni ngad dared ngad taʼareb niged gelngin daed ni fan ko Gil’ilung ni ngan toey, man piʼ e Priesthood ni ngan rrin’ e murwel riy. Fare murwel ni ngan rrinʼ u lane tin tomur e rran e reb ni rib gaʼ fan, ma bagaʼ fan gelngiy ngay, nge tin ni yib salap riy, nge tin ni yib cheag riy, nge tin rayog rok e Gidiiʼen Got, ngeyog ni nge lablab iyib ni bay falʼngin ni rib maʼngʼang ni weliy fare profet [Daniel] [muguy ko Daniel 2:34–35, 44–45]; ma ba tuʼuf e athamgil rok e Gidiiʼen Got, ni ngan rrinʼ e murwel ni aray rogon nib nib mangil mab gaʼfan.”2
Oren e tin ni gadaed ra rrinʼ nge ngiyalʼ ni gadaed ra rrinʼ ni ngan dag fare Sulyarmen daworun noeg. Machane Bin Sommʼon e Presidency nib muʼun e piʼin ni kakrom ngay e yaed manang rogon e murwel nike tay Somoel nga pulwon daed. Baʼaray boch i susun ni gamaed manang ni ra buch:
U dakean Gidii’en Got, ma ra pi’ Somoel e tawa’ath ko gospel Rok ko “gubin e pi nam, mfen, thin nge gidii’.”3 Technology nge pi maʼangʼang e ra u’u’ ni nge buch—ku taʼabrogon ko gidiiʼ ni “piʼin nima gay e gidiiʼ”4 nima machib u fithik e matʼwoy nge mich nike gel.
Gadaed ni gidiiʼ e ri gadaed ra taʼareb u fithik momawʼ nib liyeg daed nibe gel. Gadaed ra mukun nga taʼabang ni ulung nge tabinaew nikan sug ko tamilang ko gospel.
Mus ko piʼin ni dani mich u wanʼ e ra nang Fare Galasia ku Yesus Kristus ni fan ko Gidiiʼen Got ko Tin Tomur e Rran man nang gelngin Got ni bay riy. Piʼin nib michmich nib gel e tafney rok e dariy e murus rok, u fithik e sobutaenʼ, mar feked nga dakean raed fithngan Kristus nga lane yafas roraed ni gubin rran.
Ere, urogon, ni rayog ni ra bagdaed me un ko biney e murwel ni rib mangil ma rib ga’fan? President Nelson nike fil’ ngodad rogon ni ngan thapeg gelngiy u tharmiy. Napan ni gadaed ra sap ko kalnganʼ u fithik e falfalenʼ ni bachane e mich rodaed nibe gel ni Yesus e ir Kristus, napan ni gadaed ra nang fan me mich u wanʼ daed ni Chitamangiy nu Tharmiy e ma rungʼang gubin e meybil rodaed, napan ni gadaed ra athamgil ni ngad fol gaed ma gadaed fol ko fapi motochiyel, me gel gelngin daed ni ngad thapeged e thogthog ni gubin ngiyalʼ. Fare Kan ni Thothup be paermgodad gubin rran. Gadaed ra thamiy e tamilang nike paer rodaed napan nibe gel e lumor ko fayleng.
Joseph Smith e reb e kanawo’ ko rogon ni ngan thapeg gelngiy u tharmiy. Ke dag ngodaed ni meybil u fithik e mich e kiy ni ngan thapeg e thogthog rok Got. Ke meybil u fithik e mich, nib mich u wanʼ ni Got ni Chitamangiy e ra fulweg e meybil rok. Ke meybil u fithik e mich, nib mich u wanʼ ni kemus ni dakean Yesus Kristus ma rayog ninge puf rogon ko kirkireb nike thamiy ko denen rok. Me meybil u fithik e mich, nib mich u wan’ nib tu’uf ni nge pir’eg e bin riyul’ e Galasia rok Yesus Kristus ni nge thapeg e binem e n’ag fan.
U lane murwel rok nib profet, me Joseph Smith e murwel ko meybil u fithik e mich ni nge paer nibe thapeg e thogthog. Napan ni gadaed ra yaen u fithik e gafgow e dabaʼ nge tin rran ni bay yib, ma ku rayog rodaed ni ngad rrinʼed ta’ab banʼen. President Brigham Young e gaʼar, “Danug nang reb e kanawoʼ ni fan ko Gidiiʼen Got ko Tin Tomur e Rran ni ngan paer ma ngam meybil ngak Got ni yibe ning e kanawoʼ me gagyeg nag e gidiiʼ rok.”5
Tiney e thin ko fare meybil ko sacrament e thingar mang ko yafas rodaed: “Gubin e ngiyalʼ me yib uran ngoraed.” “Uran” be yip fan ngak Yesus Kristus. Bin migid e thin e, “mar fol gaed ko pi motochiyel rokʼ,” nibe yoeg ni ngan leam nag.6 Napan ni gadaed ra leam nag Yesus Kristus ni gubin ngiyalʼ, ma gadaed fith daed u lane meybil, “Mange baʼadag ni nggu rrinʼ?”
Meybil ni aram rogon, e kan noeg u fithik emich ngak Yesus Kristus, u lane biney e mfen ni tomur. Ma ra paer u lan gumirchaʼen daed ninge paer ma be buch. Ku pir’eg, ni boed gur, e kanawo’ nib falel’ nib woed e meybil.
Somm’on e Joseph Smith. Ke fith ni woed ni kab achig e mich rok ko mang e baʼadag Somoel ni nge rrinʼ. Fulweg Rok e thilyeg e fayleng.
Gag rog, ma n’en ni ran fil riy ni rib ga’fan ko nʼen ni rrin’ Joseph ko togopluw rok Satan napan ni garbog Joseph ninge meybil.
Gu manang nike buch rog ni Satan nge piʼin nibe laek e ma gay rogon ni dabin meybil gaed. Napan ni gel nag Joseph Smith gelngin ni nge pining Got ni nge ayuweg ko n’en nibe gay rogon ninge taleg, man fulweg e meybil rok me m’ug e Chitamangiy nu Tharmiy nge Yesus Kristus.
Satan ni gay rogon ni nge taleg e sommʼon ko Sulyarmen e rib rib alamrin ya rib gaʼfan e meybil rok Joseph. Gur nge gag e ba achig e nʼen ni ngad rrinʼed ni nge ulul fare Sulyarmen. Machane togopluw ko Sulyarmen e ra gay rogon ninge taleg daed ko meybil. Fare susun ko e Mich rok Joseph nge athamgil rok e rayog ni nge gel nag daed ko magawon rodaed. Biney e reb fan ni meybil rog e guma og e magaer ngak e Chitamangiy nu Tharmiy ni fan ko Profet Joseph.
Enos ulan e Babyor ku Mormon e kubeaʼ ni guma sap ngak ni fan ko meybil rog ko mich napan ni gura gay rogon ni nggu rrinʼ e birog e murwel ni nge ulul e Sulyarmen. Demtrug ko bin ngan e birom, ma ku rayog ni ngam tay ni ir e sensey.
Boed Joseph, ma ke meybil Enos u fithik e mich. Ke weliy mang ke buch:
“Ma yaʼel rog e ri yibe bilig ngakʼ; mug ragbug nga butʼ u pʼoewchen e Anisunmiyeg, mug yoer ngakʼ u dakean e meybil rog nge wenig rog ni fan ko yaʼel rog; nge fare rran ni poloʼ e rug yoer riy ngakʼ; arragon, ma napʼan ni nepʼ ma kug be meybil nib gaaʼ lamag nge yaeni taw nga tharmiy.
“Ma arame yib ba lam ngog, ni be gaʼar: Enos, denen rom e kan nʼaegfan, ma bay ni falʼeg waʼatham.
“Me gag, Enos, e gumnang ni Got e dabi baen; ere, kireb rog e ke mʼay.
“Mug gaʼar: Somoel, mang e ke rinʼ ni arragon?
“Me gaʼar ngog: Bachan e mich rom ngakʼ Kristus, niʼir e chaʼ ni gur ma dawor mu rungʼag laman fa muguy. Ma ba yoʼor e duw nra yaen u mʼon riy ni nga fini dag ir ni bay doewngin; ere, ngam man, mich rom e ke poloʼ nigem.”7
Nʼen ni ku fil ni nge falʼeg waʼathag e bay ko pi thin ney: “Bachan e mich rom ngakʼ Kristus, niʼir e chaʼ ni gur ma dawor mu rungʼag laman fa muguy.”
Ba’ e mich rok Joseph ngak Kristus ni nge yan nga fithik e paan miki meybil ni nge chuw u tan pa’ Satan. Dawori guy e Chitamangiy nge fare Faak, machane ke meybil u fithik gelngin e mich rok u gumirchaʼen.
N’en nike buch rok Enos e ke fil ngog ta’ab ban’en. Napan ni gura meybil u fithik e mich, ma ba’ fare Tathapeg nima wenig nigeg ngak e Chitamangiy ma rayog ni nggu thamiy ni be thap e meybil rog nga tharmiy. Ma sul taban e meybil rog. Pi tawaʼath e yibe thapeg. Ba’ e gapas nge falfalen’ ko ngiyal’ nib momaw’.
Kugu manang, ni kugub bi’ech ko Ulung ko fare Ragag nge L’agruwi Apostle, ni gu gargbog nga but ni gomow Elder David B. Haight. Yangar rok e taʼabrogon ko yangreg e chiney, ni bay e tin momawʼ rok ni ku taʼabrogon ngog. Kugu manang luman napan ni ke meybil. Danug bing owcheg ni ngguy, machane boed nibe tingiʼ ngog. I non ngak e Chitamangiy nu Tharmiy nibaʼ e falfalenʼ u laman.
Rayog ni nggu rungʼag ko tafney rog e falfalenʼ rok napan ni ke gaʼar, “U dakean fithngan Yesus Kristus.” Boed nike thamiy Elder Haight fare Tathapeg nibe rungʼag e thin nibe myebil nag ngak e Chitimangiy ko ngiyalʼ nem. Ma mich u wunʼug nikan thapeg u fithik e falfalenʼ.
Rogdaed ni ngad pi’ed ban’en ko fare Sulyarmen ni e ra gel napan ni gadaed ra gel nag e mich rodaed ngak Yesus Kristus nge Chitmangdaed nu Tharmiy ni ir e Chitamangdaed. Napan ni gadaed ra meybil u fithik e mich, ma gadaed ra mang bang ko murwel rok Somoel nib ga’fan napan ni ra fal’eg rogon e fayleng ko bin L’agruw e Wub Rok. Gube meybil ni gadaed gubin ma gadaed ra pirʼeg e falfalenʼ ni gadaed be rrinʼ e murwel nike pining daed ngay ni ngad rrinʼed.
Gube micheg nib fas Yesus Kristus. Iraray e Galasia Rok nge gil’ilungun u fayleng. Joseph Smith e profet ko fare Sulyarmen. President Russell M. Nelson e profet rok Somoel u dakean e fayleng e daba’. Be koel gubin fapi kiy ko priesthood u lan Fare Galasia ku Yesus Kristus ni fan ko Gidii’en Got ko Tin Tomur e Rran. U dakean fithngan Yesus Kristus, amen.