Fare Athap ni Rib Tamilang nib macholbog

Keb rok Elder Jeffrey R. Holland

Ko fare Ulung ko fare Ragag nge L’agruwi Apostle

Machane fare Sulyarmen ke pi’ e n’en nib riyul’ n ma murwel Got u lane biney e duw, ya ngeyog ni ngad athapeged, ma thingar di athapeged, mus ni napan ni gadaed be yaed u fithik e tin tha’abi momaw’ ban’en.

Fare October. nike thimur me pining daed President Russell M. Nelson ni ngad sap gaed nga m’on ko biney e conference ko April 2020 ni ra bagdaed ma rogon e birok e sap nga tomur ni ngan guy pa’ Got nibe fulweg fare gospel rok Yesus Kristus. Sister Holland nge gag e gomow be feek e re thin nem nib riyul’. Gu tafney nag ya’an mow ni gomow ba’ ko 1800, nge lemnag marunga’agen e machib ko pi galasia u rran nem. Ulan e lem ney, kug fithgow ngomow, ”Mang nike pag?” Mang e godow be athapeg ni go’mange ba’ rodow? Mang e godow be athapeg ni ra pi’ Got ngodow ko n’en ni godow ba’adag nib mat’aw?”

Ere, ta’ e ba’nen, e ku nangew ni fare l’agruw e mfen nga tomur ni kakrom ma sana ri gomow ra athapeg fare sulyarmen ko bin riyul’, nib thothup rok Got nib ga’ ko boech e rran, nib mith ra baga’ ni Ir e bay u foen gubin ban’en nibe buchbuch nge tin ni darni nang fan. Nggu gog e thin rok William Ellery Channing, bee’ nib ga’fan u ningyal’ nem, ma gadaed ra sap nag e “rogon Got nib chitamangiy,” ni rogon nike yoeg Channing ngay e “fare bin somm’on e machib nib ga’fan ko Kristiano.”¹ Binem e machib e rayog ni ngan guy e Got ni Chitamangiy nu Tharmiy nib sug ko tu’ufeg, ko bin ni ngan sap ngak ni bee’ niba’ pufthin fa bee’ ni ki moey u fayleng machane chiney e ke magawon nibe sap ko boech e fayleng.

Arrogon, athap rodaed ko 1820 e rayog ni ngad piriyeg Got ni rayog ni ngan non ngak, nibe non ma powi’iyey nib puf rogon ko chiney ni woed ni kakrom, Chitamangiy nib riyul’, biney e bay yip’ fan ko thin ney. I ir gathi bee’ nib kireb e tafney rok ninge mel’eg in e gidii’ ni nge thapeg me digey urngin e tabinaew ni nge gafgow. Danga’, Ir e bee’ ni be rrin’ demtrug e ngongol, u fithik’ e thothup, ni “fan ko fayleng; ya ba tu’uf e fayleng rok”² nge gubin e yafas ni bay u dakean. Binem e tu’ufeg e fan nike pi’ Yesus Kristus, ni Fak ni Maʼagirag Rokʼ, nga fayleng.³

Fa’anra gadaed kad fasgad ko ngiyal’ nem ni kakrom, ma sana gadad ra sap nib papay ni bay e maerwaerean’ marunga’ agen e yafos nge fas ko yam’ rok fare Tathapeg ni ke ying ulan e gidii’ ni ba fol’ Kristus. Ere, gadaed ra athapeg ni fan e pow ninge yib nga fayleng ni nge poweg e tin nibe micheg e bible ni Yesus e ir Kristus, nri Faak Got, fare Alpha nge Omega nge kemus fare Tabiyul rodad ni ma nanged. Athapeg rodaed ni gubin e pow u lane bible nib thothup ni nge buch, ban’en ni rayog ni nge dag reb e m’ag ni mornga’agen Yesus Kristus, ni nge ga’ nag e gonop rodaed ni mornga’agen nikan gargeleg, machib rok, miligach ni bayul rok, nge ir nike Foskoyam’. Riyul’ ni thin ni yira yoeg e “pi’in nib mat’aw [ngan pi’] ngeb u tharmiy; nge n’en nib riyul’ [nikan] pi’ ni yib u fithik e but’.”⁴

Ran yaliy e Kristiano ko re rran nem, ma gadaed ra thapeg ni ngad pir’eged bee’ niba’ mat’won rok Got niba’ fare bin riyul’ mat’won e priesthood rok ni nge rayog ni nge tawfe nag daed, ni rayog ni nge pi’ fare Kan ni Thothup ngodaed, me pi’ gubin e pi gam’ing ko gospel nib ga’fan ko falfalen’. U lane 1820, ma gadaed ra athapeg ni ngad guyed fare micheg ni yoeg Isaiah, Mikah, nge kuboech e profet ni kakrom ni mornga’agen a na’un rok Somoel ni ran fulweg.⁵ Gadaed ra falfalen’ ni kad guyed biyay e temple nib thothup nikan toey biyay, niba’ e Kan Nthothup riy, nge fapi gam’ing, nge gelngin, nge mat’won ni ngan fil e tin nib riyul’ nib manemus, nge gol nag e amith, nge tabinaew ni nge m’ag nga ta’abang ni manemus. Sana gura sapsap ni demtrug yang ni gubin yang ni nggu pir’eg bee’ niba’ mat’won ni nge yoeg ngog nge ppin rog ni rugu ba’adag ni mabgol romow e kan m’ag ko ngiyal’ ney nge manemus, ni dabgu rung’ag fare thin ni dabug ni “nge taw ko ngiyal’ ni kam m’ow.” Gu manang ni “lane na’un e Chitamang[dad] e bo’or e senggil riy,”⁶ machane, gag rog, ma fa’anra ke fal’ wa’athag ni nggu fana’ reb, ma boed ni go’ bangi ban’en nib kireb fa’anra demor Pat nge pifaak mow rog ni nggu falflaen’ gaed riy. Ma gidii’ rodaed ni kakrom, boech ni pi’in ni kab fas fa pi’in nike yim’ ni dani rung’ag fithngan Yesus Kristus, ma gadaed ra athapeg ni e thin u lane bible nib runguy ni ngan fulweg—ni pi’in ni kab fas ni nge rrin’ fapi gam’ing ni fan ko gidii’ roraed nike yim’.⁷ Dariy u bang ni gu manang ni ra rrin’ e n’en nima rrin’ Got nib sug ko tu’ufeg nge runguy ni fan ngak gubin e gidii’ ni pifaak u dakean e fayleng ni demtrug ko kar m’ad fa yaed ba fas.

Ma, list ko athap rodaed ko athap e ra n’uw, machane sana bin tha’abi ga’fan e mulwol ko fare Sulyarmen e pi athap nem e dabi paer ni dabi buch. Tabab u fithik e Paan ni Thothup nge mada’ ko chiney, ma pin’ey ni yiba adag e tabab i buch ni riyul’, ni rogon nike yoeg Apostle Paul nge kuboech e gidii’ ni kar machib niged, nike mange yuluy ko ya’el, nib riyul’ ma dabi mithmith.⁸ N’en ni ku’un athapeg e ke buech e chiney.

Ere sap rodaed nga tomur napan 200 e duw e fal’ngin Got ko fayleng. Machane mange ngad sap gaed ngay nga m’on? Ku ba’ e athapeg rodaed ni dawori buch. Napan ni ngad nongad, gadad gubin ba mael gad ngak COVID-19, ma pugurandad e m’ar⁹ nib achigchig ko ta’areb e yang ko yan’¹⁰ rayog ninge fek gubin e nam nge gidii ni ngar ragbug nga dakaen e buut’. Gadad be meybil nifan uringin e bee’ kar malog gad e bee’ ni ma tu’fen bachen e m’ar ney, nge nifan gidii’ be m’ar chiney fa sana ra ngar feked. Ba riyul gadad be meybil nifan pi’in niba pii’ e ayuw ko m’ar ney. Napan ningad gelnag biney—nge rangad rin’ed—wenig ningad guy rogon ni ngad gelnag e m’ar ko dariy e bilig riy, binaew ni dariy e gafgow riy. Gadad be athap nifan e skuul ni yibe sensey nag e bitir—dar rus gaed ni ngan nup’ raed—ma ra reb e bitir rok Got ma ke mangil, dariy e tolngan’, kireb, ara urngin mit e owan’ e dariy. Ra ngoch nag, ma ka gadaed be athapeg fare gal motochiyel nib ga’fan: ni nge tu’uf Got rodaed ni ngan fol ko thin Rok man tu’ufeg e pi’in ni bay u to’ben daed u fithik e gol nge tu’ufeg, gapas nge n’ag fan.¹¹ L’agruw ney nib ga’fan nge gubin ngiyal’—ma kemus ni bin athap ni bay rodaed ni ngad pi’ed ko bitir rodaed bang nib mangil ko bin ni yaed manang e chiney.¹²

Tiney ni gadaed ba’adag, ma oren e gidii’ u fithik daed e chiney e bay e athap rok: athap ko mabgol ni nge mangil, fa be athapeg ni nge mabgol; be athapeg ni nge taleg e tin kireb nike macham ngay, be athapeg ni nge sul e bitir rok nike malog; be athapeg e amith ko dowef nge leam nibe yib ko bukun mira’ay e bitir ni nge waer. Machane fare Sulyarmen ke pi’ e n’en nib riyul’ n ma murwel Got u lane biney e duw, ya ngeyog ni ngad athapeged, ma thingardi athapeged, mus ni napan ni gadaed be yaed u fithik e tin tha’abi momaw’ ban’en. Iraram e n’en nibe yoeg e babyor nib thothup napan ni yag ni nge athapeg Abraham¹³—ni, ya mich rok dariy’fan ko demutrug urngin fan ni dabi mich u wan’—ni rayog ni nge diyen Sarah napan ni ban’en ni woed ni dabyog ninge buch. Ere, nggu fith, “Fa’anra pi athap rodaed ko 1820 e rayogn ni nge buch ni bachane ba tamilang nib thothup nike m’ug ngak ba pagael nibe garbog u fithik e gak’iy u New York, ma mngofan ni dabyog ni ngad athapeged ni tin ni yi ba’adag nib mat’aw nge pangiy ni woed Kristus e ku rayog, ni Got e nge fulweg taban gubin e athap?” Gadaed gubin ma ba tu’uf ni nge michan’ daed ko n’en ni gadaed ba’adag nib mat’aw ni rayog ni nge boran, ko reb e kanawo’, nge ra rogon ni ra yag ngodaed.

Pi walageg, gadaed manang ni boech e taliw nib thilthil ni kakrom e ke digey bukun e gidii’. Nge reb, gadaed manang ban’en ko taliw e chiney ni kube digey boech e n’en niba adag ma be athapeg e gidii’ ni dawori buch. Gadaed manang ni pin’em e be chuweg bukun e gidii’ ngar chuw gaed ko yilen ko galasia. Ka gadaed manang, ni bee’ nima yol, e ga’ar “bukun e taliw [ko re rran ney] e boed ni dar na’ab gaed” i weliy mornga’agen e biney, ni yaed be non ”ninge fal’eg lingan u teliy, nochi mithmith ni pow ni gathi rib mangil rogon, thin ni dani mat’aw, [fa boech e ngiyal’ ma kemus ni] bo’olungi ban’en ni dariy rogon”¹⁴ma gubin ngiyal’ nib tu’uf boech ban’en ko fayleng, napan nibe yib boech e mfen nib bi’ech, nge napan e rran rok Yesus e pi’ bukun ban’en. Gadaed ni gachalpen Kristus, ma rayog ni ngad baed ngalang ko pi Israeilte ni kar yoer gaed ni yaed be ga’ar e, “kar mlik’gad ndakuriy ban’en ni be l’agan’rad ngay.”¹⁵ Riyul’, ni fa’anra dakriy e athap rodaed, ma ke chuw e bin tomur e n’en ni fan daed. Dante e bay u dakean ko yoror ko infiyarno ni yol nibe magar nag gubin e pi’in nibe milekag ko poem rok nikan noeg e Divina Commedia: Mpag gubin e athap,” nibe non, “gur ni gabe yib ngaray.”¹⁶ Riyul’ ni napan ni ra chuw e athap, ma n’en ni kuba’ rodaed e nifiy u infiyarno nibe daramram ni ga’ngin yang.

Ere, napan nib sap kiru’ daed ko rungrung ma, boed fare tang ni ga’ar, “pi’in nima ayuw e ra mil me chuw e gapas rom,”¹⁷ u fithik e tin mangil rodaed nib ga’fan e ra mang e biney e athap nib tu’uf nge chagil ko mich rodaed ngak Got nge tu’ufeg rodaed ngak boech e gidii’.

Biney e duw nike gaman l’agruw mira’ay, e napan ni gadaed ra sap nga tomur ko pin’en nikan pi’ ngodaed ma gadaed falfalen’ ni kad nanged bukun e athap nike buch, ma gube sul u dakean e thin rok ba bpin nike sul ko mission rok ni ga’ar ngomaed u Johannesburg niek yan in e pul ni ga’ar, “Gathi [kad] baed ni aray n’umngin yang ni kemus ni ngad mus gaed u roy.”¹⁸

Nggog reb e thin ni rib mangil nikan noeg u lane babyor nib thothup, ni gube un ngak Nephi nge re ppin nib yangren yibe ga’ar:

“Pi walageg nib tʼuf rog, tomuren ni kam [thapeged e tin somm’on ko fare Sulyarmen], gubin make m’ay irrin’? Musap gaed, gube yoeg ngomed ni, Dawor. …

“…Thingar mu pi’ed iyaen nga m’on u fithik’ e yul’yul’ romed ngak’ Kristus, nib machalbog laniyaen’med ko athap, nge t’ufeg rok’ Got ngak’ gubin e gidii’. … Fa’an gimed ra rrin’[,] …i gaʼar facha’ ni Chitamangiy: Rayog e yafos ni gubinfen ngomed.”¹⁹

Gube pining e magaer, pi walageg, ngak gubin e piʼin nike piʼ e ayuw ko biney e mfen ni tomur ni rib gaʼfan, fare mfen nikan fulweg fare gospel rok Yesus Kristus. Pi to’owath nima yib ko fare gospelir ga’fan ngog—ga’fan—ere ufithik e rayog rog guma oge e magar ngak e Chitimang nu Tharmiy nifan em, ni bay e ”michegt’uf ni nggu rin’, nge bo’or e pi mile t’uf nggu waen umon e mol rog, nge bo’or e pi mile t’uf nggu waen umon e mol rog.”²⁰ Aygun athamgil gaed ni bay e tuʼufeg u lan gumirchaʼen daed, ni yibe yaen u fithik e “athap ni rib tamilang”²¹ nima galʼ e kanawoʼ nib thothup ni gadaed bay riy e chiney nike yan 200 e duw. Gube micheg ni tin ni bay nga mʼon e ra tawaʼath nigey ni woed kakrom. Bay fan ni gadaed be athapeg e tawaʼath ninge mangil ko tin ni kad thapeged ya iraray e murwel rok Got ni Gubinfen, re Galasia ney e be ulul nibe thapeged e thogthog, iraray e gospel rok Kristus ni dabi mus. Gube micheg gubin e tin riyul ney nge kuboech u dakean fithngan Yesus Kristus, amen.