Hom Mbra Mbɛkã Ho
Yɛto nsa frɛ Nyame ne mba a wɔwɔ wiadze nyina mu dɛ hom mbra mbɛkã hɛnho wɔ dwumadzi son yi mu.
Mo nuanom na me nkyerɛbaa, anyɛnkofo adɔfo, dapɛn biara, Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrmba a wɔwɔ wiadze nyina mu no som hɛn Ɔsor Egya dɔfo, Nyankopɔn na wiadze nyina Hen no, na No Dɔba, Jesus Christ. Yɛdwendwen Jesus Christ n’abrabɔ na ne nkyerɛkyerɛ ho—ɔkra nko a ɔtsenaa ase a Ɔannyɛ bɔn da, Nyame Eguambaa a nkenkãa nnyi no ho no. Mpɛn dodow biara yebotum no, yedzi sacrament no dze kaa N’afɔrbɔ na yenyim dɛ Ɔno na hɛn abrabɔ tsim No do.
Yɛdɔ No na yɛhyɛ No enyimnyam. Osian No dɔ kɛse a onnyiewiei ntsi, Jesus Christ hun amandze na Owui maa emi na ɔwo. Obuu owu abobow no dze buei, Odwuruuw fasu a otwa anyɛnkofo na adɔfo ntamu no gui.1 na ɔdze enyidado brɛɛ hɔn a wonnyi enyidado no, ayarsa brɛɛ ayarfo, na ɔgye maa hɔn a woafa hɔn ndɔmmum.2
Ɔno na yɛdze hɛn akoma, hɛn abrabɔ, na hɛn daa daa som ma No. Siantsir yi ntsi, “yɛkã Christ ho asɛm, yedzi dɛw wɔ Christ mu, [na] yɛbɔ Christ ho asɛmpa no dawur, … ama hɛn mba eehu fibea kor a ɔsɛ dɛ wɔkɔ kɔhwehwɛ hɔn bɔnfakyɛ.’’”3
Edze Osũanyiyɛ Ridzi Dwuma
Mbom, yɛyɛ Jesus Christ osuanyi no gye ndzeyɛɛ a ɔbor erekasa na erekã Christ asɛmpa no ara. Agyenkwa Nankasa dze N’Asɔr asan ananmu aba dze aboa hɛn wɔ anamɔn kwan a yebodua do ayɛ tse dɛ Ɔno ara yie. Wɔahyehyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ama wɔaama akwan horow a yɛdze osũanyiyɛ fapem nhyehyɛɛ no abɔ bra. Yɛdze hɛnho rehyɛ Asɔr dwumadzi mu no, yesũa dɛ yebohu na yebedzi Sunsum Krɔnkrɔn ne nkenyan do. Yetu akoma a wɔdze kyerɛ ayamuhyehye na ayamuyie ma nkaa no mpon.
Iyi gye abrabɔ ber nyina mu mbɔdzembɔ, na ohia dɛ yɛdze dzi dwuma.
Akansifo a wodzi konyim no wɔhwer ndɔnhwer piinara dze hɔn agordzi horow no ne fapem nhyehyɛɛ no dzi dwuma. Anɛɛsfo, internet edwumayɛfo, nuclear engineerfo, na kun a ɔreyɛ akansi edzibanyɛ wɔ ne yer ne gyaadze no botum ayɛ na ɔawea ho a gyedɛ yɛdze enyimia dzi hɛn dwuma no nko.
Meyɛ aeroplane edwuma captain no, nna metaa kyerɛkyerɛ wimu-hɛnkãfo adze a yɛdze flight simulator efir hwanyann a ɔyɛ dɛ ma enam wimu. Simulator no mmboa wimu-hɛnkãfo no ma wonnsũa enam wimu ho ahyɛase nhyehyɛɛ nko, mbom ɔma hɔn kwan ma wonya sũahu wɔ dza obotum esi ber a woetu aeroplane ankasa no na sɛ biribi a enyi nnda si a, wɔayɛ ho biribi.
Fapem kor yi ara fa Jesus Christ esuafo ho.
Edze ahokekã rehyɛ Jesus Christ N’Asɔr dwumadzi na n’akwanya horow mu no, bɔboa wo ma ayɛ ahoboa ama abrabɔ a, dza ɔbɛyɛ biara no, nna mbrɛ ne dzen besi ayɛ biara no, ne gyinabew sesã no. Dɛ yɛyɛ Asɔrmba no, wɔhyɛ hɛn nkuran dɛ yendua No nkɔnhyɛfo mu, tsetse na ndɛ no, yɛmfa hɛnho nhyɛ Nyame ne nsɛm mu. Yɛnam akoma na ahobrɛadze mpaabɔ mu do ma hɛn Ɔsor Egya no, yesũa dɛ yɛbɛtse Sunsum Krɔnkrɔn ne ndze. Yɛgye ɔfrɛ to mu dɛ yɛbɔsom, yɛakyerɛkyerɛ, ayɛ nhyehyɛɛ, asom, na yɛahwɛ binom do. Akwanya horow yinom ma hɛn kwan ma yenyin wɔ sunsum mu, adwen mu na suban pa mu.
Ɔbɔboa hɛn ma yɛayɛ ahoboa dɛ yɛbɛyɛ na yebesie ahyɛmudzi krɔnkrɔn a obehyira hɛn wɔ abrabɔ yi mu na abrabɔ a ɔreba no.
Hom Mbra, Mbɛka Hɛnho!
Yɛto nsa frɛ Nyame ne mba a wɔwɔ wiadze nyina mu dɛ hom mbra mbɛka hɛnho wɔ dwumadzi son yi mu. Hom Mbra Mbɔhwɛ! Taferbanyinmbɔmu COVID-19 mber yi mpo mu no, hom nhyia hɛn wɔ Internet do. Hom nhyia hɛn asɛmpasomafo no wɔ Internet do. Hwehwɛ ma woho dɛ ebɛnadze nye Asɔr yi no botae. Sɛ nkõdzen mber yi pa ho a, hom nye hɛn nhyia wɔ hɛn efiefi mu na wɔ hɛn asɔrdan mu!
Yɛto nsa frɛ hom dɛ hom mbra na hom mbɔboa! Hom mbra na hom nye hɛn nsom, nsom Nyame ne mba, yentsiatsia Agyenkwa no n’anamɔn mu, na yɛnyɛ wiadze yi bea pa.
Hom mbra mbɛkã ho! Hom bɛma yeenya ahoɔdzen yie. Na hom bɛyɛ yie, enya ayamuyie, na hom enya enyigye mbordo akã ho. Wo gyedzi mu bɔdɔ na ɔahyɛ dzen yie—ama oeetum egyina begyabegyayɛ na abrabɔ mu nsɔhwɛ a ɔba awora no ano yie.
Na yebesi dɛn ahyɛ ase? Akwan horow wɔ hɔ a ibotum dze bɛyɛ.
Yɛto nsa frɛ hom dɛ hom kenkan Mormon Nwoma no. Sɛ nnyi nwoma no bi a, ibotum akenkan no wɔ ChurchofJesusChrist.org4 anaa adownload Book of Mormon abaefo app no. Mormon Nwoma no yɛ Jesus Christ n’ahyɛmu kor so na ɔnye Ahyɛmu Dadaw na Ahyɛmu Fofor no nam dɛ adamfo. Yɛdɔ kyerɛwsɛm krɔnkrɔn yinom nyina na yesũa adze fi ne nyina mu.
Yɛto nsa frɛ wo dɛ hwer wo mber kakra wɔ ComeuntoChrist.org fa hu dza Asɔrmba no kyerɛkyerɛ na wɔgye dzi.
To nsa frɛ asɛmpasomafo no ma wɔnye wo nhyia wɔ abaefo Internet do anaa wɔ wo fie, sɛ ɔbɛyɛ yie a—wɔwɔ nsɛmpa a ɔma enyidado na ayarsã. Ãsɛmpasomafo yinom yɛ hɛn mbabanyin na hɛn mbabaa a wɔsom bo a, wɔsom wɔ mbea pii mu wɔ wiadze nyina mu dze hɔnara hɔn mber na sika.
Jesus Christ N’Asɔr mu no, hom bohu nkorɔfo a wɔyɛ ebusua a ɔnnson hɔn na hom. Ibohu nkorɔfo a wohia wo mboa na wɔpɛ dɛ wɔboa wo ber a erobɔ mbɔdzen abɛyɛ wo nyimpaban pa no—nyimpa a Nyame bɔɔ wo dɛ bɛyɛ no.
Agyenkwa no Mfuae no Tsen du Obiara do
Bi a na erodwen dɛ, “Mayɛ mfomdo wɔ m’abrabɔ mu. Minngye nndzi dɛ mubotum atse nkã dɛ mekã Jesus Christ N’Asɔr ho. Nyame n’enyi nnkotum agye obi a ɔtse dɛ emi ho.”
Jesus, Christ no, ɔyɛ “ahemfo hɔn Hen,”5 Messiah no, “Nyame tseasefo Ne Ba,”6 dze, naaso ɔdwen hɛn mu kor biara na Nyame ne mba nyina ho. Ɔdwen hɛnho a nyimpa no ne dzibew no mmfa ho—mbrɛ wo hia anaa wo sika tse, mbrɛ wo sintɔ anaa wokunyin tse. No ɔnnkyebo abrabɔ mu no, Agyenkwa no soom obiara: prɔmprɔmfo a hɔn enyi gye, hɔn a woebubu na wɔayew, na hɔn a wonnyi enyidado. Nna ɔtɔ dɛ, nkorɔfo a ɔsoom hɔn ankorankor no, wonnyi dzibew, ahoɔfɛw, anaa ahonyadze. Nna ɔtɔ dɛ, nkorɔfo a opepegyaa hɔn no nna wonnyi pii a wɔdze ma no, kã hɔn enyisɔ, akoma a abobɔ, na pɛ dɛ wobenya gyedzi ho.
Sɛ Jesus Christ hweer No ɔnnkyebo abrabɔ dze soom “nketseaba mu iyinom”7 a, ana Ɔnnkɔ dɔ hɔn ndɛ? Ana kwan nnyi N’Asɔr mu ma Nyame ne mba nyina? Hɔn mpo a wonya atsenkã dɛ wɔmmfata, werɛ efir hɔn, anaa wɔayɛ ankonam no?
Emudziyɛ ntwerba biara nnyi hɔ a otwar dɛ ifow kodu ana afata Nyame n’adom. Wo mpaabɔ nnhia dɛ ɔbɛyɛ dede anaa ano tsewee, anaa wɔfefa no yie ana oedu sor.
Nokwar mu ara, Nyankopɔn nnhwɛ nyimpa enyim8—ndzɛmba a ɔsom bo ma wiadze no nnyɛ hwee mma No. Onyim w’akoma, na Ɔdɔ wo a ɔmmfa w’abɔdzin, sika dodow, anaa wo Instagram akãdofo
Ber a yɛkyɛn hɛn akoma ma Ɔsor Egya na yɛtwe bɛn no no, yɛbɛtse dɛ Ɔtwe bɛn hɛn.9
Yɛyɛ No sunsum mu mba adɔfo.
Hɔn a wɔpow No mpo.
Hɔn mpo a, wɔtse dɛ abofra tsirmɔdzennyi a ommbu adze, hɔn bo fuw Nyame na N’Asɔr, fa hɔn ntar hyɛ adaka mu, na wotwuuw pue abow no mu, repaa mu dɛ woruguan akɔ a wɔnnkɛba bio dabiarada.
Sɛ abofra guan fi fie a, bia orunnhu awofo a wɔdwen noho a wɔrohwɛ dua tokura mu. Wɔdze akoma a ɔyaw hyɛ mu no, wɔhwɛ hɔn babanyin anaa babaa ma ɔkɔ—wɔ enyidado mu dɛ hɔn ba a ɔsom bo no bosũa biribi efi dza ɔtsew akoma yi mu na bia ɔdze enyiwa fofor ahwɛ abrabɔ yi—na ewiei no ɔasan aba fie.
“Dɛm na ɔtse wɔ hɛn Ɔsor Egya dɔfo enyim. Ɔrotweɔn dɛ yɛbɛsan aba.
W’Agyenkwa, dze ɔdɔ ho nyinsuwa na ayamuhyehye a ɔwɔ n’akoma mu no, rotweɔn dɛ ebɛsan aba. Sɛ etse dɛ ɔwo na Nyame ntamu atwe mpo a, Obohu wo, Obenya ayamuhyehye ama wo na Oetu mbirika ebofua wo.10
Hom Mbra Mbɛkã ho
Nyame Ma Hɛn Kwan ma Yesũa fi Hɛn Mfom mu.
Yɛyɛ akwantufo a yɛnam ɔnnkyebo abrabɔ kwan no do rohwehwɛ abrabɔ ntseasee na nokwar trudɔdɔ no. Yɛtaa dɛ, dza yehu ara nye anamɔn kwan no a ɔda hɛn enyim tsentsendo no—yɛnnkotum ehu bea a ɔman no ɔbɔkɔ ekodu. Hɛn Ɔsor Egya dɔfo mma hɛn nyiano no nyina. Ɔwɔ enyidakwan dɛ hɛnankasa yebotum enya ndzɛmba pii ho anoyi. Ɔwɔ enyidakwan dɛ yɛbɛgye edzi—ber mpo a ɔyɛ dzen dɛ ebɛyɛ dɛm.
Ɔwɔ enyidakwan dɛ yɛbɛtsen hɛn abatsir mu na yenya botae kakra—enya ahoɔdzen—na yetu anamɔn kor so akɔ kan.
Dɛm nye kwan a yɛfa do sũa adze na yenyin.
Ampaara dɛ ebɛpɛ dɛ wɔbɛkyerɛkyerɛ biribiara a woesi ase? Ampaara dɛ ebɛpɛ dɛ asɛmbisa biara woyi ano? Bea biara a yɛrokɔ no wɔakyerɛw ato hɔ?
Megye dzi dɛ hɛn mu dodow bɛbrɛ ntsɛntsɛm wɔ ɔsor a wɔrobɔ hɛn bra ma hɛn yi ho. Sũahu mu na yedua dze sũa abrabɔ mu adzesuadze horow no. Yerudua hɛn mfom mu dze rusũa. Yerudua nnuhu mu na hɛnara yeruhu dɛ “emumuyɛdze nnyɛ enyigyedze ara da.”11
Jesus Christ, Nyankopɔn Ne Ba no, wui ama hɛn mfomdo emmbu hɛn fɔ na woennsiw hɛn daapem mpontu no. Osian Ɔno ntsi, yebotum enu hɛnho, na hɛn mfomdo abɛyɛ anamɔn tu a ɔkɔ enyimnyam kɛse mu.
Nnyɛ wo nko na ɔsɛ dɛ innantsew kwan no do. Hɛn Ɔsor Egya nngyaa hɛn dɛ yɛnantsew-nantsew sum mu.
Iyi ntsi na, fefɛw ber afe 1820 no, Ɔnye Ne Ba, Jesus Christ, puee aberantsɛba, Joseph Smith do.
Dwen dɛm ho mber kumabaa. Wiadze nyina Nyankopɔn no puee nyimpa do.
Iyi nye ber a odzi kan no, Joseph nye Nyame na sor abɔdze binom nyaa nkitahodzi. Nsɛmfua pii no a ɔsor abɔdze yinom kãa kyerɛɛ no no, wɔakyerɛw no wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne kyerɛwsɛm mu. Ɔnnyɛ dzen dɛ nsa bɛkã. Obiara botum akenkan na woesũa ama hɔnho asɛm a Nyame wɔ ma hɛn ndɛ.
Yɛto nsa frɛ wo dɛ sũa ma woho.
Ber a onyaa nyikyerɛ yinom, nna Joseph Smith nnyɛɛ panyin koraa. No mu dodowara bae ansaana oridzi mfe 30.12 Nna onnyi sũahu, na dɛ ma binom dwen no, nna bia ɔnnfata dɛ ɔbɛyɛ Ewuradze no nkɔnhyɛnyi.
Naaso, Ewuradze frɛɛ no dɛmara—Odzii nhwɛdo a yehu no wɔ kyerɛwsɛm krɔnkrɔn nyina mu.
Nyame anntweɔn nyimpa a odzi mu ana N’asɛmpa no wɔdze asan ananmu aba.
Sɛ Ɔyɛɛ dɛm a, nkyɛ Ɔda ho rotweɔn.
Nna Joseph tse dɛ emi na ɔwo. Ɔno Joseph fomee mpo a, Nyankopɔn dze no dzii dwuma dze yɛɛ Ne tsirmpɔw no.
President Thomas S. Monson taa si do kã afotu nsɛm yi dɛ: “Onyia Ewuradze afrɛ no no, Ewuradze ma ɔfata.”13
Ɔsomafo Paul nye Ahotseweefo a wɔwɔ Corinth no susui dɛ: “Na, enuanom na [nkyerɛbaa,] hom nhwɛ hom frɛ no, dɛ nna hom nnyɛ honam afamu enyansafo pii, nnyɛ etumfo pii, nnyɛ adehye pii.”14
Nyankopɔn dze hɔn a wɔyɛ mberɛw na ahobrɛadzefo dzi dwuma ma No botae bɔbɔ adze. Nokwar yi gyina hɔ dɛ dasegye dɛ ɔyɛ Nyame no tum, nnyɛ nyimpa dze a, nna ɔyɛ N’edwuma wɔ asaase yi do.
Tsie No, Kã No Do
Ber a Nyame puee Joseph Smith do no, Ɔdaa Ne Ba, Jesus Christ edzi, na Ɔsee dɛ, “Tsie No!”16
Joseph hweer n’abrabɔ mber nkaa dɛ oritsie No na ɔrekã No do.
Tse dɛ Joseph no, hɛn adwenpɔwbɔ dɛ yebetsie Agyenkwa Jesus Christ na yɛakã no do na ɔhyɛ hɛn osuanyiyɛ ase.
Sɛ ipɛ dɛ ekã No do a, boa wo gyedzi ano na fa Ne mbeamudua.
Hom bohu dɛ hom kã ho wɔ N’Asɔr mu—bea a wofua na wɔma wo akwaaba na hom botum akã ho wɔ osuanyiyɛ na enyigye no nhwehwɛe dwumason no ho.
Ɔyɛ m’enyidado dɛ, Enyido-adzehu a Odzi Kan ne mfe aha ebien afrɛnhyia yi, ber a yerodwendwen na yerusũa Jesus Christ N’Asɔr ne Nsan-ananmu ho no, yebohu dɛ ɔnnyɛ abakɔsɛm a osii ara. Ɔwo na emi yɛwɔ kyɛfa kɛse, wɔ asɛm dɛw a ɔda ho rokɔ do yi mu.
Ntsi, emi na ɔwo ebɛnadze, nye hɛn kyɛfa?
Ɔno nye yebosũa Jesus Christ ho nsɛm. Yesũa N’asɛm. Yebetsie No na yɛakã No do a, yɛdze hɛnho rehyɛ edwuma kɛse yi mu ndamyɛ mu. Moto nsa frɛ wo dɛ bra bɛkã ho.
Nnyɛ wo emudziyɛ na worohwehwɛ. Dza ɔwɔ dɛ inya ara nye pɛ a edze botu wo gyedzi mpon na atwe abɛn No yie dabiara.
Hɛn kyɛfa nye dɛ yɛbɔdɔ Nyankopɔn na yɛasom No na yɛasom Nyame ne mba.
Ber a ereyɛ dɛm no, Nyame dze No dɔ, enyigye, na kwankyerɛ a osi pi botwa woho ehyia wɔ abrabɔ yi mu, wɔ gyinabew mpo a ɔyɛ dzen papaapa mu, nye ma ɔtr mpo.
Iyi ho na megye dase, na medze enyisɔ kɛse na ɔdɔ ma hom mu kor biara, dze gya hom me nhyira, wɔ hɛn Agyenkwa, hɛn Wura ne dzin krɔnkrɔn no mu—Jesus Christ ne dzin mu, amen.