O Le a Oo Mai Le Mea Sili
Mai le saunoaga i se sauniga lotu a le Iunivesite o Polika Iaga i le aso 13 o Ianuari 2009. Mo le anotusi atoa o le saunoaga i le faaPeretania, tagai i le http://speeches.byu.edu.
Vaai i luma ma manatua o le faatuatua e faasino e lē aunoa agai i le lumanai.
O le amataga o le tausaga fou o se taimi masani lea e fai ai se suega o o tatou olaga ma vaai po o fea o loo tatou agai i ai, e fuaina i ai le tulaga sa tatou i ai muamua. Ou te le fia talanoa e uiga i tautinoga mo le Tausaga Fou, ae ou te fia talanoa e uiga i le taimi ua tuanai ma le lumanai, faatasi ai ma se vaaiga agai i soo se taimi o mea tutupu ma suiga i o tatou olaga—ma o na taimi e masani lava ona oo mai e toeitiiti lava o aso uma.
I le avea ai o se autu faale-tusitusiga paia mo lenei talanoaga, ua ou filifilia ai le Luka 17:32, lea o loo lapatai mai ai le Faaola, “Ia outou manatua le ava a Lota.” O le a le uiga o Lana fetalaiga i se fasi fuaitau laitiiti ae anagata faapea? Ina ia mauaina, e manaomia lo tatou faia e pei ona Ia fautuaina mai. Ia tatou toe tomanatu po o ai le ava a Lota.
O le tala, e moni lava, ua oo mai ia i tatou mai aso o Sotoma ma Komoro, ina ua fiu le Alii, i le silisili ona leaga o mea ua faia e alii ma tamaitai, o lea na tau atu ai ia Lota ma lona aiga e sosola ese aua o le a faatafunaina na aai. “Ina sola ia e te ola ai,” na fetalai atu ai le Alii. “Aua e te tepa i tua … ; a ia sola lava i le mauga, ina nei malaia oe” (Kenese 19:17; ua faaopoopo le faamamafa).
O le faatuai ona latou usitai ona sa tau fai nisi feutagaiga, na iu ai ina tuua e Lota ma lona aiga le nuu ae ua toeitiiti lava a tuai. Na tau mai e tusitusiga paia ia i tatou le mea na tupu i le vaveao o le taeao ina ua mavae la latou solaaga:
“Ona faatotō faaua ifo lea e Ieova i Sotoma ma Komoro o le teio ma le afi mai ia Ieova mai le lagi;
“Na Ia faaumatia o ia lava aai” (Kenese 19:24–25).
O la’u autu e maua mai le fuaiupu o loo sosoo ai. E mautinoa lava, faatasi ai ma le fautuaga a le Alii—“aua e te tepa i tua”—o loo tatagi manino mai lava i taliga, o le ava a Lota, ua faapea mai le tusi, “ua tepa i tua,” ona liua lea o ia ma ua avea ma tupua masima (tagai i le fuaiupu e 26).
Po o le a ea se mea na faia e le ava a Lota na matuai sese lava? I le avea ai ma se tamaitiiti aoga o le talafaasolopito, sa ou mafaufau e uiga i lena mea ma ofoina atu se vaega o le tali. O le mea moni lava, o le mea na sese i le ava a Lota e le na o lona tepa i tua; a o lona loto sa ia manao e toe foi i tua. E foliga mai ae lei taitai ona sopoia e ia tuaoi o le aai, ua leva ona ia misia mea sa ofoina mai e Sotoma ma Komoro ia te ia. E pei ona saunoa mai Elder Neal A. Maxwell (1926–2004) o le Korama a Aposetolo e Toasefululua, o nei ituaiga o tagata ua latou iloa e tatau ona i ai o latou fale tumau i Siona, ae o loo faamoemoe lava e tuu pea se faleoo mo le taumafanafana i Papelonia.1
E mafai foi ona faapea na tepa i tua le ava a Lota faatasi ai ma le tetee i le Alii mo mea ua Ia fai atu ai ia te ia e tuua. Ua tatou mautinoa lava o Lamana ma Lemuelu na tetee ina ua faatonuina Liae ma lona aiga e tuua Ierusalema. O le mea lea e le na o lona tepa i tua; ae sa ia tepa i tua ma le moomoo. O le faapuupuuina, o lona piitaga i mea ua tuanai ua taotaomia ai i lalo lona talitonu i le lumanai. O lena, e mautinoa lava, o se vaega itiiti o lana agasala.
O Le Faatuatua e Faasino Atu i le Lumanai
Ao amataina se tausaga fou ma tatou taumafai ai e aoao mai se vaaiga sao i mea ua tuanai, ou te augani atu ia te outou ina ia aua nei nofoai i aso ia ua tuanai po o le faananau vale mo ananafi, e tusa lava po o le a le lelei o na ananafi atonu na i ai. O le tuanai e mo le aoaoina mai ai, ae le o le ola ai. Tatou te vaai i tua e pue mai aloiafi mai aafiaga susulu ae le o lefulefu. Ma afai ua tatou aoaoina mea e manaomia ona tatou aoaoina ma ua tatou aumaia ma i tatou mea sili na tatou aafia ai, ona tatou vaavaai lea i luma ma manatua o le faatuatua e masani lava ona faasino atu i le lumanai. O le faatuatua e masani lava ona aafia ai faamanuiaga ma upumoni ma gaoioiga na o le a aumaia ai taunuuga manaomia i o tatou olaga.
O le auala sili lava la faaletalalelei e talanoa ai e uiga i le ava a Lota o le faapea atu sa leai sona faatuatua. Sa masalosalo o ia i le gafatia e le Alii ona tuuina atu ia te ia o se mea e sili atu nai lo mea ua ia maua. O le mea moni lava, sa manatu o ia e leai se mea o loo i le lumanai e mafai ona tutusa le lelei e pei o na mea ua ia tuua.
O le faananau e toe foi i tua i se lalolagi lea e le mafai ona nonofo ai nei, o le faaauauina pea ona le fiafia i mea o le taimi nei ma mauaina na o ni vaaiga maualalo e uiga i le lumanai, ma misia le taimi nei ma a taeao ona ua tatou taulai atu i mea ua tuanai ma ananafi o nisi ia o agasala a le ava a Lota.
Ina ua maea ona toe iloilo e le Aposetolo o Paulo lona olaga talavou faamanuiaina ma le tauia—o lona tofi, aoaoga, ma lona tulaga i le nuu o Iutaia—na ia fai atu i tagata o Filipi o na mea uma o ni “otaota” pe a faatusatusa atu i lona liliu mai ma avea o se Kerisiano. Fai mai a ia, ma ou te toe faaupuina, “Ua ou le toe tala mimita e uiga ‘i na aso lelei ua tuanai’ ma o lenei ua naunau lava e vaai atu i le lumanai ‘o mea uma sa aoga ia te au, ua ou manatu ua le aoga ia mea ona o Keriso’” (tagai Filipi 3:7–12). Ona oo mai ai lea o fuaiupu nei:
“Ao le mea e tasi ou te faia, ou te faagalogalo i mea ua tuanai, ou te momoe punou ai foi i mea o lumanai,
“ou te tausisi atu i le faailoga, ia maua ai le taui na valaauina ai au mai luga e le Atua ia Keriso Iesu” (Filipi 3:13–14).
E leai se ava a Lota iinei. Leai se toe tepa i tua i Sotoma ma Komoro iinei. Ua silafia e Paulo o iina i le lumanai, i luga atu po o fea lava e aveina i ai i tatou e le lagi, lea o le a tatou manumalo ai i “le taui na valaauina ai au mai luga e le Atua ia Keriso Iesu.”
Faamagalo ma Faagalo
O loo i ai se mea i totonu o le toatele o i tatou lea e faapitoa lava ona le mafai ai ona faamagalo ma faagalo mea sese ua tuanai o le olaga—a le o a tatou mea sese o mea sese a isi. E le lelei. E le Kerisiano. O loo ia tu mai o se tetee matautia i le maualuga ma le mamalu sili o le Togiola a Keriso. O le noatia i mea sese ua leva, o se ituaiga sili lea ona leaga o le nofoa’i i le taimi ua tuanai, lea ua valaauina ai i tatou e faamuta loa ma aua le toe faia.
Sa ta’u mai ia te au e uiga i se taulealea lea na tele lava ona avea ma autu o tausuaga uma i lana aoga mo le tele o tausaga. Sa i ai ni ona vaivaiga, ma na faigofie ai i ana tupulaga ona faalili ia te ia. Mulimuli ane i lona olaga na malaga ese o ia. Na iu ina faatasi atu o ia i le ami a le in malo ma na mauaina ai ni aafiaga faamanuiaina iina i aoaoga ma faasolosolo ai lava ina laa ese mai le taimi ua tuanai. O le taualuga o na mea uma, e pei ona faia e le toatele i le militeli, na ia mauaina le matagofie ma le mamalu sili o le Ekalesia ma sa toaga ma fiafia ai.
Ina ua mavae ni nai tausaga, sa toe foi o ia i le aai sa nofo ai a o talavou. O le toatele lava o lana tupulaga ua malaga ese ae le o i latou uma. O le mea moni lava, ina ua ia toe foi mai ma le matuai faamanuiaina ma ua toe fanauina, sa i ai pea lava iina le faiva o mafaufauga sa i ai muamua, o loo faatalitali i lona toe foi mai. I tagata o lona nuu, ua na o ia lava o se tagata tuai o “pai ma lafai”—e te manatuaina le alii lea na i ai le faafitauli, lea e ese a ana amio, le faavasivasi, lea na faia lea mea ma lea mea. Pe le o se mea na matuai malie tele?
O sia mea itiiti ma sia mea itiiti o taumafaiga a lenei alii faapei o Paulo ina ia tuua na mea uma ua tuanai ae pue mai le taui lea na faataatia e le Atua i ona luma, sa mou malie ese atu seia oo ina maliu o ia i le tulaga lava lea na ia ola ai i lona talavou. Na ia toe foi i le ala na i ai muamua: na le toe toaga [i le lotu] ma na faanoanoa ma avea ma autu o tausuaga a se tupulaga fou. Ae ui i lea na i ai ia te ia lena taimi susulu e tasi, le matagofie o le ogatotonu o le olaga ina ua mafai e ia ona tula’i maualuga mai lona taimi ua mavae ma iloa moni ai o ia ma le ituaiga tagata e mafai ona avea ai o ia. E matuai leaga, matuai faanoanoa lava ona ua toe siomia o ia e se ‘au atoa o ava a Lota, i latou o e na manatu e sili atu le manaia o lona taimi ua mavae nai lo lona lumanai. Na mafai ona latou toso ese mai lona lima le mea lena lea na uuina ai o ia e Keriso. Ma na maliu faanoanoa o ia, e ui e le o sona sese na mafua ai.
E tupu foi lena mea i faaipoipoga ma isi mafutaga. E le mafai ona ou tau atua ia te outou le aofai o ulugalii sa ou fautuaina o ē, pe a matuai loloto le lagona tiga pe ua na o se mamafatu foi, latou te aapa atu i taimi ua tuanai ma faasolosolo atu lava i tua i le sailiga o se faafitauli e manatua e fesoasoani lea i le “faaleagaina” o a latou faaipoipoga. Pe a maea se mea ma ua mavae, pe a afai ua salamoina ma le atoatoa, pe afai ua agai i luma le olaga e pei ona tatau ai ma e tele isi mea lelei matagofie na tupu mai lena taimi, e le sa’o le toe foi i tua ma toe fofoe ni manu’a anamua lea na maliu le Alo o le Atua lava Ia e faamaloloina.
Tuu atu i tagata ia salamo. Tuu atu i tagata ia tuputupu ae. Talitonu e mafai e tagata ona sui ma faaleleia. Pe o le faatuatua ea lena? Ioe! Pe o le faamoemoe ea lena? Ioe! Pe o se alofa moni ea lena? Ioe! O le taualuga o mea uma, o le alofa moni, o le alofa mama lea o Keriso. Afai ua tanumia se mea i le taimi ua tuanai, tuu ai pea e tanumia. Aua e te fefo’ifo’ia’i ma lau tamai paelo oneone ma le tamai suo e eli ai i luga, ma faalealea solo, ona togi atu lea i se isi ma faapea atu, “Ei! E te manatua le mea lea?” Splat!
Ia, mate mai la? E le taumatea lava e iu i se taga mataga i le taimi ua sola ua toe eliina mai i luga mai lau faatafunaga, “Ioe, ou te manatuaina. E te manatuaina le mea lenei?” Splat.
Ma e le umi ae o mai tagata mai lena fetufaaiga ua palapala ma eleelea ma faanoanoa ma tiga, ae o le mea o loo augani mai ai lo tatou Tama o i le Lagi o le mama ma le agalelei ma le fiafia ma le faamalologa.
O lena nofoa’i i olaga ua tuanai, e aofia ai mea sese ua tuanai, e matua le sa’o lava! E lē o le talalelei lena a Iesu Keriso. I nisi o tulaga, ua sili atu le leaga nai lo le ava a Lota aua na ia faaumatia na o ia lava. I tulaga o faaipoipoga ma aiga, uarota ma paranesi, fale mautotogi ma tuaoi, e mafai ona tatou faaumatiaina nisi e toatele.
Atonu i lenei amataga o se tausaga fou e leai se mea e sili atu ona manaomia mo i tatou nai lo le faia e pei ona fetalai mai le Alii lava Ia ua Ia faia: “O le ua salamo i ana agasala, e faamagaloina o ia, ma o au, le Alii, ou te le toe manatua lava” (MF&F 58:42).
O le mataupu, e moni lava, e faapea o le salamo e tatau ona faamaoni, ae a faapea o lena ua i ai ma o loo faia se taumafaiga faamaoni ia alualu i luma, ua tausalaina i tatou i le agasala sili atu pe afai tatou te faaauau pea ona manatua ma faamanatu ma toe fetogiina se tasi i ana mea sese ua tuanai—ma o lena tagata masalo o i tatou lava. E mafai ona tatou faatiga ia i tatou lava— i le tele lava o taimi e sili atu nai lo [le faatiga i] isi!
O lenei, e pei o Aneti-Nifae-Liae o le Tusi a Mamona, ia tatanu a outou auupega o le taua ma tuu ai pea ia tanumia (tagai i le Alema 24). Faamagalo ma faia le mea lea e faigata atu i nisi taimi ona fai nai lo le faamagalo: faagalo. Ae afai e toe oo mai i le mafaufau, ia toe faagalo foi.
O Le a Oo Mai le Mea Sili
E mafai ona e manatua tau lava o le aloese mai le toe faia o le mea sese, ona tuu loa lea o le toega o na mea uma i le faaputuga otaota lea na saunoa i ai Paulo i tagata o Filipi. Ia faatea ese le taufaaleaga, ma tumau ai pea le faatea ese seia faaalia mai ia te oe e le matagofie o le Togiola a Keriso lou lumanai manuia ma le lumanai manuia o lou aiga, o au uo, ma ou tuaoi. E le popole tele lava le Atua po o fea sa e i ai ae popole o Ia po o fea o loo e i ai ma, faatasi ai ma Lana fesoasoani, o fea le mea o e naunau e te alu i ai. O le mea lena e le’i iloa e le ava a Lota—ma e faapena foi Lamana ma Lemuelu ma le toatele lava o isi i totonu o tusitusiga paia.
O se mataupu taua tele lenei ia mafaufau i ai i le amataga o se tausaga fou—ma o aso taitasi e tatau lava ona avea o le amataga o se tausaga fou ma o se olaga fou. O le ofoofogia lena o le faatuatua, salamo, ma le vavega o le talalelei a Iesu Keriso.
Na tusia e le tusisolo o Robert Browning:
Ola ia ta matutua faatasi ma au!
O le a oo mai le mea sili,
Le olaga faaiu, lea na mai le amataga ona tauivi:
Ua i Ona aao o ta ola
Lē na faapea mai, “Na ou fuafua se olaga atoa,
Talavou ua na o le ‘afa o le olaga; faatuatua i le Atua: vaai i mea uma, ae aua le fefe!”2
O nisi o outou atonu e tomanatu: Pe i ai ea se lumanai mo au? O le a ea se mea o loo i ai mo au i se tausaga fou po o se semesa fou, se mataupu fou po o se faigauo fou, se galuega fou po o se aiga fou? Pe o le a ou saogalemu ea? Pe o le a manuia ea le olaga? Pe mafai ea ona ou faatuatuaina le Alii ma i le lumanai? Pe le sili ea le toe tepa i tua, toe foi i tua, ma aumau ai i le taimi ua tuanai?
Mo i latou uma [o loo tuufesili] o augatupulaga uma, ou te valaau atu, “Manatua le ava a Lota.” O le faatuatua e mo le lumanai. O le faatuatua e fausia i luga o le taimi ua tuanai ae le moomoo lava e tumau ai iina. E talitonu le faatuatua o le Atua o loo i ai ni mea se tele o loo fuafuaina mo i tatou taitoatasi ma o Keriso e moni lava o le “faitaulaga sili i mea lelei atali” (Eperu 9:11).
Ia tulimatai atu ia outou miti, e tusa lava po o le a le va ma le mamao ese atu. Ola e vaai i vavega o le salamo ma le faamagaloga, o le faatuatuaina ma le alofa paia lea e suia lou olaga i le aso nei, taeao, ma le faavavau. O se tautinoga lena o le Tausaga Fou ou te talosaga atu ia te outou ina ia tausisia.
Na aoao mai Paulo, “Ao le mea e tasi ou te faia, ou te faagalogalo i mea ua tuanai, ou te momoe punou ai foi i mea o lumanai, ou te tausisi atu i le faailoga, ia maua ai le taui na valaauina ai au mai luga e le Atua ia Keriso Iesu.”
Ata pue na tusia e Matthew Reier
Ata na tusia e Paul Mann