Ko Sīsū Kalaisí ko e ʻAlo Ia ʻo e ʻOtuá pea Ko ha ʻOtua Ia ʻo e Ngaahi Maná

Fai ʻe Sandra Tanner mo Cristina Franco

ʻOku fakaʻaongaʻi ʻe he kau tāvalivali tokolahi ʻa ʻenau ʻilo mo ʻenau tui kia Sīsū Kalaisí pea mo e ngaahi taukei mo e ngaahi fakakaukau ʻoku nau maʻú ke tā ʻaki Hano ngaahi fakatātā. ʻOku lava ke tokoni ʻenau ngaahi tāvalivalí ke tupulaki ai ʻetau tui mo e mahino ʻo kau kia Sīsūú. ʻI heʻetau lau e folofolá, ʻoku lava ke tau fakaʻaongaʻi ʻa e anga ʻo ʻetau fakakaukaú ʻo hangē ko ia ʻoku fai ʻe he kau tāvalivalí, ke tokoni ke mahino kiate kitautolu ʻa e meʻa naʻe akonaki ʻaki ʻe Sīsuú.

Te mou ʻilo ʻi he Fuakava Foʻoú ha ngaahi talanoa kau ki he ngaahi mana naʻe fai ʻe Sīsū ʻi Heʻene moʻui ʻi he māmaní. Ko e taha ʻo kinautolu ʻoku ʻi he Maʻake 4:35–39. Lau e talanoá; ʻosi ko iá peá ke fakakaukauloto naʻá ke ʻi he vaká mo Sīsū mo ʻEne kau ākongá ʻi he Tahi Kālelí. Fakakaukau ki ha fuʻu matangi. ʻOku ngaungaue pē ʻa e vaká, mālohi mo e matangí, pea ʻoho hake ʻa e tahí ʻi ho tafaʻakí. Fakakaukauloto ki he meʻa te ke fakakaukau ki ai mo ongoʻí. Fakakaukau atu leva he taimí ni ki hoʻo sio atu ki hono fafangu ʻe he kau ākongá ʻa Sīsuú. Fakakaukau ki he leʻo ʻo e ʻEikí ʻi Heʻene tuʻu hake peá Ne pehē, “Fiemālie, peá ke toka lelei.” Fakakaukau ki he anga e tuʻu ʻa e tahí ʻi he nonga ʻa e matangí pea mo e ofo ʻa e kau ākongá ʻi he talangofua ʻa e matangí mo e tahí kia Sīsuú.

ʻOku tokoniʻi fēfē koe ʻe hono lau mo fakakaukau ki he talanoa ko ʻení ke toe lahi ange hoʻo tui kia Sīsū Kalaisí?

ʻE lava ke tau hoko foki mo kitautolu ko e kau tāvalivali ʻo fakahaaʻi ʻetau tui mo e mahino kau kia Sīsuú ʻaki ʻetau tā ha ngaahi fakatātā ʻo e ngaahi mana naʻá Ne fakahokó pea fakaʻaongaʻi ʻetau ngaahi fakatātaá ke akoʻi ki ha niʻihi kehe ʻa e meʻa kuo tau ʻiló.

Tohinoa Fakafolofola ʻo ʻAokosi 2010

Lau ʻa e 2 Nīfai 27:23.

Lotu ki he Tamai Hēvaní ke ʻiloʻi ko Sīsū Kalaisí ko “ha ʻOtua Ia ʻo e ngaahi maná.”

Ako maʻuloto ʻa e 2 Nīfai 27:23.

Fili ha taha ʻo e ngaahi ʻekitivitī ko ʻení, pe faʻu pē haʻo ʻekitivitī ʻaʻau:

Tokoni ki ha taha kehe ke ne ako maʻulotu ʻa e 2 Nīfai 27:23.
Fakakaukau ki ha tala-noa mei he folofolá ki ha toe mana kehe ʻa Kalaisi. Fakakaukau angé pe naʻe hā fēfē nai; hili ko iá pea tā ha ngaahi fakatātā ʻo e meʻa naʻe hokó. Vahevahe ʻa e talanoá mo hoʻo ngaahi fakatātaá ʻi ha efiafi fakafāmili ʻi ʻapi.
Vahevahe hoʻo fakamoʻoni kia Sīsū Kalaisí ʻaki haʻo ako maʻuloto ʻa e potufolofola ʻo e māhina ní peá ke lau ia ki ha taha.
ʻOku fakaʻaliʻali ʻe he ngaahi fakatātā ʻi he peesi 63 ʻa e anga ʻo e fakakaukau ʻa ha tokotaha tāvalivali ʻe taha ki he mana ʻo hono fakanonga ʻo e matangí ʻe Sīsuú. Kosi e ngaahi fakatātaá ʻo fakapipiki ʻi ha pepa matolu ange. Fakaʻaongaʻi e ngaahi fakatātaá ke fai ʻaki e talanoá ʻi he efiafi fakafāmili ʻi ʻapí pe ki hao kaumeʻa.

ʻOku founga fēfē ʻene tokoni ʻa e meʻa ne ke faí ke mahino kiate koe ʻa e 2 Nīfai 27:23?

Hiki ʻi hoʻo tohinoá ʻa e meʻa kuó ke fakahokó.

Faitaaʻi ʻe Craig Dimond; tāvalivali ʻe Paul Mann