Ko ha Fāʻofua maʻa Senifā
“Ke ke fiemālie” ( Mātiu 9:22).
Naʻe tāpuniʻi ʻe Senifā e matapā hono lokimohé peá ne tokoto hifo he mohengá. Naʻá ne holoholoʻi e loʻimatá mei hono ongo kouʻahé mo feinga ke tuku ʻene tangí.
Ne toki ʻosi ʻenau fakakikihi mo hono tuongaʻane lahí mo hono taʻoketé. Kuo ʻalu ʻa e fineʻeikí mo e tangataʻeikí ki falekoloa, pea hangē ia he ʻikai pē ke na toe foki mai kinauá.
Naʻe ongoʻi lotomamahi ʻa Senifā. Neongo ʻene feinga lahi ke taʻofi e tete hono loungutú, ka naʻá ne kei ongoʻi lotomamahi ʻaupito. Naʻá ne fakakaukau ʻo pehē, “Kapau naʻe ʻi ʻapí ni ʻa e fineʻeikí mo e tangataʻeikí, ʻe lelei ange e meʻa kotoa pē.”
Naʻe manatuʻi hake leva ʻe Senifā ʻa e meʻa naʻá ne ako ʻo kau ki he lotú ʻi he Palaimelí. Naʻe pehē ʻe heʻene faiako Palaimelí, “Te ke lava ʻo lotu ʻi ha taimi pē. Te ke lava ʻo lotu ʻi hoʻo ongoʻi fiefiá mo e taimi ʻokú ke ongoʻi mamahi aí.”
Ne tūʻulutui ʻa Senifā ʻi hono veʻe mohengá. Naʻá ne pūlou e sipí ke ʻoua naʻa fakahohaʻasi ia ʻe ha taha te ne fakaava mai e matapaá. Naʻá ne toe holoholoʻi hono loʻimatá, kūnima, pea kamata ke lotu.
Naʻá ne pehē, “ ʻE Tamai Hēvani, kātaki ʻo fakamolemoleʻi au ʻi heʻeku kē mo hoku tuongaʻané pea mo hoku taʻoketé he ʻaho ní. Pea fakamolemole ʻo tokoniʻi au ke u ongoʻi lelei ange. ʻI he huafa ʻo Sīsū Kalaisí, ʻēmeni.”
Naʻe ʻikai ke toe fie tangi ʻa Senifā. Naʻe liliu māmālie pē ʻa e ongoʻi lotomamahí ki ha ongoʻi māfana mo nonga. Naʻá ne ongoʻi lelei mo ʻofeina ʻo hangē pē naʻe fāʻofua ange ha taha kiate iá.
Naʻe toki foki mai ʻene ongomātuʻá, kuo ʻosi kole fakamolemole ʻa Senifā pea nau toe vaʻinga pē mo hono tuongaʻané mo hono taʻoketé. ʻI he hū mai ʻa e fineʻeikí he matapaá, naʻe lele atu ʻa Senifā ʻo fakafeʻiloaki ʻaki ʻene fāʻofua kiate ia. Ko e ongo fakaʻofoʻofa ʻa e fāʻofua kiate ia ʻa e fineʻeikí, ka kuo ʻiloʻi ʻe Senifā neongo he ʻikai ʻi ʻapi ʻa e fineʻeikí, te ne lava pē ke ongoʻi ʻa e ʻofa fakafiemālie ʻa e Tamai Hēvaní.
Tā fakatātaaʻi ʻe James Johnson