Uēlesi

Ne fuofua tūʻuta e kau faifekaú ʻi Uēlesi ʻi he 1840 pea nau fokotuʻu ha faiʻanga lotu maʻa ha toko 150 ʻi Uēlesi Tokelau ʻi ha māhina pē ʻe fā. ʻI he kamataʻangá, naʻe fāinga e kau faifekaú ke kumi ha kakai ke akoʻi, ka ʻi loto he taʻu pē ʻe 15, ko e peseti ʻe 80 ʻo e kau ului ʻi Uēlesí mei he feituʻu fakatonga ʻo Uēlesí.

ʻI Sānuali ʻo e 1845, naʻe foki ai ʻa Teni Sōnasi, ko ha tangata Uēlesi naʻe kau ki he Siasí ʻi he ʻIunaiteti Siteití, ʻo ngāue fakafaifekau ʻi Uēlesi. Naʻá ne kamata pulusi ha ngaahi tohi ʻa e Siasí mo tokoni ki hono fakamālohia ʻo e Siasí. Naʻe hoko e tohi himi faka-Uēlesí ʻi he 1846 ko e fuofua himi ʻa e Siasí ʻi ha lea mavahe mei he lea faka-Pilitāniá. Naʻe langa e ʻuluaki fale lotu ʻo e Siasí ʻi Uēlesí ʻi he 1849. ʻI he taimi ko iá, naʻe laka siʻi hake pē he toko 3,600 e kau papi ului ʻi Uēlesí.

Naʻe hikifonua e tokolahi ʻo e kau fuofua ului ʻi Uēlesí ki ʻIutā. Naʻe kau ai ʻa Sione Peili, ʻa ia naʻá ne fokotuʻu e kulupu hiva naʻe hoko ko e Kuaea ʻa e Tāpanekalé. Naʻe fokotuʻu e ʻuluaki siteiki ʻi Uēlesí, ʻa e siteiki Mefia Taifilí (Merthyr Tydfil), ʻi he 1975.

Ko e Siasí ʻi Uēlesi
Tokolahi ʻo e Kāingalotú	9,110
Ngaahi Siteikí	2
Ngaahi Uōtí mo e Ngaahi Koló	17