Toʻu Tupú

Ko e Vakai Hifo mei ha Potu Māʻolunga Ange

Fai ʻe Mindy Raye Holmes

ʻI heʻeku kei finemuí ne u maʻu ha ngaahi faingamālie lahi ke papitaiso ai maʻá e kakai pekiá ʻi he Temipale Seni Tieko Kalefōniá. Neongo ne u aʻusia maʻu pē ha ngaahi meʻa lelei, ka ʻoku ou manatuʻi lelei ha taimi ʻe taha ne u ʻalu ai.

Ne u taʻu 16, pea toki hoko e taʻu 12 hoku kiʻi tehiná pea ko e fuofua taimi ʻeni ke ne fakahoko e papitaiso maʻá e pekiá. Koeʻuhí ko ʻene fuofua ʻalú ʻeni, ne ma fakakaukau leva ke ma lue takai he tuʻa temipalé hili ʻemau papitaisó.

ʻI he tafaʻaki ʻe taha ʻo e ngoue ʻo e temipalé naʻe ʻi ai ha ngaahi feituʻu ke te tuʻu ai ʻo sio hifo ki lalo, peá ma lue atu ki ai. Koeʻuhí ʻoku tuʻu e Temipale Seni Tiekó ofi ki ha hala puleʻanga ʻoku femoʻuekina, ʻi hoʻo tuʻu ʻo sio hifo mei ha taha ʻo e ngaahi feituʻu ko ʻení, ʻokú ke sio fakahangatonu hifo pē ki he hala puleʻangá.

ʻI heʻeku tuʻu ʻi he potu māʻolunga ange ʻoku tuʻu ai e temipalé ʻi he ʻaho ko iá, ne u maʻu ai ha ʻilo foʻou kau ki he moʻuí. Ne u vakai hifo ki māmani mo hono ngaahi motokā lele omá, ngaahi falekoloa fonu he kakaí, mo e ngaahi fakaʻilonga hala kuo tohitohiʻí.

Ne haʻu leva he taimi ko iá ki hoku ʻatamaí ʻa e fakakaukaú ni: “ ʻOku ʻikai te ke fie hoko koe ko ha konga ʻo e meʻa ko iá: ʻoku ʻikai ko e taumuʻa ia ʻo e moʻuí.” Ne akonekina maʻu pē au ko e taumuʻa ʻo e moʻuí ke tau foki ʻo nofo mo ʻetau Tamai Hēvaní pea tau hoko ʻo tatau mo Ia. Ne u ʻilo naʻe ʻikai te u fie maʻu e ngaahi meʻa ʻo māmaní ke fakahoko ʻaki e taumuʻa ko iá.

Ne u tafoki hake ʻo vakai ki he temipale fakaʻofoʻofá, pea ne u fakamālō ʻi heʻeku ʻilo ki he ongoongoleleí mo e tūkufua naʻá ne ʻomi maʻakú. Ne u ʻiloʻi kuó u maʻu ha potu māʻolunga ange ke u tuʻu ai ʻi he lotolotonga ʻo e māmani moveuveu mo fakatuʻutāmakí ni.

Ne u palōmesi ki heʻeku Tamai Hēvaní ʻi he ʻaho ko iá te u tuʻu maʻu pē ʻi Hono tafaʻakí kae ʻikai ʻi he tafaʻaki ʻo e māmaní. Neongo pe ko e hā ha meʻa ʻe ʻomi ʻe he māmaní, te tau lava ʻo ikunaʻi ia ʻaki ʻetau tauhi e ngaahi fuakava kuo tau faí mo tuʻu ʻi he ngaahi potu toputapú (vakai, T&F 87:8).